Monday, January 20, 2014

၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦးကိုကိုကြီးနှင့် တွေ့ဆုံခြင်း



Mizzima - News in Burmese

၈၈ မျိုးဆက်ခေါင်းဆောင်တချို့အနေဖြင့် လွှတ်တော်နိုင်ငံရေးထဲ ပါဝင်ရန် သေချာသော်လည်း လက်ရှိ တွင် လေ့လာသုံးသပ်နေဆဲ အခြေအနေတွင်ရှိပြီး နိုင်ငံရေး အင်အားစုများနှင့် ဆွေးနွေးညှိနှိုင်း စရာများ စွာ ရှိနေသေးသောကြောင့် နောက်ထပ် နှစ်နှစ်လောက်ကြာမှသာ လုပ်ဆောင်နိုင်မည်ဟု ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦးကိုကိုကြီးက ပြောသည်။

လက်ရှိ နိုင်ငံရေးအပြောင်းအလဲများ၊ ရှေ့ဆက်သွားရမည့် နိုင်ငံရေးအပြောင်းအလဲများ အပေါ် ၈၈ မျိုး ဆက်များ၏ သုံးသပ်ချက်နှင့် ပတ်သက်၍ ဦးကိုကိုကြီးကို မဇ္ဈိမမှ တွေ့ဆုံမေးမြန်းသည့် အချက်အချို့ကို ကောက်နုတ်ဖော်ပြပါသည်။

၈၈ မျိုးဆက်များအနေနဲ့ ရှေ့နိုင်ငံရေးလမ်းစဉ်မှာ ဘယ်လိုပါဝင်မလဲ။

မြန်မာနိုင်ငံရဲ့ ရှေ့ဆက်သွားမယ့်နိုင်ငံရေးမှာ ကဏ္ဍနှစ်ခုအနေနဲ့ လုပ်ဆောင်ဖို့ရှိမယ်။ တစ်ခုက နိုင်ငံရေး ပြဿနာတွေ ရှိတယ်။ နောက်တစ်ခုကနေ့စဉ်နဲ့အမျှ ဖြေရှင်းပေးရမယ့် လူထုတွေရဲ့ ပြဿနာတွေရှိတယ်။ ပထမတစ်ခုက ဥပဒေတွေပြင်ဖို့၊ ဖျက်ဖို့၊ လွှတ်တော်နိုင်ငံရေးနဲ့ နိုင်ငံရေး ပါတီတွေကနေ မူဝါဒဆိုင်ရာ ပြဿနာတွေကို ဖြေရှင်းဖို့ ဆိုတဲ့နေရာတွေ လုပ်ဆောင်ရမှာက တစ်ပိုင်း၊ နိုင်ငံရေး ပြဿနာတွေကို ဖြေ ရှင်းနေတဲ့ တစ်ချိန်တည်းမှာပဲ သာမန်ပြည်သူတွေရဲ့ ပြဿနာတွေကို ဖြေရှင်းဖို့ကလည်း နေ့စဉ်ရှိနေမှာ။

လက်ရှိ ဆောင်ရွက်နေတဲ့ လုပ်ငန်းစဉ်တွေက ဘာတွေဖြစ်မလဲ။
သာမန်လူထုတွေရဲ့ ပြဿနာတွေကို ဖြေရှင်းတဲ့ အလုပ်တွေကိုလည်း ပုံမှန် လုပ်ဆောင်နေတယ်၊ တစ်ချိန် တည်းမှာပဲ ဖွဲ့စည်းပုံနဲ့ ပတ်သက်တဲ့ သဘောထား အမြင်သုံးသပ်ချက်လည်း ထုတ်ပြန်ပြီးတာတွေ ရှိတယ်၊ နောက်အရေးကြီးတဲ့ကိစ္စတစ်ခုက အောက်ခြေလူထုကြားထဲမှာ ဒီမိုကရေစီဖွံ့ဖြိုးမှုတိုးတတ်အောင်၊ ပြန့်ပွား လာအောင် ဆက်လုပ်နေတယ်၊ တစ်ချိန်တည်းမှာပဲ ထိပ်ပိုင်းက မူဝါဒတွေနဲ့ ပတ်သက်ပြီး အကြံပြုသင့် တာ၊ ဆွေးနွေးသင့်တာတွေကို ဆက်လုပ်မှာပါ၊

လွှတ်တော်နိုင်ငံရေးကိုသွားဖို့ အနေအထားကရော ဘယ်လိုရှိပါသလဲ။

လွှတ်တော်နိုင်ငံရေးထဲကို သွားဖို့လည်း ချိန်ဆနေတယ်၊ တကယ်တော့ အမှန်ပြောရမယ်ဆိုရင် လူတွေရဲ့ အသက်အရွယ်အားဖြင့် ဖြတ်သန်းမှုအားဖြင့်လည်း လုပ်နိုင်ပါတယ်။ လုပ်ဖို့လည်း စဉ်းစားနေကြတာတွေရှိ တယ်။ ဘယ်လိုပုံစံနဲ့လုပ်မလဲ ဆိုတာကို စဉ်းစားနေတယ်၊ တစ်ခုခုဝင်ပြီး ဆုံးဖြတ်လိုက်ရင် လက်ရှိနိုင်ငံ ရေးအခင်းအကျင်းအပေါ်ကို ဘယ်လို သက်ရောက်သွားမလဲဆိုတာတွေကိုလည်း ချိန်ဆနေတယ်၊ ဒါပေမဲ့ ၈၈ မျိုးဆက်ထဲက တချို့ခေါင်းဆောင်တွေကတော့ လွှတ်တော် နိုင်ငံရေးကိုသွားမယ့် အင်အားစုတွေဖြစ် လာမှာ သေချာပါတယ်။

လွှတ်တော်နိုင်ငံရေးထဲ ဘယ်တော့လောက် ၀င်ဖြစ်မလဲ။

လိုပါသေးတယ်၊ လောလောဆယ် နှစ် နှစ်လောက် ကျန်ပါသေးတယ်၊ အခုပြောနေကြတဲ့ ၂၀၁၅ ဆိုတာ က မှတ်တိုင်တစ်ခုပါ၊ နိုင်ငံရေးလမ်းမှာ ဖြတ်သွားရမယ့် မှတ်တိုင် တစ်ခုပါ၊ တကယ့်တကယ် နိုင်ငံရေး ဖြစ်စဉ်ဆိုတာက ၂၀၁၅ တင် မဟုတ်ဘူး၊ အလွန်ဟိုဘက်မှာ နိုင်ငံရေးက ပိုပြီး သိမ်မွေ့လာမယ့် အခြေ အနေတွေရှိတော့ အများကြီး ပြင်ဆင်ရဦးမှာပါ။ တကယ်လို့ သွားဖြစ်ပြီဆိုရင် အားလုံးကို အသိပေးမယ်၊ အခုတော့ လေ့လာသုံးသပ်နေတဲ့ အခြေအနေပဲ၊ နိုင်ငံရေးအင်အားစုတွေ ကြားထဲမှာ ဆွေးနွေးညှိနှိုင်း စရာတွေ အများကြီး ရှိနေသေးလို့ပါ။

လွှတ်တော်နိုင်ငံရေးထဲကို သွားဖို့ဆိုရာမှာ ၈၈ မျိုးဆက်ထဲက ဘယ်သူဖြစ်နိုင်မလဲ။

ဘယ်သူသွားမယ်လို့တော့ အဖွဲ့အစည်းအနေနဲ့ ရွေးချယ်ထားတာ မရှိဘူး။ တစ်ဦးချင်းအနေနဲ့ သူတို့ရဲ့ ဖြတ်သန်းမှု ရွေးချယ်မှုပေါ်မှာပဲ မူတည်မယ်။ တချို့ကတော့ အရပ်ဘက် အဖွဲ့အစည်းအားကောင်းအောင် လုပ်ချင်တဲ့သူတွေ ရှိတယ်၊

အရပ်ဘက်အနေနဲ့ ဆက်သွားမယ်ပေါ့။ တချို့ကျတော့လည်း ဒီထဲကပဲ လွှတ်တော် နိုင်ငံရေးဘက်ကို ကူးပြောင်းဖို့ စိတ်ကူးတာတွေလည်း ရှိပါတယ်။


လွှတ်တော်နိုင်ငံရေးထဲ ၀င်မယ်ဆိုရင် ဘယ်လိုမူဝါဒတွေနဲ့ သွားမှာပါလဲ။

၈၈ ထဲက လွှတ်တော်နိုင်ငံရေးကို ကူးပြောင်းရင်တော့ မူဝါဒပိုင်းဆိုင်ရာ၊ လုပ်ကိုင်မှုဆိုင်ရာတွေက တစ်ဦး တစ်ယောက်ချင်းပေါ်မှာပဲ မူတည်တယ်။ ယေဘုယျအားဖြင့် ဦးတည်ချက်တွေ၊ ရည်ရွယ်ချက်တွေ၊ တန်ဖိုး တွေက တူကြမှာ မဟုတ်ဘူး။ တစ်ယောက်နဲ့ တစ်ယောက်က မတူကြဘူး။

လက်တွေ့အကောင်အထည်ဖော်မှုအပိုင်းကိုပဲ ကြည့်ရမှာ။ အဲဒီမှာပဲ အရေးကြီးတယ်။ လူတိုင်းကပြောတာ ပဲ။ ပါတီစုံ ဒီမိုကရေစီဆိုတာတွေက လက်တွေ့အကောင်အထည်ဖော်အောင် လုပ်ဖို့က အတွေ့အကြုံ ရော၊ ရင့်ကျက်မှုရော ပြဿနာကို ဘက်ပေါင်းစုံကနေ ချဉ်းကပ်တတ်တဲ့ အရည်အချင်းတွေ လိုပါတယ်။ အခုက ရှိနေတဲ့ နိုင်ငံရေးအင်အားစုတွေနဲ့ ဖြန့်ကျက်မှု အခြေအနေတွေ ရှိနေတယ်။ ကိုယ်တွေက တစ်ခုခု ဆုံးဖြတ်လိုက်ရင် ဘယ်လိုအကျိုးသက်ရောက်မှု ရှိမလဲ ဆိုတာတွေပေါ့၊ အဲဒါတွေကို ချိန်ဆနေတဲ့သဘော ပါ။

လက်ရှိ နိုင်ငံရေးလမ်းစဉ်အပေါ် ဘယ်လို သုံးသပ်ပါသလဲ။

အပြောင်းအလဲ စပ်ကူးမတ်ကူး ကာလမှာတော့ အမြင်သဘောထားတွေက အမျိုးမျိုးရှိမှာပဲ။ တစ်ခုရှိတာ က လက်တွေ့ နိုင်ငံရေးဆိုတာက သေချာတဲ့ခိုင်လုံတဲ့ ရလဒ်ကောင်းတွေကို ရလာဖို့ တစ်ဆင့်ပြီး တစ်ဆင့် ကြိုးစားကြရတာပါ၊ အဲဒီလို ကြိုးစားတဲ့အခါမှာ တစ်ယောက်ကို တစ်ယောက် နားလည်မှုရှိဖို့ လိုတယ်။

တစ်ဖွဲ့ချင်း ဆွေးနွေးတာ၊ တစ်ဦးချင်းလုပ်နေတဲ့ တစ်ချိန်တည်းမှာပဲ ကျန်တဲ့အင်အားစုတွေ အားလုံးကြား မှာ ဘယ်လိုဖြစ်သွားမယ်ဆိုတဲ့ နားလည်မှုပေါ့။ ကျန်တဲ့ အင်အားစုတွေ အားလုံးကလည်း လက်တွေ့ကျ တဲ့ဆုံးဖြတ်မှုတွေ တွေးခေါ်မှုတွေရှိဖို့ လိုတယ်၊ နိုင်ငံရေးဆိုတာက မျက်စိတစ်မှိတ်လောက် ကြည့်တဲ့ကိစ္စ မဟုတ်ဘူး။ ရေရှည်ပြုပြင် ပြင်ဆင်ရမယ့်ကိစ္စပါ။

ငြိမ်းချမ်းရေး၊ အပစ်အခတ် ရပ်စဲရေးနဲ့ ပတ်သက်ပြီး အစိုးရနဲ့ တိုင်းရင်းသားတို့ ဆွေးနွေးနေမှုကို ဘယ်လိုသုံးသပ်လဲ။

တိုင်းရင်းသား လက်နက်ကိုင်တွေနဲ့ အစိုးရရဲ့ အခုလက်ရှိအခြေအနေကတော့ ငြိမ်းချမ်းရေးအတွက် ကြိုး စားနေဆဲပဲလို့ မြင်ပါတယ်။ ဒီပြဿနာတွေက နှစ်ပေါင်း ၆၀ ကျော် အမြစ်တွယ်လာတဲ့ ပြဿနာတွေ ဆို တော့ ခဏလေးနဲ့ အဆင်ပြေမှာမဟုတ်ဘူး။ ညှိနေဆဲလို့ပဲ မြင်ထားတယ်။

ဒေါ်အောင်ဆန်းစုကြည်နဲ့ နိုင်ငံရေးအရ ဆွေးနွေးထားမှုတွေများ ရှိပါသလား။

ဇန်န၀ါရီ ၅ ရက် တွေ့တုန်းကတော့ ကျန်းမာရေးကိစ္စပဲ မေးတာပါ၊ ဒါပေမဲ့ ဖွဲ့စည်းပုံပြင်ဆင်ရေးနဲ့ ပတ် သက်ပြီးတော့ သဘောထားတွေ၊ ယေဘုယျအချက် အလက်တွေ ပြောဖြစ်တာတွေ ရှိတယ်၊ ထွေထွေ ထူးထူး ကိစ္စတွေတော့ မဟုတ်ပေမယ့် လူအများကိုပြောပြီးသား ဖွဲ့စည်းပုံကိစ္စပါပဲ။

ဖွဲ့စည်းပုံပြင်ဆင်ရေးအတွက် ၈၈ အနေနဲ့ ဘယ်လိုအကြံပေးချက်တွေ ရှိပါသလဲ။

ဖွဲ့စည်းပုံက ပြင်ဆင်ရေးနဲ့ပတ်သက်ပြီး ပြင်မယ်ဆိုတာနဲ့ ပတ်သက်ပြီး တစ်ယောက်နဲ့တစ်ယောက် အငြင်း ပွားကြတာ မဟုတ်ဘူး။ ဘယ်လောက်ပြင်မလဲ၊ ဘယ်လိုပြင်မလဲဆိုတာကိုသာ ဆွေးနွေး ညှိနှိုင်းယူကြတာ ပါ။ အခုလည်း အကြံပြုထားတာက ဖွဲ့စည်းပုံပြင်ဆင်ရေး လုပ်ထုံးလုပ်နည်းနဲ့ပတ်သက်ပြီး တင်းကျပ်လွန်း တာကြီးကို ထောက်ပြထားတယ်။ နောက်တစ်ခုက အချုပ်အခြာအာဏာက ပြည်သူတွေဆီက ဆင်းသက် ရမယ်ဆိုတာကို တကယ်လက်တွေ့မှာ အကောင်အထည် ပေါ်လာဖို့လိုတယ်ဆိုတာကို ထောက်ပြထား တယ်၊ အဲဒါက နောက်နောင် ဖွဲ့စည်း ပုံပြင်ဆင်ရေးနဲ့ပတ်သက်ပြီး အသွင်ပြောင်းလာအောင် ကြိုးစားနေ တယ်။

ဖွဲ့စည်းပုံကိုပြင်ဖို့ လက်တွေ့လုပ်ရမယ့် အချက်တွေကရော ဘာတွေဖြစ်မလဲ။

လက်တွေ့ နိုင်ငံရေးကတော့ ပြည်သူတွေကြားထဲမှာပါ၊ ပြည်သူတွေကြားထဲမှာ နိုင်ငံရေးနိုးကြားအောင် လုပ်တဲ့အပိုင်းပေါ့။ နောက် လူထုရဲ့ဆန္ဒကို ဖော်ထုတ်တဲ့သဘော နောက်တစ်ခုက အရှိတရားကတော့ လွှတ်တော်ထဲမှာ ၇၅ ရာခိုင်နှုန်း ကျော်ကျော် သဘောတူဖို့ လူထုဆန္ဒခံယူပွဲယူဖို့ဆိုတာ၊ အဲဒါကြီးက ကျန် နေတယ်။ နောက်နောင်မှာ ဖွဲ့စည်းပုံပြင်ဆင်ရေးကို အခုလိုကျပ်တဲ့ အနေအထားကြီးမဟုတ်ဘဲ ပြုလွယ် ပြင်လွယ်ဖြစ်တဲ့ အခြေအနေ ဖြစ်အောင် ကြိုးစားဖို့လိုတယ်။

၂၀၁၅ ခုနှစ်ရဲ့ နိုင်ငံရေး အနေအထား ဘယ်လိုဖြစ်လာမယ်လို့ သုံးသပ်ပါသလဲ။

တစ်လျှောက်လုံးက အာဏာရှင်အောက်မှာ နေလာခဲ့ရတာကနေ အခု ဘာပဲပြောပြော အသွင်သဏ္ဌာန် အားဖြင့်- လွှတ်တော်တို့၊ လွှတ်တော်ကနေ ရွေးကောက်တင်မြှောက်တဲ့ အစိုးရတို့ ပေါ်လာတော့ ဒီကာလ မှာက ဘယ်သူ့ ဘယ်သူမှာမှ အတွေ့အကြုံ မရှိသေးဘူး။ သူ့ဘာသာနဲ့သူ ဦးဆောင်တဲ့သူတွေကလည်း စစ်ဗိုလ်ဟောင်းတွေ၊ သူတို့မှာလည်း ဒီမိုကရေစီ နဲ့ပတ်သက်ပြီး လွှတ်တော်နဲ့ပတ်သက်ပြီး အတွေ့အကြုံ မရှိဘူး။ ဒီဘက်မှာလည်း ကျွန်တော်တို့က အစိုးရကို ဆန့်ကျင်တဲ့ အင်အားစုတွေ အနေနဲ့ ရပ်တည်လာခဲ့ တာဆိုတော့ ဒီကာလမှာ ရှေ့တိုးနောက်ဆုတ် ဖြစ်တာတွေကတော့ ရှိမှာပဲ။ အဲဒါကို ဘယ်လောက်အမြော် အမြင်ကြီးကြီးနဲ့ ကျော်လွှားကြမလဲ။ တစ်ဖက်ကလည်း တွန်းထိုးလှုပ်ရှားမှုတွေ ရှိနေမှာဖြစ်သလို တစ်ဖက် ကလည်း နားလည်မှု တည်ဆောက်တဲ့ကိစ္စတွေ ရှိနေမှာပဲ။ အဲဒါတွေကို ဟန်ချက်ညီအောင်လုပ်နိုင်ဖို့ အရေးကြီးတယ်။

ရေရှည်နိုင်ငံရေး လမ်းကြောင်းကို ဘယ်လိုသွားမယ်လို့ ဆုံးဖြတ်ချက်ရှိထားပါသလဲ။

လာမယ့် နိုင်ငံရေးက ၂၀၁၅ က ရွေးကောက်ပွဲရလဒ်တစ်ခုတည်းနဲ့ မဆိုင်ဘူး၊ လက်ရှိ နိုင်ငံရေး အပြောင်း အလဲအားလုံးနဲ့ ဆိုင်တယ်။ ဖွဲ့စည်းပုံ ပြင်မယ့်ကိစ္စပဲဖြစ်ဖြစ်၊ တိုင်းရင်းသားတန်းတူညီမျှရေးကိစ္စပဲဖြစ် ဖြစ် အဲဒါတွေအားလုံးက တစ်ခုနဲ့တစ်ခု ခွဲလို့မရဘူး၊ အပစ်အခတ်ရပ်စဲရေးကိစ်္စ တွေရှိတယ်။


နိုင်ငံရေးဆွေးနွေးပွဲတွေ ဆက်လုပ်ဖို့ရှိတယ်၊ ပြီးတော့ အဲဒီကနေ ရလာတဲ့ ရလဒ်တွေကို လွှတ်တော်မှာ တရားဝင်အောင် အတည်ပြုပေးဖို့ကိစ္စတွေ ရှိတယ်၊ အဲဒီတော့ဖွဲ့စည်းပုံပြင်ဆင်ရေးကိစ္စတွေရယ်၊ ၂၀၁၅ မှာ ရွေးကောက်ပွဲပြင်ဆင်မှုတွေ အားလုံးက ချိတ်ဆက်နေတယ်။ အရေးကြီးတဲ့ဖြစ်စဉ်တွေ အားလုံးကို စဉ်းစားတာမျိုး လုပ်ရမယ်၊ အဲဒါတွေကို ဆက်စပ်ပြီး ပြင်ဆင်ရမယ်လို့ မြင်တယ်။


0 အကြံပြုခြင်း: