တပွဲစား

မင်းအောင်လှိုင်၏ စိတ်ထဲတွင် စွဲနေသည့် တခုတည်းသော အရာက ဗိုလ်နေဝင်း နှင့် ဗိုလ်သန်းရွှေ တို့ပင် တိုင်းပြည်ကို နှစ် နှစ်ဆယ်ကျော်မျှ အုပ်ချုပ်သွားနိုင်ပါလျှက် သူ့ကျမှ အဘယ်ကြောင့် မဖြစ်နိုင်ရသနည်း ဆိုသည်လောက်သာ တွေးတောနိုင်စွမ်း ရှိသော ဦးနှောက် မျိုး နှင့် တပွဲထိုး ကြံစည်နေခြင်း ဖြစ်သည်။

ဖြစ်နိုင်လျှင် ပြည်သူ တရပ်လုံးအား ထိုခေတ် ထဲသို့ ပြန်ဆွဲ ခေါ်ချင်နေသည်။ ထို့အတွက် ဗီယက်နမ် ပင် လျှပ်စစ် ကား ထုတ်လုပ်နိုင်သည့် အနေအထား ရောက်လာချိန်တွင် မင်းအောင်လှိုင်သည် တိုင်းချစ် ပြည်ချစ် စိတ်ဖြင့် စက်ဘီးများကို ထုတ်၊ ဖုန် သုတ် စီးကြပါရန် ၎င်း၏ မြစ်ကြီးနား ခရီးစဉ် တွင် ပြောဆိုသွားခဲ့ခြင်းကပင် ၎င်း ရှိနေ သမျှ တိုးတက်နေသော ခေတ်ကြီး နှင့် ရင်ဘောင်တန်း နိုင်ဖို့ မည်သို့မျှ မျှော်လင့်ချက် မရှိ ဆိုသည်ကို ပြဆိုသွား ခြင်းဖြစ်သည်။ ထို့အပြင် လျှပ်စစ်ရထား၊ ကားများ ထုတ်လုပ်သွားမည်ဟု တဖွဖွ ပြောနေရင်းက စက်ဘီးဖက် လှည့်သွားသည့် အရေးသည်လည်း ဆိုရှယ် မီဒီယာများ တွင် အကြီးကျယ်ဆုံး ဟာသ ဖြစ်သွားခဲ့ရသည်။

အစစ အရာရာ ရှေ့သို့သာ တိုးတက်နေသော ခေတ်ကာလကြီး ဖြစ်သည့် နှစ်ဆယ့်တစ်ရာစုထဲတွင် ဘိုးဘွား များထက် စာလျှင် တိုးတက်ရမည့် အစား ယခုအခါ ၎င်းတို့ ခေတ်ကကဲ့သို့ပင် မိမိတို့သည်လည်း မောင်ဗမာ စက်ဘီးနှင့် နှစ်ပါးသွား ရတော့မည့် အရေး ဖြစ်လာနေပြီ။ တိုင်းပြည်အုပ်ချုပ်ရန် ကြံနေသူသည် ခေတ်ကို နောက်ပြန် ဆွဲသွားနေသည့်အဖြစ်အား ပြည်သူများ အဖို့ မတွေးမိဘဲ နေနိုင်ကြမည် မဟုတ်ပေ။ ဤသည်ကို ကြည့်လျှင် ပြောရမည့်စကား ဟုတ်၊ မဟုတ် ဟူ၍ပင် ခွဲခြားနိုင်စွမ်း မရှိသူ ဖြစ်နေသည်မှာ အထင်အရှားပင်။

စစ်ခေါင်းဆောင်များ၏ ထုံးစံအတိုင်း အထွေထွေ ယုတ်လျော့ကျဆင်းလာနေမှုအား ကမ္ဘာကြီးကို အပြစ်ပုံချ တတ်စမြဲ ဖြစ်သည်။ သို့ဆိုက ပတ်ဝန်းကျင် အိမ်နီးချင်း နိုင်ငံများ ဖြစ်သော လာအို၊ ကမ္ဘောဒီယား ကဲ့သို့ နိုင်ငံများမှာ ကိုဗစ် နောက်ပိုင်း အရှိန်အဟုန်နှင့် တိုးတက်လာနေသည်ကို မည်သို့များ ပြောဆိုနိုင်ဦးပေမည်နည်း။

ပြည်သူများအား စက်ဘီးစီးပြီး ချွေတာရန် သာ ပြောနေသော်လည်း ရုရှား၊ တရုတ်တို့မှ နောက်ဆုံးပေါ် လူသတ် လက်နက် တိုက်လေယာဉ်ကြီးများ အဘယ်ကြောင့် ဝယ်ယူနေကြရသနည်း ဟု မေးခွန်းထုတ်လာကြမည် ဖြစ်သည်။

တာလီဘန် လက်အောက် အာဖဂန်နစ္စတန် ရှိ ပြည်သူများသည် မြန်မာပြည်သူများ ကဲ့သို့ ဖိနှိပ်အုပ်ချုပ်ခံရမှု များ နှင့် အခြေအနေ အားလုံး နီးပါး တူညီစွာ ကြုံတွေ့နေရသော်လည်း ၎င်းတို့ အဖို့ တာလီဘန် အစိုးရ၏ အကြမ်း ဖက်မှု များ၊ ရွာများကို မီးရှို့ခံရမှု များ နှင့် လွတ်ကင်းနေဆဲပင် ဖြစ်သည်။

မင်းအောင်လှိုင်တို့ ၏ အာဏာကို ဆုပ်ကိုင်ထားနိုင်ရန် ကြိုးပမ်းနေမှု မှန်သမျှ သည် အတွေးအခေါ် အနှစ်သာရ မရှိ၊ လက်ထဲတွင် သေနတ်ရှိက မည်သူမဆို လုပ်နိုင်သည့် လူမိုက် အဆင့် သာသာ လုပ်ရပ်များ ဖြစ်သည်က စဉ်းစားဉာဏ် ရှိသူတိုင်း သိပြီး ဖြစ်သည်။

၎င်း၏ မြစ်ကြီးနား ခရီးစဉ် ဖြစ်မြောက်ရန် လုံခြုံရေးအား စစ်အင်အား ထောင်ချီ၊ တိုက်လေယာဉ်၊ ရဟတ်ယာဉ် များ နှင့် ဝိုင်းရံ စောင့်ရှောက်ပေးခဲ့ရပြန်သည်။ အစည်းအဝေး ခန်းမထဲသို့ မည်သူမျှ လက်ကိုင်ဖုန်းများ ယူလာခွင့် မပြုကြောင်း သိရသည်။ ၎င်းအဖို့က တိုင်းပြည်ကို စိုးမိုးထားနိုင်ဆဲ ဟု ကမ္ဘာကို ပြသ ရန် နှင့် အဖက်ဖက်မှ ပြိုလဲ ကျဆင်းလာနေသော သစ္စာခံ တပ်များ အား စိတ်ဓါတ် မြှင့်တင် ပေးနိုင်ရန် ဖြစ်သည်။ ဤသည်တွင် တပ်ဖွဲ့ ဝင်များ အတွက် လက်နက်ကောင်းများ ထုတ်လုပ်ပေးရန် စီစဉ်နေသည်ဟူ၍ ထည့်ပြောသွားသည်ကို ကြည့်က ထင်ရှားနေသည်။

ဆယ်စုနှစ်ပေါင်း များစွာ စစ်ဘေး၊ အငတ်ဘေး နှင့် ကြုံနေရသော ကမ္ဘောဒီယား နိုင်ငံ ဝန်ကြီးချုပ်ကပင် မြန်မာ ပြည်တွင် ဖြစ်ပျက်နေမှု များ အတွက် သူ့လက်မှ လွတ်ပြီ၊ အင်ဒိုနီရှားသာ ဆက် ခံပေတော့ သဘောမျိုးဖြင့် ဘရပ်ဆဲလ်တွင် လှောင်ပြောင် ပြောဆိုသွားခဲ့သည်။ ၎င်းတို့ ရှိနေသရွေ့ နောက် ငါးနှစ် ကြာသည့်တိုင် ဖြေရှင်း နိုင်မည် မဟုတ်၊ မိမိနှင့် ၎င်း၏ သံတမန် ဖြစ်သူတို့ အစွမ်းကုန် ကြိုးစားခဲ့သော်လည်း မည်သို့မျှ မျှော်လင့်ချက် မရှိ၍ အထူး သံတမန် သွားမည့် ခရီးစဉ်ကိုပင် ဖျက်သိမ်းလိုက်ပြီဟု ဆိုသည်။

ထိုသို့ အိမ်နီးချင်း နိုင်ငံများမှ ၎င်းတို့အား hot potato ကြီး အလား လက်ပြောင်းလက်လွှဲ လုပ်လာနေသည် ကို ရှက်ရကောင်းမှန်းလည်း မသိကြ၊ ရေအိုင်ထဲက ဖားသူငယ်များအလား ယခုထိ ကုလသမဂ္ဂ တွင် အသိအမှတ် ပြု မခံရသည့် အရေးကို နားမလည်နိုင် ဖြစ်နေရသည်ဟု ဆိုလာပြန်သည်။ ၎င်းတို့ အတွက် ဆူးကြီး တချောင်းလို စိုက်ဝင်နေသော အမျိုးသား ညီညွတ်ရေး အစိုးရ၏ ကုလ ကိုယ်စားလှယ် ဖြစ်လာသူ သံအမတ် ကြီး ဦးကျော်မိုးထွန်းကို ပိုနေမြဲ ကျားနေမြဲ ဆက်ထားရန် ဆုံးဖြတ်ချက်ကို သောကြာနေ့တွင် တရားဝင် ကျေညာ တော့မည် ဖြစ်သည်။

ကနဦးက စစ်ကောင်စီအား လူသိရှင်ကြား ထောက်ခံနေသော ရုရှားက ကပျက်ယပျက် လုပ်မည့် အရေးကြောင့် ကုလ အထွေထွေ ညီလာခံ တွင် မဲခွဲရသည့် အဆင့်အထိများ ဖြစ်လာလေမလားဟု စိုးရိမ်မှုများ ရှိခဲ့သော်လည်း ထိုသို့ တကမ္ဘာလုံးက မကောင်းဆိုးဝါးကြီး အလား သတ်မှတ်ခံထားရသူဖက်မှ အဆုံးစွန်အထိ လိုက်ပြီး ထောက်ခံ ကာကွယ်ပေးရမည့် အရေးကို မူ လက်တွန့်သွားပုံရသည်ဟု လေ့လာသူ များ က သုံးသပ်ခဲ့ကြသည်။

ရုရှား အားကိုး နှင့် ဒီတကြိမ်တော့ အဆင်ပြေလောက်ပြီဟူ၍ ထင်ထားသော အကြမ်းဖက် စစ်တပ်အဖို့ အကြီး အကျယ် စိတ်ဓါတ်ကျစရာ ဖြစ်သွားခဲ့ရသည်။

စစ်ကောင်စီ၏ အဆင်ခြင်မဲ့ လုပ်ရပ်များဖြင့် ကိုယ့်ဂိုးကိုယ် ပြန်သွင်းနေခြင်းကြောင့် အမျိုးသား ညီညွတ်ရေး အစိုးရသည် နိုင်ငံတကာ တွင် ပွဲလည်တင့်လာနေပြီ ဖြစ်သည်။

ထိုသို့ ဖြစ်လာနေသည်ကို မင်းအောင်လှိုင်သည် မှန်ကန်စွာ သုံးသပ်နိုင်ခြင်း မရှိကြောင်းကို မြစ်ကြီးနား ခရီး စဉ်တွင် အာဏာသိမ်းပြီးကာစ မည်သူ့အကူအညီ တပြားတချပ်မှ မပါဘဲ မည်သို့ မည်ပုံ ရုန်းကန် ခဲ့ရသည်ကို သိက “ခင်ဗျားတို့ အားလုံး မျက်ရည်ကျသွားမယ်” ဟူသော စကားက သက်သေခံနေပေသည်။

အဘယ်ကြောင့်ဆိုသော် စိတ်ပညာ သဘောအရ လူတို့သည် မိမိတို့ အခြေအနေ မြင့်မားလာပြီ ဟု ယုံကြည် သည့် အခါတိုင်း နိမ့်ကျခဲ့စဉ်က မည်သို့မည်ပုံ ရုန်းကန်ခဲ့ရသည်ကို ပြန်ပြောရန် ဝန်မလေး တတ်ကြသောကြောင့် ဖြစ်သည်။

မင်းအောင်လှိုင် အဖို့ အခြေအနေကို မှန်ကန်စွာ စစ်ကြောနိုင်စွမ်း ရှိသည့် ဦးနှောက်မျိုး မပိုင်ဆိုင် ခဲ့ခြင်းကပင် တော်လှန်ရေးကြီး အောင်မြင်ဖို့ အထောက်အပံ့များ ဖြစ်လာခဲ့ရ သည် မဟုတ်ပါလော။

ပြည်သူတို့၏ ခုခံ တွန်းလှန်စစ် မုချအောင်ရမည်!!!

လှစိုးဝေ

ဓါတ်ပုံ - မြန်မာ နောင်း (EPA-EFE)