​ရဲကြေးနန်း၊ ရုံးစာများ ပေါက်ကြားနေ၍ ပြည်ထဲရေးဝန်ကြီးထံ တိုက်ရိုက်ဖုန်းဆက်ကြရန် လျှို့ဝှက်ညွှန်ကြားစာ ထပ်မံပေါက်ကြား

ရန်ကုန်၊ ဧပြီ ၁ 

ခေတ်သစ်မီဒီယာ

အကြမ်းဖက်စစ်ကောင်စီက ရဲကြေးနန်း၊ ရုံးစာများ ပေါက်ကြားနေ၍ ပြည်ထဲ ရေးဝန်ကြီးထံ တိုက်ရိုက်ဖုန်းဆက်ကြရန် ညွှန်ကြားထားသော လျှို့ဝှက်ကြေး နန်း စာ ထပ်မံပေါက်ကြားကြောင်း Myanmar Police CDM Channel က သတင်းထုတ်ပြန်သည်။ 

ရုံးစာများ၊ အရေးကြီးသတင်းများ၊ ထူးခြားဖြစ်စဉ်များ လူမှုကွန်ယက်စာမျက်နှာများပေါ်တွင် ပေါက်ကြားလျက်ရှိနေရာ စစ်ကောင်စီလက်အောက်ခံ ပြည်ထဲရေးဝန်ကြီးမှ သတင်းပေါက်ကြားမှုများအား စိုးရိမ်ထိတ်လန့်နေသဖြင့် တိုင်း/ပြည်နယ်ရဲတပ်ဖွဲ့မှူးများအား ထူးခြားဖြစ်စဉ်နှင့် အရေးကြီးသတင်းများပေးပို့ရာတွင် ပြည်ထဲရေးဝန်ကြီး၏ဖုန်းနံပါတ်သို့လည်းကောင်း၊ ၎င်း၏ PSO ဖုန်းနံပါတ်သို့လည်းကောင်း တိုက်ရိုက်ဖုန်းဆက်ကြရန်ညွှန်ကြားလျက်ရှိသည့် လျှို့ဝှက်ကြေးနန်းစာ တစ်စောင် ထုတ်ပြန်ထားကြောင်း သိရှိရသည်။ 

အဆိုပါ စာတွင် ညွှန်ကြားစာများ ထပ်မံ မပေါက်ကြားစေရေး ကြပ်မတ်ကွပ်ကဲဆောင်ရွက်ရန် ပြည်ထဲရေးဝန်ကြီးက ညွှန်ကြားထားကြောင်း၊ ဝန်ကြီး၏ ညွှန်ကြားချက်ကို ရတဖမှူးများက လိုက်နာဆောင်ရွက်ရန်၊ ထူးခြားဖြစ်စဉ်များကို ဖုန်း 067-412222၊ ဖက်စ် 067-412444 သို့ နေ့စဉ် ၀၅ နာရီ အရောက် မပျက်မကွက်တင်ပြရန်နှင့် ညွှန်ကြားစာများ ပေါက်ကြားမှုမရှိစေရေး ကြပ်မတ်ကွပ်ကဲ ဆောင်ရွက်ရန် ညွှန်ကြားထားကြောင်း သိရှိရသည်။