ဒေါ်အိသင်ဇာမောင် အား အမေရိကန်မှ ဆု ချီးမြှင့် ************************************

အမေရိကန် နိုင်ငံခြားရေး ဝန်ကြီးဌာနမှ အမျိုးသား ညီညွတ်ရေး အစိုးရ၏ အမျိုးသမီး၊ ကလေး သူငယ်နှင့် လူငယ်ရေးရာ ဒုတိယ ဝန်ကြီး ဒေါ်အိသင်ဇာမောင်အား နိုင်ငံတကာ သတ္တိရှင် အမျိုး သမီးများ International Women of Courage (IWOC) ဆုကို ချီးမြှင့်လိုက်ပြီ ဖြစ်သည်။

မိမိ အသက်အန္တရာယ်ကို ပဓာန မထားဘဲ အနစ်နာခံ၍ မိမိနေထိုင်ရာ လူ့အဖွဲ့အစည်း အတွက် အပြုသဘော ဆောင်သည့် အပြောင်းအလဲများ ဖေါ်ဆောင်နိုင်ရန် ထူးချွန်စွာဖြင့် သတ္တိ၊ ခွန်အား နှင့် ခေါင်းဆောင်မှု ပေးနိုင်ခဲ့သည့် ကမ္ဘာတဝှမ်း ရှိ အမျိုးသမီးများကို ၂၀၀၇ မှစ၍ IWOC ဆုကို ရွေးချယ် ချီးမြှင့်ခဲ့ခြင်း ဖြစ်သည်။

အသက် ၂၇ နှစ်ရှိ ဒေါ်အိသင်ဇာမောင်သည် ယမန်နှစ်  ဖေဖေါ်ဝါရီ အတွင်း စစ်တပ်မှ အာဏာ သိမ်းခဲ့မှုအား ဆန့်ကျင်ကန့်ကွက်သည့် အကြမ်းမဖက် အာဏာဖီဆန်ရေး လူထု လှုပ်ရှားမှုတွင် ဦးဆောင်မှု အခန်းမှ ပါဝင်ခဲ့သည့် အတွက်  အခြား အမျိုးသမီး ၁၁ ဦးနှင့် အတူ ရွေးချယ် ခဲ့ရခြင်း ဖြစ်သည်ဟု အမေရိကန် နိုင်ငံခြားရေး ဝန်ကြီးဌာနက ဆိုသည်။

ထိုသို့ အမျိုးသား ညီညွတ်ရေး အစိုးရ အား နိုင်ငံတကာ က အသိအမှတ် ပြုလာချိန်တွင် နေပြည်တော်ရှိ စံအိမ်ကြီး အတွင်းတွင်တော့ စစ်ခေါင်းဆောင်ကြီးသည် ကိုဗစ်၏ တိုက်ခိုက် မှုကို အလူးအလဲ ခံနေရပြီ ဖြစ်သည်ဟု သတင်းများက ဆိုသည်။

ဖေဖေါ်ဝါရီ ၂၇ ရက်နေ့တွင် နေပြည်တော်ရှိ ဘုန်းကြီးကျောင်း တကျောင်း၏ ဖွင့်ပွဲ အခမ်း အနားတွင် မင်းအောင်လှိုင်အား နောက်ဆုံးအကြိမ် ‌တွေ့မြင်ခဲ့ကြရသည်။

အလားတူ ရဲချုပ် သန်းလှိုင်သည်လည်း ဖနွမ်းပင်တွင် အာဆီယံ ရဲအဖွဲ့ ညီလာခံ တက်ရောက် ပြီးအပြန် ပြီးခဲ့သော အပတ်အတွင်း ကိုဗစ် ကူးစက်ခံခဲ့ရပြန်သည်။

အမေရိကန် ဒေါ်လာ သန်း ၅၀ ခန့် အကုန်အကျခံ လုပ်ခဲ့သော ဗိုလ်ရှုခံ အခမ်းအနားတွင်လည်း အများအပြား ကူးစက်ခံခဲ့ရသည်ဟု သိရသည်။

စစ်တပ်သည် ကယားပြည်နယ်အား လက်လွှတ်ရမတတ် ဖြစ်လာနေပြီး ယခုအခါ ချင်း ပြည်နယ် တောင်ပိုင်းရှိ ကန်ပက်လက်ကို  ပြန်လည် သိမ်းပိုက်နိုင်ရန် အပြင်းအထန် ထိုးစစ် ဆင်လာနေသည်။

လက်ရှိတွင် ချင်းပြည်နယ်၏ ၉၅% အား ပြည်သူ့ ‌တော်လှန်ရေး တပ်ဖွဲ့များက ထိန်းချုပ် ထားနိုင်ခဲ့ပြီ ဖြစ်သည်။

ချင်းတိုင်းရင်းသား အားလုံးသည် သူမသတ်လျှင် ကိုယ် အသတ်ခံရမည့် အနေအထားကြောင့် အစ္စရေး တို့ကဲ့သို့ Rise to Kill ဆိုကာ ခုခံတွန်းလှန်လာကြခြင်း ဖြစ်သည်။ စစ်တပ်၏ တိုင်းပြည်ကို အကြောက်တရား ဖြင့် အုပ်ချုပ်ရန် ကြံစည်ခဲ့မှုအား မိမိတို့ ခေါင်းငုံ့ ခံမည် မဟုတ် ဆိုသည်ကို ချင်းတိုင်းရင်းသားများက သက်သေပြနိုင်ခဲ့ခြင်းပင် ဖြစ်သည်။

ပြည်သူများ အဖို့ ဆယ်စုနှစ်တခုအတွင်း အဆိုးဝါးဆုံး ကြုံလာရသည့် ဓါတ်အား ပြတ်တောက် မှုကြီး နှင့် ရင်ဆိုင်နေကြရပြီ ဖြစ်၍ ထင်း၊ မီးသွေး၊ဖယောင်းတိုင်များကို ဝယ်ယူစုဆောင်းနေ ကြရပြီ ဖြစ်သည်။ သူတို့၏ ဘဝများကို အာဏာသိမ်းပြီးချိန်မှစ၍ ကမောက်ကမ ဖြစ်အောင် နည်းမျိုးစုံ နှင့် ဒုက္ခပေးလာသည့် စစ်တပ်အပေါ်လည်း ဒေါသများ စုပြုံကျရောက်လာနေကြ သည်။

ဤသည်ကပင် အစိုးရကောင်းတရပ် ကို မှန်ကန်စွာ ရွေးချယ်နိုင်ရေးသည် မည်မျှအထိ အရေးကြီးသည် ဆိုသည့်အပေါ် နှောင်းလူများအား သင်ခန်းစာပေးလာနေခြင်းပင် ဖြစ်သည်။

စစ်ဗိုလ်ချုပ်များ၏ ရိုဟင်ဂျာ များ အပေါ် ကျူးလွန်ခဲ့သည့် ရာ‌ဇဝတ်မှု များ နှင့် ယင်း မတိုင်မီ ‌အမုန်းတရား များ ဖြင့် သွေးထိုး လှုံ့ဆော်ခဲ့မှုများအတွက် ဖေ့စ်ဘုတ် တွင် ရေးသားခဲ့မှု များကို  တင်ပြရန် အာဂျင်တီးနား အထက်တရားရုံးက တောင်းဆိုလိုက်သည်။ ထိုအထဲတွင် မင်းအောင်လှိုင်၏ အကောင့်များ၊ ပေ့ခ်ျ များ အားလုံးလည်း ထိပ်ဆုံးမှ ပါဝင်လာခဲ့သည်။

အာဂျင်တီနားသည် ၁၉၉၀ တွင် အမေရိကန်နှင့် ချုပ်ဆိုခဲ့သော ရာဇဝတ်ကြောင်းနှင့် သက် ဆိုင်သည့် မှုခင်းများ တွင် ဥပဒေပိုင်း အပြန်အလှန် အကူအညီ ပေးရေး သဘောတူ စာချုပ် အပေါ် အခြေခံကာ ယခုလို တောင်းဆိုခဲ့ခြင်း ဖြစ်သည်ဟု သိရသည်။

နိုင်ငံတကာ နယ်ခြား ဖြတ်ကျော် တရားစီရင်ပိုင်ခွင့်ကို အသုံးချကာ အာဂျင်တီးနား တရား သူကြီးများက ၂၀၂၁ နိုဝင်ဘာ ၂၈ မှ စ‌၍ အမှုကို တရားဝင် စတင်ကြားနာစစ်ဆေးလာခဲ့ခြင်း ဖြစ်သည်။

အစစ အရာရာ ရှေ့ကို တိုးတက်နေသော နှစ်ဆယ့်တရာစုတွင် ယခင် နှစ်များက စိတ်အေး ချမ်းသာ စွာဖြင့် ထမင်းဝဝလင်လင် စားခဲ့ရသော လူများသည် ယခုအခါ ထမင်းတလုပ် အတွက် ပင်ပန်းဆင်းရဲကြီးစွာဖြင့် ရှာဖွေစားသောက်နေကြရပြီ ဖြစ်သည်။

ပြည်သူတို့ အဖက်ဖက်မှ ဒုက္ခမျိုးစုံရောက်အောင် လုပ်ခဲ့သော ထိုကဲ့သို့သော လူများသည် ပြည်သူတို့၏ ဒဏ်ခတ်မှုကို နောက်ဆုံးတွင် မလွဲမသွေ ခံကြရတော့မည်လည်း ဖြစ်သည်။

ပြည်သူတို့၏ ခုခံတွန်းလှန်စစ် မုချအောင်ရမည်!!!

​(လှစိုးဝေ)