Saturday, June 25, 2011

ပလက်ဖောင်းဈေးသည်အဖြစ် ဘာကြောင့်သူတို့ ရပ်တည်နေကြရတာလဲ



by Ko Myoe on Saturday, June 25, 2011 at 9:47am
 

ရေးသားသူ..ဒေါက်တာခင်မောင်ညို*

 
ပလက်ဖောင်းဈေးသည်အဖြစ် ဘာကြောင့်သူတို့ ရပ်တည်နေကြရတာလဲ၊ အုပ်ချုပ်သူလူတစုက ပြည်သူတွေအတွက် အလုပ်အကိုင်တွေ မဖန်တီးပေးနိုင်ခဲ့လို့ပေါ့

ကြီးမားကျယ်ပြန့်တဲ့ မြို့ကြီး လူဦးရေ ခြောက်သန်းကျော်။ ပြောင်းရွှေ့လာရောက် နေထိုင်သူတွေပါ ပေါင်းရင် ရှစ်သန်းလောက်ရှိပြီ ထင်ရဲ့။ အနှီမြို့ကြီးတွင် ဈေးဝယ်ဈေးသည်တွေ အများကြီးရှိတာ မဆန်းပါဘူး။ မြို့လယ်ခေါင် ပလက်ဖောင်းတွေဟာ ဈေးရောင်ဌာန ဖြစ်နေသည်။

''ဆရာ ပလက်ဖောင်း ဈေးရောင်းတာကို မကြိုက်ဘူးလား''ကျွန်တော် တပည့် ချွန်တွန်းသည် ကျွန်တော့်အား တွန်းပို့နေသည်။ သို့သော် ဒီကောင့်ကို မဖြေရင်တော့ သိက္ခာကျပေရော့မည်။
''ချွန်တွန်း၊ မင်းတို့ကို ချောက်ချနေတာလား''
''မဟုတ်ပါဘူး။ ဆရာရယ် ဆရာတို့ ဂျာနယ်လစ်တွေရဲ့ သဘောထားကို သိချင်လို့ပါ''
''တို့သဘောထားကတော့ အမှန်ကို လိုလားတာပေါ့။ မင်းကို ငါမေးမယ်။ လမ်းဘေး ပလက်ဖောင်းဟာ လူသွားဖို့လား ဈေးရောင်းဖို့လား''
''ဈေးရောင်းဖို့''
''ဘာ''
''ဈေးရောင်းဖို့ မဟုတ်ဘူးလို့ ပြောဖို့ပါ။ ဆရာက ဒေါသကြီးပဲ''
''မင်းက လူသွားဖို့လို ဖြေရင် ပြီးရော။ တိုကျိုမှာက ပလက်ဖောင်းမှာ စက်ဘီး စီးလို့ရအောင် လုပ်ထားပေးတယ်။ စက်ဘီးလာရင် ဘရိတ်က ကျိကျိနဲ့ အသံမြည်တယ်။ ဒီအခါ လူတွေက ဘေးကပ်ပေးရတယ်''
''ပလက်ဖောင်းပေါ်ကဆင်း ပေးရသေးလား ဆရာ''
''ငါပြောပြီးပြီကော ပလက်ဖောင်း ဆိုတာ လူလျှောက်ဖို့''
''ဟာ ဆရာက အခုပဲ၊ စက်ဘီးသွားလို့ ရတယ်ဆို''
''အေးလေ နေရာ လုပ်ပေးထားတာကိုး''
''ဒါဆိုလည်း ဆရာရယ်၊ လမ်းဘေး ပလက်ဖောင်းမှာ လူလည်းလျှောက် ဈေးလည်းရောင်းဖို့ လုပ်ပေးရင် မကောင်းဘူးလား''
''ချွန်တွန်း၊ မင်းပညာရှိပဲ။ ကာတွန်း ဆရာတစ်ယောက်တော့ ရေးဖူးတယ်။ ခုဈေးရောင်း ပလက်ဖောင်း တွေတော့ လုံလောက်နေပြီ။ လူတွေ လမ်းလျှောက်ဖို့ ပလက်ဖောင်းတွေပဲ လုပ်ပေးဖို့ လိုသတဲ့''
''ဟုတ်ကဲ့ဆရာ။ လူတွေကလည်း အမျိုးမျိုး နည်းလမ်းရှာတယ်နဲ့ တူတယ်''
''အေးကွ၊ ရန်ကုန်ကလူတွေက လမ်းကျကျပဲ လျှောက်တော့တယ်''
''အင်းဒါကတော့ ပလက်ဖောင်းတွေဟာ လူလျှောက်လို့ အဆင်မပြေလောက်အောင် မညီမညာ ဖြစ်နေတာလည်း ပါတယ်။ နောက် အကျင့်ပါသွားပြီလေ၊ Mindset ဖြစ်သွားတာပေါ့''
''ခုပလက်ဖောင်းပေါ်က ဈေးသည်တွေ ဖယ်ရှားတာ ဆရာ ဘယ်လို သဘောထားလဲလို့ ဆရာ့ကိုမေးတာ ဆရာ ဝေ့လည်ကြောင်ပတ်ပဲ ဖြေတယ်''
''ငါဖြေပါ့မယ်ကွာ။ အချက်သုံးချက် ပါဝင်တယ်။ နံပါတ်တစ်က ပလက်ဖောင်း ကိစ္စ''
''ဟုတ်ကဲ့ဆရာ''
''ပလက်ဖောင်းတွေကို လူတွေလျှောက်ဖို့ သင့်တော်အောင် လုပ်ထားတာ မြင့်နေတယ်။ ရွဲ့နေစောင်းနေ၊ အပေါက်တွေနဲ့ လမ်းတွေ့တဲ့ အခါ ခြေတစ်လှမ်းစာမက တက်လိုက်ဆင်းလိုက် လုပ်နေတာမျိုး ဆိုရင် အဆင်မပြေဘူးပေါ့။ ဒါကတော့ ဖြည်းဖြည်း လုပ်လို့ရတယ်။

နောက်တစ်ချက်က ပလက်ဖောင်းကို မည်သူမှ အချိန်ပြည့် အခိုင်အမာ အဆောက်အဦ မဆောက်ဖို့ လိုတယ်။ အပြစ်ပြောနေတာ မဟုတ်ဘူး။ စဉ်းစားလို့ ရဖို့ပါ။ ပလက်ဖောင်းကို ပြည်သူတွေ သွားလာနိုင်အောင် ဆောင်ရွက်တဲ့ ရည်ရွယ်ချက် ထားဖို့ပါပဲ။

လက်တွန်းလှည်းတွေ စက်ဘီးတွေနဲ့ ပိတ်ဆို့ထားလို့ မရဘူး။ ပလက်ဖောင်းဘေး ကားရပ်ရင် ဒီပလက်ဖောင်းတွေ မြင့်နေရင် ကားတံခါး မလွတ်တာမျိုးကို သတိထားရမယ်။ အချုပ်ကတော့ ပလက်ဖောင်း ဆိုတာ လမ်းကို မပျက်စီးအောင် ထိန်းတဲ့ ပုခုန်းသား ဖြစ်ရသလို လမ်းလျှောက်ပြီးသွားတဲ့ လူတွေ သွားလာရေး အတွက် အဆင်ပြေရေးကို အလေးပေးတာမျိုး ဖြစ်ရတယ်''
''ဟုတ်ကဲ့ဆရာ၊ ပလက်ဖောင်းတွေမှာ ဂျပန်လို စက်ဘီးတွေ သွားလို့ရအောင် လုပ်ပေးရင် ပိုကောင်းတာပေါ့နော်''
''အေးကွ၊ ဒါက အဆင့်ဆင့် လာမှာပေါ့။ နောက်တစ်ချက် ပြောချင်တယ်။ အဲဒါက ဈေးသည်တွေ ကိစ္စပါ။ ဈေးသည်တွေက သူတို့ စားဝတ်နေရေး အတွက် ဈေးရောင်းတာ သမာအာဇီဝါပါ။ ဒါပေမယ့် လူတွေသွားတဲ့ ပလက်ဖောင်းမှာ ဘာလို့ လာရောင်းလဲ သိလား''
''လူတွေ ခလုတ်တိုက်မိတဲ့နေရာမှာရောင်းရင် ပိုရောင်းရတာပေါ့ ဆရာ''

''ဒါက အများ ယူဆချက်ပါ။ Mindset ဖြစ်နေတဲ့ ကိစ္စပါ။ တကယ်တော့ နေရာသတ်မှတ်ပြီး လူလယ်လို့လွယ် ကားရပ်လို့လွယ်တဲ့ နေရာမှာ ဈေးရောင်းရပါတယ်။ နိုင်ငံ အတော်များများမှာ Warehouse ဆိုတဲ့ ကုန်လှောင်ရုံတွေမှာ ဈေးရောင်းတာတွေ ရှိသလို Outlet Mall ဆိုပြီး မြို့ပြင် ခပ်လှမ်းလှမ်းမှာ ရောင်းတဲ့ ဈေးဆိုင်တွေ ရှိတယ်။ ဈေးသက်သာတယ်။ အသုံးတည့်တယ် ဆိုရင် လာဝယ်ကြတာပဲ။ ဒီမှာလည်း ရွှေပုစွန်ဆို သာကေတမှာ သွားစားတယ်။ ခိုင်ခိုင်ကျော်ဆို တောင်ဥက္ကလာထိ သွားစား တာပဲ။ Junction 8 တို့ Ocean တို့ကိုလည်း သွားတယ်။ ကျွန်တော်က သဘောကို ပြောပြတာပါ။ ဈေးသည်တွေကို ညနေဖက် ရုံးရှိတဲ့ ပန်းဆိုးတန်း အောက်လမ်းလို နေရာတွေ ဗိုလ်တစ်ထောင်လမ်းလို နေရာတွေမှာ ညဈေးတန်းလို လုပ်ရောင်းခိုင်းရင် လူတွေ ၀ယ်လာကြမှာပါ။ ဒါက ကျွန်တော် ဉာဏ်မီသလောက် ပြောတာပါ။ တိုင်တိုင်ပင်ပင် လုပ်ရင် ဒီထက်ကောင်းတဲ့ အကြံဉာဏ်တွေ အများကြီး ပေါ်လာမှာပါ။ လမ်းဘေး ဈေးရောင်းသူတွေ အတွက် ကျန်းမာရေး၊ လူမှုရေး ငွေကြေး အထောက်အပံ့တွေ အတွက်လည်း ကျွန်တော်တို့ စဉ်းစားရမှာပါ''
''ဟုတ်တယ်ဆရာ၊ အခု လမ်းဘေး ဈေးမရောင်းရလို့ ကလေးတွေ ကျောင်းမအပ်နိုင်ဘူးလို့ ဆိုတဲ့သူတွေ ရှိတယ်။ တကယ် ဟုတ်မဟုတ်တော့ မသိဘူးဆရာ''

''ပညာရေးဝန်ကြီးက မူလတန်း ပညာရေး မသင်မနေရ ပြုလုပ်တော့မယ်။ လတ်တလော ကျောင်းဝင်ကြေးတွေလည်း မပေးရသလောက် နည်းအောင် ကောက်ခံနေတယ်။ ဒါပေမယ့် တကယ်ဆင်းရဲရင် သူတို့မှာ တကယ် အခက်အခဲ ရှိတယ်''
''ဒါအစိုးရမှာ တာဝန် ရှိတယ်''
''ဟေ့ကောင် ချွန်တွန်း၊ မင်းက အပြုသဘောမျိုး ပြောနေတာလား၊ ကပျက်ယပျက် လုပ်နေတာလား''
''ကျွန်တော် တကယ့် စေတနာနဲ့ ပြောတာပါ''
''အေး အစိုးရမှာ တာဝန်ရှိသလို တို့တတွေမှာလည်း တာဝန်ရှိတယ်ကွ၊ အားလုံး ကူညီဆောင်ရွက်မှာပဲ''
''ဆရာကောဆရာ''
''ငါကတော့ လူတွေ သဘောပေါက်အောင် ကြိုးစားရေးနေရတာပဲ။ စာရေးဆရာတို့ ဂျာနယ်လစ်တို့ ဆိုတာ စတုတ္ထမဏ္ဍိုင်ကွ''
''ဟုတ်ကဲ့ဆရာ၊ ဒီမဏ္ဍိုင်လည်း ခိုင်မှ''
''ခွေးကောင်''

-.ဒေါက်တာခင်မောင်ညို

ထာဝရဝေကြယ်စင်ကြွေ....ဆလိုင်းကိုတင်မောင်ဦး



2 attachments — Download all attachments  
postcard-for-TMO.jpgpostcard-for-TMO.jpg
73K   View   Download  
TMO-P.pdfTMO-P.pdf
229K   View   Download  
TMO-P

၂၅.၆.၂၀၁၁ ရက်နေ့ရဲရင့်ငယ်ဒိုင်ယာရီ


http://openeyeproxy.appspot.com/yeyintnge.com
မွန်းကြပ်ခြင်းမှကင်းဝေးပါစေ။
ပြည်တွင်းမေးလ်များသို့ တဆင့်ပို့ ၍မီဒီယာတိုက်ပွဲဆင်နွဲကြပါစို့..။

2 attachments — Download all attachments  
25 Jun 2011 Yeyintnge's Diary.doc25 Jun 2011 Yeyintnge's Diary.doc
266K   View   Download  
25 Jun 2011 Yeyintnge's Diary.pdf25 Jun 2011 Yeyintnge's Diary.pdf
486K   View   Download  

http://www.mediafire.com/file/djn482bl96yhbl8/25%20Jun%202011%20Yeyintnge%27s%20Diary.doc
PDF
25 Jun 2011 Yeyintnge's Diary

Army and People Newsletter Vol 1 - No 2



Army andPeople Newsletter Vol1 No2.pdfArmy andPeople Newsletter Vol1 No2.pdf
1884K   View   Download 

Army AndPeople Newsletter Vol1 No2

စစ်ပေါ်တာအဖြစ် သေသည်ထိ နှိပ်စက်ညှင်းပန်းအသုံးချခံ ပြစ်မှုဆိုင်ရာအကျဉ်းသားများ - အပိုင်း (၂)

စနေ, 25 ဇွန် 2011
By ရော်နီညိမ်း

အစိုးရစစ်တပ်ရဲ့ စစ်ဆင်ရေးတွေမှာ အထမ်းသမား(ခေါ်)ပေါ်တာတွေ အဖြစ် အသုံးပြုဖို့၊ အမျိုးသားအမျိုးသ မီးမရွေးဖမ်းဆီးပြီး ရှေ့တန်းစစ်မျက်နှာကိုပို့ ခြင်း၊ အမျိုးသမီးတွေကို အဓမ္မပြုကျင့်ခြင်း၊ ပေါ်တာတွေကိုသတ် ပစ်ခြင်းဆိုတဲ့ အလေ့အထဟာ၊ မြန်မာ့တပ်မတော်ထဲမှာ ရာစုနှစ်တ၀က်လောက် ကြာမြင့်လာပြီဖြစ်တဲ့ လုပ်ရိုး လုပ်စဉ် ပုံမှန်လုပ်ငန်း တွေ ဖြစ်နေပါတယ်။ ဒီလိုပြင်းပြင်းထန်ထန် လူ့အခွင့်အရေးချိုးဖေါက်နေမှုတွေအပြင်၊ ဒီထက်ဆိုးဝါးတဲ့၊အကျဉ်းထောင်တွေထဲက ပြစ်မှုဆိုင်ရာအကျဉ်းသားတွေကို၊ စစ်ဘက်စီမံကိန်းတွေနဲ့ရှေ့တန်း စစ်မျက်နှာတွေမှာ သေသည်ထိ အစီအစဉ်ရှိရှိ စနစ်တကျညှင်းပန်းနှိပ်စက် အသုံးချနေတဲ့ဖြစ်ရပ်တွေ ရှိနေ တာကို၊ တပ်မှူးတပ်သားဟောင်းတွေနဲ့ ဦးရော်နီညိမ်းက မေးမြန်းဆွေးနွေး တင်ပြထားပါတယ်။

ဦးထွန်းလင်း။ ။ အဲဒီ ကျောက်ထုတ်စခန်းမှာ ထောင်ပိုင်က ပိုက်ဆံယူပြီးတော့၊ အလုပ်သက်သာတဲ့နေရာ မှာ ထားထားတဲ့ အကျဉ်းသားတွေ ရှိတယ်။ ဥပမာ၊ ကင်းသမားတို့ နောက်တန်းမှာ သန့်ရှင်းရေးလုပ်တဲ့လူတို့။ နောက်တခါ ထောင်ပိုင်ရဲ့ ကိုယ်ပိုင်စီးပွားရေးလုပ်ငန်းတွေ ရှိသေးတယ်။ ဘာလုပ်ငန်းတွေလဲဆိုတော့ ဗြုံး တောင်က ဗြုံးကျောက်တွေကို တူးပြီးတော့၊ အုတ်ရိုက်တာပေါ့နော်။ လက်ရိုက်အုတ်ခေါ်တဲ့ အုတ်ရိုက်တဲ့လုပ် ငန်း။ နောက်တခါ အကျဉ်းသား တွေထုတ်တဲ့ ကျောက်နဲ့ ထုံးဖုတ်တတ်တဲ့လူတွေကို အကျဉ်းသားတွေထဲက ရွေးထုတ်လိုက်ပြီးတော့၊ ထုံးဖိုလုပ်ငန်းကိုလည်း သူက လုပ်တယ်။ နောက်တခါ အကျဉ်းသားတွေခေါ်ပြီး၊ တောထဲမှာ ထင်းသွားခုတ်တယ်။ ရလာတဲ့ထင်းတွေကို ခုနကထုံးဖုတ်တဲ့လုပ်ငန်းမှာ သုံးတယ်။ လေဆိပ်တည် တဲ့အခါကျတော့၊ ဘိလပ်မြေဖျော်တဲ့ စက်ရုံဆိုတာ ရှိတယ်။ ဘိလပ်မြေဖျော်တဲ့ စက်ကြီးရှိတယ်။ အဲဒီစက်ကြီး မှာ အကျဉ်းသားအယောက် (၅၀)ကို သူက သွားပို့ထားတယ်။ အဲဒီအတွက် ဒီအကျဉ်းသား(၅၀)ရဲ့ အလုပ်လုပ် လို့ ရရမယ့် နေ့စဉ် လုပ်အားခအားလုံးကို၊ ထောင်ပိုင်က ရတယ်။ နောက်တခါ အဲဒီစက်ရုံမှာ ဘိလပ်မြေအိတ် တွေကို ဖွင့်ဖေါက်တဲ့အခါ၊ အိတ်မပျက်မစီးအောင် ဖေါက်တဲ့နည်းကို အကျဉ်းသားတွေကို သူက လေ့ကျင့်သင် ကြားပေးတယ်။ အကျဉ်းသားတွေက အဲဒီနည်းအတိုင်း လုပ်ရတယ်။ အဲဒီအိတ်တွေထဲမှာ ပါလာတဲ့ ဘိလပ်မြေ အခဲလေးတွေကိုလည်း သူက စုထားခိုင်းပြီး၊ သိမ်းထားခိုင်းတယ်။ စခန်းကို ပြန်သယ်လာခိုင်းတယ်။ ပြီးတော့ ထောင်ပိုင်က အကုန်သိမ်းတယ်။ အဲဒီ ဘိလပ်မြေအိတ်ခွံတွေကို လေဆိပ်ကနေ လေလံဆွဲတယ်။ အဲဒီမှာ နမ့်ဆန် အမှတ်(၇၁)အုပ် လေတပ်စခန်းရဲ့ စခန်းမှူးရယ်၊ ခလရ (၆၆) ရဲ့ တပ်ရင်းမှူးရယ်၊ အရပ်ဘက်ဆောက် လုပ်ရေးကော်ပိုရေးရှင်းက ဒီလုပ်ငန်းခွင်ရဲ့တာဝန်ခံရယ်၊ သူတို့တွေကို (လေလံဝင်ဆွဲတဲ့သူတွေက) ရမယ့် အမြတ်ထဲက မျှပြီး တော့ခွဲပေးရတယ်။ သူတို့တွေရဲ့ စီးပွားရေးပေါ့။ ခုနတုန်းက ထောင်ပိုင်ပိုက်ဆံယူထားပြီး အလုပ်သက်သာတဲ့နေရာမှာ ထားထားတဲ့သူတွေရယ် / ထောင်ပိုင်ရဲ့ ကိုယ်ပိုင်စီးပွားရေးလုပ်ငန်းတွေမှာ သွား လုပ်နေရတဲ့ အကျဉ်းသားတွေရယ်/နောက်တခါ သေသွားတဲ့အကျဉ်းသားတွေကို စာရင်းမှာအသေမပြပဲ အရှင် ဆက်ပြထားတဲ့သူတွေရယ် / အဲဒီအကျဉ်းသားတွေရဲ့ လုပ်အားတွေအတွက်ပါ၊ ကျန်တဲ့ အကျဉ်သားတွေက ကိုယ်လုပ်ရမဲ့ အလုပ်ထက် နှစ်ဆသုံးဆပိုများလာတဲ့ အလုပ်တွေကို ၀င်လုပ်နေရတယ်။ လူသုံးယောက်ကို ကျောက်တကျင်းနှုန်းနဲ့ ကျောက်ထုတ်ပေးရမယ်ဆိုတဲ့မူအရ၊ စာရွက်ပေါ်မှာရှိတဲ့ ရှိသမျှ အင်အားတွေ အကျဉ်း သားတွေအားလုံး လုပ်ရမယ့် အလုပ်အချိုးအစားအတိုင်း ကျန်တဲ့လူတွေက၊ ကျောက်ထုတ်လုပ်နေရတော့၊ မတန်တဆ အလုပ်ဒဏ်ပိပြီး အဲဒါ တွေကြောင့် သေတာတွေလည်း ပါတာပေါ့။

ဦးရော်နီညိမ်း။ ။ အဲဒီလောက် အသေအပျောက်တွေ များလာတဲ့အခါကျတော့၊ အကျဉ်းသားတွေရဲ့ မိသား စုတွေနဲ့ သက်ဆိုင်ရာတွေကလည်း ဒါတွေကို သိပြီးတော့၊ စစ်တပ်ကလုပ်နေတဲ့ (လေတပ်စခန်းတည်ဆောက် ရေး)စီမံကိန်းမှာလာလုပ်ကြရလို့ အကျဉ်းသားတွေသေကုန်ကြတဲ့ကိစ္စကို၊ အကျဉ်းဦးစီးဌာနက တုန့်ပြန်အရေး ယူတာ မလုပ်ဘူးလား။ ဒီလောက် နေ့တိုင်း နှစ်ယောက်သုံးယောက် တဖြုတ်ဖြုတ်သေနေကြတဲ့ ကိစ္စကို၊ အ ကျဉ်းသားတွေရဲ့ မိသားစုတွေကကော၊ ဘာဖြစ်နေလဲ ဆိုတာ၊ ဘာညာတွေ ဘာမှ မသိဘူးလား။

ဦးထွန်းလင်း။ ။ ဒါကြောင့်(မတန်တဆ အလုပ်ဒဏ်ပိလို့) သေတာတင်မဟုတ်ဘူး။ သူတို့က အကျဉ်းသား တွေကို ရိုက်လို့နှက်လို့ သေတာတွေလည်း ရှိသေးတယ်။ သူတို့က နည်းမျိုးစုံနဲ့ အကျဉ်းသားတွေကို နှိပ်စက် တာဗျာ။ အဲဒီထဲမှာ ဆိုးတဲ့ ထောင်မှူးတယောက်ဆိုရင်၊ စစ်တပ်ကလာတာပဲ။ လက်ထောက်ထောင်မှူး အောင် သူရ ဆိုတာပေါ့။ တော်တော်ကို ဆိုးတယ်။ အလုပ်မလုပ်နိုင်တော့လို့ သတိလစ်ပြီး လဲသွားတဲ့ အကျဉ်းသားကို ဘာလုပ်လဲဆိုတော့၊ သူက ဒီကောင် ဟန်ဆောင်တာဆိုပြီးတော့၊ တခါထဲခါချဉ်အုံကို သစ်ပင်ပေါ်ကသွားဖြုတ် လာပြီး၊ အကျဉ်းသားရဲ့ဗိုက်ပေါ်ကိုတင် တုတ်နဲ့ထိုးတယ်။ ခါချဉ်တွေက တကိုယ်လုံးပြန့်ပြီး ကိုက်ကုန်တော့ တာပေါ့။ ဒါပေမဲ့ အဲဒီအကျဉ်းသား တကယ်ကို သတိမေ့နေတုန်းပဲ။ အဲဒီမှာ ဘာလုပ်လဲဆိုတော့၊ သစ်ရွက် ခြောက်တွေ ခြေထောက်ပေါ်တင်ပြီး မီးရှိ့တယ်။ အဲဒီအခါကျတော့ အကျဉ်းသားက သတိရလာတယ်။ အလုပ် မလုပ်နိုင်တော့လို့ဆိုပြီးတော့၊ အကျဉ်းသားကို ကန်ကျောက် ရိုက်နှက်ပြီး နောက်တန်းကို ပြန်ပို့လိုက်တယ်။ ဒါပေမဲ့ အကျဉ်းသားက လမ်းမှာတင် သေသွားခဲ့တယ်။ အဲဒါမျိုးတွေ လည်း ရှိတယ်။

ဦးရော်နီညိမ်း။ ။ အဲဒီလောက် ဖြစ်နေတာကို၊ အပေါ်က သက်ဆိုင်ရာ အာဏာပိုင်တွေ ရ၀တတို့၊ မ၀တ တို့၊ စ၀တ တို့၊ ပ၀တ တို့တွေက မသိကြဘူးလား။ အဲဒီအချိန်က နိုင်ငံတော်ငြိမ်ဝပ်ပိပြားမှုတည်ဆောက်ရေး အဖွဲ့ အုပ်ချုပ်နေတဲ့ အချိန်ကြီးမှာ။

ဦးထွန်းလင်း။ ။ သူတို့က ဝေစားမျှစားက လွဲရင်၊ ကျန်တဲ့ကိစ္စတွေ ဘာမှ ပြဿနာရှာဖို့ မရှိဘူးလေ။ လူ ကြီးတွေကလည်း ဒီကျောက်ထုတ်စခန်းကို ခဏခဏလာကြတယ်။ လာလို့ရှိရင် ထောင်ပိုင်က လူကြီးတွေကို ဝေစားမျှစား ခွဲတမ်းတွေ ပေးလိုက်တယ်ဆိုရင်၊ အကုန်လုံး အိုကေ။ ကျန်တဲ့ဟာတွေ အကုန်လုံး ပြီးသွားတာ ပဲ။

ဦးရော်နီညိမ်း။ ။ လူကြီးတွေဆိုတာ၊ ဘယ်သူတွေလဲ ခင်ဗျ။ စစ်တပ်ကလား ခင်ဗျ။

ဦးထွန်းလင်း။ ။ ဗျူဟာမှူး လာတယ်။ ဒုတိုင်းမှူး လာတယ်။ ပြည်ထဲရေး ဒုဝန်ကြီးလာတယ်။ နောက်တခါ အကျဉ်းဦးစီးဌာန ညွှန်ချုပ်တို့၊ ဒုညွှန်ချုပ်တို့၊ အဲဒါတွေ လာတယ်။

ဦးရော်နီညိမ်း။ ။ ကိုထွန်းလင်းက အဲဒါတွေ ဖြစ်ပျက်နေတဲ့ ကျောက်ထုတ်စခန်း အနီးတ၀ိုက်မှာ နေလို့၊ ဒါ တွေ သိနေရတဲ့ အခါကျတော့၊ အဲဒီလောက် မတော်မတရားတွေ ဖြစ်ပြီး၊ မသေသင့်ပဲ သေနေကြရပြီးတော့ လူ့အခွင့်အရေးတွေလည်း ဆုံးရှုံး၊ အကျဉ်းသားမှာလည်း သူ့ရှိတဲ့ အခွင့်အရေးနဲ့ မနေရတဲ့အပြင်၊ တခါထဲ လူ တွေဟာ မသေသေအောင် ညှင်းပန်းနှိပ်စက်ခံရ၊ မနိုင်ဝန် အလုပ်တွေ လုပ်ကြရပြီးတော့မှ၊ ထောင်မှူးထောင် ပိုင်တွေရဲ့ ကိုယ်ပိုင်စီးပွားရေးလုပ်ငန်းတွေအတွက် လုပ်ပေးကြရရင်းနဲ့၊ သေကုန်ကြတာကို၊ လာနေကြတဲ့ လူ ကြီးတွေက မသိကြဘူးလား။

ဦးထွန်းလင်း။ ။ သိတာပေါ့ဗျာ။ မသိပဲနဲ့ ဘယ်ရှိပါ့မလဲ။ ဒါပေမဲ့ သူတို့ကလည်း ဒီခေတ်ဒီကာလ အဲဒီလိုပဲ လုပ်စားနေကြတာဆိုတော့၊ အကုန်လုံးက ဘယ်သူဘာပြောပြော ဘာမှ ပြောလို့ကို မရတော့ဘူး။ အရေးကြီး ဆုံးက သတ်မှတ်ထားတဲ့အချိန်မှာ ဒီလုပ်ငန်း (လေတပ်စခန်းဌာနချုပ်တည်ဆောက်ရေး) ပြီးသွားဖို့ပဲ အဓိက။ အရင်တုန်းကလို ငွေဝယ်ကျွန်ခေတ် ဆိုရင်တော့၊ သူတို့ ဒီလို လုပ်မှာ မဟုတ်ဘူးပေါ့။ ကျွန်ဆိုတာ ၀ယ်ရမယ် ဆိုရင်၊ သူတို့ မွဲသွားမှာပေါ့။ အခုဟာက (အကျဉ်းသားတွေကို) လိုသလောက်ကို မှာလို့ ရတယ်လေ။ (အကျဉ်း သားတွေ) သေလဲ ကိစ္စမရှိဘူး။ သူတို့ကပြောတာ ရှင်းရှင်းလေး။ လူတယောက် သေသွားတာ ဘာမှ ပြဿနာ မရှိဘူးတဲ့။ ငါတို့က စာရွက်လေးပေါ်မှာ စာလေးရေးလိုက်ရင် ပြီးသွားတယ်တဲ့။ ဒီစခန်းထဲမှာ မွေးထားတဲ့ နွား တွေ ဘာတွေ သေသွားရင်ကမှ ပြဿနာရှိတယ် တဲ့။ အဲဒီလိုကို ပြောတာဗျာ။

ဦးရော်နီညိမ်း။ ။ အဲဒါက လေတပ်စခန်း ဆောက်လုပ်ရေးစီမံကိန်းဖြစ်နေတော့၊ အခု မတော်မတရားကိစ္စ တွေမှာ လေတပ်ရဲ့ ပါဝင်ပတ်သက်မှုကော ရှိလား ခင်ဗျ။

ဦးထွန်းလင်း။ ။ လေတပ်က ပါဝင်ပတ်သက်မှုတော့ မရှိဘူး။ ဒါပေမဲ့ အဲဒီအနားမှာ အမြောက်တပ်ရှိတယ်။ ဒီအမြောက်တပ်က အဲဒီကျောက်ထုတ်စခန်းအတွက် လုံခြုံရေးယူပေးတယ်။ အကျဉ်းဦးစီးဌာန ကျောက်ထုတ် တဲ့ ကျောက်တောင်ရဲ့ပတ်ဝန်းကျင်မှာ လုံခြုံရေးယူပေးတယ်။ အကျဉ်းသားတွေ ထွက်ပြေးတာကို သူတို့က လည်း ၀ိုင်းဖမ်းတယ်။ တခါက မိနေတဲ့ အကျဉ်းသားကို ဖမ်းလိုက်တယ်ပေါ့ဗျာ။ အဲဒါကို မဟုတ်ဘူး။ သေနတ် နဲ့ ပစ်သတ်လိုက်တယ်။ မိနေပါပြီ။ ဘာလို့လဲဆိုတော့ အကျဉ်းသားက ခြေကျဉ်းကြီးနဲ့လေဗျာ။ အဲဒီတော့ ဒီ အကျဉ်းသားက ဘယ်ပြေးနိုင်မှာလဲ။ လူက အားကမရှိရတဲ့ကြားထဲ ခြေကျဉ်းကြီးတဘက်နဲ့။ အဲဒါကိုလိုက်ဖမ်း တော့ မိနေတဲ့ဥစ္စာကို၊ ပစ်သတ် ပစ်လိုက်တယ်။

ဦးရော်နီညိမ်း။ ။ အဲဒါက အမြောက်တပ်က လုပ်တာဆိုတော့၊ ကျောက်ထုတ်လုပ်ရေးစခန်းက ထောင်ပိုင် အရာခံဗိုလ်ကြီးအနေနဲ့က၊ သူ့မှာ လုပ်အားတယောက်လျော့သွားတာ၊ ဘယ်လိုမှ ပြဿနာ မရှိဘူးလား။

ဦးထွန်းလင်း။ ။ မရှိဘူး။ ဒီအကျဉ်းသားတွေ အကျဉ်းဦးစီးဌာနကနေ လိုသလောက်သူမှာလို့ ရတယ်လေ။ နောက်တခါလဲ၊ ထွက်ပြေးသွားတဲ့အကျဉ်းသားတယောက်ကို နမ့်ဆန်မြို့ရဲစခန်းက မိပြီးတော့၊ ကျောက်ထုတ် စခန်းကို သွားပြန်အပ်တယ်။ ရဲစခန်းမှူးက သွားပြန်အပ်တာကို၊ ထောင်ပိုင်က ဘာလုပ်လဲဆိုတော့၊ တခါထဲ လက်ဝါးကပ်တိုင်လို ဥစ္စာမျိုးပေါ်မှာ ဒီအကျဉ်းသားကို ကိုယ်တုံးလုံးချွတ်ပြီးတော့မှ၊ ကြိုးနဲ့ချည်တယ်။ ကြိုး ချည်ပြီးတော့မှ၊ ဒီစခန်းတခုလုံး က အိုးတွေသံစည်ပိုင်းတွေထဲမှာစွန့်ထားတဲ့ မစင်တွေအပေါ့တွေအလေးတွေ ကို အကုန်လုံးကိုဖျော်။ ပြီးတော့ အကျဉ်းသားရဲ့ခေါင်းကနေလောင်း။ ရှမ်းပြည်က အေးရတဲ့အထဲ၊ ဘေးကနေ နှီးဖျာနဲ့ ဒီအကျဉ်းသားကို ယပ်ခပ်တဲ့ကောင်က ခပ်။ ရိုက်တဲ့ကောင်က ရိုက်။ အဲဒီလိုလုပ်တာ။ နောက်ဆုံးကျ အဲဒီအကျဉ်းသားဟာလဲ၊ သုံးရက်လောက်နေတော့ သေသွားတာပါပဲ။ ဒါကအောက်က ကိုယ်တိုင်ကိုယ်ကျလုပ် တယ်ပေါ့။ အထက်က ကြီးကြပ်တဲ့ကောင်တွေကလည်း၊ အားပေးအားမြှောက်လုပ်။ အထက်ကကောင်တွေက အောက်ကကောင်တွေဆီကနေ သူတို့စားရအောင်လုပ်ပေးနေရင် ပြီးရောပဲ။ အောက်ကဘာလုပ်လုပ်၊ မျက်စေ့ စုံမှိတ်ပြီး မသိချင်ယောင်ဆောင် နေကြတာပေါ့။

ဦးရော်နီညိမ်း။ ။ လူသားတွေ စိတ်ဓါတ်မှ ရှိသေးရဲ့လား။ အကုန်လုံး လူမဆန်တဲ့ အလုပ်တွေ လုပ်နေကြ တာ။ လုပ် နေရတဲ့အပေါ်မှာ တကယ် ဘယ်လို ဖြစ်နေလဲ။ သူတို့တွေဟာ စိတ်လိုလက်ရ ပျော်ပျော်ရွှင်ရွှင်နဲ့ ဒီအလုပ်ကြီးကို နှစ်ခြိုက်အားရကျေနပ်ဝမ်းသာစွာနဲ့ လုပ်နေကြတဲ့သဘောလား။ မိုးလင်းလာလို့ တနေ့ရောက် လာရင် အကျဉ်းသားတွေ ကို ရိုက်မယ်နှက်မယ် သတ်ပစ်မယ်၊ ဒီဥစ္စာဟာ နေ့တိုင်းနေ့တဓူဝ လုပ်နေတဲ့ကိစ္စမို့ ရိုးနေတဲ့အတွက်၊ သူတို့ ဘယ်လိုမှ မနေတဲ့ သဘောလား။ ကျနော် နားမလည်နိုင်ဘူး။

ဦးထွန်းလင်း။ ။ သူတို့အတွက်ကတော့ used to (အကျင့်ပါ) ဖြစ်နေပြီဗျ။ လုပ်ရိုးလုပ်စဉ်ပဲ။ အကျဉ်းသား တင် မဟုတ်သေးဘူး။ ခုနက ပြောတဲ့ စစ်တပ်က ပြောင်းလာတဲ့ ထောင်ပိုင်ဦးစိုးအောင်ဟာ၊ ဘယ်လောက်ထိ ဆိုးလဲဆိုရင်၊ သူ ကားမောင်းသွားတယ် ပေါ့ဗျာ။ သူနောက်က အရပ်သားကားတစီးက သူ့ကားကို ကျော်တက် သွားတယ်။ အဲဒါ ကျော်တက်ရပါ့မလား ဆိုပြီး၊ နောက်ကနေ မမှီ မှီအောင် အတင်းလိုက်မောင်းတယ်၊။ အဲဒါ က နမ့်ဆန်မြို့နဲ့ မိုးနဲမြို့နဲ့ သွားတဲ့ကြားက လမ်းခလယ်မှာ ဟိုင်းဖတ်ဆိုတဲ့ ရွာကြီး ရှိတယ်ဗျာ။ အဲဒီရွာက “မြတ်ဟိန်း” ထမင်းဆိုင်မှာ ကားသမားက ထမင်းဝင်စားတော့၊ ထောင်ပိုင်က မှီသွားတယ်။ အဲဒါ သူ့ကားကို ကျော်တက်ရပါ့မလား ဆိုပြီး၊ ထိုးမလို့ ကြိတ်မလို့ လုပ်တာ၊ ဆိုင်ကလူတွေက ၀ိုင်းဆွဲရတယ် ဗျာ။ ကဲ အဲဒါ ဘယ်လိုလုပ်မလဲ။

ဦးရော်နီညိမ်း။ ။ ဘုရင်စိတ် ပေါက်ကုန်တာကိုး။

ဦးထွန်းလင်း။ ။ စစ်တပ်ကဆိုရင် ဘာပဲလုပ်လုပ် အကုန်လုံး၊ ပြီးနေတာကိုး ဗျ။

ဦးရော်နီညိမ်း။ ။ ပါလီမန်ဒီမိုကရေစီခေတ်၊ ၁၉၅၀ ခုနှစ်တွေရဲ့ နှောင်းပိုင်းတွေမှာ၊ ကျူးကျော်လာတဲ့ တရုတ်ဖြူကို မောင်းထုတ်တဲ့ စစ်ဆင်ရေးကြီးတွေမှာ၊ အထမ်းသမား ခေါ် ပေါ်တာတွေကို ဘယ်လိုနည်းနဲ့ ခေါ်ယူခဲ့သလဲ ဆိုတာကို တော့၊ မြန်မာ့တပ်မတော်ရဲ့ စတုတ္ထမြောက် ကာကွယ်ရေးဦးစီးချုပ် ဖြစ်ခဲ့သူ အငြိမ်းစားဗိုလ်ချုပ်ကြီး သူရဦးတင်ဦးက အခုလို ပြောခဲ့ဘူးပါတယ်။

ဗိုလ်ချုပ်ကြီးတင်ဦး။ ။ အခုလို အဓမ္မလုပ်အားပေး ဆွဲတာ မရှိဘူး ဗျ။ ကျနော်တို့တုံးက သွားတာက၊ အဲဒီ တုန်းက ပါလီမန်ဒီမိုကရေစီခေတ်က၊ သူတို့ဖွဲ့ထားတဲ့ TUCB (Trade Unions Confederation of Burma မြန်မာနိုင်ငံ အလုပ်သမားသမဂ္ဂများအဖွဲ့ချုပ်) တို့ ဘာတို့ရှိတယ်။ Trade Union (အလုပ်သမားသမဂ္ဂ)တွေ ရှိ တယ်။ အဲဒီတော့ သူတို့က နေပြီးတော့ သူတို့နည်းသူတို့ဟန်နဲ့ ၊ မြို့နယ်တွေ မြို့တွေမှာရှိတဲ့ Trade Unionနဲ့ ဆက်သွယ်ပြီးတော့ အလှည့်နဲ့ လုပ်အားပေးတာတွေ ရှိတယ်။ ပေးတဲ့အခါမှာ သူတို့ကိုလည်း ကျနော်တို့က သတ်မှတ်ထားတဲ့ရည်ရွယ်ချက်အတိုင်းဘဲ၊ တစ်ယောက်ကို ဘယ်သူ့မှ နှစ်ပတ်ကျော်သုံးပတ်ကျော် မခိုင်းဘူး။ ဟိုကအသစ်ဝင်လာရင် သူတို့ကို လဲပေးလိုက်တယ်။ ပြီးတော့ သူတို့ရရမယ့်ငွေနဲ့ပတ်သက်တာအားလုံးလည်း၊ အထောက်အပံ့အကုန်လုံးအပြည့်ပေးတဲ့အပြင် ရိက္ခာကိုက ကျနော်တို့နည်းတူလို ပေးတဲ့ရိက္ခာမျိုးဗျ။ အဲဒီတုန်း က ဘယ်လိုပဲပြောပြော၊ ဒီလို၊ ပေါ်တာတွေ ယူပြီးလာရငြားသော်လည်းပဲ၊ ဒီလူတွေကို ကျနော်တို့က စစ်တပ် က ချွေးတပ်ဆွဲတာ၊ မဟုတ်ဘူးဗျ။ အဲဒီတော့၊ သိပ် ခြားနားတယ်။ အခုဟာက ဒီလို မဟုတ်ဘူး။ တခါထဲ ဟို ရုပ်ရှင်ရုံပိတ်ဆွဲ၊ ဟိုဟာပိတ် ဆွဲ၊ လမ်းပိတ်ဆွဲ။ အဲဒါတွေက မဟုတ်ဘူး။ ကျနော်တို့တုံးက၊ အဲဒီလိုကို မရှိဘူး။ အဲဒါမျိုး၊ ကြားလည်း မကြားဘူးဘူး။ ကျနော်တို့ ပြောလိုက်တာက၊ အဲ့ဒီမှာ သက်ဆိုင်ရာဒေသမှာ ရှိနေတဲ့ Trade Union ကို။ သက်ဆိုင်ရာအုပ်ချုပ်ရေးပိုင်းကို။ ကျနော်တို့က သူတို့ Trade Union ကို တိုက်ရိုက်ပြော တာ မဟုတ်ဘူး။ အုပ်ချုပ်ရေးပိုင်းကို ကျုပ်တို့ ဒီ စစ်ဆင်ရေးခွင်အတွက်၊ အထမ်းသမားနဲ့ ပတ်သက်လို့ တပ်ခွဲ တစ်ခွဲမှာ နှစ်ဆယ်၊ အစိတ်လိုတယ်။ ဒါကြောင့်မို့၊ အားလုံးပေါင်းရင်တော့ (၈၀)/(၁၀၀) မျှလိုတယ် ဆိုရင်၊ ကျနော်တို့က သွားပြီးတော့၊ အိမ်တွေမှာ ဆွဲရတာ မဟုတ်ဘူး ဗျ။ အဲဒီ အုပ်ချုပ်ရေးပိုင်းကို ပြောလိုက်ရင်၊ အုပ်ချုပ်ရေးပိုင်းက လူက၊ သူ Trade Union တို့ ဘာတို့နဲ့၊ စီစဉ်ပြီးတော့၊ သူတို့ဟာ သူတို့ voluntarily လာ တာဗျ။ War Office (စစ်ရုံးချုပ်) က ထုတ်ပြန်ထားတဲ့ WORKAI တို့ Order တို့က၊ သူတို့နဲ့ ပတ်သက်တဲ့ သတ်မှတ်ချက်တွေက၊ အပြည့်ဗျ။ နောက်တစ်ခုက၊ သူတို့ကိုလည်း ကျနော်တို့က ကတိတစ်ခုပေးတာက၊ ဥပမာ Phase One (စစ်ဆင်ရေးရဲ့ပထမအဆင့် )ပြီးရင်၊ မင်းတို့ကို ပြန်ပို့မယ်၊ နောက်လူက Phase Two (စစ်ဆင်ရေးရဲ့ ဒုတိယအဆင့်)မှာ၊ ဘယ်လောက် ရောက်လာမယ်။ အဲဒီတော့၊ သူတို့ ရောက်လာရင်၊ မင်းတို့ Phase One ပြီးရင် ပြန်ကြ။ ဆိုတော့၊ သူတို့ကလည်း၊ သူတို့ အသိက Phase One ပြီးရင် ပြန်ရမယ်ဆိုတာ သိတဲ့အတွက်၊ သူတို့ကိုလည်း ကတိအတိုင်း၊ ကျနော်တို့က၊ ပြန်စေရတယ်။ မပြန်လို့လည်း မရဘူးဗျ။ မပြန် ရင် ခင်ဗျားTrade Unionက လွှတ်တော်တက်ပြီး၊ အော်မှာ။ ခင်ဗျား ဒါ ဒီမိုကရေစီဗျ။ ပြည်သူလူထုရဲ့ အသံ က အဓိက။ အဲဒီတော့ ကျနော်တို့အားလုံးက၊ စစ်သည်တော်တွေ ဖြစ်ငြားသော်လည်းပဲ၊ ကျနော်တို့ ကိုယ်တိုင် က ဗီဇ၊ မိဘဖြစ်လာခဲ့တဲ့ ပြည်သူပြည်သားရဲ့ သဘောသဘာဝကို၊ ခန္ဓာကိုယ်ထဲမှာ၊ “ငါ” ပြည်သူပြည်သား၊ “ငါ” ပြည်သူပြည်သား၊ “ငါ” ပြည်သူပြည်သား၊ “ငါ” လူတန်းစားတစ်ရပ် မဟုတ်ဘူး၊ “ငါ” လူတန်းစားတစ်ရပ် မဟုတ်ဘူး၊ ဆိုတာ၊ ရင်ထဲမှာ အစဉ်သိမ်းပိုက်ပြီးသား ဖြစ်ရမယ်ခင်ဗျ။

ဦးရော်နီညိမ်း။ ။ အငြိမ်းစားဗိုလ်ချုပ်ကြီး သူရဦးတင်ဦ ပြောကြားခဲ့တာပါ။ လူ့အခွင့်အရေးချိုးဖေါက်မှုတွေ ကို မြန်မာ့တပ်မတော်က ကျူးလွန်နေမှုတွေဟာ၊ ၁၉၆၀ခုနှစ်တွေက စစ်ဆင်ရေးတွေမှာ စတင်ခဲ့ကြတာ ဖြစ်ပါ တယ်။ တပ်မတော်ဟာ စစ်အောင်ဖို့ကိုသာ အဓိကထားပြီး၊ စစ်ရေးအမြင်နဲ့ လုပ်ဆောင်ခဲ့သမျှတွေထဲက၊ ပြည် သူလူထုနဲ့ ပတ်သက်ပြီး လူ့အခွင့်အရေးချိုးဖေါက်မှုတွေကို ကျူးလွန်ခဲ့ကြတာမှာ၊ တံခါးပိတ်ဝါဒကျင့်သုံးခဲ့တဲ့ ၁၉၆၂ ခုနှစ်ကစလို့၊၊ ပြင်ပကမ္ဘာ နဲ့ထိတွေ့မှု နည်းပါးလှတဲ့အတွက်၊ ဒါတွေဟာ လူ့အခွင့်အရေးချိုးဖေါက်မှုတွေ လို့ အသေအချာ နားလည်သိရှိခြင်း မရှိတာကလည်း၊ အကြောင်းရင်းတရပ် ဖြစ်နေပါတယ်။ စစ်ရေးအရ စစ် အောင်ဖို့သာ အဓိကဖြစ်တယ်လို့၊ ယူဆကြတာကြောင့် စစ်ဆင်ရေးအတွက် (လူထုကို) အထမ်းသမားပေါ်တာ တွေအဖြစ် အတင်းအဓမ္မ ခေါ်ဆောင်သွားတာမျိုးဟာ၊ အပြစ်မရှိဘူးလို့ ခံယူလာကြရာဂာနေ၊ တစစ၊ ရန်သူ့အ ပေါ် စစ်နိုင်ဖို့ ဘာပဲလုပ်လုပ်၊ တရားတယ် ဆိုတဲ့ အတွေးအခေါ်မျိုးတွေနဲ့ ပိုမိုဆိုးဝါးလာတဲ့ လူ့အခွင့်အရေးချိုး ဖေါက်မှုတွေကို ကျူးလွန်ခဲ့ကြတာ ဖြစ်ပြီးတော့၊ တပ်မတော်ထဲမှာ တပ်မတော်သားချင်းဖြစ်စေ၊ ပြည်သူလူထု အပေါ်မှာ ဖြစ်စေ၊ လူ့အခွင့်အရေးချိုးဖေါက်မှုတွေကို၊ ဖြစ်ပျက်ခဲ့သမျှ ဖြစ်ရပ်မှန်အတိုင်း အများပြည်သူ သိရှိ ထားခြင်းအားဖြင့်၊ နောင် ဒါမျိုးတွေ မဖြစ်ပေါ်ရေးအတွက် ၀ိုင်းဝန်းဆောင်ရွက်ကြရာမှာ၊ အထောက်အကူ ဖြစ် ပါတယ်။ လက်ရှိ မြန်မာ့တပ်မတော်ရဲ့စစ်ခေါင်းဆောင် အသစ်တွေဟာ၊ တရုတ်ဖြူကျူးကျေိာမှုကိုတွန်းလှန် တိုက်ထုတ်ခဲ့စဉ် ကာလက၊ တပ်မတော်အပေါ် ပြည်သူလူထုရဲ့ ယုံကြည်ကိုးစားမှုမျိုး ပြန်လည်ရရှိအောင်၊ တပ်မတော်ထဲမှာ စိတ်ဓါတ်ရေးရာပြုပြင်ပြောင်းလဲမှုတွေ လုပ်ဆောင်ကြရေးကို စဉ်းစားလာကြလာလေမလား၊ မျှော်လင့်ရင်းနဲ့ပဲ၊ ဒီသီတင်းပတ်အတွက် “တပ်မှူးတပ်သား ပြောစကား”အပတ်စဉ်ကဏ္ဍကို၊ ဒီမှာတင်ပဲ ရပ်နား ခွင့်ပြုပါ။ ကျနော် ရော်နီညိမ်း ပါ။
.............................................................................

စနေ, 18 ဇွန် 2011
စစ်ပေါ်တာအဖြစ် သေသည်ထိ နှိပ်စက်ညှင်းပန်းအသုံးချခံ ပြစ်မှုဆိုင်ရာအကျဉ်းသားများ - အပိုင်း (၁)

By ရော်နီညိမ်း

အစိုးရစစ်တပ်ရဲ့ စစ်ဆင်ရေးတွေမှာ အထမ်းသမား(ခေါ်)ပေါ်တာတွေအဖြစ် အသုံးပြုဖို့၊ အမျိုးသား အမျိုး သမီးမရွေး ဖမ်းဆီးပြီး ရှေ့တန်းစစ်မျက်နှာကို ပို့ခြင်း၊ အမျိုးသမီးတွေကို အဓမ္မပြူကျင့်ခြင်း၊ ပေါ်တာတွေကို သတ်ပစ်ခြင်း ဆိုတဲ့ အလေ့အထဟာ၊ မြန်မာ့တပ်မတော်ထဲမှာ ရာစုနှစ်တ၀က်လောက် ကြာမြင့် လာပြီဖြစ်တဲ့ လုပ်ရိုးလုပ်စဉ် ပုံမှန်လုပ်ငန်းတွေ ဖြစ်နေပါတယ်။ ဒီလို ပြင်းပြင်းထန်ထန် လူ့အခွင့်အရေးချိုးဖေါက်နေမှုတွေ အပြင်၊ ဒီထက်ဆိုးဝါးတဲ့၊ အကျဉ်းထောင်တွေထဲက ပြစ်မှုဆိုင်ရာအကျဉ်းသားတွေကို၊ စစ်ဘက်စီမံကိန်းတွေနဲ့ ရှေ့တန်းစစ်မျက်နှာတွေမှာ သေသည်ထိ အစီအစဉ်ရှိရှိ စနစ်တကျ ညှင်းပန်းနှိပ်စက် အသုံးချနေတဲ့ ဖြစ်ရပ် တွေ ရှိနေတာကို၊ တပ်မှူးတပ်သားဟောင်းတွေနဲ့ ဦးရော်နီညိမ်းက မေးမြန်းဆွေးနွေး တင်ဆက်ထားပါတယ်။

ဦးရော်နီညိမ်း။ ။ ကချင်ပြည်နယ်မှာ အစိုးရတပ်တွေက ကချင်လွတ်လပ်ရေးတပ်မတော် KIA (Kachin Idependence Army) အပေါ် ထိုးစစ်ဆင်တိုက်ခိုက်မှုတွေ ပြီးခဲ့တဲ့ ဇွန်လ (၁၁) ရက်နေ့မှာ စတင်ခဲ့ ပြီးတဲ့နောက်၊ အင်းစိန်ထောင်ထဲက ပြစ်မှုဆိုင်ရာအကျဉ်းသားတွေကို ရာနဲ့ချီပြီး ခေါ်ထုတ်သွားခဲ့တာကို တွေ့ မြင်လိုက်ရတဲ့ မျက်မြင်သက်သေတွေ ရှိနေခဲ့ပါပြီ။ ဒီသီတင်းပတ်မှာ တင်ပြမယ့်၊ “စစ်ပေါ်တာအဖြစ် သေသည် ထိ နှိပ်စက်ညှင်းပန်း အသုံးချခံ ပြစ်မှုဆိုင်ရာအကျဉ်းသားများ - အပိုင်း (၁)” ခေါင်းစဉ်နဲ့ အကြောင်းအရာရဲ့ နောက်ခံအဖြစ်၊ ပြီးခဲ့တဲ့ ဇွန်လ (၁၆)ရက် နေ့က ဗီအိုအေ၀ိုင်းတော်သူ မသင်းသီရိ တင်ဆက်ခဲ့တဲ့ သတင်းထဲ ကနေ၊ အရင်ဆုံး ကောက်နှုတ်တင်ပြပါရစေ။

မျက်မြင်သက်သေ။ ။ ဒီနေ့မနက် (၈)နာရီခွဲလောက်က လာထုတ်သွားတယ်။ ဆယ်ဘီးကားကြီး နှစ်စီးနဲ့ အင်းစိန်ထောင်ကနေ အရှေ့ဘက်ကို မောင်းသွားတာတွေ့ရတယ်။ ကားပေါ်မှာ လုံခြုံရေးအတွက် လုံ ထိန်းတော်တော်များများ လိုက်သွားတာလည်း တွေ့ရတယ်။ မနေ့ကတုန်းက ညဘက်ထဲက ဒါတွေက အကုန် လုံး စီပြီးတော့၊ ကားပေါ်ကိုတင်ဖို့ အဆင့်သင့်ပဲလေ။ မနက်ကျတော့ ကားပေါ်အကုန်လုံး ဆွဲတင်ပြီးတော့၊ အိပ်ထောင်ဖွင့်တာနဲ့၊ ကားပေါ်တင်ပြီးတော့ တခါထဲကို မောင်းထွက်သွားကြတာ။

ဦးရော်နီညိမ်း။ ။ ဒီလို ရာနဲ့ချီပြီး အကျဉ်းသားတွေကို ခေါ်ထုတ်သွားပြီဆိုရင်၊ ဘာတွေဖြစ်လာတော့ မယ်ဆိုတာကိုလည်း၊ နှစ်ရှည်နိုင်ငံရေးအကျဉ်းသားဟောင်း အငြိမ်းစားဗိုလ်ကြီးဦးဝင်းထိန်က ဗီအိုအေကို သုံး သပ်ပြခဲ့ပါတယ်။

ဗိုလ်ကြီးဝင်းထိန်။ ။ ဒီလိုအချိန်မှာတော့ အကျဉ်းသားတွေကို ကားတွေနဲ့ လာထုတ်သွားပြီ ဆိုရင် တော့၊ များသောအားဖြင့်၊ စစ်ပေါ်တာ ပါသွားဖို့များတယ်။ ဦးတို့ ထောင်ထဲမှာ အတွေ့အကြုံအရ ဆိုရင် တော့၊ စစ်ပေါ်တာ ပါသွားဖို့များတယ်။ အန်ကယ်က ထောင် ငါးထောင်မှာ နေခဲ့ရတော့၊ ဒီ စစ်ပေါ်တာခေါ် တော့မယ် ဆိုရင်၊ လွတ်ခါနီး (၁) နှစ် လောက်အလို၊ နောက်ပြီးတော့မှ ပြစ်ဒဏ်ကျထားတာလည်း (၄) နှစ်၊ (၅) နှစ်၊ (၃) နှစ် (၂) နှစ်၊ အဲဒီလို ပြစ်ဒဏ်တိုတဲ့ လူတွေကိုပဲ ခေါ်တယ်။ ပြစ်ဒဏ်ကြီးတဲ့လူတွေ မခေါ်ဘူး။ နိုင်ငံရေး အကျဉ်းသားတွေကို ထောင်ပြောင်းမယ် ဆိုရင်၊ ညကတည်းက လာပြောထားပြီး၊ နောက်တနေ့ မနက်ခင်း မှာ၊ အေးအေးဆေးဆေး လာထုတ်သွားတာ။ အခုလို ကားတွေနဲ့လာထုတ်သွားတာ၊ ကမန်းကတန်းထုတ်သွား တာမျိုးဆိုရင်တော့၊ ဒါ စစ်ပေါ်တာဖြစ်ဖို့ကသေချာသလောက်ပဲ။

ဦးရော်နီညိမ်း။ ။ စစ်ပေါ်တာ အဆွဲခံကြရတဲ့ လူမသိသူမသိ မျက်နှာမွဲ ပြစ်မှုဆိုင်ရာအကျဉ်းသားတွေ ဟာ၊ ဥပဒေအရ တရားစီရင်ထားပြီးပြီဖြစ်တဲ့၊ မိမိတို့ကျခံကြရမယ့် ပြစ်ဒဏ်ထက် ပိုပြီး ကြမ်းတမ်းပြင်းထန်တဲ့ စစ်ဘက်ဆိုင်ရာလုပ်ငန်းတွေက အလုပ်ကြမ်းတွေ၊ ရှေ့တန်းစစ်မျက်နှာတွေမှာ ရက်ရက်စက်စက် ညှင်းပန်းနှိပ် စက်ပြီး၊ အသက်ဆုံးရှုံးသွားသည်အထိ ခိုင်းစေခြင်းခံကြရတာကိုလည်း၊ မသေလို့ ထောင်ထဲပြန်ရောက်လာသူ တွေဆီက ကြားသိရပုံကို၊ ဦးဝင်းထိန်က ပြောပြပါတယ်။

ဗိုလ်ကြီးဝင်းထိန်။ ။ ကိုယ်တိုင် အဲဒီပုဂ္ဂိုလ်မျိုး စစ်ပေါ်တာပါတဲ့လူနဲ့ တွေ့ခဲ့ဘူးတယ်။ အဲဒီစစ်ပေါ် တာတွေဟာ ရက်ရက်စက်စက် အခိုင်းခံရတယ်။ မိုင်းနင်းတယ် ဆိုလို့ရှိရင်၊ ခြေထောက်ပြတ်တယ်၊ လက်ပြတ် တယ်၊ အစာရေစာ ၀၀လင်လင် ကျွေးတာမျိုး မရှိဘူး၊ တရိစ္ဆာန်တွေလို ဆက်ဆံခံရတယ်။ တခါတလေကျ သေခါနီးအကျဉ်းသားတွေဆိုရင် သူတို့ (ခိုင်းတာတွေ မလုပ်နိုင်တော့သဖြင့်) သည်းမခံနိုင်တော့ပဲ၊ တမင်သက် သက် သတ်ပစ်လိုက်တာတွေ ရှိတယ်ဆိုတာ၊ ကြားခဲ့ဘူးတယ်။ နောက်တခါ အခုလိုဟာမျိုး၊ အန်ကယ့်အတွေ့ အကြုံအရဆိုရင်၊ လူ (၂၀၀) ခေါ်ထုတ်သွားပြီ ဆိုရင်၊ ဒီလူတွေကို ရှစ်လတနှစ် ခိုင်းပြီး၊ ပြန်လာရင်၊ လူ (၅၀) တောင် ပြန်ပါမလာတော့ဘူး။ ကျန်တဲ့ (၁၀၀) ကျော်လောက်က၊ ရှေ့တန်းမှာ သေကြေလက်ပြတ်ခြေထောက် ပြတ်၊ အသက်တွေဆုံးရှုံး။ အဲဒါတွေက အန်ကယ်ကိုယ်တိုင် အဲဒီပုဂ္ဂိုလ်တွေနဲ့ တွေ့လို့၊ ပြောနိုင်တာ။

ဦးရော်နီညိမ်း။ ။ အပြည်ပြည်ဆိုင်ရာလေဆိပ်ဆောက်လုပ်ရေးစီမံက်ိန်း ဆိုင်းဘုတ်တင်ပြီးမှ၊ လေ တပ်အခြေစိုက်စခန်းကြီး တည်ဆောက်ခဲ့တဲ့ စီမံကိန်းတခုမှာ၊ ဦးဝင်းထိန်ကြားသိခဲ့ရတာမျိုးတွေထက် မယုံနိုင် လောက်အောင် ပိုမိုဆိုးဝါးလှစွာ၊ တရိစ္ဆာန်တွေလို လူမဆန်အောင် ရက်ရက်စက်စက် ညှင်းပန်းနှိပ်စက်ခိုင်းစေ ပြီးမှ၊ ပြစ်မှုဆိုင်ရာအကျဉ်းသားတွေကို အစီအစဉ်ရှိရှိ စနစ်တကျ နေ့စဉ် သတ်ပစ်နေတာကို၊ ကိုယ်တွေ့ကြုံခဲ့ရ သူ စစ်သည်ဟောင်း ဦးထွန်းလင်းရဲ့ ပြောစကားတွေကို ဆက်ပြီး တင်ဆက်သွားပါမယ်။

ဦးရော်နီညိမ်း။ ။ ၁၉၈၃ ခုနှစ်၊ ရန်ကုန်မြို့ အာဇာနည်ဗိမ္မာန်ကို မြောက်ကိုးရီးယားသူလျှိုတွေ ဗုံးခွဲ တိုက်ခိုက်ခဲ့စဉ်က၊ အဲဒီ ဗုံးခွဲတရားခံသူလျှိုတွေကို၊ လိုက်လံလက်ရဖမ်ဆီးခဲ့တာမှာ၊ ကိုယ်တိုင်ပါဝင်ခဲ့သူ တဦး ဖြစ်တဲ့၊ သန်လျင်မြို့ ခလရ(၉၀)က စစ်သည် ဦးထွန်းလင်းဟာ၊ နောက်ပိုင်းမှာ တပ်မတော်က ထွက်ခွာလာခဲ့ တဲ့ စစ်သည်ဟောင်းတဦး ဖြစ်လာခဲ့ပါတယ်။ သူဟာ ရှမ်းပြည်နယ်တောင်ပိုင်း လွိုင်လင်ခရိုင် နမ့်ဆန်မြို့မှာရှိ တဲ့ ဆွေမျိုးသားချင်းတွေရှိရာကို သွားရောက်ခဲ့ပြီး၊ ခြံလုပ်ငန်းယာလုပ်ငန်းတွေနဲ့ ဘသ၀စ်ထူထောင်ဖို့ ကြိုး ပမ်းနေတဲ့အချိန်မှာပဲ၊ သူ့ရဲ့ ပတ်ဝန်းကျင်က တပ်မတော်တပ်ရင်းတပ်ဖွဲ့တွေနဲ့ပတ်သက်နေတဲ့ မတော်မတရား လုပ်မှုတွေ သူ့ရဲ့အတွေ့အကြုံတွေကို အခုလို စပြီး ပြောပါတယ်။

( ဗီအိုအေမှ ၂၀၁၀ နိုဝင်ဘာ (၂၆) နှင့် ၂၀၁၀ ဒီဇင်ဘာ (၃) တို့တွင် ထုတ်လွှင့်ခဲ့သည့် "တပ်မှူးတပ်သား ပြောစကား" - အမှတ်စဉ် (၀၃၆) နှင့် (၀၃၇) ၊ " မြန်မာ-မြောက်ကိုးရီးယားဆက်ဆံရေး နှင့် အာဗာနည်ဗိမ္မာန် တိုက်ခိုက်ခံရမှု" - အပိုင်း (၁) နှင့် (၂) တို့တွင်၊ ဦးထွန်းလင်း၏ ပြောစကားများကို ဖတ်ရှု / နားဆင် နိုင်ပါ သည်။)

ဦးထွန်းလင်း။ ။ ရှမ်းပြည်နယ်တောင်ပိုင်း လွိုင်လင်ခရိုင် နမ့်ဆန်မြို့ပေါ့။ အဲဒီနမ့်ဆန်မြို့မှာ အမှတ်(၆)ရပ်ကွက်က ဆေးရုံနားမှာ ကျနော် နေခဲ့တယ်။ ကျနော်တို့ (၆)ရပ်ကွက်မှာ သင်္ချိုင်းတခုရှိတယ်။ ဒီမြို့မှာ သင်္ချိုင်းက (၆)ရပ်ကွက်မှာပဲ ရှိတယ်။ အဲဒီသင်္ချိုင်းမှာ အကျဉ်းသားအလောင်းတွေကို လာလာပြီးမြှုပ် တာပေါ့။ ကျင်းတကျင်းကို နှစ်လောင်းသုံး လောင်းထပ်ပြီး မြှုပ်နေတာ၊ နေ့စဉ်ရက်ဆက် ဖြစ်နေတော့၊ မြို့ လူထုက “ဒီလို လာလာမြှုပ်နေရင် ငါတို့မြို့ခံတွေကို မြှုပ်ဖို့နေရာရှိတော့မှာ မဟုတ်ဘူး၊ ဒါကို တားမှ ဖြစ်မယ်” ဆိုပြီး၊ နောက်ဆုံးမှာ တားယူခဲ့ရတာပေါ့။ (အကျဉ်းသား)အလောင်းတွေကို ဒီမှာ လာမမြှုပ်ဖို့၊တောထဲသွားမြှုပ် ကြဖို့၊ အဲဒီလို တားခဲ့ကြရတယ်။

ဦးရော်နီညိမ်း။ ။ အကျဉ်းသားဆိုတာကို ဘယ်လိုလုပ် အသေအချာ သိလဲခင်ဗျ။ အကျဉ်းသားဝတ်စုံ ဖြစ်တဲ့ အပေါ်အဖြူ အောက်အဖြူ သဘောမျိုးလား။ ဘယ်လိုလုပ်ပြီး ရပ်ကွက်လူထုက သတိထားမိလဲ ခင်ဗျ။ ဒီအလောင်းတွေဟာ အကျဉ်းသားတွေ ဆိုတာကို။

ဦးထွန်းလင်း။ ။ လာမြှုပ်တာက လယ်ထွန်စက်နောက်တွဲပေါ်မှာ တင်လာတယ်။ အလောင်းတွေကို ထော်လာ ဂျီနောက်တွဲနဲ့ အဲဒီလို တင်လာတယ်။ တချို့တွေဆို ဒီအတိုင်း ခြေကျဉ်းတွေ ဖြုတ်မရလို့၊ ဒီအတိုင်း ခြေကျဉ်းကြီးတန်းလန်းနဲ့ မြှုပ်တဲ့အလောင်းတွေတောင် တွေ့ရတယ်။

ဦးရော်နီညိမ်း။ ။ အဲဒီအလောင်းတွေကို ဘယ်ဖွဲ့က သယ်လာတာလဲခင်ဗျ။ အကျဉ်းဦးစီးဌာနကလား။ ဒါမှမဟုတ် ဘယ်အဖွဲ့အစည်းကလဲ ခင်ဗျ။

ဦးထွန်းလင်း။ ။ အကျဉ်းဦးစီးဌာနက သယ်တာ။ အကျဉ်းဦးစီးဌာနပိုင်လယ်ထွန်စက်တွေနောက်တွဲ တွေနဲ့ သယ်တာ။ မောင်းတဲ့လူကလည်း အကျဉ်းဦးစီးဌာန ယူနီဖေါင်းနဲ့ပဲ။

ဦးရော်နီညိမ်း။ ။ အကျဉ်းသားတွေ နေ့စဉ်သေဆုံးနေပြီးတော့၊ ဒီသင်္ချိုင်းထဲမှာ လာပြီး မြှုပ်နှံနေတဲ့ ကိစ္စဟာ၊ နမ့်ဆန်မြို့မှာ ရှိနေတဲ့ အုပ်ချုပ်မှုပိုင်းအာဏာပိုင်တွေနဲ့ ဘယ်လို ပတ်သက်မှုရှိလဲ၊ သို့မဟုတ် ဘယ် လို အဖွဲ့အစည်းတွေနဲ့၊ ဒီကိစ္စနဲ့ ဘယ်လို ဆက်နွယ်နေပါလဲ ခင်ဗျ။

ဦးထွန်းလင်း။ ။ အဲဒီ အကျဉ်းဦးစီးဌာန ကျောက်ထုတ်လုပ်ရေးစခန်းဆိုတာက၊ နမ့်ဆန်မြို့မှာ ရှိတဲ့ စစ်ဗျူဟာနဲ့၊ အရှေ့ပိုင်းတိုင်းစစ်ဌာနချုပ် (ထိုအချိန်က တိုင်းမှူးမှာ ကြည်း ၉၈၂၇ ဗိုလ်ချုပ်တင်ထွဋ် OTS 29) တို့က တိုက်ရိုက်ကြီးကြပ်ကွပ်ကဲတာ ခင်ဗျ။ အဲဒီမှာရှိတဲ့ ခလရ(၆၆)က တပ်ရင်းမှူးတို့၊ ဒီဗျူဟာမှူးတို့က ဒီ ကျောက်ထုတ်စခန်းကို အမြဲ လာနေကြတာ။ ရဟတ်ယာဉ်ပျက်ကျလို့သေသွားခဲ့တဲ့ ဒုတိယဗိုလ်ချုပ်ကြီးတင်ဦး ကိုယ်တိုင်လည်း လာသွားဘူးတယ်။ ဒီလေဆိပ်စီမံကိန်းအတွက် တွန်းပြီးလုပ်နေတဲ့ ကာလ ဖြစ်နေတာကိုး။

ဦးရော်နီညိမ်း။ ။ ကျောက်ထုတ်လုပ်ရေးစခန်းနဲ့ လေဆိပ်စီမံကိန်းနဲ့ တပ်မတော်နဲ့ ဘယ်လိုပတ်သက်ဆက်နွယ်နေလဲဆိုတာ၊ နည်းနည်းရှင်းပြပေးပါဦး။

ဦးထွန်းလင်း။ ။ အဲဒီမှာဆိုင်းဘုတ်က ဘယ်လိုရေးထားလဲဆိုတော့၊ “နမ့်ဆန်မြို့ အပြည်ပြည်ဆိုင် ရာ လေဆိပ်စီမံကိန်း"၊ နောက်တခါ အဲဒီအောက်ကမှ “အကျဉ်းဦးစီးဌာန၊ ကျောက်ထုတ်လုပ်ရေးစခန်း” လို့ ရေးထားတယ်။ ဒါပေမဲ့ ဒီလေဆိပ်ကြီးပြီးသွားတဲ့ ၁၉၉၅ မှာကျတော့၊ အဲဒီလေဆိပ်ကြီးဟာ “နမ့်ဆန် လေတပ် စခန်းဌာနချုပ်” လို့ ဖြစ်သွားတာ ခင်ဗျ။

ဦးရော်နီညိမ်း။ ။ အပြည်ပြည်ဆိုင်ရာလေဆိပ်ကော မဟုတ်တော့ဘူးလား။

ဦးထွန်းလင်း။ ။ မဟုတ်တော့ဘူး ဗျ။ အဲဒီမှာ စပြီး ကျောက်ထုတ်တုန်းကတော့၊“နမ့်ဆန်မြို့အပြည် ပြည်ဆိုင်ရာ လေဆိပ်စီမံကိန်း” ဆိုပြီး၊ ကျောက်တွေထုတ်ခဲ့တာ။ လေဆိပ်ကြီးပြီးသွားတော့၊ လေတပ်က ဗိုလ် မှူးချုပ်ဘဋ္ဌေးချစ် (DSA 3) က ပထမဆုံးလာပြီးတာဝန်ကျတဲ့ လေတပ်စခန်းမှူးပေါ့။ “နမ့်ဆန် လေတပ်စခန်း ဌာနချုပ်”ကို သူနဲ့စပြီး ဖွင့်ခဲ့တာခင်ဗျ။

ဦးရော်နီညိမ်း။ ။ ဦးထွန်းလင်းပြောတဲ့ ကျောက်ထုတ်စခန်းက အကျဉ်းသားတွေ နေ့စဉ်သေဆုံးနေ တဲ့ကိစ္စနဲ့ အခု လေဆိပ်လို့ နံမည်ပြပြီးတော့မှ လေတပ်စခန်းဌာနချုပ် တည်ဆောက်တာနဲ့၊ ဘယ်လိုပတ်သက် ဆက်နွယ်နေလဲ ခင်ဗျ။

ဦးထွန်းလင်း။ ။ စစ်တပ်က ဒီဥစ္စာကို လျှို့ဝှက်ပြီး လုပ်ခဲ့တာပေါ့ဗျာ။ ဒီအကျဉ်းသားတွေကို အသုံး ပြုပြီး၊ လေတပ်စခန်းတခု ဆောက်တာပေါ့။ ဒါကို ပထမပိုင်းမှာ ဖုံးဖုံးဖိဖိနဲ့လုပ်ပြီးတော့၊ အပြည်ပြည်ဆိုင်ရာ လေဆိပ်စီမံကိန်း ဆိုပြီး ခေါင်းစဉ်တပ်ထားပုံ ရပါတယ်။ ဒီစီမံကိန်းကိုက တော်တော်ကို ပြင်းပြင်းထန်ထန် နေ့ ရောညရော လုပ်တာလေ။ အဲဒီလိုလုပ်တာမှာ အကျဉ်းသားတွေကို အသုံးပြုပြီးလုပ်တော့၊ အကျဉ်းသားတွေ သေကုန်တာပေါ့။

ဦးရော်နီညိမ်း။ ။ ဘယ်လိုဖြစ်ပြီး သေကုန်တာလဲ။ ရာသီဥတုဒဏ် မခံနိုင်လို့လား။ အဟာရ မပြည့်လို့ လား။ အလုပ်တွေ အရမ်းလုပ်ရလို့လား။ ဘယ်လိုကြောင့် နေ့စဉ် နှစ်ဦးသုံးဦး အဲဒီလို တဖြုတ်ဖြုတ် ကွယ်လွန် နေကြရတာလဲ ခင်ဗျ။

ဦးထွန်းလင်း။ ။ ရာသီဥတုကြောင့်တော့ မဟုတ်ဘူး။ ဘာလဲဆိုတော့ အဟာရချို့တဲ့တာနဲ့ အလုပ် ကို လူတယောက် လုပ်နိုင်တဲ့ဝန်ထက်ကို ပိုပြီး ခိုင်းတာပေါ့။ နောက်တခါ ရိုက်နှက်နှိပ်စက်ညှင်းပန်းတာတွေ ခံကြရတာရယ်။ အဲဒါတွေကြောင့် သေကုန်ကြတာ။

ဦးရော်နီညိမ်း။ ။ ကျနော်တို့ နားလည်ထားတာက အကျဉ်းဦးစီးဌာနဆိုတာ ပြည်ထဲရေးဝန်ကြီးဌာန အောက်က၊ တပ်မတော်(လေ)က ကာကွယ်ရေးဝန်ကြီးဌာနအောက်က။ ၀န်ကြီးဌာနနှစ်ခု မတူဘူး။ တကယ် လို့ ကာကွယ်ရေးဝန်ကြီးဌာနက ဒီလေတပ်စခန်းကို တည်ဆောက်ဖို့၊ အလုပ်သမားလိုချင်တယ် ဆိုရင်၊ တခြား နည်းနဲ့ ရှာရမယ်။ ဒါပေမဲ့ ပြည်ထဲရေးဝန်ကြီးဌာနနဲ့ ဆက်ပြီး လုပ်လိုက်တဲ့ဟာမှာ၊ ဒီကျောက်ထုတ်စခန်းက နဂိုတုန်းကကော ဒီနေရာမှာ ရှိလား ခင်ဗျ။ ဒီ ဒီလေတပ်စခန်းကို မဆောက်ခင်က။

ဦးထွန်းလင်း။ ။ မရှိဘူး၊ မရှိဘူး ခင်ဗျ။

ဦးရော်နီညိမ်း။ ။ အဲဒီ အကျဉ်းသားတွေက ဘယ်ကနေ ရောက်လာကြတာလဲ ခင်ဗျ။

ဦးထွန်းလင်း။ ။ အဲဒီ အကျဉ်းသားတွေကို နယ်ပေါင်းစုံကနေ ပို့တာပဲ။ ရန်ကုန်အင်းစိန်ထောင်က နေ ပို့တယ်။ မန္တလေး အုတ်ဖိုထောင်ကနေ ပို့တာရှိတယ်။ သာယာဝတီထောင်က ပို့တာရှိတယ်။ ကျနော်တို့နဲ့ သိကျွမ်းသွားတဲ့ ထောင်ဝင်စာ လာပို့နေကြတဲ့ မိသားစုတွေတောင် ရှိပါတယ်။ အဲဒါ ပဲခူးတိုင်းအနောက်ခြမ်း ရေကြည်ခြောက်ခမ်းလို့ ခေါ်ကြတဲ့ ရွာတွေကပေါ့။ ရွာလုံးကျွတ် သစ်ကိစ္စနဲ့ ထောင်ကျကြတာ။ အပက (၃) အမှုနဲ့ ထောင်ကျကြတဲ့သူတွေ။ သူတို့အုပ်စုတွေဆို အသေအပျောက် အများဆုံးပဲ။

ဦးရော်နီညိမ်း။ ။ ဘယ်လိုဖြစ်တာလဲခင်ဗျ။ နည်းနည်းပြောပြပေးပါဦး။ ဒီအတိုင်းဆို နမ့်ဆန်လေတပ် စခန်းဌာနချုပ် ဆိုတာ၊ လူ့အသက်တွေ များစွာနဲ့ ရင်းနှီးတည်ဆောက်ထားရတဲ့ သဘောဖြစ်နေတယ်။ ဒီဥစ္စာ က ရာဇ၀င်လိုက်ကြည့်ရင် ဘယ်လိုရှိမယ်ဆိုတာ၊ သိချင်စရာဘဲလေ။

ဦးထွန်းလင်း။ ။ အဲဒီ ကျောက်ထုတ်လုပ်စခန်းရဲ့ ထောင်ပိုင်က ဦးစိုးအောင် တဲ့။ သူ့ ရာဇ၀င်က သူက အကျဉ်းဦးစီးဌာနက မဟုတ်ဘူး။ သူက စစ်တပ်ကနေ အကျဉ်းဦးစီးဌာနကို ရောက်လာပြီးတော့၊ သူ့ကို တမင်တကာ စစ်တပ်ကနေ ရွေးပြီး ခေါ်လိုက်တဲ့ သဘောရှိပါလိမ့်မယ်။

ဦးရော်နီညိမ်း။ ။ အသွင်ပြောင်းဆိုတာက အဲဒီခေတ်မတိုင်ခင်ထဲက ရှိနေတာပဲ။ တပ်ကနေ အရပ် ဘက်ဝန်ကြီးဌာနတွေအောက်က ဦးစီးဌာနတွေ ကော်ပိုရေးရှင်းတွေကို လာနေကြတာပဲ။ ဦးစိုးအောင်က တပ် မတော်ကနေ ဘာအဆင့်နဲ့ လာခဲ့တာလဲ ခင်ဗျ။

ဦးထွန်းလင်း။ ။ တပ်မတော်(ကြည်း)ကနေ အရာခံဗိုလ်အဆင့်နဲ့ လာခဲ့တာပါ။ ကျနော်ဆိုလိုချင်တာ က၊ သူ့ကို ရွေးခေါ်တယ်ဆိုတာက၊ တခြား သူ့အဆင့်နဲ့ တူတဲ့ အကျဉ်းဦးစီးဌာနက ထောင်ပိုင်တွေ အများကြီး ရှိတယ်။ သူ့ကို ဘာကြောင့် ရွေးခေါ်လဲဆိုတော့၊ ဒီစီမံကိန်းကိစ္စမှာ အကျဉ်းသားတွေက အသေအပျောက်များ မယ်၊။ အကျဉ်းသားတယောက် သေသွားတယ်ဆိုရင်၊ စာရွက်ပေါ်ကစာရင်းထဲမှာက သေချင်မှသေတာ။အသေ မပြပဲ ထားတာတွေ ရှိတယ်။ ဥပမာ - အကျဉ်းသားတယောက် သေသွားတယ်၊ အဲဒီ အကျဉ်းသားဟာ နောက် သုံးလကြာရင် လွတ်တော့မယ့်သူဖြစ်တယ် ဆိုရင်၊ အဲဒီအကျဉ်းသားကို စာရွက်ပေါ်ကစာရင်းထဲမှာ အသေမပြ သေးဘူး၊ အရှင် ဆက်ပြထားတဲ့ အတွက် အဲဒီ အကျဉ်းသားအတွက် ရနေတဲ့ရိက္ခာကို သူက (ထောင်ပိုင်ဦးစိုး အောင်က) ထုတ်စားတယ်။ အဲဒီ အကျဉ်းသား ထုတ်လုပ်ရမယ့် ကျောက် (အချိုးအစား quota) ကို၊ ကျန်တဲ့ အကျဉ်းသားတွေက ထုတ်ပေးရတယ်။

ဦးရော်နီညိမ်း။ ။ အဲဒီ အကျဉ်းသားက တကယ် မရှိတော့ဘူး။ ဆုံးသွားပြီပေါ့။

ဦးထွန်းလင်း။ ။ သေသွားပြီ။ နောက်သုံးလ ကျရင်၊ အဲဒီ အကျဉ်းသားကို ပြန်လွှတ်လိုက်ပြီဆိုပြီး၊ သူက စာရွက်ပေါ်က စာရင်းထဲမှာ “အလွတ်” ပြလိုက်တယ်။

ဦးရော်နီညိမ်း။ ။ ရှေ့သီတင်းပတ် စနေနေ့မနက်ခင်းနဲ့ညနေခင်းတွေမှာ “စစ်ပေါ်တာအဖြစ်သေသည် ထိ နှိပ်စက်ညှင်းပန်း အသုံးချခံ ပြစ်မှုဆိုင်ရာအကျဉ်းသားများ - အပိုင်း (၂)” ကို စောင့်မျှော်နားဆင်ကြပါ။ ကျနော် ရော်နီညိမ်းပါ။
http://www.voanews.com/burmese/news/

တရုတ် ကုန်သွယ်မှုလုံခြုံရေး



 စနေ, 25 ဇွန် 2011
By ဦးအောင်ခင် & မညိုညိုလွင်

တောင် တရုတ်-ပင်လယ်မှာ တရုတ်ရေတပ်က ကြီးစိုးဖို့ ကြိုးပမ်းနေချိန်မှာ ပထမဦးဆုံးသော လေယာဉ်တင်သင်္ဘောကြီးကို ရှေ့ လမှာ အစမ်းမောင်းကြည့်ပြီး ရှေ့ နှစ်မှာပြီးစီးမယ်ဆိုတဲ့ သတင်းထွက်လာတာကြောင့် တရုတ်စစ်တပ် အလှမ်းမီတဲ့နေရာတွေ တဖြည်းဖြည်းကျယ်ပြန့်လာပုံကို သုံးသပ်ကြပါတယ်။ အရှိန်အဟုန်နဲ့ တိုးတက်နေတဲ့ အကျိုးစီးပွားကို ကာကွယ်ဖို့ စစ်အင်အားတိုးချဲ့ နေတာကို လေယာဉ်တင်သင်္ဘောကြီးက သက်သေပြသလို ဖြစ်နေပါတယ်။ တကမ္ဘာလုံးမှာ ပျံနှံနေတဲ့ အမေရိကန်အကျိုးစီးပွားကို လေယာဉ်တင် စစ်သင်္ဘော (၁၁) စီးက စောင့်ရှောက်နေတာကို တရုတ်က အားကျနေပုံရပါတယ်။
အနောက်တိုင်းနဲ့ တရုတ်ပြည်ကို ကုန်သွယ်ရာမှာ ပင်လယ်ရေကြောင်း သယ်ယူပို့ဆောင်ရေးဟာ အဓိကအခန်းက ပါဝင်နေပါတယ်။ တရုတ်ကုန်သင်္ဘောတွေကို ကာကွယ်စောင့်ရှောက်နိုင်ဖို့အတွက် တရုတ်စစ်သင်္ဘောတွေ အဆက်မပြတ် လှည့်လည်နိုင်အောင် ထောက်ပံ့ရေးဆိပ်ကမ်းတွေရှိဖို့ လိုအပ်တာကို မြန်မာ၊ သီရိလင်္ကာ နဲ့ ပါကစ္စတန် တို့က ဖြည့်ဆည်းပေးပါလိမ့်မယ်။ ရေကြောင်းကိုချည်း အားမကိုးဘဲ ကုန်းလမ်းကုန်းသွယ်ရေး မြှင့်တင်ဖို့အတွက် တရုတ်-ဥရောပ အမြန်ရထားလမ်းရှိဖို့ လိုပါတယ်။ ဒီရည်ရွယ်ချက်ကို ဦးတည်ပြီး အဝေးပြေး ရထားလမ်းစီမံကိန်း အကောင်အထည် ဖော်နေပါတယ်။
ဥရောပ-အရှေ့ အလယ်ပိုင်း အာရပ်ဒေသနဲ့ တရုတ်ပြည်ကို ရထားလမ်းဆက်သွယ်ဖို့ ကုလသမဂ္ဂ က အရင်ဆုံး စိတ်ကူးခဲ့ပေယ့် လက်တွေ့ အကောင်အထည်ဖော်နေသူဟာ တရုတ်အစိုးရ ဖြစ်ပါတယ်။ တိဗက် ရထားလမ်းကို နိပေါလ်နိုင်ငံအထိ ဆက်ဖောက်နေပြီး လာအို၊ မြန်မာ၊ ထိုင်း၊ ကမ္ဘောဒီးယား၊ ဗိယက်နမ် နဲ့ စင်္ကာပူကို ရထားလမ်းနဲ့ ဆက်သွယ်ဖို့ စီစဉ်နေပါတယ်။ တရုတ်၊ ဥရောပ၊ ရထားလမ်း ဖြတ်သွားမယ့်နိုင်ငံတွေကို စည်းရုံးသိမ်းသွင်းထားပြီး ဖြစ်ပါတယ်။ ရထားလမ်းစီမံကိန်းရဲ့  ဆက်စပ်နေပုံကို စာတမ်းပြုစုထားသူဟာ သုတေသီ Dr. Christina Lin ဆိုသူ တရုတ်အမျိုးသမီး ဖြစ်ပါတယ်။ စစ်တပ်သုံးနိုင်အောင် ပြင်ဆင်ထားတဲ့ ရထားဘူတာရုံ တထောင်ကျော် ရှိပါတယ်။ ရထားလမ်းကို စစ်တပ်လှုပ်ရှားရေးနဲ့ စစ်တပ်ထောက်ပံ့ရေး လမ်းကြောင်းအဖြစ် တရုတ်က အသုံးပြုနေတာ ဖြစ်ပါတယ်။
တရုတ်-တိဗက် ရထားလမ်းကို ၂၀၀၆ ခုနှစ်မှာ ဖွင့်လှစ်နိုင်တာကြောင့် ၂၀၀၈ တိဗက် ဆန္ဒပြပွဲ ဖြစ်ပွားနေတဲ့အခါမှာ နှစ်ရက်အတွင်း စစ်အင်အား ဖြည့်တင်းနိုင်ခဲ့တာလို့ သုံးသပ်ကြပါတယ်။ တရုတ် ဆောက်လုပ်မယ့် ရထားလမ်းတွေဟာ ကုန်သွယ်ရေးအတွက် အရေးပါသလို စစ်ရေးအတွက်လည်း အရေးကြီးပါတယ်။ တရုတ်အနောက်ပိုင်းပြည်နယ် ရှင်းဂျန် ကလာတဲ့ ရထားလမ်းကို Kyrgyzstan, Tajikistan နဲ့ Afghanistan တို့ကို ဖြတ်သန်းပြီး အီရန်နိုင်ငံထဲအထိ ဆောက်လုပ်ဖို့ တရုတ်က စီးမံကိန်းချထားပါတယ်။ ဒီ ရထားလမ်းဖောက်လုပ်ဖို့ သက်ဆိုင်ရာနိုင်ငံက သယ်ယူပို့ဆောင်ရေးဝန်ကြီးတွေ လွန်ခဲ့တဲ့ အောက်တိုဘာ က Tajikstan နိုင်ငံ၊ Dushanbe မှာ လက်မှတ်ထိုးကြပါတယ်။ အီရန်ကနေ အီရတ်၊ ဆီးရီးယား နဲ့ တာကီကို ဆက်သွယ်မယ့် ရထားလမ်းဆောက်ဖို့ တရုတ်က အီရန်ကို ဒေါ်လာသန်းနှစ်ထောင် ထောက်ပံ့ပါလိမ့်မယ်။
တချိန်တည်းမှာပဲ နေတိုး (NATO) ကာကွယ်ရေးအဖွဲ့ဝင်တဦးဖြစ်တဲ့ Turkey နဲ့ တရုတ်ပြည်ကို အမြန်ရထားနဲ့ ဆက်သွယ်မယ့် စီမံကိန်းကိုလည်း သဘောတူထားပါတယ်။ တာကီ ကို ဖြတ်သန်းမယ့် အမြန်ရထားလမ်းနဲ့ တာကီ- ပါကစ္စတန် ရထားလမ်း စီမံကန်းမှာ Bulgaria နိုင်ငံပါ ပါဝင်ဖို့ တရုတ်က ဖိတ်ခေါ်ထားပါတယ်။ Bulgaria ဆိပ်ကမ်း၊ လေဆိပ် နဲ့ မြစ်ကြောင်တွေကို သုံးခွင့်ပြုရင် ငွေအများအပြား ထုတ်ချေးမယ်လို့ တရုတ်ဘက်က ကမ်းလှမ်းထားပါတယ်။ တရုတ်-တာကီ ပူးတွဲ မဟာဗျူဟာဆိုပြီး စစ်ရေးလေ့ကျင့်ခန်း ဆက်လုပ်ရာမှာလည်း ဒီ ရထားလမ်းဟာ အသုံးဝင်မယ်လို့ ဆိုပါတယ်။ တရုတ်-ဥရောပ ရထားလမ်းဟာ အနောက်ပိုင်းပြည်နယ်တွေ ဖွံ့ဖြိုးရေးနဲ့ လုံခြုံရေးအတွက် ရည်ရွယ်ပါတယ်။
ယူနန်၊ ရှင်းဂျန် နဲ့ တိဗက်မှာ ကားလမ်း၊ ရထားလမ်းတွေ တိုးချဲ့ ဆောက်လုပ်တာကြောင့် တရုတ်-အိန္ဒိယ နယ်စပ်ဒေသမှာ တရုတ်ဘက်က အများကြီး တပန်းသာနေပါတယ်။ အိန္ဒိယ အရှေ့ မြောက်ဒေသ သယ်ယူပို့ဆောင်ရေးဟာ အလွန်ခေတ်နောက်ကျ နေပါတယ်။ ရှိနေတဲ့ ကားလမ်းဟာ မိုးရွာတဲ့ဒဏ်ကို မခံနိုင်လို့ ပျက်စီးနေတာများပါတယ်။ သစ်သားတံတားကို ကွန်ကရစ်တံတားအဖြစ် အသွင်ပြောင်းနေတာ အခုထက်ထိ မပြီးနိုင်သေးတဲ့အတွက် နယ်စပ်သွားဖို့ သစ်သားတံတားကို အားကိုးနေရပါတယ်။
လူဦးရေများတဲ့နေရာနဲ့ နည်းတဲ့နေရာ၊ ဆင်းရဲတဲ့နေရာနဲ့ ချမ်းသာတဲ့နေရာ စတာတွေကို ဆက်သွယ်ပေးနိုင်တဲ့ ရထားလမ်းဟာ တိုင်းပြည်စီးပွားရေးမှာ အလွန်အရေးကြီးပါတယ်။ စစ်တပ်ကို ထောက်ပံ့ဖြည့်တင်းရာမှာ ရထားလမ်းဟာ အထိရောက်ဆုံး ဖြစ်ပါတယ်။ တရုတ်ဟာ ကားလမ်း၊ ရထားလမ်းတွေကို နယ်စပ်အထိ အခိုင်အမာ တည်ဆောက်ထားပေမယ့် အိန္ဒိယပြည်မနဲ့ အာသံပြည်နယ်ကို ဆက်သွယ်ထားတဲ့ ရထားလမ်း တလမ်းသားရှိပါတယ်။ တိဗက်မှာ ရာသီမရွေးသုံးနိုင်တဲ့ နှစ်လမ်းသွား ကားလမ်းကီလိုမီတာ ခြောက်သောင်းဆောက်လုပ်ထားပါတယ်။ အိန္ဒိယ နဲ့ တရုတ်ကို တိုးတက်နေတဲ့ အင်အားကြီးနိုင်ငံတွေအဖြစ် သတ်မှတ်ကြပေမယ့် လက်တွေ့မှာတော့ အိန္ဒိယဟာ တရုတ်ကို အမှီလိုက်နိုင်ဖို့ အများကြီးလိုနေသေးပါတယ်။
http://www.voanews.com/burmese/news

လူသား လုံခြုံရေးသည် အမျိုးသား လုံခြုံရေး ဖြစ်သည်


မဇ္ဈိမသတင်းဌာန | စနေနေ့၊ ဇွန်လ ၂၅ ရက် ၂၀၁၁ ခုနှစ် ၁၄ နာရီ ၄၀ မိနစ်
မြန်မာနိုင်ငံသည် အမျိုးသားလုံခြုံရေးနိုင်ငံ ဖြစ်သည်။ အမျိုးသား လုံခြုံရေး မှန်ဘီလူးကြီးဖြင့်ကြည့်၍ အစိုးရ ဆုံးဖြတ်ချက် မှန်သမျှကို ချမှတ်သည်။ အမျိုးသားလုံခြုံရေးနှင့် ကာကွယ်ရေးကို နေပြည်တော်က ဦးစားပေး စဉ်းစားဆုံးဖြတ်ခြင်းသည် တာဝန်မဲ့ ဆောင်ရွက်မှုဖြစ်သည်ဟုတော့ ပြော၍မရပါ။ ဝါရှင်တန်၊ လန်ဒန်မှသည် နယူးဒေလီအထိ အစိုးရတိုင်းသည် အမျိုးသားလုံခြုံရေးကို ဦးစားပေး ထည့်သွင်းစဉ်းစားရမြဲ ဖြစ်ပါသည်။ နိုင်ငံတခု၏ အခြေခံကျသော တာဝန်လည်း ဖြစ်ပါသည်။

မြန်မာခေါင်းဆောင်များသည် နိုင်ငံတော် မူဝါဒတခုလုံးတွင် အမျိုးသားလုံခြုံရေးကိစ္စက မည်၍မည်မျှ လွှမ်းမိုး ပါဝင်နေသည်ကို လည်းကောင်း ၊ အမျိုးသား လုံခြုံရေး ကိစ္စတွင် စစ်တပ်အပိုင်းက မည်၍မည်မျှအထိ လွှမ်းမိုး ချုပ်ကိုင်ထားမည်ကို လည်းကောင်း ခွဲခြားသိမြင်ကြရပါမည်။

လက်နက်ကိုင် တပ်ဖွဲ့များသည် အမျိုးသား လုံခြုံရေးတွင် လိုအပ်သောအရာ ဖြစ်သော်လည်း အစိတ်အပိုင်း တရပ်မျှသာ ဖြစ်ပါသည်။ ကာကွယ်ရေးနှင့် နိုင်ငံတော် ညီညွတ်ရေးတို့သည် လူသားလုံခြုံရေး အတွက်လည်း
ဖြစ်ရပါမည်။ အကြောင်းမူ နိုင်ငံတော်ဆိုသည်မှာ လူတဦးချင်းကို စုပေါင်း ဖွဲ့စည်း တည်ဆောက်ထားခြင်းကြောင့်
ဖြစ်ပါသည်။ ဤလိုအပ်ချက်ကို ဖြည့်ဆည်းရန်အတွက် လူသားလုံခြုံမှုဆိုသော အကြောင်းအရာကြီးတွင် များပြားလှသော ကိစ္စများဖြစ်ကြသည့် ပတ်ဝန်းကျင် ထိန်းသိမ်းကာကွယ်ရေး၊ အလုပ်အကိုင် ရရှိရေး၊ အာဟာရ
ပြည့်ဝသော အစားအစာများ ရရှိရေး၊ ကျန်းမာရေး စောင့်ရှောက်မှု ရရှိရေးတို့ ပါဝင်ကြပါသည်။

စီးပွားရေးအရ ချွတ်ခြုံကျပြီး စားဝတ်နေရေး မပြေလည်သည့် သူများက နိုင်ငံတော် ညီညွတ်ရေးနှင့် လုံခြုံရေး ကိစ္စများကို ဆောင်ရွက်ပေးနိုင်ကြပါမည်လား။ ကူးစက်ရောဂါများ၏ ခြိမ်းခြောက်မှုကို အစဉ်တစိုက် ခံနေရသည့်၊ တကိုယ်ရေ ကျန်းမာရေးကို မစောင့်ရှောက်နိုင်သည့် သူများကကော ထိုသို့လုပ်ဆောင်နိုင်ကြပါမည်လား။ ညစ်ညမ်းနေသော ပတ်ဝန်းကျင်နှင့် သဘာဝသယံဇာတ ကင်းမဲ့သည့် အခြေအနေကကော ထိုသို့ လုပ်ဆောင်နိုင်ပါမည်လော။ အဖြေမှာ လုံးဝ မလုပ်နိုင်ပါဟုပင် ဖြစ်သည်။

လူသားလုံခြုံရေး ကိစ္စဆိုသည်မှာ အားလုံး ဝိုင်းဝန်းဆောင်ရွက်ကြရမည့် ကိစ္စကြီး ဖြစ်ပါသည်။ ဤတာဝန်ကြီးကို အမျိုးသားလုံခြုံရေးအတွက် အစဉ်အလာ ထမ်းဆောင်နေကျ ပုဂ္ဂိုလ်များသာမက အခြားသူများလည်း ပါဝင်ခွင့်ရှိရန်မှာ အရေးကြီးသော ကိစ္စဖြစ်သည်။ ပျော့ပျောင်းမှုရှိဖို့ လိုအပ်သည်။ နိုင်ငံတကာ၊ ဒေသတွင်းနှင့် သက်ဆိုင်ရာဒေသတွင်းမှ သင့်တော်သော တသီးပုဂ္ဂလများ၊ အဖွဲ့အစည်းများကို ပါဝင်ဆောင်ရွက်ခွင့် ပြုရမည်ဖြစ်ပါသည်။

ကုလသမဂ္ဂ ဖွံ့ဖြိုးရေးအစီအစဉ်မှ ထုတ်ပြန်သော လူသားဖွံ့ဖြိုးမှု အညွှန်းကိန်းအရ မြန်မာနိုင်ငံသည် ၂ဝ၁ဝ ခုနှစ်၌ နိုင်ငံပေါင်း ၁၇၂ နိုင်ငံ ရှိသည့်အနက် အဆင့် ၁၃၅ ချိတ်သည်ကို တွေ့ရသည်။ ယင်းသည် ယခင်နှစ်ကနှင့် စာလျှင် တဆင့်တက်လာခြင်း ဖြစ်သည်။ သို့သော် `ဖွံ့ဖြိုးမှုနိမ့်ကျ´ သည်ဆိုသော အဆင့်တွင် ရှိနေဆဲဖြစ်သည်။ အာဖရိကနိုင်ငံ အများအပြားနှင့် ယှဉ်လျှင် သာသည်ဟု ဆိုနိုင်သော်လည်း ဒေသတွင်း နိုင်ငံများနှင့် ယှဉ်လျှင် ဘင်္ဂလားဒေ့ခ်ျနိုင်ငံမှ လွဲ၍ အားလုံးနောက်တွင် ကျန်နေဆဲပင် ဖြစ်သည်။

ယင်းတို့ကိုကြည့်လျှင် မြန်မာနိုင်ငံ၏ အမျိုးသား လုံခြုံရေးတွင် ကွာဟချက်ကြီး ရှိနေသည်မှာမူ ထင်ရှားသည်။ ကံကောင်းသည်မှာ ဤကွာဟမှုကြီးကို တာဝန်သိသော ခေါင်းဆောင်မှု၏ လမ်းညွှန်မှုနှင့် ပါဝင်လက်တွဲ
ဆောင်ရွက်မှုတို့ဖြင့် ပိတ်ဆို့နိုင်သေးသည့် အခွင့်အလမ်း ရှိနေသေးခြင်းပင် ဖြစ်သည်။

လူသားလုံခြုံမှုကို တိုးတက်စေမည့် အစီအစဉ်များကို အောင်မြင်စွာ အကောင်အထည် ဖော်ရင်းဖြင့် အမျိုးသား လုံခြုံရေးတွင် ပါဝင်သော စစ်တပ် အစိတ်အပိုင်းကို နိုင်ငံသား အားလုံးနှင့် သက်ဆိုင်သည့် ကာကွယ်ရေး ကိစ္စများတွင် ပါဝင်ခွင့် ပြုရမည် ဖြစ်သည်။
http://www.mizzimaburmese.com/edop/editorial/7816-2011-06-25-08-12-53.html