အလုံမြို့နယ်တွင် စစ်ကောင်စီတပ်က အသက် ၄ နှစ်အရွယ် ကလေးငယ်ကို မူကြိုကျောင်းအတွင်း ဝင်ရောက် ဖမ်းဆီး

​ဘာလဲဟ... ခလေးတွေ ကစိတ်ဒဏ်ရ သွားပီ

နင်တို့ဒီ အပြစ်က လွတ်မယ်ထင်လား.... ပြည်သူ့ မေတ္တာ စူး...ပါစေ... မြန်မြန်စူးပါစေ

-------------------------------

ရန်ကုန်တိုင်း၊ အလုံမြို့နယ်၌ အသက် လေးနှစ်ဝန်းကျင် အရွယ် ကလေးငယ်ကို ယမန်နေ့  ဧပြီလ ၅ ရက် ညနေပိုင်းတွင်  စစ်ကောင်စီတပ််က မူကြိုအတွင်း ဝင်ရောက် ဖမ်းဆီးသွားကြောင်း ဒေသခံများက  မဇ္စျ်ိမကို ပြောသည်။ 

အလုံမြို့နယ်၊ ဆင်မင်းရပ်ကွက်၊ စက်တွင်းလမ်းအတွင်း ဖွင့်လှစ်ထားသည့် BC အမည်ရှိ မူကြိုကို DC တစ်စီး၊ အိမ်စီးကားတစ်စီး၊ ရဲကားတစ်စီးနှင့်  အရပ်ဝတ်များ ရဲယူနီဖောင်းများဖြင့် လာရောက်ကာ ကလေးငယ်ကို ဖမ်းဆီးသွားကြောင်း သိရသည်။ 

“ကလေးရဲ့ အဖေနဲ့ အမေကို  PDF ထောက်ပံ့သူတွေဆိုပြီး  စစ်တပ်က လိုချင်နေတာ။ သူတို့က တိမ်းရှောင်ပြီး နေရတော့ သူတို့ ကလေးက အဖိုးနဲ့ သွားနေနေတာ။ မနေ့က ညနေ ၃ နာရီ ၁၅ မိနစ်လောက်မှာ အဲ့ဒီကလေးတက်နေတဲ့  စက်တွင်းလမ်းထဲက  BC  ဆိုတဲ့ မူကြိုကို အရပ်ဝတ်တွေနဲ့ ရောက်လာပြီး အဲ့ဒီ ကလေးငယ်လေးကို ဖမ်းသွားတယ်။ လာတဲ့အထဲမှာ စစ်ကောင်စီက ခန့်ထားတဲ့ ဆင်မင်းရပ်ကွက် အုပ်ချုပ်ရေးမှူးလည်း ပါတယ်။ ကြားရသလောက် ဝင်ဖမ်းတဲ့ အချိန် ကလေးတွေ အကုန်လုံးနဲ့ ဆရာမကို ဒူးထောက်ခိုင်းပြီး သေနတ်နဲ့ ချိန်တယ်။ ဆရာမက ကလေးကို မပေးဘူး သူမွေးစားလိုက်မယ်ဆိုပြီး ပြောတာတောင် မရဘဲ ကလေးကို ဖမ်းသွားတာ။ ကလေးက ငိုပြီး ပါသွားတယ်” ဟု ဆင်မင်းရပ်ကွက်အတွင်း နေထိုင်သူတစ်ဦးက ပြောသည်။ 

စစ်ကောင်စီတပ်က ဝင်ရောက်ဖမ်းဆီးရာ စက်တွင်းလမ်းထိပ်တွင် ရဲကားဖြင့် လမ်းပိတ်ခဲ့ပြီးနောက် မူကြိုအတွင်း အရပ်ဝတ်များဖြင့် နာရီဝက်ခန့် ဝင်ရောက်ကာ ကလေးငယ်ကို ဓားစာခံအဖြစ် ဖမ်းဆီးခေါ်ဆောင်သွားခဲ့ခြင်း ဖြစ်ကြောင်း ဆိုသည်။ 

“သားသမီးချင်း ကိုယ်ချင်းစာသင့်တယ်လေ။ ပြီးတော့ ဒါက ဘယ်လိုမှ မဖြစ်သင့်တဲ့အရာတစ်ခု။ လူ မှန်တယ်ဆိုရင်ပေါ့။ မူကြိုကလေးဆိုတဲ့ အရွယ်က ဘာမှ မသိသေးတဲ့အရွယ်လေ။ ကလေးစိတ်မှာ ဘယ်လောက်တောင် ဒဏ်ရာရသွားမလဲ။ လုံးဝမလုပ်သင့်တဲ့ အရာတစ်ခု။ ပြည်သူတစ်ယောက် အနေနဲ့ဆိုရင်တော့ အဲ့လို လူမဆန်တဲ့ လုပ်ရပ်မျိုးကို လုံးဝ ရှုတ်ချပါတယ်။ အရမ်းလည်း ရွံ့မုန်းမိပါတယ်။ ဘာမှ ပြန်မလုပ်နိုင်တာကိုက အရမ်းရင်နာရပါတယ်” ဟု အလုံမြို့နယ်တွင် နေထိုင်သူတစ်ဦးက အဆိုပါ ဖြစ်စဉ်အပေါ် မှတ်ချက်ပြု ပြောသည်။ 

ရန်ကုန်မြို့တွင် စစ်ကောင်စီက အာဏာသိမ်းမှု ဆန့်ကျင် ဆန္ဒပြသူများ၊ တော်လှန်ရေး အဖွဲ့ အစည်းများနှင့် ဆက်စပ်ပတ်သက်သူများကို ဖမ်းဆီးမှုများ  ဆက်တိုက်လုပ်ဆောင်လျက်ရှိသည်။ 

စစ်အာဏာသိမ်းသည့် ဖေဖော်ဝါရီလ ၁ ရက်နေ့မှ ၂၀၂၂ ခုနှစ် ဧပြီလ ၅ ရက်နေ့ထိ  ဖမ်းဆီးချုပ်နှောင်ခြင်းခံထားရသူ စုစုပေါင်း ၁၀,၀၅၄ ဦးရှိပြီး ဖမ်းဝရမ်းထုတ် ခံထားရသောကြောင့် တိမ်းရှောင်နေသူ ၁,၉၇၆ ဦးရှိကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းများအရ သိရသည်။

#Mizzima

#အလုံမြို့နယ်

#မူကြို

#ဖမ်းဆီး

#AAPP