ဦးညီပု၏သမီး မမိုးဆန်းစုကြည် ထပ်တိုးတရားစွဲခံရ

​ရခိုင်ဝန်ကြီးချုပ်ဟောင်း ဦးညီပု၏သမီး မမိုးဆန်းစုကြည် နိုင်ငံတော်အကြည်ညိုပျက်စေမှုပုဒ်မ ၅ဝ၅(ခ)အပြင် မတရားအသင်းဆက်သွယ်မှုပုဒ်မ ၁၇(၁)ဖြင့် ထပ်တိုးတရားစွဲခံရ 

ချစ်အိလှိုင်

နိရ ဉ္စရာ၊ မတ် ၉/ ၂ဝ၂၂ 

ရခိုင်ပြည်နယ်ဝန်ကြီးချုပ်ဟောင်း ဦးညီပု၏သမီးဖြစ်သူ မမိုးဆန်းစုကြည်သည် နိုင်ငံတော် အကြည်ညိုပျက်စေမှုပုဒ်မ ၅ဝ၅(ခ)အပြင် မတရားအသင်းဆက်သွယ်မှုပုဒ်မ ၁၇(၁)ဖြင့် ထပ်တိုးတရားစွဲခံလိုက်ရကြောင်း သိရသည်။ 

မမိုးဆန်းစုကြည်မှာ ၅၀၅(ခ)ပုဒ်မဖြင့် အင်းစိန်အကျဉ်းထောင်တွင် ထိန်းသိမ်းခံထားရပြီး အမှုရင်ဆိုင်နေရချိန် ယမန်နေ့ မတ်လ ၈ ရက်တွင် အင်းစိန်အကျဉ်းထောင်အထူးတရားရုံးက ပုဒ်မ ၁၇(၁)ဖြင့် တရားစွဲဆိုခံလိုက်ရခြင်းဖြစ်ကြောင်း မိခင်ဖြစ်သူ ဒေါ်ဝင်းကြည်က နိရ ဉ္စရာအားပြောသည်။ 

တရားခံပြသက်သေအနေနဲ့တွေ့လို့ရတယ်ဆိုလို့ အန်တီသွားတွေ့ခွင့်ရခဲ့တယ်။ စိုးရိမ်စိတ်ရှိတာပေါ့။ ကိုယ့်သားသမီးကို မှန်မှန်ကန်ကန်နဲ့ဖြစ်စေချင်တယ်။ ကိုယ့်သမီးကလည်း ငယ်ငယ်လေးပဲရှိသေးတယ်။ အညွန့်အဖူးပဲရှိသေးတာ။ သူ့ရဲ့ရှေ့ရေးလည်း စိုးရိမ်တာပေါ့။ အန်တီတို့က ဘာပြောနိုင်မှာလဲ။ သူတို့လုပ်သမျှခံရမှာပဲ ဟုပြောသည်။ 

ပုဒ်မ ၁၇(၁)သည် ထောင်ဒဏ်အနည်းဆုံး ၂ နှစ်မှ ၃ နှစ်အထိချမှတ်နိုင်သည့် ပုဒ်မတစ်ခုဖြစ်သည်။ 

မမိုးဆန်းစုကြည်သည် လွန်ခဲ့သည့် ၂ဝ၂၁ ခုနှစ်၊ မေလ ၉ ရက်နေ့က ရန်ကုန်မြို့၊ လှည်းတန်းတွင် စစ်သားများနှင့် ရဲတပ်ဖွဲ့ဝင်များ၏ ဖမ်းဆီးခြင်းကိုခံခဲ့ရပြီး နိုင်ငံတော်အကြည်ညိုပျက်စေမှုပုဒ်မဖြင့် အင်းစိန်အကျဉ်းထောင်တွင် အမှုရင်ဆိုင်နေရခြင်းဖြစ်သည်။ 

အလားတူ ဖခင်ဖြစ်သူ ဝန်ကြီးချုပ်ဟောင်းဦးညီပုမှာ နိုင်ငံတော်အကြည်ညိုပျက်စေမှုပုဒ်မ ၅ဝ၅(ခ)နှင့် အဂတိလိုက်စားမှုတိုက်ဖျက်ရေး ဥပဒေပုဒ်မ(၅၅)တို့ဖြင့် စစ်တွေအကျဉ်းထောင်တွင် အလုပ်နှင့်ထောင်ဒဏ် စုစုပေါင်း ၁၁ နှစ်ကျခံနေရသည်။ 

ယင်းအပြင် ဦးညီပုသည် မဲမသမာမှုပုဒ်မ ၁၃ဝ(က)ဖြင့်လည်း ဝန်ကြီးဟောင်း ဦးမင်းအောင်နှင့်အတူ စွဲချက်တင်ခံထားရသေးသည်။