စစ်ရာဇဝတ်မှုတွေ ကျူးလွန်နေတဲ့ စစ်တပ်နဲ့ မင်းအောင်လှိုင် သမီးကို ရိုးမဘဏ်က ထောက်ပံ့နေ

မဲခေါင်၊ ဒီဇင်ဘာ ၂၁

ရာဇဝတ်မှုတွေ ကျူးလွန်နေတဲ့ စစ်တပ်နဲ့ စစ်ခေါင်းဆောင် မင်းအောင်လှိုင်ရဲ့ သမီးပိုင် စီးပွားရေး လုပ်ငန်းတွေကို ထေက်ပံ့နေတဲ့ အထောက်အထားတွေ တွေ့လို့ ကမ္ဘာ့ဘဏ်အုပ်စုရဲ့ လုပ်ငန်းခွဲ ဖြစ်တဲ့ အပြည်ပြည်ဆိုင်ရာ ဘဏ္ဍာရေး ကော်ပိုရေးရှင်း-IFC က ရိုးမဘဏ်မှာ ရင်းနှီးမြှုပ်နှံထားတာတွေ ရုပ်သိမ်းတော့မယ်လို့ Justice For Myanmar က ဒီကနေ့ အတည်ပြု ထုတ်ပြန်ပါတယ်။

ရိုးမဘဏ်ဟာ လူမျိုးတုံး သတ်ဖြတ်မှု၊ စစ်ရာဇဝတ်မှုတွေနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေ ကျူးလွန်နေတဲ့ အကြမ်းဖက်စစ်တပ်နဲ့ စီးပွားရေး လုပ်ကိုင်နေတဲ့ အထောက်အထား မှတ်တမ်းတွေကြောင့် IFC က ရင်းနှီးမြှုပ်နှံမှုတွေ ရုပ်သိမ်းတာ ဖြစ်ပါတယ်။

IFC ဟာ ရိုးမဘဏ်ရဲ့ ရှယ်ယာ ၄ ဒသမ ၅ ရာခိုင်နှုန်းကို ပိုင်ဆိုင်ပြီး သူ့ရဲ့ အစုရှယ်ယာ အားလုံးကို First Myanmar Investment -FMI ကို အမေရိကန်ဒေါ်လာ ၅ သန်းနဲ့ ပြန်ရောင်းချနေတာ ဖြစ်ပါတယ်။ 

၂၀၂၀ ခုနှစ်က ရိုးမဘဏ်ဟာ စစ်ခေါင်းဆောင်ရဲ့ သမီး ခင်သီရိသက်မွန် ပိုင်ဆိုင်တဲ့ Pinnacle Asia ကို ကုမ္ပဏီ ချေးငွေ ထုတ်ပေးခဲ့ပြီး အဲဒီချေးငွေဟာ စစ်ကောင်စီပိုင် မိုင်တဲလ်အတွက် တာဝါတိုင်တွေ တည်ဆောက်ဖို့ ပံ့ပိုးပေးခဲ့တာ ဖြစ်တယ်လို့ Justice For Myanmar က ဆိုပါတယ်။

ရိုးမဘဏ်ဟာ Mytel ပိုင်ရှင်ဖြစ်တဲ့ Telecom International Myanmar အတွက် ဒေါ်လာ ၁၀ သန်းကျော်ကို ၂၀၂၂ ခုနှစ် မတ်လအထိ သိမ်းဆည်းပေးခဲ့တယ်လို့ ပြီးခဲ့တဲ့လမှာ Justice For Myanmar က ဆိုပါတယ်။

အဲ့ဒီအပြင် နိုဝင်ဘာလမှာ စစ်ကောင်စီပိုင် အင်းဝဘဏ်နဲ့ ရိုးမဘဏ်တို့ ငွေလွှဲမှု အကြိမ်၂၀၀ ကျော် ရှိတယ်လို့ ဆိုပါတယ်။

ရိုးမဘဏ်ကို ရန်ကုန်စတော့အိတ်ချိန်း စာရင်းဝင် ဦးပိုင်ကုမ္ပဏီ ဖြစ်တဲ့ FMI က ထိန်းချုပ်ထားပြီး စင်္ကာပူ  နိုင်ငံပိုင် ရန်ပုံငွေ GIC အဖွဲ့ဝင်ဖြစ်တဲ့ Greenwood Capital က ၁၉ ဒသမ၇ ရာခိုင်နှုန်းနဲ့ နော်ဝေ ဖွံ့ဖြိုးရေးဆိုင်ရာ ဘဏ္ဍာရေး အဖွဲ့အစည်း Norfund က ၁၀ ဒသမ ၆ ရာခိုင်နှုန်း ပိုင်ဆိုင်တယ်လို့ သိရပါတယ်။ 

လက်ရှိ FMI ဟာ ဟောင်ကောင်က ဦးပိုင်ကုမ္ပဏီတစ်ခုဖြစ်တဲ့ Pun Holdings (HK) Limited နဲ့ အရောင်းအဝယ် ပြုလုပ်ပြီး IFC ရဲ့ ရှယ်ယာတွေကို ဝယ်ယူနေတယ်လို့ ဆိုပါတယ်။

စစ်တပ်ပိုင် အင်းဝဘဏ်ရဲ့ မိခင်ကုမ္ပဏီဖြစ်တဲ့ မြန်မာ့စီးပွားရေး ကော်ပိုရေးရှင်းကို အမေရိကန်၊ အီးယူ၊ ယူကေနဲ့ ကနေဒါနိုင်ငံတို့က ဒဏ်ခတ်ပိတ်ဆို့ အရေးယူထားတယ်လို့ သိရပါတယ်။

သြစတြေးလျဘဏ် ANZ ဟာ Innwa Bank နဲ့ ငွေလွှဲတာတွေ လူသိရှင်ကြား ဖော်ထုတ်ခံရပြီးနောက် မြန်မာနိုင်ငံကနေ ထွက်ခွာတော့မယ့်အကြောင်း ပြီးခဲ့တဲ့လက ကြေညာခဲ့ပါတယ်။

MK-006

#MeKongNews