လွိုင်ကော်မှာ စစ်မှုထမ်းဟောင်း မိသားစုဝင်တွေကို စစ်ဘေးရှောင်အသွင်ယူကာ ဝန်ကြီးချုပ်ကိုယ်တိုင် ထောက်ပံ့ပြီး ဝါဒဖြန့်

မဲခေါင် ဇွန် ၁၄

ကရင်နီပြည်၊ လွိုင်ကော်မြို့ ပြည်နယ်ခန်းမမှာ ဇွန်လ ၁၁ ရက်နေ့က စစ်မှုထမ်းဟောင်း မိသားစုဝင်တွေကို စစ်ဘေးရှောင်အသွင်ယူကာ စစ်ကောင်စီတပ်က ထောက်ပံ့ပြီး ဝါဒဖြန့်နေတယ်လို့ နေရပ်ပြန်ရောက်နေသူတွေက ပြောပါတယ်။

အဲ့ဒီပွဲကို ဝန်ကြီးချုပ် ဦးဇော်မျိုးတင်အပါအဝင် ကာကွယ်ရေးဦးစီးချုပ်ရုံး(ကြည်း)က ဗိုလ်ချုပ် နိုင်နိုင်ဦး၊ အရှေ့ပိုင်းတိုင်း စစ်ဌာနချုပ်တိုင်းမှုး ဗိုလ်ချုပ်ဇော်မင်းလတ် အပါအဝင် ဌာနဆိုင်ရာဝန်ထမ်းတွေ အသီးသီး တက်ရောက်ခဲ့ကြပြီး စစ်ဘေးရှောင်တွေအစား စစ်တပ်၊ စစ်မှုထမ်းဟောင်းနဲ့ Non-CDM မိသားစုဝင် တို့ကို ထောက်ပံ့ခဲ့တယ်လို့ ဆိုပါတယ်။

“လွိုင်ကော်မြို့အတွင်း ဒီလူလိမ် (စစ်ကောင်စီတပ်) တွေကို အထူးသတိထားစေချင်တယ်။ ပြန်ရောက်လို့ သူတို့စကားနားမထောင်ရင် ဘာလုပ်မလဲဆိုတာ သိတယ်မလား။ ဝင်လာကတည်းက ဝိုင်းပြီး သေနတ်တွေနဲ့ ချိန်ထားတာ။ ဘာမှ‌ထောက်ပံ့စရာ မလိုဘူး။ အင်တာနက်နဲ့ ဖုန်းလိုင်းသာ ဖွင့်ပေးလိုက်။ အကုန်စီးပွားရေး အဆင်ပြေတယ်” လို့ နေရပ်ပြန်စစ်ဘေးရှောင်တစ်ဦးက ပြောပါတယ်။

လွိုင်ကော်မြို့ကို မေလ နောက်ဆုံးပတ်လောက်က ပြန်ကြတဲ့သူတွေရှိပေမယ့် လူနည်းစုလောက်သာဖြစ်တဲ့အပြင် အများစုကလည်း ပစ္စည်းပြန်ယူသူတွေ ဖြစ်ပြီး တချို့ကလည်း ပြန်စရာအိမ် မရှိတော့တာကြောင့် စစ်ကောင်စီရဲ့ လုပ်ရပ်ဟာ ဝါဒဖြန့်ကြောင်း ထင်ရှားနေတယ်လို့ မြို့ခံတွေဆီက သိရပါတယ်။

ဒါ့အပြင် အိမ်ထောင်စု ၁၅၃ စုအတွက် ဆန်၊ ဆီနဲ့ ထောက်ပံ့ကြေးငွေ သိန်းပေါင်း ၁၅၀၀ ကျော် ပေးအပ်ခဲ့တယ်လို့ စစ်ကောင်စီဘက်က ထုတ်ပြန်ထားပေမယ့် မြေပြင်အချက်အလက်နဲ့ ကွဲလွဲနေတယ်လို့ Non-CDM ဝန်ထမ်းတွေနဲ့ နီးစပ်သူတစ်ဦးက ပြောပါတယ်။

“တစ်ယောက်ကို ၂ သောင်းကျပ်နဲ့ ခရမ်းချဥ်သီးတွေ အာလူးတွေရတယ်လို့ ကြားတယ်။ ဒါပေမဲ့ တစ်ယောက်ကို ၂ သောင်းပဲ ရတယ်ဆိုတော့ အိမ်ထောင်စုစာရင်းနဲ့ တိုက်ကြည့်လို့ရှိရင် စာရင်းက အများကြီး ဟနေတယ်။ CP ကြက်တစ်ပိဿာက ၃ သောင်းရှိနေပြီ။ ဆန် ၂ ပြည်က ၁ လပြတ်စားဖို့ ခွဲတမ်းလား။ အဲ့ဒါနဲ့များ ဒကာကြီး လုပ်ချင်သေးတယ်” 

စစ်ကောင်စီဟာ လွိုင်ကော်မြို့ကို ဖုန်းနဲ့အင်တာနက်လိုင်း ဖြတ်ထားပြီး စစ်ဆေးရေဂိတ်တွေမှာ ကုန်စည်တွေကို တင်းကြပ်ထားတာကြောင့် နေရပ်ပြန် စစ်‌ဘေးရှောင်တွေအတွက် အလုပ်အကိုင် အခွင့်အလမ်း အဆင်မပြေနိုင်သေးဘူးလို့ သိရပါတယ်။

မေလနောက်ဆုံးပတ်ကစပြီး စစ်ကောင်စီဘက်က အကြမ်းဖက်လုပ်ရက်တွေအစား ဝါဒဖြန့်မှုတွေကို တိုးချဲ့လုပ်ဆောင်နေတာကြောင့် မီဒီယာကို မီဒီယာနဲ့ ပြန်တိုက်နေတယ်လို့ တော်လှန်ရေးအင်အားစု တာဝန်ရှိသူတွေက သုံးသပ်ထားပါတယ်။

MK-014

#MeKongNews

#ရိက္ခာထောက်ပံ့

#စစ်ကောင်စီ

#လွိုင်ကော်

#ကရင်နီ