စစ်တပ်မှ လူဦးရေစာရင်းကောက်ယူရာ၌ တိမ်းရှောင်နေရသူများ၏ နေရာများကိုပါ ဖိအားပေးမေးမြန်းမှုများရှိခဲ့
စစ်ကောင်စီသည် ဇန်နဝါရီ ဒုတိယပတ်မှ စတင်ပြီး ယင်းတို့ပြုလုပ်မည့် ရွေးကောက်ပွဲအတွက် လူဦးရေစာရင်း ကောက်ခံရာတွင် တိမ်းရှောင်နေသည့် သူများ၏ နေရာများကိုပါ မေးမြန်းမှုများရှိနေကြောင်း ပြည်သူများထံမှ စုံစမ်းသိရှိရသည်။
ဇန်နဝါရီ ၂၇ ရက်က စစ်ကောင်စီ၏ လူဦးရေစာရင်း ကောက်ခံသည့် အဖွဲ့သည် ရန်ကုန်တိုင်း၊ ကြည့်မြင်တိုင်မြို့နယ်ရှိ (မြို့နယ်လွှဲ) နေအိမ်တစ်ခုအား လူဦရေစာရင်းကောက်ယူရာတွင် ဆန္ဒပြပွဲများ၌ ပါဝင်ခဲ့သည့် လူငယ်တစ်ဦး၏ တိမ်းရှောင်နေသည့် နေရာများကိုပါ မိဘများထံ မေးမြန်းမှုများ ပြုလုပ်ခဲ့ခြင်း ဖြစ်သည်။
“စာရင်း လာကောက်တဲ့နေ့က ရဲတွေကော၊ စစ်သားတွေကော ပါလာတယ်။ ကိုယ်တွေအိမ်မှထူးပြီး ခင်ဗျားသားကော ဘယ်ရောက်နေလဲမေးတာ၊ ကိုယ့်သား ဘယ်မှာနေမှန်းတောင် ကိုယ်က မသိဘူး၊ အဲ့ဒါကို အတင်းအကျပ်တွေမေးတာ၊ အတော်ကိုဆိုးတယ်။ လူဦးရေစာရင်းကောက်ရင် လူဦးရေစာရင်းပဲကောက်ပေါ့၊ အခုက ပြသနာပါရှာတယ်” ဟု ကြည့်မြင်တိုင်မြို့နယ်( မြို့နယ်လွှဲ) တွင် နေထိုင်သည့် အသက် ခြောက်ဆယ်အရွယ် အမျိုးသမီးတစ်ဦးက ဆိုသည်။
လူဦးရေစာရင်း ကောက်ယူရာ၌ တိမ်းရှောင်နေသူများ၏ မိဘဖြစ်သူများကို စစ်ကောင်စီက အတင်းအကျပ် ဖိအားပေး မေးမြန်းမှုများသည် ရန်ကုန်တိုင်းတွင်သာမကပဲ ဧရာဝတီတိုင်းတွင်လည်း လုပ်ဆောင်မေးမြန်းခြင်းများ ရှိခဲ့သည်။
“ကျွန်တော်က တိမ်းရှောင်နေရတာ ၂၀၂၁ ထဲက အရင်တုန်းကလဲ အိမ်ကို စစ်တပ်က ခဏခဏလာမေးတယ်။ မိဘတွေတော့ ကျွန်တော် ဘယ်မှာ နေတယ်ဆိုတာ မသိကြဘူး။ ပြန်ပြီး သတင်းကြားရတာ အဲ့ကောင်တွေ အိမ်ကို လူဦးရေစာရင်း လာကောက်တော့ ကျွန်တော်နေတဲ့ အိမ်သိတယ်မလား။ ပြောဆိုပြီးတော့ အတင်းမေးတယ်။ အိမ်ကလဲ ကျွန်တော် ဘယ်မှာနေတယ်ဆိုတာ မသိတော့ တော်သေးတယ်” ဟု ဧရာဝတီတိုင်းအတွင်း နေထိုင်သည့် အသက် ၃၈ နှစ်အရွယ် အမျိုးသားတစ်ဦးက ပြောကြားသည်။
စစ်ကောင်စီက လူဦးရေစာရင်းကောက်ယူရာ၌ ရန်ကုန်မြို့တွင်းမြို့များ၌ အိမ်တိုင်ရာရောက် ကောက်ခံမှုများရှိသကဲ့သို့၊ တိုက်ခန်းများတွင် တိုက်အောက်မှ နေကာ ကောက်ခံခြင်းများလည်း ရှိသည်။
“ကျွန်မတို့ မှော်ဘီမှာတော့ သူတို့တွေက ကျေးရွာ အုပ်ချုပ်ရေးမှူးရုံးကို လာပြီးတော့ လူဦးရေစာရင်းပေးခိုင်းတယ်။ ဘာမှ ထွေထွေထူးထူး မေးတာမြန်းတာတော့ မရှိဘူး” ဟု မှော်ဘီမြို့နယ်တွင် နေထိုင်သည့် အသက် လေးဆယ်အရွယ် အမျိုးသမီးတစ်ဦးက ပြောကြားသည်။
စစ်ကောင်စီသည် ယင်းတို့ထိန်းချုပ်နိုင်သည့် မြို့နယ်များတွင် လူဦးရေစာရင်းကို အတင်းအကျပ် ကောက်ခံနေခြင်း ဖြစ်သော်လည်း၊ တိုင်းရင်းသား လက်နက်ကိုင်များ ထိန်းချုပ်ထားနိုင်သည့် ကိုယ်ပိုင် အုပ်ချုပ်ခွင့်ဒေသများတွင် ယင်းကဲ့သို့ ဆောင်ရွက်ခြင်းမျိုးများ မရှိကြောင်းလည်း သိရသည်။
“ အစ်မတို့ လောက်ကိုင်မှာတော့ ဘာမှကို စာရင်းကောက်တာဘာမှ မရှိဘူး။ သူတို့တွေသြဇာသက်ရောက်မှုမရှိတဲ့ နယ်မြေမို့လားမသိဘူး” ဟု လောက်ကိုင်မြို့နယ်တွင် နေထိုင်သည့် အသက် ၃၅ နှစ်အရွယ် အမျိုးသမီးတစ်ဦးက ရှင်းပြသည်။
ဇန်နဝါရီ ၉ ရက်မှ ၃၁ ရက်အထိ လူဦးရေစာရင်းကို ကောက်ယူခြင်းဖြစ်ကာ ၂၀၂၀ မဲစာရင်းတွင် လူဦးရေစာရင်း အမှားအယွင်းများစွာရှိသဖြင့် ယခုကဲ့သို့ မြေပြင်ကွင်းဆင်းကောက်ယူခြင်းဖြစ်သည်ဟု စစ်ကောင်စီကဆိုထားသည်။
လူဦးရေစာရင်းကောက်ခံမှုသည် စစ်ကောင်စီမှ အတုအယောင်ရွေးကောက်ပွဲလုပ်ဆောင်နိုင်ရန် ဆောင်ရွက်ခြင်း ဖြစ်သဖြင့် NUG အပါအဝင် တော်လှန်ရေးအင်အားစုများက သပိတ်မှောက်ရန် ပြည်သူများကို တိုက်တွန်းနှိုးဆော်မှုများ ပြုလုပ်ခဲ့သည်။
ဓာတ်ပုံ- CJ
ပုံစာညွှန်း- ရန်ကုန်မြို့တစ်နေရာတွင် လူဦးရေးစာရင်း ကောက်ယူနေသည်ကို ဇန်နဝါရီလဆန်းပိုင်းက မြင်ရပုံ
 |
Comments