Tuesday, November 24, 2009

24 Nov ဒိုင်ယာရီ

http://ifile.it/g20pfnl

Nov24Diary_yeyintnge

ပိတ်ဆို့မှုထက် ရွေးကောက်ပွဲက ပိုအရေးကြီးနေဟု ဦးဝင်းတင် ပြောဆို



ဆလိုင်းဟံသာစန်း
အင်္ဂါနေ့၊ နိုဝင်ဘာလ 24 ရက် 2009 ခုနှစ် 19 နာရီ 37 မိနစ်


နယူးဒေလီ (မဇ္ဈိမ)။ ။ စစ်အစိုးရအတွက် ၂၀၁၀ ရွေးကောက်ပွဲသည် စီးပွားရေးပိတ်ဆို့မှု အခန်းကဏ္ဍထက် ပိုမိုအရေးပါနေသဖြင့် ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် တွေ့ဆုံဆွေးနွေးရန် ရာခိုင်နှုန်းအားဖြင့် နည်းပါးကြောင်း အန်အယ်ဒီ ဗဟိုအလုပ်အမှုဆောင် ဦးဝင်းတင်က ပြောဆိုလိုက်သည်။

အဖွဲ့ချုပ်ခေါင်းဆောင် ဒေါ်အောင်ဆန်းစုကြည်က နအဖ ကောင်စီနှင့် ပူးပေါင်းဆောင်ရွက်လိုကြောင်း ယခုလ ၁၁ ရက်နေ့တွင် စစ်အစိုးရအကြီးအကဲ ဗိုလ်ချုပ်မှူးကြီးသန်းရွှေထံ စာရေးတင်ပြခဲ့ပြီးနောက် ရက်သတ္တ နှစ်ပတ်ခန့် ကြာမြင့်လာသော်လည်း တစုံတရာ တုံ့ပြန်မှု မပြသသည့်အပေါ် ပြောဆိုလိုက်ခြင်း ဖြစ်သည်။

“ရွေးကောက်ပွဲဟာ စီးပွားရေးပိတ်ဆို့မှု ရုပ်သိမ်းရေး၊ အမေရိကန်နဲ့ စေ့စပ်ညှိနှိုင်းရေးတို့ထက် ပိုအရေးကြီးနေလို့ ဒီလိုအချိန်မျိုးမှာ ဒေါ်အောင်ဆန်းစုကြည်လို အတိုက်အခံမျိုးနဲ့ တွေ့ဆုံဆွေးနွေးခြင်းအားဖြင့် သူတို့အတွက် သိပ်ပြီးတော့ အကျိုးရှိမယ်လို့ ထင်မှာမဟုတ်ဘူး။ ဒီအခြေအနေကိုထောက်ရင် တွေ့ဆုံဆွေးနွေးပွဲဆိုတာက မဖြစ်နိုင်ဘူးလို့ မပြောနိုင်ပေမယ့် တော်တော်အချိန်ဆွဲထားပြီးကာမှ ဖြစ်လိမ့်မယ်။ တခါတည်း ဗြုန်းစားကြီး ပေါ်ပေါက်လာလိမ့်မယ်လို့တော့ မထင်ဘူး” ဟု ဦးဝင်းတင်က မဇ္ဈိမကို ပြောသည်။

''စီးပွားရေးပိတ်ဆို့မှုကြောင့် အခက်အခဲတွေရှိပေမယ့် အဲဒါက ငွေရေးကြေးရေးနဲ့ ချိန်တွက်ကြည့်ရင် ပြဿနာ သိပ်မရှိဘူး။ ရင်းနှီးမြှုပ်နှံမှုတွေကလည်း တရုတ်တို့၊ အိန္ဒိယတို့၊ အာဆီယံတို့လည်း ရှိနေတဲ့အခါကျ ပိတ်ဆို့မှုက အကြောင်းမထူးလှဘူး။ ပိတ်ဆို့မှုရဲ့ ပြဿနာက စီးပွားရေး ပြဿနာက နည်းနည်းရယ်။ တကယ့်က လူတော မတိုးဘူးဗျာ။ ကမ္ဘာနဲ့ဆက်ဆံရာမှာ အဟန့်အတားတွေ ဖြစ်နေတဲ့အတွက် ဒါကို ရုပ်သိမ်းပေးစေချင်တဲ့ သဘော ဖြစ်တယ်။ သို့သော် ရွေးကောက်ပွဲနဲ့ ယှဉ်လိုက်တဲ့အခါ ရွေးကောက်ပွဲက ပိုအရေးကြီးနေတယ်ဗျ'' ဟု သူက ဆိုသည်။

ပါတီပြောခွင့်ရပုဂ္ဂိုလ် ဦးဥာဏ်ဝင်းကလည်း အန်အယ်ဒီအနေဖြင့် ဒေါ်အောင်ဆန်းစုကြည်၏ ကမ်းလှမ်းချက်နှင့် ပတ်သက်၍ ရလဒ်ကောင်း ပေါ်ထွက်လာရန် မျှော်လင့်ထားသော်လည်း မည်သည့်အချိန်တွင် တုံ့ပြန်လာမည်ကို မခန့်မှန်းနိုင်ကြောင်း မဇ္ဈိမကို ပြောဆိုသည်။

အနောက်နိုင်ငံများက ချမှတ်ထားသော ပိတ်ဆို့အရေးယူမှုများ လျော့ပါးသက်သာရေးအတွက် သူမအနေနှင့် ကူညီဆောင်ရွက်ပေးရန် ဆန္ဒရှိကြောင်း ပြီးခဲ့သည့် စက်တင်ဘာလ ၂၅ ရက်နေ့တွင် ဒေါ်အောင်ဆန်းစုကြည်က စစ်အစိုးရအကြီးအကဲ ဗိုလ်ချုပ်မှူးကြီး သန်းရွှေထံ စာတစောင် ပေးပို့ခဲ့သေးသည်။

စာထဲတွင် မြန်မာနိုင်ငံအပေါ် ထားရှိသည့် ပိတ်ဆို့အရေးယူရေး မူဝါဒများနှင့် အကျိုးဆက်များကို ရှာဖွေရန် အမေရိကန်၊ ဗြိတိန်နှင့် သြစတြေးလျား သံတမန်တို့ကို တွေ့ဆုံခွင့် တောင်းဆိုခဲ့ရာ အောက်တိုဘာ ၉ ရက်နေ့တွင် ရန်ကုန်မြို့ အစိုးရ ဧည့်ဂေဟာ၌ တွေ့ဆုံခွင့် ရရှိခဲ့သည်။

တွေ့ဆုံပွဲတွင် ၎င်းနိုင်ငံများမှ မြန်မာနိုင်ငံအပေါ် ချမှတ်ထားသော ပိတ်ဆို့အရေးယူမှု ရပ်တည်ချက်များ၊ အရေးယူမှု ပြုလုပ်သည့် အရာများ၊ ထိုအရေးယူမှုများ၏ သက်ရောက်မှု စသည်တို့ကို မေးမြန်းနိုင်ခဲ့သည်။

ပေးစာကို တုံ့ပြန်သည့်အနေဖြင့် အောက်တိုဘာ လဆန်းတွင် စစ်အစိုးရ ဆက်ဆံရေးဝန်ကြီး ဦးအောင်ကြည်က သူမကို နှစ်ကြိမ် တွေ့ဆုံခဲ့သေးသည်။ ထို့အပြင် အောက်တိုဘာလ ၄ ရက်နေ့တွင် အမေရိကန်နိုင်ငံ အာရှနှင့် ပစိဖိတ်ဆိုင်ရာ လက်ထောက် နိုင်ငံခြားရေးဝန်ကြီးနှင့် အရှေ့တောင်အာရှ နိုင်ငံများ အသင်းဆိုင်ရာ အမေရိကန် သံတမန်ကြီးနှင့် တွေ့ဆုံခွင့်ရခဲ့ပြန်သည်။

ထို့နောက် မြန်မာနိုင်ငံအပေါ် အရေးယူပိတ်ဆို့ထားမှုများကို ရုပ်သိမ်းရေးကိစ္စ နောက်ဆက်တွဲ တင်ပြခြင်း ဟူသည့် ပေးစာကို ဒေါ်အောင်ဆန်းစုကြည်က ယခုလ ၁၁ ရက်နေ့တွင် ဗိုလ်ချုပ်မှူးကြီးထံ လိပ်မူကာ ပေးပို့ခဲ့ခြင်း ဖြစ်သည်။

အဆိုပါ စာထဲတွင် နိုင်ငံတော်အတွက် အခြား အကျိုးကျေးဇူးရှိမည့် လုပ်ငန်းများကိုလည်း ကျမအနေဖြင့် နအဖ နှင့် ပူးပေါင်းဆောင်ရွက်နိုင်လိမ့်မည်ဟု မျှော်လင့်ကြောင်းနှင့် ဆောင်ရွက်မည့် လုပ်ငန်းများနှင့် စပ်လျဉ်းပြီး ဗိုလ်ချုပ်မှူးကြီးနှင့် တွေ့ဆုံတင်ပြခွင့်ပြုပါရန် အထူးမေတ္တာရပ်ခံအပ်ပါကြောင်း ပါရှိသည်။

လွန်ခဲ့သည့် ၂ လအတွင်း ပေါ်ပေါက်လာသည့် ဤဖြစ်စဉ်များသည် အမေရိကန်အစိုးရက မြန်မာပြည်ဆိုင်ရာ မူဝါဒ အပြောင်းအလဲများ ပြုလုပ်သွားမည်ဟု ထုတ်ဖော်ပြောဆိုမှုများနောက်ပိုင်း မကြာခင် စတင်ဖြစ်ပွားခဲ့ခြင်း ဖြစ်သည်။

စက်တင်ဘာလ ၂၈ ရက်နေ့တွင်မူ အမေရိကန်က စစ်အစိုးရနှင့် တိုက်ရိုက် ဆက်ဆံသွားမည်ဖြစ်ပြီး လက်ရှိ ပိတ်ဆို့အရေးယူမှုများကို ဆက်ထားမည့်အပြင် တရုတ်နှင့် အိန္ဒိယ အပါအဝင် ဒေသဆိုင်ရာ နိုင်ငံများနှင့်ပါ မြန်မာပြည်တွင်း အပြောင်းအလဲများ ဖြစ်ပေါ်ရေးအတွက် တိုင်ပင်ဆွေးနွေးမှုများ ပြုလုပ်သွားမည်ဖြစ်ကြောင်း တရားဝင် ထုတ်ဖော်ကြေညာခဲ့သည်။

အရှေ့အာရှနှင့် ပစိဖိတ်ရေးရာဗျူရို လက်ထောက် အတွင်းရေးမှူး ကာ့တ် အမ် ကမ့်ဘဲလ် Kurt M. Campbell ကလည်း စစ်အစိုးရ ကျင်းပမည့် ၂ဝ၁ဝ ခုနှစ် ရွေးကောက်ပွဲနှင့် စပ်လျဉ်း၍ ရွေးကောက်ပွဲဆိုင်ရာ ကိစ္စများကို လေ့လာ အကဲဖြတ်နိုင်မှု၊ အတိုက်အခံနှင့် တိုင်းရင်းသားအဖွဲ့များ ရွေးကောက်ပွဲတွင် ပါဝင်နိုင်ခွင့် ရှိမရှိတို့အပေါ် မူတည်ပြီး အမေရိကန်က တိုင်းတာချဉ်းကပ်မှုများ ပြုလုပ်သွားမည်ဟု ပြောဆိုခဲ့သည်။

ဦးဝင်းတင်က ''ဒီ ရွေးကောက်ပွဲက သူတို့အတွက် အာမခံချက်နဲ့လုပ်မယ့် ရွေးကောက်ပွဲဗျ။ ၂ဝဝ၈ အခြေခံဥပဒေအတိုင်း ၂ဝ၁ဝ ကို လုပ်မယ်။ နောက်ပေါ်ပေါက်လာမယ့် လွှတ်တော်တို့၊ အစိုးရတို့ ဆိုတာကိုလည်း ဒီ ဥပဒေနဲ့ ချုပ်ကိုင်ထားမှာဆိုတော့ သူတို့ရဲ့ စစ်အာဏာစက်ဟာ နောက်ထပ် နှစ်ပေါင်းများစွာ အုပ်ချုပ်သွားနိုင်ဖို့ အာမခံထားတဲ့၊ ကာကွယ်ပေးထားတဲ့ အခြေခံဥပဒေဗျာ'' ဟု ပြောသည်။

(ရဲရင့်အောင် တည်းဖြတ်သည်။)

http://www.mizzimaburmese.com/news/inside-burma/4258-2009-11-24-13-20-51.html


ရွေးကောက်ပွဲအပြီး ပေါ်ထွက်လာမည့် အစိုးရသစ် ရင်ဆိုင်ရဖွယ် အကျပ်အတည်း


Monday, 23 November 2009 11:51
ထက်အောင် .
အမေရိကန် ပြည်ထောင်စု၏ မြန်မာနိုင်ငံဆိုင်ရာ မူဝါဒအပေါ် အကဲဖြတ် ဆန်းစစ်ချက် ရလဒ်ဖြစ်သော အရေးယူ ပိတ်ဆို့မှုများ ထိရောက်မှု မရှိခြင်း၊ နိုင်ငံတကာ အရေးယူ ပိတ်ဆို့မှုများ ရပ်တန့်ပေးရန် မြန်မာစစ်အစိုးရ၏ တောင်း ဆိုမှုနှင့်အတူ အမေရိကန်နှင့် ပူးပေါင်းဆောင်ရွက်လိုသည့် ၎င်းတို့၏ စိတ်ဝင်စားမှုကို သိသိသာသာ ပြသလာခြင်း၊ ဒီမိုကရေစီ ခေါင်းဆောင် ဒေါ်အောင်ဆန်းစုကြည်က နိုင်ငံတကာ အရေးယူ ပိတ်ဆို့မှုများ အဆုံးသတ်ရေးအတွက် စစ်အစိုးရနှင့် ပူးပေါင်း ဆောင်ရွက်ရန် ကမ်းလှမ်းခြင်း စသည်တို့ကြောင့် ကာလကြာရှည် ပိတ်ဆို့နေသော မြန်မာ့ နိုင်ငံရေး အကျပ်အတည်း အဆုံးသတ်သွားတော့မည်ဟူသည့် ယူဆချက်ကို ဖြစ်ပေါ်စေပါသည်။

မကြာသေးခင်က ပြုလုပ်ခဲ့သည့် ကုလသမဂ္ဂ အထွေထွေ ညီလာခံတွင် စစ်အစိုးရက အရေးယူ ပိတ်ဆို့မှုများ ရုပ်သိမ်းပေးရန် တောင်းဆိုခဲ့သည်။ ထိုသို့ တောင်းဆိုရာတွင် အရေးယူ ပိတ်ဆို့မှုများသည် ကိုယ့်ကျင့်တရားနှင့် ကိုက်ညီခြင်း မရှိသကဲ့သို့ မြန်မာ ပြည်သူများ၏ စီးပွားရေးနှင့် လူမှုရေး ဖွံ့ဖြိုး တိုးတက်မှုကို အတားအဆီး ဖြစ်စေကြောင်း၊ မြန်မာနိုင်ငံ၏ အချုပ်အခြာ အာဏာကို ၀င်ရောက် စွက်ဖက်ရန် ပိတ်ဆို့ အရေးယူမှုကို နိုင်ငံရေး လက်နက်တခုအဖြစ် သုံးနေကြကြောင်း ပြောဆိုခဲ့ပါသည်။

စီစဉ်ထားသော ၂၀၁၀ ပြည့်နှစ် ရွေးကောက်ပွဲ နီးလာချိန်တွင် မြန်မာစစ်ဗိုလ်ချုပ်များသည် နိုင်ငံတကာ အသိုင်းအ၀န်းအပြင် ပြည်တွင်း နိုင်ငံရေး အင်အားစုများနှင့်ပါ ပူးပေါင်း ဆောင်ရွက်ရန် အမှန်တကယ် ပြင်ဆင်နေပြီလား။ ဤသို့ဆိုလျှင် ထိရောက်မှု မရှိသော အရေးယူ ပိတ်ဆို့မှုများသည် အဓိပ္ပာယ်ရှိသော တွေ့ဆုံ ဆွေးနွေးမှုများ ဖြစ်ပေါ်လာရေးအတွက် ထိရောက်သော အကြောင်းရင်းတခုအဖြစ် ပြောင်းလဲသွားနိုင်မလား။

ဗိုလ်ချုပ်မှူးကြီး သန်းရွှေသို့ ဒေါ်အောင်ဆန်းစုကြည် ပေးပို့လိုက်သော စာကို ရလျှင်ရခြင်း စစ်ဗိုလ်ချုပ်ကြီးများက ဆက်ဆံရေးဝန်ကြီး ဦးအောင်ကြည်ကို ဒေါ်အောင်ဆန်းစုကြည်ထံ စေလွှတ်လိုက်သည်။ ဦးအောင်ကြည်သည် ဒေါ်အောင်ဆန်းစုကြည်ကို တပတ်အတွင်း နှစ်ကြိမ် တွေ့ဆုံရုံမက၊ စာထဲတွင် တောင်းဆိုထားသော အမေရိကန်၊ သြစတြေးလျ၊ ဥရောပသမဂ္ဂတို့မှ သံတမန်များနှင့် တွေ့ဆုံခွင့်ကိုလည်း လိုက်လျောခဲ့သည်။

ဆယ်စုနှစ် နှစ်ခုကြာ အဆင့်မြင့်သံတမန်ဆက်ဆံရေး ဖြတ်တောက်ထားမှုကို အဆုံးသတ်သည့် အနေဖြင့် အမေရိကန် အစိုးရသည် မြန်မာ အဆင့်မြင့် အရာရှိများ အပေါ် (နယူးယောက်မြို့ရှိ ကုလသမဂ္ဂ အစည်းအဝေးများသို့ တက်ရောက်ခြင်းမှအပ) အမေရိကန် ပြည်ထောင်စုအတွင်း ခရီး သွားလာခွင့် ပိတ်ပင်ထားခြင်းကို ယာယီအားဖြင့် လျှော့ချပေးသကဲ့သို့ ကုလသမဂ္ဂ အထွေထွေ ညီလာခံပြင်ပ၌လည်း မြန်မာ ကိုယ်စားလှယ်အဖွဲ့နှင့် ပထမဦးဆုံး အကြိမ် တရားဝင် တွေ့ဆုံ ဆွေးနွေးမှုများ စတင်ခဲ့သည်။

မြန်မာပြည် ဒီမိုကရေစီ ပြောင်းလဲရေး အတွက် အရေးယူ ပိတ်ဆို့ထားမှုများက အလုပ်မဖြစ်ခြင်းကို အမေရိကန် အစိုးရက ၀န်ခံ၊ အသိအမှတ် ပြုပြီး စစ်အစိုးရနှင့် ပြန်လည် ဆက်သွယ်၊ ဆက်ဆံရန် ဆုံးဖြတ်ခဲ့သော်လည်း ထို အရေးယူ ပိတ်ဆို့မှုများကို စစ်ဗိုလ်ချုပ်ကြီးများအား ဖိအားပေးမှု အဖြစ် ဆက်လက်ထားရှိ သွားပေလိမ့်မည်။

ယခုအချိန်အခါသည် စစ်အစိုးရအတွက် အရေးကြီးသော အချိန်လည်း ဖြစ်သည်။ အကြောင်းမှာ လွတ်လပ်ပြီး တရားမျှတသည့် ရွေးကောက်ပွဲများမှ တဆင့် သက်ဆိုင်သူ အားလုံး ပါဝင်သည့် နိုင်ငံရေး အပြောင်းအလဲ တခုကို လုပ်ဆောင်ပေးရန် ကုလသမဂ္ဂ ဦးဆောင်သည့် နိုင်ငံတကာ အသိုင်းအ၀န်း၊ အမျိုးသား ဒီမိုကရေစီ အဖွဲ့ချုပ် (NLD) ဦးဆောင်သည့် ပြည်တွင်း၌ လက်ရှိ ရပ်တည်လျက်ရှိသော နိုင်ငံရေး ပါတီများ၊ အပစ်အခတ် ရပ်စဲထားသော တိုင်းရင်းသား လက်နက်ကိုင် အုပ်စုများက စစ်အစိုးရကို ပြင်းပြင်းထန်ထန် တောင်းဆိုနေသည်။

သေချာသည့်အချက်တခုမှာ ထိုအုပ်စု ၃ခုတွင် ၎င်းတို့၏ အကျိုးစီးပွားများ တခုမက ရှိနေခြင်းဖြစ်သည်။ သို့သော် သိသာထင်ရှားသည့် အချက်တခုမှာ နိုင်ငံတကာ အရေးယူ ပိတ်ဆို့မှုများသည် ၎င်းတို့အကြား ဘုံတူညီသည့် ပြဿနာတခု ဖြစ်လာခဲ့ပြီး မကြာသေးခင်ကပင် ၎င်းတို့အသီးသီးက ထုတ်ဖော် ပြောဆိုလာကြခြင်းပင် ဖြစ်ပါသည်။

သို့သော် ဤဖြစ်ပေါ်တိုးတက်မှုများ၏ နောက်ကွယ်တွင် စစ်ဗိုလ်ချုပ်များ အမှန်တကယ် စိုးရိမ်နေသည့် အချက်က အဘယ်နည်း။ အကယ်၍ ရွေးကောက်ပွဲသည် လွတ်လပ်ပြီး တရားမျှတခြင်း မရှိသကဲ့သို့ အဓိက ဒီမိုကရေစီ အင်အားစုများ ပါဝင်ခြင်း မရှိလျှင် အမေရိကန် ဦးဆောင်သည့် နိုင်ငံတကာ အရေးယူ ပိတ်ဆို့မှုများသည် ရွေးကောက်ပွဲပြီးနောက် ပေါ်ထွက်လာမည့် အစိုးရသစ်၏ တရားဝင်မှုကို ခြိမ်းခြောက်နိုင်ပါသလော။

ဤအရေးကြီးသောမေးခွန်းများက မြန်မာနိုင်ငံ၏ ရွေးကောက်ပွဲအပြီး ပေါ်ထွက်လာမည့် အစိုးရသစ်အပေါ် အမေရိကန် အရေးယူပိတ်ဆို့မှုများက မည်သို့မည်ပုံ အကျိုးသက်ရောက်နိုင်သည်ကို ပြန်လည် ရှာဖွေလေ့လာရန် လိုအပ်လာသည်။

မြန်မာနိုင်ငံအပေါ် အမေရိကန်၏ အရေးယူ ပိတ်ဆို့မှုများ ဖြစ်စဉ် အကျဉ်း

စစ်အစိုးရ ကျူးလွန်ခဲ့သော လူအခွင့်အရေး ချိုးဖောက်မှုများကြောင့် `မြန်မာနိုင်ငံသို့ စစ်လက်နက်ပစ္စည်းများ တင်ပို့မှုများကို ရပ်ဆိုင်းခြင်း´ ဆိုသည့် အရေးယူ ပိတ်ဆို့ခြင်းကို ထိုအချိန်က သမ္မတ ကလင်တန် အာဏာရလာပြီး လပိုင်းအကြာ ၁၉၉၃ ခုနှစ်၊ ဇွန်လ ၁၆ ရက်နေ့က လုပ်ဆောင်ခဲ့သည့် အချက်ကို အမေရိကန် နိုင်ငံခြားရေး ၀န်ကြီးဌာန၏ နိုင်ငံရေးနှင့် စစ်ရေးဆိုင်ရာ ဗျူရို မှတ်တမ်းတွင် တွေ့ရသည်။

မြန်မာနိုင်ငံတွင် လူ့အခွင့်အရေးနှင့် ဒီမိုကရေစီ တိုးတက်မှု မရှိသဖြင့် သမ္မတ ကလင်တန်သည် ၁၉၉၆ ခုနှစ် အောက်တိုဘာလ ၃ ရက်နေ့တွင် ဒုတိယအကြိမ် အရေးယူ ပိတ်ဆို့မှု အနေဖြင့် ကြေညာချက်အမှတ် ၆၉၂၅ ကို လက်မှတ်ရေးထိုးပြီး မြန်မာစစ်ခေါင်းဆောင်များနှင့် ၎င်းတို့၏ မိသားစုများကို အမေရိကန် ပြည်ဝင်ခွင့် ပိတ်ပင်ခဲ့သည်။

သို့ရာတွင် ထိုသို့ အရေးယူပိတ်ဆို့ပြီး တလအကြာ နိုဝင်ဘာလ ၉ရက်နေ့တွင် ဒေါ်အောင်ဆန်းစုကြည် စီးနင်း လိုက်ပါ သွားသည့် မော်တော်ယာဉ်တန်းကို ရန်ကုန်မြို့တွင် စနစ်တကျ စီစဉ်ထားသော လူအုပ်စုနှင့် တိုက်ခိုက်ခြင်းဖြင့် တုံ့ပြန် ခဲ့ပါသည်။ ထိုတိုက်ခိုက်မှုသည် အမေရိကန် ပြည်ထောင်စု၏ တတိယမြောက် အရေးယူ ပိတ်ဆို့မှုသို့ ဦးတည်ခဲ့ပါ သည်။ ၁၉၉၇ ခုနှစ် မေလ ၂၀ ရက်နေ့က `မြန်မာနိုင်ငံတွင် ရင်းနှီးမြှုပ်နှံမှု အသစ်များ တားမြစ်ခြင်း´ ဆိုင်ရာ သမ္မတ ၏ အမိန့်အမှတ် ၁၃၀၄၇ ကို သမ္မတ ကလင်တန် လက်မှတ်ရေးထိုးခဲ့ပါသည်။ ထိုအချိန်မှစ၍ ယခုအထိ အမေရိကန် ပြည်ထောင်စု၏ မည်သည့်ရင်းနှီးမြုပ်နှံမှု အသစ်မျှ မြန်မာနိုင်ငံအတွင်းသို့ ၀င်ရောက်လာခြင်း မရှိတော့ပါ။

သို့သော်လည်း ထိုအမိန့်တွင် မြန်မာနိုင်ငံအတွင်း ထိုနှစ် မေလ ၂၁ ရက် မတိုင်မီက ရောက်ရှိနေခဲ့သော အမေရိကန် ရင်းနှီး မြုပ်နှံမှုများ မပါဝင်သဖြင့် ရေနံကုမ္ပဏီကြီး ယူနိုကယ်၏ အကျိုးစီးပွားများကို အကာအကွယ် ဖြစ်ခဲ့ပါသည်။

စစ်အစိုးရ၏ ရန်လိုသော အပြုအမူများသည် ၂၀၀၃ ခုနှစ် မေလ ၃၀ ရက်နေ့တွင် အထွတ်အထိပ်သို့ ရောက်ရှိသွားသည်။ ၎င်းတို့ စနစ်တကျ စီမံလေ့ကျင့်ပေးထားသော လူရမ်းကား အုပ်စုကြီးအား အသုံးပြုပြီး ဒေါ်အောင်ဆန်းစုကြည်၏ မော်တော်ယာဉ်တန်းကို မြန်မာနိုင်ငံအထက်ပိုင်း ဒီပဲယင်းမြို့အနီးတွင် ဒုတိယအကြိမ် လုပ်ကြံ သတ်ဖြတ်ခဲ့သည်။ ဒေါ် အောင်ဆန်းစုကြည်သည် ထိုတိုက်ခိုက်မှုမှ လွတ်မြောက်ခဲ့သော်လည်း အတူ လိုက်ပါလာသော NLD အဖွဲ့ဝင်များနှင့် ထောက်ခံသူ ဒါဇင်နှင့် ချီပြီး အသတ်ခံခဲ့ရသည်။ နိုင်ငံတကာ အသိုင်းအ၀န်းက အံ့သြ ထိတ်လန့်ပြီး စစ်အစိုးရ၏ ပြိုင်ဖက်မရှိ ရက်စက်မှု၊ လူ့အခွင့်အရေး လေးစားလိုက်နာရန် ၎င်းတို့ တောင်းဆိုနေမှုများကို ပြောင်ပြောင်တင်းတင်း စိန်ခေါ်လိုက်ပုံကို တွေ့ရှိခဲ့ရပါသည်။

ထိုနှစ် ဇူလိုင်လတွင် `မြန်မာနိုင်ငံ လွတ်လပ်ရေးနှင့် ဒီမိုကရေစီ အက်ဥပဒေ´ ဟု ခေါ်သည့် ပိုမို ပြင်းထန်သည့် အရေးယူ ပိတ်ဆို့မှုကို အမေရိကန် ပြည်ထောင်စု လွှတ်တော် နှစ်ရပ်လုံးက ချမှတ်ခဲ့ပါသည်။ ထိုပိတ်ဆို့မှုတွင် ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးအသင်း (ကြံ့ဖွံ့) ၏ ယခင်ခေါင်းဆောင်များ၊ လက်ရှိ ခေါင်းဆောင်များကို ပြည်ဝင်ခွင့် ပိတ်ပင်ခြင်း၊ မြန်မာပြည်ထုတ် ကုန်ပစ္စည်းများ တင်သွင်းခွင့် ပိတ်ပင်ခြင်း၊ အမေရိကန် ပြည်ထောင်စုတွင် ရှိသော စစ်အစိုးရ ခေါင်းဆောင်များနှင့် ၎င်းတို့ မိသားစု ပိုင်ဆိုင်မှုများကို သိမ်းယူခြင်း၊ နိုင်ငံတကာ ငွေကြေး အဖွဲ့အစည်းများမှ ချေးငွေများ မရရှိစေရန် ပိတ်ဆို့ခြင်း စသည်တို့ ပါဝင်သည်။ ထိုအက်ဥပဒေတွင် စစ်အစိုးရ ပိုင်ဆိုင်သော မြန်မာ့စီးပွားရေး ဦးပိုင်လီမိတက်၊ မြန်မာ့စီးပွားရေး ကော်ပိုရေးရှင်းတို့အပေါ် ပိတ်ဆို့ အရေးယူမှုကိုလည်း ဖော်ပြထားပါသည်။

ထို့အပြင် အမေရိကန်သမ္မတသည် အမိန့်အမှတ် ၁၃၃၁၀ ကို လက်မှတ်ရေးထိုး ထုတ်ပြန်ခဲ့ပြီး မြန်မာနိုင်ငံပိုင် ဘဏ် ၃ ခု ဖြစ်သော မြန်မာ့ နိုင်ငံခြား ကုန်သွယ်မှုဘဏ်၊ မြန်မာ့ရင်းနှီးမြုပ်နှံမှုနှင့် ကုန်သွယ်ရေးဘဏ်၊ မြန်မာ့စီးပွားရေးဘဏ် စသည့် ဘဏ်များနှင့် ငွေကြေးဆက်သွယ်မှု အားလုံးကို ပိတ်ပင် တားမြစ်ခဲ့ပါသည်။

အမေရိကန်ကွန်ဂရက် သုတေသနဌာနက ၂၀၀၇ ခုနှစ် အောက်တိုဘာလ၌ ထုတ်ပြန်ခဲ့သည့် အစီရင်ခံစာ တစောင် တွင် `၂၀၀၆ ခုနှစ် ဇန်န၀ါရီလတွင် တရုတ်နိုင်ငံဘဏ်များ၌ ရှိသော မြန်မာဘဏ်စာရင်းများကို အတည်ပြုနိုင်ခဲ့ပြီး မြန်မာ့ ရင်းနှီးမြုပ်နှံမှုနှင့် ကုန်သွယ်ရေးဘဏ်၊ မြန်မာ့နိုင်ငံခြား ကုန်သွယ်မှုဘဏ် တို့နှင့် အမေရိကန် ဒေါ်လာဖြင့် ဆက်သွယ် လုပ်ဆောင်နေသော လုပ်ငန်းများအားလုံးကို ရပ်ဆိုင်းရန် တရုတ်ဗဟိုဘဏ်က အမိန့် ထုတ်ပြန်ခဲ့သည်” ဟု ဖော်ပြထားသည်။

နိုင်ငံတကာဘဏ်များနှင့် နိုင်ငံခြားငွေကြေးဆိုင်ရာ ဆက်သွယ် လုပ်ဆောင်မှု မှန်သမျှကို မြန်မာစစ်အစိုးရက ထိုဘဏ် ၃ ခုကိုသာ အခွင့်အာဏာ ပေးထားပါသည်။ ထို့ကြောင့် `မြန်မာနိုင်ငံ လွတ်လပ်ရေးနှင့် ဒီမိုကရေစီအက်ဥပဒေ´ သည် မြန်မာအစိုးရပိုင်နှင့် ပုဂ္ဂလိကပိုင်ဘဏ်တို့က အမေရိကန်ဘဏ်များကွန်ယက်ကို အသုံးပြုပြီး ငွေကြေးဆက်သွယ်မှုများ မပြုလုပ်နိုင်စေရန် ထိထိရောက်ရောက် လုပ်ဆောင်နိုင်ခဲ့သည်။

သို့ရာတွင် အမေရိကန် အရေးယူ ပိတ်ဆို့မှုများသည် စစ်အစိုးရ၏ ရက်စက်မှုများကို အဆုံးသတ်သွားခြင်း မရှိပေ။ ထို့အပြင် စစ်အစိုးရသည် ၂၀၀၇ ခုနှစ် စက်တင်ဘာလတွင် ဖြစ်ပွားသော အကြမ်းမဖက်သည့် လူထုဆန္ဒပြပွဲများတွင် ဦးဆောင်ခဲ့သော ဗုဒ္ဓဘာသာ ဘုန်းတော်ကြီးများကိုပင် သက်ညှာခွင့် မပေးခဲ့ပါ။ ၎င်းဆန္ဒပြပွဲကို စစ်အစိုးရက အကြမ်း ဖက် နှိမ်နှင်းခဲ့ပြီး နောက်ပိုင်း အမေရိကန် သမ္မတသည် အမိန့်အမှတ် ၁၃၄၄၈ ကို ၂၀၀၇ အောက်တိုဘာလ တွင် လည်းကောင်း၊ အမိန့်အမှတ် ၁၃၄၆၄ ကို ၂၀၀၈ မေလတွင် လည်းကောင်း လက်မှတ်ရေးထိုး ထုတ်ပြန်ခဲ့ပြီး မြန်မာ အစိုးရပိုင် စီးပွားရေး လုပ်ငန်းများ၊ စစ်အစိုးရနှင့် အကျိုးတူ ပေါင်းဖက်ပြီး အကျိုးအမြတ်များ ရရှိနေသည့် လုပ်ငန်းရှင် များ၊ ၎င်းတို့၏ လုပ်ငန်းများကို ပစ်မှတ်ထား အရေးယူ ပိတ်ဆို့မှုများ ပြုလုပ်ခဲ့ပါသည်။

ထိုလုပ်ငန်းရှင်များမှာ ဦးတေဇ၊ ဦးဌေးမြင့်၊ ဦးခင်ရွှေတို့ ဖြစ်ပြီး ၎င်းတို့၏ စီးပွားရေး ကွန်ယက်များကို ပိတ်ဆို့ခဲ့ပါသည်။ ထို့အပြင် စစ်အစိုးရပိုင် မြန်မာ့ ကျောက်မျက်ရတနာလုပ်ငန်း၊ မြန်မာ့သစ်လုပ်ငန်းနှင့် မြန်မာ့ပုလဲလုပ်ငန်းများ ကို ပိတ်ဆို့ အရေးယူခဲ့သည်။

၂၀၀၈ခုနှစ် ဇူလိုင်လတွင် ငြိမ်းချမ်းစွာ ဆန္ဒပြနေသော ဗုဒ္ဓဘာသာ ဘုန်းတော်ကြီးများကို စစ်အစိုးရတပ်များက ရက်ရက် စက်စက် သတ်ဖြတ်ခဲ့ခြင်းကို တုံ့ပြန့်သည့် အနေဖြင့် `တွမ်လန်းတော့စ် မြန်မာ့ ကျောက်စိမ်း ပိတ်ဆို့မှု အက်ဥပဒေ´ ကို အမေရိကန် ကွန်ဂရက်က တညီတညွတ်တည်း အတည်ပြုခဲ့ပြီး နောက်ထပ် ပစ်မှတ်ထား အရေးယူ ပိတ်ဆို့မှုကို လုပ်ဆောင်ခဲ့သည်။

ထိုအက်ဥပဒေအရ မြန်မာ့ကျောက်စိမ်းနှင့် ပတ္တမြားတို့အား အမေရိကန် ပြည်ထောင်စုသို့ တင်သွင်းမှုကို ပိတ်ပင်ထား သည်။ စစ်အစိုးရနှင့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးအသင်းတို့မှ ထိပ်ပိုင်း ခေါင်းဆောင်များကိုသာ ပစ်မှတ်ထား ခဲ့သော ယခင်က အရေးယူပိတ်ဆို့မှုများနှင့်မတူသည့်အချက်မှာ ထိုအက်ဥပဒေသည် လူ့အခွင့်အရေးကျူးလွန် ဖောက် ဖျက်မှုများတွင် ပါဝင် ပတ်သက်နေသော စစ်တပ်နှင့် တရားရေးဌာနများ၊ ထိုဌာနများကို စီးပွားရေးနှင့် နိုင်ငံရေးအရ အထောက်အပံ့ ပေးနေသူများကိုပါ ထည့်သွင်းပြီး ၎င်း၏ ပိတ်ဆို့ အရေးယူမှု နယ်ပယ်ကို တိုးချဲ့ထားခြင်း ဖြစ်သည်။

နိုင်ငံတကာအရေးယူပိတ်ဆို့မှု - ရွေးကောက်ပွဲလွန်အစိုးရသစ်ဆက်ခံမည့် စစ်အစိုးရ၏အမွေဆိုး

အမေရိကန်ပြည်ထောင်စု၏ အရေးယူ ပိတ်ဆို့မှုများအပြင် စစ်အစိုးရ ရင်ဆိုင်နေရသော တခြား အရေးယူ ပိတ်ဆို့မှုများမှာ ဥပရောပသမဂ္ဂ၊ သြစတြေးလျ၊ ကနေဒါနှင့် ဂျပန်နိုင်ငံတို့မှ ဖြစ်ပါသည်။ နိုင်ငံတကာ ဘဏ္ဍာရေး အဖွဲ့အစည်းများ ဖြစ်ကြသော ကမ္ဘာ့ဘဏ်၊ နိုင်ငံတကာငွေကြေးရန်ပုံငွေအဖွဲ့၊ အာရှဖွံ့ဖြိုးရေးဘဏ်တို့က စစ်အစိုးရကို ဖွံ့ဖြိုးရေး အကူအညီများ ပေးရန် ငြင်းဆန်ခဲ့ကြသည်။

အကယ်၍ ၂၀၁၀ ပြည့်နှစ် ရွေးကောက်ပွဲတွင် နိုင်ငံရေးပါတီများ အားလုံး ပါဝင် ယှဉ်ပြိုင်နိုင်မည့် အခြေအနေကောင်း တခုကို စစ်အစိုးရက ဖန်တီးပေးခြင်း မရှိပါက ထိုနိုင်ငံတကာ အရေးယူ ပိတ်ဆို့မှုများသည် ရွေးကောက်ပွဲအပြီး နောက်ပိုင်းတွင်လည်း ဆက်လက် ရှိနေပါလိမ့်မည်။

အကယ်၍ရွေးကောက်ပွဲအပြီး ဖွဲ့စည်းမည့် အစိုးရသစ်တွင် နိုင်ငံတကာ၏ အရေးယူဒဏ်ခတ်မှု ခံထားရသည့် စစ် အစိုးရ အဖွဲ့ဝင်များ၊ ကြံ့ဖွံ့ အသင်း ခေါင်းဆောင်များ၊ စစ်တပ်မှ တပ်မှူးကြီးများ ပါဝင်နေပါက ထိုအစိုးရ၏ ဂုဏ်သိက္ခာ နှင့် တရားဝင်မှုသည် အန္တရာယ်ရှိနေပေမည်။ စစ်အစိုးရက ထိုအခြေအနေမျိုးကို မလိုလားသည်မှာ ထင်ရှားပါသည်။

ဤကဲ့သို့သော အခြေအနေတွင် နိုင်ငံတကာ အရေးယူ ပိတ်ဆို့မှုများသည် စစ်အစိုးရအတွက် စိုးရိမ်စရာ ဖြစ်လာပါ သည်။ အမေရိကန် ပြည်ထောင်စုက စစ်အစိုးရနှင့် ပြန်လည် ဆက်သွယ် ဆက်ဆံလာမှု၊ ဒီမိုကရေစီ ခေါင်းဆောင်က စစ်အစိုးရနှင့် ပူးပေါင်းဆောင်ရွက်ရန် အဆင်သင့်ရှိမှုတို့သည် စစ်အစိုးရ၏ ပုံရိပ်ကို အကောင်းဘက် ဦးတည်စေနိုင်ပါ သည်။ သို့သော် စစ်ဗိုလ်ချုပ်များဘက်က လိုက်လျောမှုနှင့် ညှိနှိုင်းမှုများ မပါလျှင် ထိုအခြေအနေမျိုး ဖြစ်လာလိမ့်မည် မဟုတ်ပါ။ ။
http://www.irrawaddy.org/bur/index.php?option=com_content&view=article&id=2174:2009-11-23-04-54-36&catid=21:2009-10-08-04-58-47&Itemid=253



မတရားဥပဒေ ကျင့်သုံးတဲ့တိုင်းပြည်



အောင်ကျော်ခင် (ဝေဖန်သုံးသပ်ချက်)

၂၄ နိုဝင်ဘာ ၂၀၀၉

နအဖခေတ်မြန်မာပြည်မှာ ဒီမိုကရေစီသမားကို ကြံ့ဖွံ့က၀ိုင်းရိုက်ပြီး အရိုက်ခံရသူကို အပြစ်ပေးတာဟာ ထုံးစံလိုဖြစ်နေတယ်။ အစိုးရကိုယ်တိုင် အကြမ်းဖက်သမားဖြစ်နေတော့ တရားသူကြီးကလည်း အကြမ်းဖက်သမားအမိန့်ကို နာခံရတဲ့သဘောပဲ။ မတရားစီရင်ချက်တွေကတော့ အများကြီးပဲ။ ၂၀၀၇ ခုနှစ်က ဟင်္သာတမြို့နယ်မှာ လူ့အခွင့်အရေးသင်တန်းပို့ချဖို့ ကြိုးစားသူ (၂) ဦးကို ကြံ့ဖွံ့တွေဝိုင်းရိုက်လို့ ဒဏ်ရာအပြင်းအထန်ရပြီး ဆေးရုံတင်လိုက်ရတယ်။ ဒါပေမယ့် သူတို့ (၂) ဦးစလုံး ထောင်
(၈) နှစ်စီ ကျသွားပြီး သူတို့ကိုကူညီတဲ့ ရွာသား (၅) ဦး ထောင် (၄) နှစ်စီ ကျသွားတယ်။ ၀ိုင်းရိုက်တဲ့ကြံ့ဖွံ့ကို အရေးမယူဘူး။ ရိုက်တဲ့လူက အပြစ်မရှိ အရိုက်ခံရသူသာ အပြစ်ရှိတယ်လေ။

ဘုရားကို မှန်မှန်ရှိခိုးရင်လည်း အဖမ်းခံရနိုင်တယ်။ ဒေါ်အောင်ဆန်းစုကြည်လွတ်မြောက်ဖို့ ရွှေတိဂုံစေတီမှာ အင်္ဂါနေ့တိုင်း ဘုရားရှိခိုးပြီး ဆုတောင်းနေတဲ့ အန်အယ်လ်ဒီအဖွဲ့ဝင် နော်အုန်းလှနဲ့ အပေါင်းပါအမျိုးသမီး
(၃) ဦးကို အောက်တိုဘာလ (၃) ရက်နေ့က ဖမ်းဆီးပြီး အင်းစိန်ထောင်မှာထားတယ်။ ဘုန်းကြီးကျောင်းမှာ ဆွမ်းကပ်ပြီးအပြန် သင်္ကန်းကျွန်းမြို့နယ် စံပြဈေးမှာ အဖမ်းခံရတာတဲ့။ ပုဒ်မ ၅၀၅(ခ) အရ ဖမ်းတယ်ဆိုပဲ။ “နိုင်ငံတော်အစိုးရကိုဖြစ်စေ၊ နိုင်ငံတော်ငြိမ်ဝပ်ရေးကိုဖြစ်စေ ထိခိုက်သည့်ပြစ်မှုကို တဦးတယောက်သောသူက ကျူးလွန်ချင်လာအောင် အများပြည်သူကိုလည်းကောင်း၊ အများပြည်သူ၏ သီးခြားလူစုကိုလည်းကောင်း ကြောက်ခြင်း ထိတ်လန့်ခြင်း တခုခုဖြစ်စေရန် အကြံရှိလျှင် သို့တည်းမဟုတ် ထိုသို့ဖြစ်စေတန်ရာသည့် အကြောင်းရှိလျှင်” ထိုသူကို ထောင်ဒဏ် (၂) နှစ်ဖြစ်စေ၊ ဒဏ်ငွေဖြစ်စေ၊ ဒဏ် (၂) ရပ်လုံးဖြစ်စေ ချမှတ်ရမည်ဟု ရာဇသတ်ဥပဒေမှာ ဖော်ပြထားတယ်။

လက်ဖက်ရည်ဆိုင်မှာ စကားပြောသူကို ဖမ်းနိုင်တဲ့ဥပဒေပဲ။ တရားသူကြီးတွေရဲ့တာဝန်က ထောင်ဒဏ် (၂) နှစ် ပေးရမယ့်အမှုကို (၁၀) နှစ်ဖြစ်အောင် ကြံဖန်ပြီး အပြစ်ရှာဖို့ဖြစ်တယ်။ အရှင်သခင်ကျေနပ်အောင် ဒီမိုကရေစီသမားတွေကို ကြီးလေးတဲ့ ပြစ်ဒဏ်ချမှတ်နေတာ တရားသူကြီးတွေရဲ့ တာဝန်လိုဖြစ်နေတယ်။ ဒီလိုမတရားတဲ့ စီရင်ချက်တွေကို လူ့အခွင့်အရေးအဖွဲ့တွေက ဖော်ထုတ်နေပေမယ့် ဒီတရားသူကြီးတွေကို ဘယ်လိုအရေးယူမလဲဆိုတာကို အလေးအနက် စဉ်းစားဖို့လိုလာပြီ။ မတရားသူကြီးတွေကို ဖော်ထုတ်ဖို့လိုတယ်။ နအဖလုပ်ရပ်ကို မတရားဥပဒေနဲ့ ကာကွယ်နေတဲ့ မတရားသူကြီးတွေပဲ။

တရားစီရင်ရေးဥပဒေ (နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီဥပဒေအမှတ် ၅/၂၀၀၀ ကို ၂၀၀၀ ပြည့်နှစ် ဇွန်လ (၂၇) ရက်ထုတ်ပြန်ချိန်ကစပြီး တရားသူကြီးတွေဟာ စစ်အစိုးရအလိုဆန္ဒအတိုင်း တရားစီရင်နေရတယ်။ နအဖဥက္ကဋ္ဌဗိုလ်ချုပ်မှူးကြီး ကြပ်ပြေးသန်းရွှေက လက်မှတ်ထိုးထုတ်ပြန်တဲ့ တရားစီရင်ရေးဥပဒေဖြစ်လို့ ကြပ်ပြေးကြီး အလိုကျအတိုင်း တရားစီရင်ရတယ်လို့ ဆိုနိုင်တယ်။ နအဖခေတ် မြန်မာ့ဥပဒေဟာ ကြပ်ပြေးကြီးရဲ့ အမိန့်ပါ။ တရားရုံးချုပ်နဲ့ လက်အောက်ခံ တရားရုံးများရဲ့ လုပ်ပိုင်ခွင့်အာဏာကို ကြပ်ပြေးကြီးက သတ်မှတ်လိုက်တဲ့ တရားစီရင်ရေးဥပဒေပင်ဖြစ်တယ်။ နအဖခန့်အပ်တဲ့ မတရားရုံးချုပ်မှာ မတရားသူကြီးပဲရှိတယ်။ နအဖအစိုးရရဲ့ မတရားလုပ်မှုကို မတရားသူကြီးတွေက မှန်ကန်အောင် မလုပ်နိုင်ပါ။

အခြေခံဥပဒေရေးဆွဲပြီး အတည်ပြုလိုက်ပြီဆိုရင် တိုင်းပြည်အခြေအနေ ကောင်းသွားပြီဟု သာမန်အားဖြင့် ယူဆတယ်။
၁၉၄၇ အခြေခံဥပဒေကို ရေးဆွဲဖို့ပြင်ဆင်ရာမှာ တိုင်းရင်းသားစည်းလုံးရေးကို တစုံတခုသောအတိုင်းအတာအထိ ရယူနိုင်ခဲ့လို့ ပြည်တွင်းပြည်ပ ရိုသေလေးစားကြတယ်။ မလေးစားတဲ့ အုပ်စုတွေက လက်နက်ကိုင်တော်လှန်ရေးဆင်နွှဲကြတယ်။ မဆလခေတ် ၁၉၇၄ မှာ အတည်ပြုတဲ့ ဆိုရှယ်လစ်အခြေခံဥပဒေဟာ အာဏာရှင်စနစ်ကို ဆိုရှယ်လစ်အရေခြုံတဲ့ ဥပဒေဖြစ်ပေမယ့် နိုင်ငံတကာအသိအမှတ်ပြုမှုကို ခံရတယ်။ မဆလအစိုးရကို နိုင်ငံခြားငွေကြေး အကူအညီဝိုင်းပေးကြတယ်။

၂၀၀၈ အခြေခံဥပဒေဟာ စစ်အာဏာရှင်စနစ်ကို ဒီမိုကရေစီအရေခြုံပေးဖို့ ရည်ရွယ်တယ်။ တိုင်းရင်းသားစည်းလုံးရေးနဲ့ အမျိုးသားပြန်လည်သင့်မြတ်ရေးကို မကြိုးပမ်းဘဲ တဖက်သတ်ရေးဆွဲတဲ့ အခြေခံဥပဒေဟာ ရိုသေလေးစားမှု မရနိုင်ပါ။ အရေးပေါ်အခြေအနေကို အကြောင်းပြပြီး စစ်တပ်က အာဏာသိမ်းနိုင်တယ်ဆိုတဲ့ အခြေခံဥပဒေမျိုး မြန်မာပြည်မှာသာ ရှိမယ်ထင်တယ်။ အများသဘောတူတဲ့ သဘောတရားအပေါ် အခြေပြုတဲ့ အခြေခံဥပဒေကသာ ပြည်တွင်းပြည်ပလေးစားမှုကို ရရှိနိုင်တယ်။

မတရားတဲ့ အခြေခံဥပဒေဆိုတာကို ကမ္ဘာကသိပေမယ့် ဥပဒေရှိတာကို တိုးတက်မှုအဖြစ် သတ်မှတ်တဲ့အစိုးရလည်းရှိတယ်။ တရားသူကြီးတွေဟာ စစ်ဗိုလ်အမိန့်နာခံပြီး အရပ်သားလောကမှာ လာဘ်စားတယ်။ ငွေရှိရင် ရဲနှင့်တရားသူကြီးကို ကြိုက်သလို ခိုင်းနိုင်တယ်။ ဖမ်းဝရမ်း Arrest Warrant ကို ရောင်းစားတဲ့ခေတ်ဖြစ်တယ်။ အတိုက်အခံကို အရေးယူအပြစ်ပေးတဲ့ ဥပဒေဖြစ်တယ်။ တရားရုံးကို အင်းစိန်ထောင်ဝန်းထဲမှာ ထားတာဟာ ဒီရည်ရွယ်ချက်ကို ပြသရာရောက်တယ်။ အကျင့်ပျက် တရားသူကြီတွေဟာ နအဖစစ်ဗိုလ်ရဲ့ အမိန့်အတိုင်း စီရင်ချက်ချနေတယ်။

ငြိမ်းချမ်းစွာဆန္ဒပြသူကို ထောင်ဒဏ်အနှစ် (၅၀) ကျော်ချမှတ်တဲ့ တရားဌာနဖြစ်တယ်။ ဒေါ်အောင်ဆန်းစုကြည်အမှုမှာ အမိန့်နာခံတဲ့ တရားစီရင်ရေးစနစ်ကို ကမ္ဘာက သိသွားတယ်။ မတရားစီရင်ချက် အများအပြားရှိတဲ့အနက် ထင်ရှားတဲ့အမှု
(၂) မှုကိုသာ တင်ပြပါတယ်။ ဗိုလ်ချုပ်နေ၀င်းနဲ့ဗိုလ်ချုပ်သန်းရွှေတို့ရဲ့ သမားတော်ကြီး ဗိုလ်ချုပ် ဒေါက်တာကျော်ဝင်းရဲ့သား ဆေးကျောင်းသားထွန်းကျော်ဝင်း မောင်းနှင်တဲ့ ကားကတိုက်တဲ့အတွက် စီးပွားရေးတက္ကသိုလ်ကျောင်းသား မောင်ရဲဝင်း သေဆုံးသွားတယ်။ ဒါပေမယ့် ထွန်းကျော်ဝင်းဟာ ခေတ္တသာအထိန်းသိမ်းခံရပြီး လွတ်မြောက်သွားတယ်။ ဆရာဝန်ဖြစ်လာတဲ့အခါ ဖခင်ဖြစ်သူဒေါက်တာကျော်ဝင်း သံအမတ်လုပ်တဲ့ အင်္ဂလန်ကိုလိုက်လာပြီး လီဘာပူးဆေးရုံမှာ အမှုထမ်းတယ်။

ဒါပေမယ့် ဗြိတိသျှဆေးကောင်စီစည်းမျဉ်းဥပဒေအရ ရာဇ၀တ်ပြစ်ဒဏ်ကျခံဖူးသူဟာ ဆရာဝန်လုပ်ပိုင်ခွင့်မရှိဘူး။ ကားတိုက်မှုနဲ့ ခေတ္တထောင်ကျတာကို ဖုံးကွယ်နိုင်ရင် အင်္ဂလန်မှာ အလုပ်ရနိုင်တယ်လို့ ထွန်းကျော်ဝင်းက ထင်တယ်။ အင်္ဂလိပ်တရားဥပဒေနဲ့ နအဖ၏ မတရားဥပဒေထိပ်တိုက်တွေ့မှာကို စဉ်းစားမိဟန်မတူဘူး။ ဒေါက်တာထွန်းကျော်ဝင်းအမှုကို ကင်ဘာလေမြို့ အခြေစိုက် မြန်မာအမျိုးသား မျက်စိအထူးကုဆရာဝန်တဦးက ဗြိတိသျှဆေးကောင်စီသို့ အကြောင်းကြားတဲ့အခါမှာ စစ်ဆေးမေးမြန်းမှုတွေ ပြုလုပ်လာရတယ်။ စစ်ဆေးခံရရင် ဆရာဝန်လိုင်စင်ရုပ်သိမ်းခံရပြီး နာမည်ပျက်မှာစိုးရိမ်တာနဲ့ ဒေါက်တာထွန်းကျော်ဝင်း အမေရိကန်သို့ ရွှေ့ပြောင်းသွားတယ်။ နှလုံးအထူးကုဆရာဝန် ဒေါက်တာထွန်းကျော်ဝင်းဟာ ဆေးပညာမှာတော်ပေမယ့် ဥပဒေအထက်က စစ်ဗိုလ်လူတန်းစား အခွင့်ထူးခံတဦးပဲဖြစ်တယ်။

နောက်တမှုက တောင်ငူမြို့နယ် အမျိုးသားဒီမိုကရေစီအဖွဲ့ဝင် ဦးစောလှိုင် မောင်းနှင်တဲ့ကား ဆိုက်ကားတစီးကို တိုက်မိတယ်။ ဆိုက်ကားသမားနဲ့ ဆိုက်ကားစီး ခရီးသည် (၂) ဦး မပြောပလောက်တဲ့ ဒဏ်ရာရရှိသွားတယ်။ လျော်ကြေးပေးလို့ နှစ်ဦးနှစ်ဘက် ကျေနပ်ခဲ့ကြပေမယ့် ဦးစောလှိုင်ကို သက်ဆိုင်ရာအာဏာပိုင်က စွဲချက်တင်ပြီး တောင် (၅) နှစ်ချလိုက်တယ်။ ဦးစောလှိုင်ဟာ ရှေ့နေငှားခွင့်မရလိုက်ပါ။ ပြစ်မှုဆိုင်ရာ ကျင့်ထုံးဥပဒေနှင့် လုံးဝဆန့်ကျင်တဲ့ လုပ်ရပ်ပဲ။ ဒီလိုအမှုတွေ မြန်မာပြည်မှာ အများကြီးရှိနေတာကို တရားရုံးချုပ်က ဒေါက်တာဘွဲ့ရ ဥပဒေပညာရှင်တွေ ဘာမှမတတ်နိုင်ပါ။ ဥပဒေဒေါက်တာဘွဲ့ယူပြီး နအဖစနစ်မှာ အမှုထမ်းနေတာဟာ မိမိကိုယ်မိမိ လိမ်လည်လှည့်ဖြားနေတာသာဖြစ်တယ်။

စစ်အာဏာရှင်တွေ မတရားလုပ်နေတာကို ဥပဒေကြောင်းအရ မှန်ကန်ကြောင်း တရားရေးဌာနက ဆုံးဖြတ်နေတာဖြစ်တယ်။ ဖွဲ့စည်းပုံအခြေခံဥပဒေနဲ့ပတ်သက်ပြီး အဓိပ္ပာယ်ဖွင့်ဆိုဖို့နဲ့ ဆုံးဖြတ်ဖို့အတွက် အခြေခံဥပဒေခုံရုံးထားရှိကြောင်း ၂၀၀၈ အခြေခံဥပဒေပုဒ်မ (၃၂၁) မှာ ဖော်ပြထားတယ်။ သူများတိုင်းပြည်မှာ တရားမျှတအောင် အခြေခံဥပဒေဆိုင်ရာခုံရုံးကို ထားရတာဖြစ်တယ်။ ဒီမိုကရေစီကျင့်စဉ်ကို အာဏာရအစိုးရလိုက်နာအောင် အခြေခံဥပဒေခုံရုံးကို ထားတာပါ။ မြန်မာပြည်မှာတော့ အခြေခံဥပဒေရဲ့ခုံရုံးဟာ အစိုးရလက်အောက်ခံဌာနဖြစ်လို့ မတရားဥပဒေကျင့်သုံးနိုင်အောင် ဖွဲ့စည်းထားသလို ဖြစ်နေတယ်။

ဗမာစစ်အုပ်စုရဲ့ ဆွေမျိုးပေါက်ဖော်ကြီးကလည်း သူ့နည်းသူ့ဟန်နဲ့ မတရားလုပ်နေတာပဲ။ မတရားအလုပ်ခံရတာကို မကျေနပ်လို့ မြို့ကိုတက်ပြီး တိုင်ကြားဖို့ ကြိုးစားသူတွေကို တရုတ်ကြံ့ဖွံ့နဲ့လုံခြုံရေးဝန်ထမ်းတွေက ဖမ်းဆီးပြီး လျှို့ဝှက်စခန်းတွေမှာ ထိန်းသိမ်းထားတာ (၆) နှစ်လောက်ရှိနေပြီလို့ နိုဝင်ဘာလ (၁၁) ရက်နေ့က ထုတ်ပြန်တဲ့ လူ့အခွင့်အရေးစောင့်ကြည့်ရေးအဖွဲ့ရဲ့ (၅၃) မျက်နှာအစီရင်ခံစာမှာ ဖော်ပြထားတယ်။ အရှက်မရှိတဲ့ ဗမာတရားသူကြီးတွေက မတရားတဲ့ စီရင်ချက်ကို ဗြောင်ချမှတ်နေပေမယ့် တရုတ်ပြည်မှာတော့ ဒီလိုမတရားသူကြီးမျိုး ရှာရခက်ပုံရတယ်။ ဒါကြောင့် လူမသိအောင် လျှို့ဝှက်စခန်းတွေမှာ ဖမ်းဆီးချုပ်နှောင်ထားတာဖြစ်ပုံရတယ်။

http://www.khitpyaing.org/articles/Nov09/241109.php


ရွှေဂုံတိုင်ကြေငြာစာတမ်းအကောင်အထည်ပေါ်လာနှိုင်ရေးနှီးနှောဖလှယ်ပွဲကျင်းပခြင်း

http://ifile.it/nqw5ofc

2009-11-23soe

Mae Tao Clinic - fundraising

http://ifile.it/huseo71

Fundraising Letter 27Oct09 MTC