Monday, June 1, 2009

ပြည်ပက စီးပွားရေးသပိတ်၊ ပြည်တွင်းက စားသုံးသူသပိတ်

မောင်ရစ်
မေ ၃၁၊ ၂၀၀၉
သပိတ်မှောက်တဲ့ ယဉ်ကျေးမှု

ပြည်ပက (အနောက်အုပ်စု) နအဖကို စီးပွားရေးသပိတ်၊ ငွေကြေးကူးသန်းမှုဆိုင်ရာ သပိတ်မှောက်ထားတယ်။ ဒါကို မည်သူတွေက ဘယ်လိုပြောပြော သက်တမ်းအထပ်ထပ်တိုးပြီးတော့ စီးပွားရေးသပိတ်ကို မှောက်နေဆဲပဲ။ နအဖနဲ့ စီးပွားဖက် အရှေ့အုပ်စုက ဘယ်လို အကျိုးစီးပွားတွေ ဖြစ်နေစေကာမူ ဒီလိုစစ်အုပ်စုပြုမူပုံမျိုးနဲ့ကတော့ အနောက်အုပ်စုအနေနဲ့ သပိတ်လှန်ဖို့အရေး ဝေးသည်ထက် ဝေးပါပဲ။
ပြည်တွင်းက ပြည်သူတွေ၊ စားသုံးသူတွေကိုယ်တိုင်ကကော စစ်အုပ်စုနဲ့ အပေါင်းအပါတွေကို စီးပွားရေးသပိတ်၊ စားသုံးသူသပိတ်မမှောက်နိုင်ဘူးလား။
ခုချိန်အထိ သံဃာတော်တွေက စစ်အုပ်စုကို သပိတ်မှောက်ထားပြီးသား။ မစိုးရိမ်ဆရာတော်ကြီးကိုယ်တိုင်ကလည်း စစ်အုပ်စုက အတင်းအကြပ် ဆက်ကပ်လှူဒါန်းလာခဲ့ရင် အလိမ္မာသုံးပြီး လက်ခံပါ၊ ပြီးတော့လည်း သပိတ်မှောက်ကံဆောင်တာကို ဆက်လက် ကျင့်ကြံပါလို့ မိန့်တော်မူပြီး ဖြစ်ပါတယ်။
ဘယ်လိုပဲ ဘုရား၊ တရား၊ သံဃာတွေကို ဖက်စေကာမူ မသန့်ရှင်းတဲ့အလုပ်တွေနဲ့ အကုသိုလ်ကံတွေ ဖိစီးနေတဲ့ စစ်အုပ်စုနဲ့ အပေါင်းအပါတွေအတွက်ကတော့ မည်သို့ လှူဒါန်း ပေးကမ်း ကျင့်ကြံနေစေကာမူ ဘာသာ၊ သာသနာရဲ့ အကာအကွယ် စောင့်ရှောက်မှုကတော့ ဆုတ်ယုတ် ခန်းခြောက်နေတာ အထင်အရှားပါပဲ။
ဓနုတ်စေတီကြီး ပြိုကျသွားတာကို ကြည့်ပြီး လူအများက တရားသံဝေဂ ရကြသလို၊ ဘုရားတည် ထီးတော်တင် လုပ်ခဲ့ကြတဲ့ စစ်အုပ်စုအနေနဲ့ကလည်း အယူသည်းမှုတွေ တပုံတပင်နဲ့ သောကဗျာပါဒ များကြရမှာ မလွဲပါဘူး။ အကြောက်တရားနဲ့ အုပ်ချုပ်တဲ့ စစ်အုပ်စုအတွက် အကြောက်တရားလက်နက်ကိုပဲ ပြည်သူတွေက ပြန်သုံးစွဲကြရတော့မှာပါပဲ။
ယခင်က စစ်အုပ်စုကို သပိတ်တိုက်ပွဲတွေနဲ့ ဖြုတ်ချခဲ့တာ ဖြစ်ပါတယ်။ လမ်းပေါ်က အာဏာဖီဆန်တဲ့ ဆန္ဒပြတဲ့ သပိတ်မှောက်တိုက်ပွဲတွေ၊ အစာငတ်ခံဆန္ဒပြတဲ့ သပိတ်တိုက်ပွဲတွေဟာ စစ်အုပ်စုကို ထိခိုက်စေခဲ့၊ ကြောက်ရွံ့တုန်လှုပ်စေခဲ့တဲ့အတွက် ၁၉၈၈ မှာတုံးက အနှစ် ၂၀ ကျော်အကြာ အုပ်ချုပ်ခဲ့တဲ့ တပါတီအာဏာရှင်စနစ်ကို ဖြုတ်ချနိုင်ခဲ့တယ်။ အစိုးရ၀န်ထမ်းတွေရဲ့ သပိတ်နဲ့ အစိုးရယန္တယားကြီး ဘုန်းဘုန်းလဲ ပြိုကျခဲ့ရတယ်။
ခုချိန်မှာတော့ဖြင့် ထိပ်တိုက်ရင်ဆိုင်တဲ့ သပိတ်မှောက်တိုက်ပွဲတွေအပြင် စစ်အုပ်စုကို ကြိမ်မီးအုံးသလို မကျေမနပ်ဖြစ်နေတဲ့၊ မခံမရပ်နိုင်ဖြစ်နေတဲ့ ပြည်သူလူထုအားလုံး တခဲနက် အဆင့်ဆင့် ပညာသားပါပါ အထိအခိုက်အနဲပါးဆုံးနဲ့ စစ်အုပ်စု အကြောက်ရွံဆုံး လျို့ဝှက်သပိတ်မှောက်နည်းတွေကို တိုက်တွန်းချင်တာပါပဲ။

အတိတ်က သပိတ်ခြေရာများ

ယခင်က စစ်အုပ်စုရဲ့ သတင်းစာတွေ၊ ရုပ်မြင်သံကြားတွေ၊ ပျော်ပွဲရွှင်ပွဲတွေကို အားမပေးဖို့ သပိတ်မှောက်ဖို့ အတိုက်အခံများက တိုက်တွန်းဖူးပါတယ်။ ယခုအချိန်အထိ ဒီသပိတ်ကို ကိုင်စွဲထားဆဲ ဒီမိုကရေစီအင်အားစုတွေ အရေအတွက်အားဖြင့် မများသည့်တိုင် ရှိနေဆဲဖြစ်ပါတယ်။
စစ်အုပ်စုရဲ့ မဟာမိတ် တေဇနဲ့ အပေါင်းအပါတွေဟာ ၂၀၀၇ သံဃာအရေးအခင်းအပြီးမှာ ပြည်သူလူထုရဲ့ ဒေါသမီးသင့်ခဲ့ရပြီးနောက် လေကြောင်းလုပ်ငန်းကြီးတခုလုံး ရေစုံမျောမတတ် ဖြစ်ခဲ့ရတဲ့ မှတ်တမ်းလည်း ရှိခဲ့ပါတယ်။
စစ်အုပ်စုအလိုကျ ဆိုကြ၊ ကကြ၊ သရုပ်ဆောင်ကြတဲ့ စာနယ်ဇင်းသမားတွေ၊ သရုပ်ဆောင်တွေ၊ အနုပညာရှင်တွေသည်လည်း ပြည်သူရဲ့ ပညာသားပါတဲ့ သပိတ်မှောက်မှုကြောင့် ပြည်သူချစ်သော အနုပညာရှင်တွေ ဖြစ်မလာတော့ဘဲ၊ စစ်အုပ်စုနဲ့ အပေါင်းအပါ မဟာမိတ်များရဲ့ ပေးကမ်းစာ၊ အခွင့်အရေးများနဲ့သာ နေထိုင်ရှင်သန်ရသူတွေ သက်သက်သာ ဖြစ်ကြရတဲ့ ဥပမာတွေ ရှိပါတယ်။

ပြည်တွင်းက လက်ဆင့်ကမ်းသပိတ်

စစ်အုပ်စုနဲ့ မဟာမိတ်တွေဟာ မြန်မာပြည်တခုလုံးရဲ့ စီးပွားရေး အသက်သွေးကြောတွေအားလုံးရဲ့ အချက်အခြာတွေကို သိမ်းပိုက်ပြီး အဲဒီ အကျိုးအမြတ်ပုံကြီးပေါ်မှာ စံစားနေတာ ဖြစ်ပါတယ်။ ပြည်သူတွေအနေနဲ့ ဒီစစ်အုပ်စုကို ထိခိုက်နစ်နာစေချင်ရင် စစ်အုပ်စုထိပ်သီးတွေရဲ့ စီးပွားရေးလုပ်ငန်းတွေ၊ ကွန်ယက်တွေကို စီးပွားရေးသပိတ်၊ စားသုံးသူသပိတ် မှောက်ကြရလိမ့်မယ်လို့ ထင်မြင်ချက် ပေးလိုပါတယ်။
ဥပမာ - စီးတီးမတ်ဟာ စစ်အုပ်စုရဲ့ လုပ်ငန်းတခုဖြစ်တယ်။ အတတ်နိုင်ဆုံး စီးတီးမတ်မှာ ၀ယ်ယူအားပေးတာကို လျော့ချဖို့ တိုက်တွန်းစည်းရုံးလို့ ရမယ် ထင်ပါတယ်။ တရုတ်ဟာ စစ်အုပ်စု မဟာမိတ်ဖြစ်နေလို့ တရုတ်လုပ်ပစ္စည်းတွေကို သပိတ်မှောက်မယ် ဆိုတာထက် တရုတ်လုပ်ပစ္စည်းတွေ ရောင်းပြီး စီးပွားဖြစ်နေတဲ့ လုပ်ငန်းတွေထဲက စစ်အုပ်စုထိပ်သီးရဲ့ လုပ်ငန်းတွေကို ပစ်မှတ်ထားပြီး သပိတ်မှောက်နေကြဖို့ပါပဲ။
အဲဒီအတွက်လည်း အဖွဲ့အစည်းတွေ၊ တသီးပုဂ္ဂလတွေက တာဝန်ခံပြီး နှိုးဆော်နေကြရတာထက် တဦးနှင့်တဦး လက်ဆင့်ကမ်း အသိပေးပြီး တိုက်တွန်းနှိုးဆော်လို့ရရင် ပိုပြီး အန္တရာယ်ကင်း ထိရောက်မယ်လို့ ထင်မြင်မိပါတယ်။ နောက်ပြီးတော့လည်း စားသုံးသူသပိတ်မှာ သိပ်ပြီး အတွေးခေါင်ချင်စရာ၊ အငြင်းပွားချင်စရာတွေကို နားလည်မှု အပြည့်ထားပြီး ရှောင်ရှားလို့ ရမယ် ထင်ပါတယ်။
ဥပမာ - တရုတ်ရေဒီယိုကို စီးတီးမတ်မှာမှ ရလို့ ၀ယ်ရတယ်ဆိုလည်း ၀ယ်လိုက်ပါ။ ၀ယ်ပြီးရင် သပိတ်မှောက်သူတွေက ပြည်ပက ရေဒီယိုတွေ နားထောင်ဖို့ အသုံးချမယ်ဆိုတဲ့ ရည်ရွယ်ချက်နဲ့ပဲ။ ဘာမှ လျောက်ငြင်းနေစရာ မလိုဘူး ထင်ပါတယ်။ အင်တာနက်ဆိုတာ စစ်အုပ်စုလက်ထဲမှာ ရှိတော့ သပိတ်မှောက်နေစရာမလိုပါဘူး။ အင်တာနက်သုံးပြီး သတင်းတွေ အမှန်တရားတွေ စုတုပြုရမှာ၊ လေ့လာဖတ်ရှုရမှာ ဖြစ်ပါတယ်။ စစ်အုပ်စုက ဖွင့်ထားတဲ့ ဆိုင်တွေကို သပိတ်မှောက်နိုင်ရင် ဖြစ်ပါတယ်။

သပိတ်မှောက် ပြည်သူ

မြန်မာပြည်မှာ အမီအခိုကင်းကင်းနဲ့ စီးပွားရေးလုပ်ငန်းတွေ လုပ်နေကြသူတွေ အများအပြားရှိနေဆဲပါပဲ။ သူတို့ကို သတ်သတ်မှတ်မှတ်ထားပြီး အားပေးရင် ပြည်သူတွေဖက်က နစ်နာစရာ မရှိဘူးလို့ မျှော်လင့်ပါတယ်။ အတိုက်အခံတွေ၊ နိုင်ငံရေးအကျဉ်းသားတွေရဲ့ လုပ်ငန်းတွေ၊ အလုပ်တွေကိုတော့ စစ်အုပ်စုက ရည်ရွယ်ချက်ရှိရှိနဲ့ ပိတ်ပင်တာ၊ တားမြစ်တာ၊ ဖျက်ဆီးတာတွေ လုပ်ပါတယ်။ စားသုံးသူအချို့ကိုလည်း ခြိမ်းခြောက်ပြီးတော့ အတိုက်အခံတွေရဲ့ လုပ်ငန်းတွေကို အားမပေးဖို့ စစ်အုပ်စုက အမြဲတမ်း လုပ်ပါတယ်။ ပြည်သူတွေဖက်ကလည်း ဒါကို အလိမ္မာသုံးပြီး ဆန့်ကျင်ဖို့ ဘာလို့ မ၀ံ့ရဲရမှာလဲ။
ပြည်ပက ဒီမိုကရေစီသမားများကလည်း အဲဒီ စစ်အုပ်စုနဲ့ အပေါင်းအပါများရဲ့ မိသားစုတွေ၊ မဟာမိတ်တွေကို စာရင်းပြုစုပြီး စုဆောင်းရသလောက် ထုတ်ပြန်အသိပေးနေဖို့ကို လုပ်ပေးရမယ် လို့ထင်ပါတယ်။ ပြည်တွင်းက သပိတ်မှောက်လိုပေမယ့် ကိုးကားစရာ စာရင်းမရှိရင် ရေရှည်မှာ တာသွားဖို့ ခက်ပါလိမ့်မယ်။ လုပ်တော့ လုပ်ကြပါရဲ့ အင်တာနက်ပေါ်က နေ့မြင်ညပျောက် ၀က်ဆိုက်တွေက များတော့ ဘယ်ဟာကို အားကိုးပြီး ကြည့်ရမှန်း ပြည်တွင်း မပြောနဲ့ ပြည်ပမှာတောင် မျက်စိက လည်နေတာကလည်း ပြုပြင်ရမယ့် ကိစ္စဖြစ်ပါတယ်။

အကြောက်တရားနဲ့ သပိတ်

သာမန်ပြည်သူလူထုမှာ အကြောက်တရားရှိသလို စစ်အုပ်စုနဲ့ အပေါင်းအပါတွေမှာလည်း ထပ်တူထပ်မျှ အကြောက်တရားရှိပါတယ်။ လက်နက်တွေ၊ အာဏာတွေ၊ နောက်လိုက်ငယ်သားတွေ အားကိုးနဲ့ မိုက်လုံးကြီးနေကြပေမယ့် သူတို့ တဦးချင်းစီရဲ့ အကျိူးစီးပွားအတွက် ကြောက်စိတ်ကတော့ သူလို ကိုယ်လိုပါပဲ။
ပြည်ပရောက် တချို့သော မြန်မာတွေကိုယ်တိုင်က တိုင်းပြည်ပြန်ရမှာမို့လို့ အမျိုးသားရေးပွဲတွေကို ဗြောင်ကျကျ မဆင်နွဲရဲကြပါဘူး။ ပြန်ရင်ပဲ အဖမ်းခံထိမှာ လိုလို၊ ဆွေမျိုးသားချင်းတွေ ထိခိုက်မှာ လိုလိုနဲ့ ကြောက်ရွံ့ကြပါတယ်။ သူတို့တွေ စာရင်းတွေ၊ ဓာတ်ပုံတွေလည်း ဘယ်ဝက်ဆိုက်၊ အီးမေးတွေနဲ့ အစိုးရသတင်းစာတွေမှာ ဖော်ပြထားခြင်း မရှိပါသော်ငြား စစ်အုပ်စုလက်ထဲမှာ ရောက်နေမှာ၊ လက်ထောက်ချခံရမှာ၊ သတင်းပေးခံရမှာကို ကြောက်ရွံ့နေတာ ဖြစ်ပါတယ်။ အဲဒီ ကြောက်ရွံ့စိတ်နဲ့ စစ်အုပ်စုက ပြည်သူတွေကို ပြန်ပေးဆွဲထားတာ ဖြစ်ပါတယ်။
ထိုနည်းတူစွာပဲ ဒီနည်းကို တန်ပြန်သုံးပြီးတော့ ပြည်တွင်းက ပြည်သူတွေ သပိတ်မှောက်ကြတဲ့နေရာဝယ် အထောက်အကူရအောင် စစ်အုပ်စုထိပ်သီးတွေ၊ မိသားစုဝင်တွေ၊ အပေါင်းအပါတွေ၊ မဟာမိတ်တွေကို ဓာတ်ပုံတွေ၊ အိမ်ထောင်စုစာရင်းတွေ၊ လိပ်စာတွေ၊ စီးပွားရေးလုပ်ငန်းတွေကို စုံစမ်းပြီး အထင်အရှားကို အင်တာနက်၊ အီးမေးတို့ကတဆင့် စုဆောင်း၊ တင်ပြ၊ ပြန်ကြားနေလို့ ရပါတယ်။
သာမန်ပြည်သူတွေတောင် မှတ်တမ်းမှတ်ရာ အယူခံရမှာ ကြောက်သေးရင်၊ စစ်အုပ်စုနဲ့ အပေါင်းအပါတွေဟာ ခိုးထုပ်ခိုးထည်နဲ့ သက်သေ အချက်အလက်တွေနဲ့ ဖော်ထုတ်ခံရမှာကို သာမန်ပြည်သူတွေထက် မလျော့တဲ့ အတိုင်းအတာနဲ့တော့ ကြောက်ရွံ့ပါတယ်။
၁၉၈၈ စစ်အုပ်စု အာဏာသိမ်းပြီးကတည်းက အပြစ်မဲ့တဲ့ ပြည်သူတွေကို အကြိမ်ကြိမ် သတ်၊ အကြိမ်ကြိမ် ထောင်ချ၊ အကြိမ်ကြိမ် နှိပ်စက်ညှင်းပန်းဖိနှိပ်ခဲ့ပေမယ့် သူတို့ရဲ့ တဦးချင်းစီရဲ့ အကြောင်းအရာ မှတ်တမ်းတွေကို လူသိထင်ရှား အစဉ်တစိုက် စုစည်း ဖော်ပြထုတ်ဖော်ခြင်း အားနည်းခဲ့တဲ့အတွက် စစ်အုပ်စုနဲ့ အပေါင်းအပါများ မိသားစုဝင်များဟာ ပြည်တွင်းမှာသာမက ပြည်ပမှာပါ လူတွင်ကျယ်နေနိုင်တာ ဖြစ်ပါတယ်။

သပိတ်မှောက်ရန် သန်းခေါင်စာရင်း

၁၉၄၅ ခုနှစ်များမှာ နာဇီတွေဟာ ဂျုးလူမျိုး သန်းပေါင်းများစွာကို အကျဉ်းစခန်းတွေမှာ ဖမ်းဆီး ထိန်းသိမ်းပြီး နှိပ်စက် ညှင်းပန်း သတ်ဖြတ်ခဲ့တယ်။ အဲသည် နာဇီတွေကို ဂျုးတွေက တရားဥပဒေနဲ့ ခုံရုံးတင် အရေးယူအပြစ်ပေးခဲ့တယ်။ အဲဒီ စာရင်းတွေ၊ အဖြစ်အပျက်တွေ၊ နေ့စွဲတွေ၊ သမိုင်းတွေ ဘယ်ကလာတာလဲ။ အသက်ရှင်ကျန်ရစ်ခဲ့တဲ့ ဂျုးတွေဆီက လာတာဖြစ်ပါတယ်။ နာဇီတွေ ၀န်ခံလို့လည်း မဟုတ်ဘူး။ ကယ်တင်ရှင် မဟာမိတ်တွေက ထုတ်ဖော်ပေးလို့လည်း မဟုတ်ပါဘူး။ လူသားတွေကို မျိုးတုံးအောင်သုတ်သင်သူကို အရေးယူတရားစီရင်ဖို့ ဆိုတာဟာ ဘေးက ပရိသတ်တွေမှာ တာဝန်ရှိတယ်ဆိုရင်၊ ကာယကံရှင် ကျနော်တို့ မြန်မာပြည်သူ တဦးချင်းဆီမှာ ပိုလို့တောင် တာဝန်ရှိပါသေးတယ်။ ကာယကံရှင်တွေကိုယ်တိုင်က စစ်အုပ်စုကို အနီးကပ် စောင့်ကြည့် မှတ်တမ်းတင် ဖော်ထုတ်ဖို့ အကောင်းဆုံး အခွင့်အရေးရနေတဲ့ နေရာကို ရောက်နေပြီ ဖြစ်ပါတယ်။
အင်တာနက်ခေတ်ကြီးထဲမှာ သတင်းနဲ့နည်းပညာ တော်လှန်ရေးခေတ်ကြီးထဲမှာ သူရဲကောင်းတွေ၊ စွန့်လွှတ်စွန့်စား အနစ်နာခံမှုတွေကို မှတ်တမ်းတင်ပြီး ကမ္ဘာကြီးကို အားနည်းတဲ့သူတွေဘက်က ရပ်လာကြဖို့၊ ဆုတွေ တံဆိပ်တွေ အကြိမ်ကြိမ် အလီလီ ချီးမြှင့်နိုင်ဖို့ လုပ်နိုင်ခဲ့ကြပြီ။ အခုနောက်ထပ်ပြီးတော့ စစ်အုပ်စုနဲ့ အပေါင်းအပါတွေ၊ မိသားစုဝင်တွေ၊ သူတို့ စီးပွားရေးလုပ်ငန်းတွေ၊ ကွန်ယက်တွေကို ဖော်ထုတ်ဖို့၊ မှတ်တမ်းတင်ဖို့၊ ဖွင့်ချပြီး သပိတ်မှောက် ဆန့်ကျင်နိုင်ဖို့ ပြည်တွင်းက ပြည်သူတွေအားနဲ့ ပြည်ပကလည်း ၀ိုင်းဝန်းအားပေးကြဖို့ အချိန်ကောင်းပဲလို့ ထင်မြင်မိပါတယ်။

ပြည်သူတွေလက်ထဲက တယောက်တလက် သပိတ်လက်နက်

ခုချိန်မှာတင် ဒေါ်အောင်ဆန်းစုကြည်ကို မတရားဆွဲချနေတဲ့ သက်သေ ၂၃ ဦး စာရင်း ရှိနေပြီ ဖြစ်ပါတယ်။ တရားသူကြီးတွေရဲ့ အမည်နဲ့ နေရပ်လိပ်စာတွေ ရှိနေပြီ ဖြစ်ပါတယ်။ ပြည်ပက အတိုက်အခံမီဒီယာတွေမှာ အဲသည်အကြောင်းအရာတွေ တင်ဆက်ထားပြီး ဖြစ်တော့ သူတို့နောက်ကို ခြေရာခံလိုက်ပြီး မှတ်တမ်းယူထားဖို့က မခဲယဉ်းတော့ဘူး ဖြစ်ပါတယ်။ ခုချိန်မှာ ဒေါ်အောင်ဆန်းစုကြည်ကို ထိခိုက်နစ်နာအောင် သွားပုပ်လေလွင့် တရားလက်လွတ်ပြောကြားနေတဲ့ စစ်အုပ်စု ကက်ဘိနက်အဖွဲ့ဝင်တွေ၊ အင်တာနက်ဆိုက်တွေ၊ အလိုတော်ရိတွေကို တွေ့နေရပြီ ဖြစ်ပါတယ်။ စစ်အုပ်စုရဲ့ အကြီးအကဲကြီးနဲ့ မိသားစုဝင်တွေနဲ့ တိုက်ရိုက် ဆက်စပ်နေတဲ့ စီးပွားရေးလုပ်ငန်းတွေ၊ အကျိုးစီးပွားတွေဆိုတာလည်း ပြည်တွင်းက ပြည်သူတွေအဖို့ နားစွင့်လိုက်တာနဲ့ စာရင်းနဲ့တကွ သိရှိပြီး ဖြစ်ပါတယ်။
အဲဒီလုပ်ငန်းတွေ၊ စစ်အုပ်စုနဲ့ အပေါင်းအပါတွေကို ထိခိုက်နစ်နာ ကြောက်ရွံ့သွားစေဖို့ လက်နက်ဆိုတာ လက်ပစ်ဗုံးတွေ၊ ချိန်ကိုက်ဗုံးတွေ၊ အကြမ်းဖက် လက်နက်တွေ ဖြစ်နိုင်သလို၊ ပြည်သူလူထုက အလိမ္မာဉာဏ်နဲ့ လျို့ဝှက်တိုက်ခိုက်နိုင်တဲ့ သပိတ်မှောက်လက်နက်လည်း ဖြစ်နိုင်ပါတယ်။
နိဂုံးချုပ်အနေနဲ့ ပြောရရင် စားဝတ်နေရေးအတွက် ထွက်ပေါက်မဲ့နေတဲ့ ပြည်သူလူထု၊ ချဲတွေ နှလုံးထီတွေ၊ လောင်းကစားတွေနဲ့ ဖြတ်လမ်းမှားတွေနဲ့ တ၀ဲလည်လည် ဖြစ်နေတဲ့ ပြည်သူလူထု၊ အဲဒီပြည်သူလူထုကို ထပ်ပြီး နင်းခြေပိပြားအောင် နှိပ်စက်မယ့် တရားဝင်လောင်းကစားစနစ်ကို ထူထောင်ဖို့ ပြင်ဆင်နေတဲ့ စစ်အုပ်စုရဲ့ မြန်မာနေရှင်နယ်လိဂ် ဘောလုံးပွဲတွေကို ဒေါ်အောင်ဆန်းစုကြည် တရားရင်ဆိုင်နေရချိန်နဲ့ တိုက်ဆိုင်ပြီး အသက်သွင်းလာချိန်မှာ ကျနော်တို့ ပြည်သူတွေကကော အဲဒီပွဲတွေကို သပိတ်မှောက်ဖို့ အရှိန် မမြှင့်နိုင်ပေဘူးလား။

0 အကြံပြုခြင်း: