Wednesday, December 17, 2008

ရင်ဝယ်မချိသော ဆုံးဖြတ်ချက်များစွာ


Wednesday, 17 December 2008 18:54 ကြည်ဝေ
အလင်းရောင် ကောင်းစွာ မ၀င်သော အစိုးရ သံမဏိ စက်ရုံတခု၏ အလုပ်သမား လိုင်းမှ အခန်းကျဉ်းလေး တခုထဲတွင် “အမေ ... နာတယ် နာတယ်” ဟုညည်းညူရင်း ချွေးစေးများ ထွက်နေသော အသက် ၂၅ နှစ်အရွယ် သမီးဖြစ်သူကို ကြည့်ရင်း ဘာလုပ်လို့ ဘာကိုင်ရမှန်း မသိအောင် သောက ဝေနေသည့် မိခင်ဖြစ်သူက ချွေးသုတ် ပေးကာ ယပ်တောင်ကိုသာ အတွင်ခပ်ပေးနေခဲ့သည်။

တဖြည်းဖြည်းနှင့် သမီးမျက်နှာမှာ သွေးဆုတ်စပြုလာပြီး အသံများ တိုးတိမ်သွားရာ အမေဖြစ်သူမှာ ထိတ်လန့် တုန်လှုပ်လာပြီး ဘေးပတ်ဝန်းကျင်က အခန်းများဆီသို့ အော်ဟစ်အကူအညီ တောင်းမိတော့သည်။

ဘေးပတ်ဝန်းကျင်က သိပြီဆိုသည်နှင့် ထိုအဖြစ်အပျက်ကို ဘယ်လို ဖြေရှင်းရမလဲ ဆိုတာကို ဒေါ်အေး တယောက် မတွေးဆရဲတော့။ သမီးဖြစ်သူက ဗိုက်ထဲမှ ၃လအရွယ် သန္ဓေသားကို အရပ်လက်သည် အမျိုးသမီး၏ အကူအညီနှင့် မနေ့ကပင် ဖျက်ချ ခဲ့သည် မဟုတ်လား။ မြန်မာနိုင်ငံတွင် တရားမ၀င် ကလေးဖျက်ချခြင်းမှာ ရာဇ၀တ်မှုတခု ကျူးလွန်ခြင်းပင်။

ကိုယ်ဝန်သုံးလကို လက်သည်နှင့် ဖျက်ချမည်ဟု သမီးပြောတုန်းက သူမအနေနှင့် မတားမိခဲ့ပါဟု ဒေါ်အေးက ပြောဆိုသည်။

“သူ့မှာက ကလေးကလည်း ၂ ယောက်တောင်ရှိတယ်၊ ပြီးတော့ အကြွေးတွေလည်း ရှိသေးတယ် ဆိုတော့ ကျမလည်း မလုပ်ကောင်းဘူးဆိုတာ သိပါတယ်၊ ဒါပေမယ့် မတတ်သာတဲ့အဆုံးမှာ ကျမလည်း .. မတားမိတော့ တာပါ” ဟု ပြောရင်း ငိုရှိုက်လေတော့သည်။

သူမ၏ သမီးမှာအဆိုပါ စက်ရုံမှ လစာနည်း ၀န်ထမ်းတဦးဖြစ်ပြီး ခင်ပွန်းသည်မှာလည်း သူမလိုပင် လစာနည်း အစိုးရ၀န်ထမ်းတဦး ဖြစ်သည့်အတွက် စားဝတ်နေရေးတွင် အခက် အခဲဖြစ်လျက်ရှိကြောင်း၊ ထိုကာလတွင် တတိယမြောက်ကိုယ်ဝန် ရလာသည့်အတွက် အရပ်ကြေးစား လက်သည်တဦးထံတွင် ကိုယ်ဝန်ဖျက်ချခဲ့ပြီး နှစ်ရက်မြောက်နေ့တွင် ဗဟိုအမျိုးသမီး ဆေးရုံသို့ ရောက်ရှိလာရခြင်းဖြစ်ကြောင်း သိရှိရသည်။

ဆေးရုံတွင် သွေးဆိပ်တက်နေသော ဝေဒနာနှင့် ဆေးဝါးကုသမှု ခံနေရသော အမျိုးသမီးမှာ စက်ရုံမှ အလုပ်ပြုတ်မည့်အပြင်၊ ကိုယ်ဝန်ဖျက်ချသည့်အတွက် ဥပဒေအရ တရားစွဲဆိုခြင်းခံရကာ ပြစ်ဒဏ် ၃ နှစ် ကျခံရမှာ ဖြစ်ကြောင်း သူက ပြောပြသည်။

မြန်မာနိုင်ငံတွင် အမျိုးသမီးအများစုမှာ သားဆက်ခြားနည်း များနှင့်ပတ်သက်ပြီး ဗဟုသုတနည်းပါးခြင်း၊ ငွေကြေး မပြည့်စုံခြင်းတို့ကြောင့် ကြိုတင် စီစဉ်ပြင်ဆင်ထားခြင်း မရှိသော ကိုယ်ဝန် ဆောင်ခြင်း၏ ဆိုးကျိုးကို ခံစားကြရသည်။

ဆေးရုံသို့ ကိုယ်ဝန်ဖျက်ချကာ ရောက်ရှိလာသော အမျိုးသမီးများ အများအပြား ရှိနေကြောင်း ရန်ကုန် အမျိုးသမီးရောဂါ အထူးကု ဆရာဝန်ကြီးတဦးက ပြောသည်

“အခု ဆေးရုံရောက်လာတဲ့ မိန်းမတွေမှာ ၁၀ ယောက်ရှိရင် ၇ ယောက်က ကိုယ်ဝန် ဖျက်ချ လိုက်လို့ ရောက်လာတာပဲ။ တနှစ်ထက်တနှစ်တိုးလာတယ် အဲဒီ လူနာအမျိုးအစားက လွန်ခဲ့တဲ့ ၂၀၀၄ ကနဲ့ စာရင် ၃ ဆရှိတယ်၊ လွန်ခဲ့တဲ့ ၁၀ နှစ်တုန်းကထက်စာရင် ၈ ဆ နီးပါး လောက် ရှိပါတယ်” ဟု သူက ဆိုသည်။

ဆက်လက်၍ သူက ကိုယ်ဝန်ဖျက်ချကျသော အမျိုးသမီးအများစုမှာ ဆင်းရဲနွမ်းပါးပြီး ကလေးအရေအတွက် များသူ အိမ်ထောင်သည် သားသည် အမေများ ဖြစ်ကြသည်ကို တွေ့မြင်ရသည်ဟု ဆိုသည်။

၎င်းတို့အနေနှင့် ထုံးတမ်းစဉ်လာအရ ကိုယ်ဝန်ဖျက်ချခြင်းသည် ဘာသာရေးအရ သူတပါး အသက်ကို သတ်ခြင်းဖြစ်ကြောင်း နားလည်ထားသည့်ပြင် ဥပဒေအရပါ ပြစ်ဒဏ်ခံရမည်ကို သိနေသော်လည်း နောက်ဆုံး ကြံရာမရသဖြင့် ဖျက်ချကြခြင်းဖြစ်သည်ဟု ဆရာဝန်ကြီးက ပြောဆိုသည်။

ကိုယ်ဝန်ဖျက်ချသော အမျိုးသမီးအများစုသည် အရပ်လက်သည် များနှင့် မိရိုးဖလာ ဆေးမြီးတိုများကို အသုံးချကြသည်။ အမျိုးသမီးတချို့မှာ ပြည်တွင်းဈေးကွက်တွင် ကိုယ်ဝန်ဖျက်ဆေးအဖြစ် နာမည်ကြီး လျက်ရှိသော ကေသီပန်၊ စိန်ကုလားသွေးဆေး၊ နှစ်ခွက်ဆေး စသည့် ပူစပ်သော သွေးဆေးပြင်းများကို အရက်နှင့်ရောသောက်ခြင်း၊ ချင်းနှင့် ထန်းလျက်ကို ရောကြိုသောက်ခြင်း၊ ငရုတ်ကောင်းနှင့်ရေနွေး ရောစပ်သောက်ခြင်း တို့ ပြုလုပ်ကြသည်ကို တွေ့ရသည်။

အရပ်လက်သည်အများစုမှာ ဆီးခုံရိုး နေရာကို နှိပ်နင်းခြင်း၊ ထုရိုက်စေခြင်း၊ ၀မ်းဗိုက်ပြင် အရေပြားမှတဆင့် သားအိမ်ကို ပြင်းထန်စွာ နှိပ်ခြင်း စသည့်နည်းများ သုံးကာဖျက်ချပေးကြပြီး သားအိမ်ထဲသို့ ဖဲထီးရိုးများ၊ တုတ်တံများ၊ စက်ဘီးစပုတ်တံများ၊ သစ်ကိုင်းများထည့်ခြင်းဖြင့် သားအိမ်ထဲမှ သန္ဓေသားကို ထိခိုက် ပျက်စီးအောင် လုပ်ခြင်း စသည့် နည်းလမ်းများကို အသုံးပြုလျက်ရှိသည်ကို တွေ့မြင်ရကြောင်း ဆရာဝန်များ၏ ပြောပြချက်အရ သိရှိရသည်။

ထိုနည်းများကို အသုံးပြုသူများသည် သားအိမ်ပေါက်ခြင်း၊ သားအိမ်ထဲတွင် သေဆုံးပြီး သန္ဓေသား၏ အပိုင်းအစများ ကျန်ရစ်ခဲ့ခြင်း၊ ရောဂါပိုးဝင်ရောက်ခြင်း၊ သွေးလွန်ခြင်း၊ သွေးဆိပ်တက်ခြင်း စသည့် ရောဂါများဖြစ်ပွားကြပြီး အသက်သေဆုံး သည်အထိ ဖြစ်လာကြသည်ကို တွေ့မြင်ရကြောင်း သိရှိရသည်။

“အဓိကကတော့ ဆင်းရဲကြပ်တည်းကြတာနဲ့ ၀င်ငွေနည်းပါးကြတာကြောင့်ပဲ။ နောက်တချက် က သားဆက် ခြားနည်းဆိုင်ရာ ဗဟုသုတပိုင်းမှာ အားနည်းတာ၊ လွတ်လပ်ပွင့်လင်းမှု မရှိတာနဲ့ အလုပ်အကိုင်ရရှိမှု ခက်ခဲ တာတွေက အခုခေတ်ရဲ့ ကိုယ်ဝန်ဖျက်ချရခြင်း အကြောင်းရင်း တွေပဲ" ဟု သားဖွားနှင့်မီးယပ် အထူးကု ဆရာဝန်ကြီးတဦးက ပြောဆိုသည်။

ကိုယ်ဝန်ဖျက်ချကြသော အမျိုးသမီးများမှာ အသက် ၂၅ နှစ်မှ ၄၀ ၀န်းကျင်အရွယ် အမျိုးသမီးများဖြစ်သည်ကို တွေ့ရသည်ဟု သူက ဆက်ပြောသည်။

ခုတင်တလုံးပေါ်တွင် ကွေးအိပ်ရင်းနာကျင်မှု ဝေဒနာကို အံကြိတ်ခံစားနေသော မမာလာက “ကျမမှာ သားလေး ၁ ယောက်ရှိတယ်။ အခု ဒီဖျက်ချလိုက်တဲ့ ကိုယ်ဝန်က ဒုတိယမြောက်ပါ။ ဒီကလေးကို မွေးလိုက်ရင် ကျမ အလုပ်ပြုတ်မှာ သေချာတယ်။ အဲဒါကြောင့် မဖျက်ချင်ဘဲ ဖျက်ချလိုက်တာပါ” ဟု ပြောပြသည်။

သူအလုပ်လုပ်သော ရေသန့်စက်ရုံက အလုပ်စ၀င်စဉ်ကတည်းက အိမ်ထောင်ရှိသည်ဟု ဆိုသောကြောင့် မီးဖွားခွင့်မရှိ၊ ကိုယ်ဝန်ရှိလျှင် အလုပ်ထွက်ရမည်ဟု ကြိုတင်ပြောဆို ထားသောကြောင့် ယခုကဲ့သို့ ကိုယ်ဝန်ကို ဖျက်ချလိုက်ရခြင်းဖြစ်သည်ဟု ဆိုသည်။

အိမ်ထောင်ရှိသော အမျိုးသမီးများအနေနှင့် အလုပ်အကိုင်အခွင့်အလမ်း နည်းပါးသည့်ပြင် ယနေ့ခေတ် အလုပ်ရှင်များက အိမ်ထောင်သည်အမျိုးသမီးများအား အလုပ်ခန့်ရာတွင် ကိုယ်ဝန် ဆောင်ပါက မွေးဖွားခွင့် ၄၅ ရက်နှင့် ထို ၄၅ ရက်အတွက် လစာ အပြည့် ပေးရမည် စိုးသောကြောင့် ကိုယ်ဝန်ဆောင်လျှင် အလုပ်ထွက် ရမည်ဟု ကြိုတင် သတိပေးထားလေ့ ရှိသည်။

သားဆက်ခြားနည်း အမျိုးမျိုး ရှိသည့်အနက် ဈေးအသက်သာဆုံး သားဆက်ခြားနည်း ဖြစ်သည့် ဆေးပြား စားသုံးခြင်း ဆိုသည်ပင် တကတ်လျှင် လက်လီဈေးကွက်၌ အနည်းဆုံး ငွေကျပ် ၇၀၀ ဈေးပေါက်လျက် ရှိသောကြောင့် ၀င်ငွေနည်းပါးသူများမှာ ရေရှည်မသုံးစွဲနိုင်ကြောင်း သိရသည်။ ထို့ပြင် ၎င်းဆေးကတ်မှာ အမျိုးသမီးတိုင်းနှင့် မတည့် သည့်အတွက် တချို့သာ သုံးစွဲနိုင်သည်။

တခြားသားဆက်ခြားနည်း တခုဖြစ်သော လစဉ် သားဆက်ခြားဆေး ထိုးမည် ဆိုပါကလည်း တလခံဆေး၊ နှစ်လခံဆေးနှင့် သုံးလခံဆေး ဟူ၍ရှိရာ ကုန်ကျစရိတ်အနေနှင့် ဆေးဖိုးနှင့်ထိုးခ အနည်းဆုံးကျပ် ၁၅၀၀ မှ ကျပ် ၃၀၀၀ ထိ ကုန်ကျသောကြောင့် ၀င်ငွေနည်း မိသားစုများမှ အမျိုးသမီးများ အသုံးပြုနိုင်မှု နည်းပါးသည်ကို တွေ့မြင်ရသည်။

ထို့ပြင် သားသမီးများသောကြောင့် သားကြောဖြတ်မည်ဆိုပါကလည်း အစိုးရက ကန့်သတ် ထားသော ဥပဒေများရှိသောနေရာ အသက် ၃၅ နှစ်အောက် အမျိုးသမီးများ သားကြော ဖြတ်ခွင့်မရဟု သိရသည်။

တခြားသားဆက်ခြားနည်းတခုဖြစ်သည့် ကွန်ဒုံးသုံးစွဲနည်းမှာလည်း ၀င်ငွေနည်း မိသားစုများ အတွက် အဆင်မပြေကြောင်း သိရှိရသည်။ ကွန်းဒုံးတခု၏ လက်ရှိပေါက်ဈေးမှာလည်း လက်လီ ဈေးကွက်တွင် ကျပ် ၂၀၀ နှင့်အထက် ရှိနေရာ တနေ့လုပ်အားခငွေ ကျပ် ၁၅၀၀ သာရသော အလုပ်သမားများအနေနှင့် ၀ယ်ယူ သုံးစွဲနိုင်သည့် အင်အားမရှိပေ။

ကိုယ်ဝန်ဖျက်ချပေးသည့် အရပ်လက်သည်များ၏ ဈေးနှုန်းမှာ ကျပ် ၅ ထောင်မှ ကျပ် ၂ သောင်းထိ ရှိသည်။ ကျန်းမာရေးမှူး သို့မဟုတ် သူနာပြုဆရာမ စသော ဆေးဝန်ထမ်း များထံတွင်ပြုလုပ်ပါက ပိုလုံခြုံမှုရှိပြီး ဈေးနှုန်းမှာလည်း အနည်းဆုံးကျပ် ၅ သောင်းမှ ၁ သိန်းထိ ပေးရသောကြောင့် ၀င်ငွေနည်းပါးသူများ မလုပ်နိုင်ကြောင်း သိရှိရသည်။

ကိုယ်ဝန်ဖျက်ချသူ အများစုမှာ ဈေးသက်သာသော အရပ်လက်သည်များထံတွင်သာ ဖျက်ချကြ သောကြောင့် ဆေးရုံရောက်ရခြင်း၊ အသက်သေဆုံးရခြင်းများ ရှိလာသည်။

မြန်မာနိုင်ငံတွင် ကိုယ်ဝန်ဖျက်ချခြင်းကို ရာဇ၀တ်မှု တခုအဖြစ် သတ်မှတ်ထားပြီး ကိုယ်ဝန် ဖျက်ချသူနှင့် ဖျက်ချပေးသူများကို ထောင် ဒဏ် ၃ နှစ်နှင့်အထက် သတ်မှတ်ကာ ထောင်ဒဏ် ရော ငွေဒဏ်ပါ နှစ်မျိုးစလုံး အပြစ်ပေးလျက်ရှိကြောင်း သိရှိရသည်။

NLDရုံးချူပ်လူငယ်ပညာပေးဟောပြောပွဲ

အကျယ်ကြည့်ရန်အစွန်ဆုံးမှလေးထောင့်ကွက်ကိုနှိပ်ပါ။ ။ပြီးရင်အပေါင်းကိုနှိပ်ပါ။ ။nld


17122008သတင်းနှင့်ဆောင်းပါး

file download hereပြည်တွင်းမှအီးမေးလ်များသို့တဆင့်ပို့ပေးခြင်းဖြင့်သတင်းအမှောင်ကျနေသောပြည်သူများကိုကူညီကြပါ။
အကျယ်ကြည့်ရန်အစွန်ဆုံးမှလေးထောင့်ကွက်ကိုနှိပ်ပါ။ ။ပြီးရင်အပေါင်းကိုနှိပ်ပါ။ ။17122008 Wednesday


အပြုံးနှုတ်သိမ်းခံထားရသော မိုနာလီဇာ ပန်းချီကား


ခရီးသွားဆောင်းပါး
ရွှေအိမ်စည်
ဗုဒ္ဓဟူးနေ့၊ ဒီဇင်ဘာလ 17 2008 15:20 - မြန်မာစံတော်ချိန်
Photobucket
(က)
ဒီဇင်ဘာ (၁၅)ရက်….

၁၉၉၄ ခုနှစ်။

နေ၀န်းနီနီသည် ရဟန်းပျိုသမဂ္ဂ ကုန်းတော်ပေါ်မှနေ၍ ခေါင်းပြူ၍ ကြည့်၏။ မယ်တုကွီချောင်းငယ်ကို တွေ့မည်။ သောင်းရင်းကို မြင်မည်။ သံလွင်ကို တွေ့မည်။ ပြီးလျှင် ….. သောင်းရင်းနှင့် သံလွင်တို့ ပေါင်းဆုံရာ မြစ်ဆုံ …… သုမွဲထကို တွေ့မည်။ နီရွှမ်းသော ပတ္တမြားသွေးရည်တို့၏ အောက်၌ ….. မယ်တုကွီသည်၊ သောင်းရင်းသည်၊ သံလွင်သည်၊ သုမွဲထသည် ရဲရဲနီနေပေလိမ့်မည်။ မြူနှင်းဖြူတို့က အနီရောင် အသွေးအောက်၌ အရောင်တမျိုးမှ တမျိုး ….. အမျိုးမျိုး ပြောင်းနေတော့သည်။ သောင်းရင်းနှင့် သံလွင်ကား အငွေ့ပျံနေသော ရေငွေ့တို့နှင့် နွေးထွေးနေဆဲ……။

`နော်တ` တောင်တန်းကြီးသည် မြူပင်လယ်အတွင်း မြုပ်နေသည်။ အုပ်စုဖွဲ့ ရွေ့လျားနေသော မြူနှင်းဖွဲ့တို့က အိပ်တန်းပြန် နောက်ကျသည့် ငှက်ငယ်များသဖွယ် … ခိုနားရာ ရှာမတွေ့ ဖြစ်နေကြသည်။

နေလာ နှင်းပျောက်…..။

တညလုံး သော့ရမ်းခဲ့သော မြောက်လေသည် နံနက်ဦးတွင် ငြိမ်ချက်သားကောင်းနေ၏ ကျွန်းရွက် ဖားဖားကားကားကြီးများက နှင်းရည်ဝပြီး ရွှဲအိနေသည်။ နှင်းသီးတို့ကား ၀ါးရွက်ချွန်မြမြတို့၌ ခိုသီ၍ ရီးလေးခိုနေကြ၏။

ရွက်ဖျားနှင်း……။

`မယ်တုကွီ`ချောင်းဖျားဘက်ဆီမှ ဂျီဟောက်သံကို ကြားရ၏။ သဲ့သဲ့…..။ ဒေါ်အောင်ဆန်းစုကြည်လမ်းထိပ်ဆီမှ ဖြတ်မောင်းသွားသော ကားသံကို ကြားရ၏။ သောင်းရင်းအတွင်း စက်လှေသံသည် တိတ်နေသည်။ ယခင် နံနက်ခင်းများတွင်မူ သောင်းရင်းသည် စုန်ဆန်သန်းနေကြသည့် စက်လှေသံတို့နှင့် သက်ဝင်၍ နေပြီ…..။

အလံတိုင်ရှေ့တွင် ရဲဘော်တဦး နံနက်ခင်းအလံတော်အား တင်နေ၏။ ကြယ်ဖြူကြီးနှင့် ခွပ်ဒေါင်းအလံတော်သည် တရွေ့ရွေ့နှင့် တိုင်ဖျားဆီသို့…..။ မြောက်လေသွေးသဖြင့် အလံတိုင်ထိပ်ဖျားမှ ဒေါင်းအလံနီသည် ၀ဲ၊ ယာ လှုပ်ယမ်းနေသည်။ ဒေါင်းအလံအောက်မှ ဒေါ်အောင်ဆန်းစုကြည်လမ်းသွယ်က နံနက်ဦး၌ ငြိမ်ငြိမ်သက်သက် ……။ ယခင်ကမူ ….. လူ့ဘောင်သစ် ဒီမိုကရက်တစ်ပါတီမှ ရဲဘော်အချို့ ဤလမ်းသွယ်မှ ဖြတ်လျှောက်၍ `ထူးရာစိုး`ကော်ဖီဆိုင်လေးသို့ သွားကြမည်။ ဆရာတော် အရှင်ခေမာစာရသည် ကျောင်းတော်ဝင်းမှထွက်၍… လမ်းသွယ်အတိုင်းလျှောက်ခါ DAB ကုန်းဆီသို့ ကြွချီမည်။ ယခုမူ …. ဒေါ်အောင်ဆန်းစုကြည်လမ်းသွယ်က နံနက်ဦး၌ သက်ငြိမ်……။

လင်းအားကြီးအချိန်မှစ၍ ပစ်ခတ်နေခဲ့သော လက်နက်ကြီးသံသည် ကျဲ၍….ကျဲ၍ လာသည်။ `သုမွဲထ`သည် `လောကွားလူ`၏ ပစ်ခတ်မှုအောက်၌ ၀ပ်စင်း၍ သွားပြီလား…..။ လက်နက်ငယ်သံ မကြားရ၍ သုမွဲထသည် ပုန်ကန်သူတို့၏ လက်တွင်ပဲလား…..။ `လား`…..ပေါင်းများစွာနှင့် အတွေးတို့ကား အဆုံးမသတ်…..။


(ခ)
သတင်းများဝင်လာ၏။

သုမွဲထမှ ပုန်ကန်သူတို့ ဆုတ်သွားကြပြီ။ အချို့က …. မြိုင်ကြီးငူသို့ ဆုတ်ကြ၏။ အချို့က ….. `မဲညောခီး` တောင်တန်းများဆီသို့ …..။ ပုန်ကန်သူတို့က အရှင်သံဝရ ကိုယ်တော်အား မြိုင်ကြီးငူသို့ ဖမ်းသွားပြီ။ ဘာလို့ဖမ်းတာလဲ….။

အရှင်သံဝရက KNU မှ မဟုတ်……။ ရှစ်လေးလုံးအရေးတော်ပုံတွင် တတ်တတ်ကြွကြွ ပါဝင်ခဲ့သည့် ကိုယ်တော် …..။ မွန်ပြည်နယ်၊ ဘီးလင်းက ဖြစ်သည်။ သူ့ကျောင်းတွင် သပိတ်စခန်း ဖွင့်၏။ စစ်တပ်က အာဏာသိမ်းပြီး သပိတ်စခန်းအား ၀င်သိမ်းသည့်အခါ၌ ကိုယ်တော်သည်လည်း သပိတ်မှောက် ကျောင်းသားတို့နှင့်အတူ တောခိုခဲ့၏။ မဲလထသို့ ရောက်သည်။ လူဝတ်လဲပြီး ABSDF သို့လည်း မ၀င်။ သံဃာတပါးအနေနှင့် ရဟန်းပျိုများ သမဂ္ဂတွင်လည်း ပါဝင်မှုမရှိ ….။ `သေ့လောထ` တွင် ကျောင်းသင်္ခန်းဆောက်၍ သတင်းသုံး၏။ ရဲဘော်၊ ရဲဘက်ကျောင်းသားတို့၏ သာရေး၊ နာရေး ….. သာသနာ့အရေးတို့ ဆောင်ရွက်ရင်း သီတင်းသုံးသည့် ကိုယ်တော်…..။ ABSDF က ကိုယ်တော်၏ ပစ္စည်းလေးပါး ဒကာများ…..။ နိုင်ငံရေး အရောင်အသွေးမရှိ။ အဖွဲ့အစည်းစွဲမရှိ။ ဤသို့သော ….. ကိုယ်တော်အား ဦးသုဇနသည် ဘာအတွက် ဖမ်းရသနည်း…..။

အခြေအနေက ….. အရာရာအား ကြောင်းကျိုးဆက်စပ် စဉ်းစားအဖြေထုတ်၍ မရနိုင်သော အခြေအနေ…..။

ဖြစ်နိုင်သည်များလည်း ….. မဖြစ်နိုင်။ မဖြစ်နိုင်သည်များလည်း ဖြစ်နေသည့်အချိန်ကာလ……။

သုမွဲထမြစ်ဆုံအား KNU မှ ပြန်၍ ထိန်းချုပ်နိုင်လိုက်ပြီ။ ရေလမ်းခရီး ပြန်ပွင့်ပြီ။ သံလွင်အတိုင်း ဆန်တက်၍ရပြီ။ ကျနော်တို့အဖွဲ့၏ အလယ်ပိုင်းတိုင်း ခမောက်တောင် စခန်းက သုမွဲထ၏အထက် သံလွင်ကမ်းနံဘေးတွင် ရှိသည်။ ABSDF `ဒေါင်းဂွင်` ဗဟိုနှင့်ကပ်လျက်…..။ `သုမွဲထ` အား ပုန်ကန်သူတို့ ထိန်းသိမ်းထားစဉ်အခါက `ခမောက်တောင်` နှင့် အဆက်အသွယ် ပြတ်နေခဲ့ရသည်။

`ဒေါင်းဂွင်` အခြေအနေကရော ဘယ်လိုလဲ….။ သုမွဲထနှင့်နီးသည့် ABSDF တပ်ရင်းအချို့က …. ထိုင်းဘက်ကမ်းရှိ မဲပေါ်မူထသို့ ရွှေ့ပြောင်းထားခဲ့ကြရသည်။


(ဂ)
ရေဒီယိုကြားဖြတ်သတင်းများအရ ….. နအဖ တပ်များ၏ လှုပ်ရှားမှုကို သိရသည်။ ကမမောင်းရှိ နည်းဗျူဟာမှူး ဗိုလ်မှူးကြီး သန်းအောင်အား ပြန်ခေါ်ပြီး တပ်မ (၃၃) ဒုတပ်မမှူးကိုယ်တိုင် ကမမောင်းတွင် လာထိုင်၏။ တပ်မ (၃၃) ၏ ဒုတပ်မမှူးက ဗိုလ်မှူးကြီး သီဟသူရတင်အောင်မြင့်ဦး။ ကမမောင်းနှင့် မြိုင်ကြီးငူက သံလွင်၏ ဟိုဘက်ကမ်း …. ဒီဘက်ကမ်း ….။ နီးသည်။ ကမမောင်းတွင် တာဝန်ကျသည့် နအဖ ဗျူဟာမှူးတိုင်းသည်လည်း မြိုင်ကြီးငူမှ ဦးသုဇနနှင့် အနေနီးကြသည်သာ…..။

တပ်မ (၂၂) မှ တပ်ရင်းနှစ်ရင်းနှင့် နည်းဗျူဟာတခု လေးကေ၊ ဖာပွန်လမ်းပိုင်းသို့ ထပ်ဝင်လာပြီး ကျသောင်းဆိပ်တွင် ထိုင်၏။ ဗျူဟာမှူးက ဗိုလ်မှူးကြီး စိန်ဝင်းအောင် …..။ ယခင်ကတည်းက `၀င်းတပ`တွင် ဗိုလ်မှူးကြီးလွန်းမောင်၏ နည်းဗျူဟာတခုရှိပြီး လေးကေတွင်မူ ဗိုလ်မှူးကြီး သောင်းဝေ၏ ဗျူဟာတခုနှင့် ပေါင်းလိုက်ပါက ထိုလမ်းပိုင်းတွင် နည်းဗျူဟာ ၃ ခု ရှိနေ၏။ ဤလမ်းပိုင်းက မာနယ်ပလောသို့ စစ်ချီရာ လမ်းပိုင်း…..။


(ဃ)
ဒီဇင်ဘာ ၂၁ ရက်…..

၁၉၉၄ ခုနှစ်။

သုမွဲထမှ ဆုတ်ခွာလာကြသည့် ပုန်ကန်သူတို့ မြိုင်ကြီးငူတွင် စုဝေးကြ၏။ KNLA ရင်း ၂၀၊ ရင်း ၁၀၄ နှင့် တပ်မဟာ (၁) မှ ပုန်ကန်သူအချို့…..။ ဦးသုဇန၏ ကျောင်းတွင်ပင် ဆွေးနွေးကြပြီး ….. တိုးတက်သော ဗုဒ္ဒဘာသာ ကရင်အမျိုးသားများ အစည်းအရုံးကို ဖွဲ့စည်းလိုက်ကြ၏။ အင်္ဂလိပ်လိုက ….. Democratic Kayin Buddhist Association ဟူ၍ ဖြစ်သည်။ နယကကြီးက ဦးသုဇနပင် ….။

ဥက္ကဋ္ဌက KNU သထုံခရိုင်မှ မြို့နယ်ဥက္ကဋ္ဌတဦး ဖြစ်ခဲ့သည့် ဖဒိုသာထူးကျော်…..။ DKBA လက်နက်ကိုင် တပ်ဖွဲ့များ၏ စစ်ဦးစီးချုပ်အဖြစ် ဗိုလ်မှူး ရွာဟေ့ကို ခန့်အပ်ခဲ့ကြ၏။ ဗိုလ်မှူး ရွာဟေ့က တပ်မဟာ (၁) မှ KNDO တပ်ရင်းမှူး …..။

ဗိုလ်မှူးရွာဟေ့လို လူမျိုးက ……. လေဘယ်ဘက်က တိုက်နေသည်ကို သိပြီး ကိုယ်ကျိုးစီးပွား ရှာတတ်သည့် သူမျိုးတော့မဟုတ်…..။ ငါ့ရွာ၊ ငါ့ဆွေမျိုး၊ ငါ့လူမျိုးတွေအပေါ် ဗမာစစ်သားများက မတရားပြုလုပ်ကြသည်။ ဤသူတို့အား တော်လှန်ရမည်။ ပြန်တိုက်ရမည်။ ဤအသိမျှနှင့်ပင် ကရင့်တော်လှန်ရေးအတွင်းသို့ ရောက်ခဲ့သည့်သူ…..။

တော်လှန်ရေးအတွင်း၌လည်း တော်လှန်ရေးကို အလုပ်အကိုင်တခုပမာ ….၊ တာဝန်တရပ်ပမာ …. လုပ်ကိုင်နေခဲ့ခြင်းနှင့် နှစ်ပေါင်း ၄၀ ကြာခဲ့ခြင်းဖြစ်သည်။ ဤသို့နှင့် KNDO တပ်ရင်းမှူးဖြစ်လာခဲ့ခြင်းသာ…..။ နိုင်ငံရေးမသိ…..။ အတန်းပညာမရှိ….။ ကရင့်အမျိုးသားရေးဝါဒ ဟူသည်ကိုပင် လေ၀မ်းကွဲအောင် သိသူမဟုတ် …..။ မျက်ကန်းလက်နက်ကိုင် တော်လှန်ရေးသမားတဦးမျှသာ …..။ ထိုထက်မပို …..။ သူကား …… ဗေဒင်နက္ခကိုလည်း ယုံသည်။ ယုံကြည်မှုက ဗုဒ္ဓ၏ တရားဒေသနာကဲ့သို့ ယုံကြည်ခြင်းမျိုး…..။ စစ်ကြောင်းထွက်လျှင် …… သူတတ်ထားသည့် ဗေဒင်နက္ခနည်းနှင့် တွက်ချက်၏။ ပြီးလျှင် …… နဂါးခေါင်း ဘယ်အရပ်သို့ လှည့်သဖြင့် ဘယ်အရပ်သို့ထွက် ….။ ဤသို့ စစ်ကြောင်းကို ချီစေ၏။ အရှေ့အရပ်မှလာသော ရန်သူအားတိုက်လျှင် ….. မြစ်ချောင်းအနားမှ စောင့်၍မတိုက်ရ…။ ဤသို့စစ်တိုက်သော တပ်မှူး…..။ သူ့တွင်… အဆောင်လက်ဖွဲ့များက လွယ်အိတ်နှင့်တလုံးရှိသည်။ လက်တွင်လည်း အဆောင်လက်စွပ်များ ၀တ်ထားသည်မှာ လက်ချောင်းတိုင်း၌……။ ချိုးမတေ…..၊ မိုးကြိုးသွား….၊ ၀က်စွယ်ပိတ်…..အားလုံး သူ့တွင် ရှိသည်။

ဤသို့သော လူမျိုးကို ….. ဦးသုဇနအနေနှင့် သူ့အပေါ် ယုံကြည်မှု တည်ဆောက်ရသည်မှာ မခက်ခဲ……။ စည်းရုံးရလွယ်သည်။


(င)
နအဖ သည် ၁၉၉၄ ပွင့်လင်းရာသီတွင် မာနယ်ပလောအား ထိုးစစ်ဆင်ရန် အစီအစဉ်မရှိ…..။ ဖာပွန် ရိက္ခာပို့ရေးအတွက်သာ ပြင်ဆင်လုပ်ဆောင်နေခဲ့၏။ ၉၁ ခုနှစ် ….. သံလျက် စစ်ဆင်ရေးနှင့် တပ်လှန်ခဲ့ပြီးနောက် မာနယ်ပလောကို တိုက်ရန် ရွံ့နေပုံရသည်။

အမျိုးသားညီလာခံ ခေါ်ယူပြီး ပြည်တွင်းနိုင်ငံရေး မျက်နှာစာတွင်သာ ဖိ၍ လုပ်နေခဲ့ကြသည်။

သုမွဲထမှ ဆုတ်ခွာခဲ့ကြပြီး မြိုင်ကြီးငူသို့ရောက်သည်နှင့် ဦးသုဇနသည် ကမမောင်းသို့ကူးပြီး ဒုတပ်မမှူး ဗိုလ်မှူးကြီး သီဟသူရတင်အောင်မြင့်ဦးနှင့် သွားတွေ့မည်။ တွေ့ပြီးနောက် ….. DKBA ဖြစ်လာမည်။ ဤတွင် ….. နအဖ သည် မာနယ်ပလောထိုးစစ်အား ဆင်နွှဲရန် အပူတပြင်း စီစဉ်တော့သည်။

ပြည်တပ်မ (၆၆) အား တပ်မတခုလုံး ခွေးအိပ်တောင်ခြေသို့ပို့၏။ ခွေးအိပ်တောင်ခြေရှိ `သာလွန်`တွင် တပ်မတခုလုံး အခြေပြုသည်။ တပ်မမှူးက ဗိုလ်ချုပ်ညွှန့်တင်……။ ထိုစဉ်က ရွှေမန်းသည် ….. တပ်မ (၆၆) တွင် ဗျူဟာမှူး ဗိုလ်မှူးကြီး သူရရွှေမန်း……။ သူရရွှေမန်းက သံလွင်ကို ကူးပြီး ဆင်ဖြူတောင်မှတဆင့် မာနယ်ပလောသို့ ၀င်သည်။ ခွေးအိပ်တောင်ထိပ်တွင် အရှေ့တောင်တိုင်း စစ်ဌာနချုပ်တိုင်းမှူးနှင့် က.က.သံ ညွှန်ကြားရေးမှူးတို့က အခြေပြုပြီး ထိုးစစ်ကို ကွပ်ကဲ၏။

`နောတ`စစ်မျက်နှာသို့… စစ်ကိုင်းတပ်မ (၃၃) တခုလုံးဝင်၏။

`မဲညောခီး`ကျသည်။ `ဆင်ဖြူတောင်`ကျသည်။ `နောတ`ကျသည်။ `ထီးသခီး`ကျသည် ……။ …….။ ……..။ …….။


(စ)
မာနယ်ပလောသည် ခရစ်စမတ်အား တိတ်ဆိတ်ငြိမ်သက်စွာနှင့် ကုန်လွန်ခဲ့၏။ ဓမ္မတေးသံတို့နှင့် မဝေစည်……။ Happy New Year က …… အပြုံးနှုတ်သိမ်းခြင်းခံထားရသော မိုနာလီဇာ ပန်းချီကားတချပ်ပမာ…….။

---------

ရွှေအိမ်စည်