အဘယ်ကြောင့်နည်း

 By Hla Soewai

မင်းအောင်လှိုင်သည် သူ၏ ရွေးကောက်ပွဲအား အာဆီယံ အပါအဝင် မည်သူမျှ အသိအမှတ် ပြုမည် မဟုတ်ပဲ ဒီပုံစံ အတိုင်း ဆက်လုပ်မည် ဆိုက လက်ရှိ အပါယ်ခံ ဘဝ မှာပင် ဆက်ရှိနေမည် ဆိုသည်ကို ကောင်းစွာ ရိပ်စားမိနေပြီ ဖြစ်၍ သူရွေးကောက်ပွဲ လုပ်မည် ကို နိုင်ငံတော် အတိုင်ပင်ခံ မှ ထောက်ခံလာရန် ပါတီမှ ကိုယ်ကျိုးရှာ turncoat သစ္စာဖောက်များ နှင့် တွေ့ခွင့်ပြုခဲ့သည်ဟု ဧရာဝတီမှ သတင်းအရင်းအမြစ်များအား ကိုးကား၍ ဖေါ်ပြလာသည်။
မင်းအောင်လှိုင်သည် တကယ်တမ်းတွင် ဒေါ်အောင်ဆန်းစုကြည် ၏ ထောက်ခံမှုပင် မလိုပဲ အမတ် ဖြစ်ချင်သူ NLD မှ ပုဂ္ဂိုလ်များအား ပါတီ အမည်ခံပြီး ဝင်ပြိုင်ခိုင်း၍ ရသော်လည်း၊ ထိုသို့ လုပ်ပါက သူ၏ ရွေးကောက်ပွဲသည် အလိမ်အညာ အဖြစ်သာ ဆက်ရှိနေမည် ဆိုသည်ကို သိထားပြီး ဖြစ်ပုံရသည်။
မင်းအောင်လှိုင်သည် ဒေါ်အောင်ဆန်းစုကြည်သာ သဘောတူ မည်ဆိုက မည်သို့ အခွင့်အရေးများရလာမည်၊ မတူက ပါတီကို ဖျက်သိမ်းပစ်မည်၊ ခြံ အမှတ် ၅၄ အား ဘူဒိုဇာ နှင့် ထိုးပစ်မည် အစရှိသည့် carrot and stick များ ပါလာမည်သာ ဖြစ်သည်။
ထို့အတွက်လည်း စွန့်စားပြီး အားကိုးလောက်သည်ဟု ယူဆသူများကို စေလွှတ်ရသည်အထိ ဖြစ်လာခဲ့ခြင်းပင်၊ ထိုမျှလောက် တော့ ‌တွေးသင့်သည်။
ဒေါ်အောင်ဆန်းစုကြည်အား သူမအား ချုပ်နှောင်ထားရာ အခန်းမှ ခေါ်ထုတ်ပြီး ထောင်ထဲရှိ အဆောက်အအုံတခုတွင်  ဒေါ်စန္ဒာမင်း နှင့် အခြားတဦး တို့ နှင့် နှစ်ကြိမ်တိုင် တွေ့ဆုံဖြစ်ခဲ့သည်ဟု ဆိုသည်။
ဒေါ်အောင်ဆန်းစုကြည်သည် ထိုသို့ စစ်ကောင်စီ အလိုကျ လာရောက်တွေ့ဆုံခဲ့သည် ပုတ်သင်ညိုများ အပေါ် အလွန်ဒေါသထွက်သွားခဲ့သည်ဟု ဆိုသည်။
သို့သော် စန္ဒာမင်း သည် ကိုဂျင်မီ၊ ကိုဖြိုးဇေယျသော် အပါအဝင် လုပ်ဖေါ်ကိုင်ဖက် အများ အပြား အသတ်ခံရ၊ ထိုသို့ မဟုတ်ကလည်း ထောင်ထဲရောက်နေ၊ မရောက်သူများကလည်း အချိန်မီ တိမ်းရှောင်နေကြရပြီး ဒုက္ခသုက္ခများ ပင်လယ် ဝေ ဖြစ်နေချိန်၊ ထိုမျှမကသေး လူငယ်လူရွယ်လေးများ တောထဲတောင်ထဲတွင် ရရာလက်နက် စွဲကိုင် တွန်းလှန်နေကြချိန်တွင် ယခုကဲ့သို့ စကားမျိုး ပြောထွက်သည်မှာ အဘယ့်ကြောင့်နည်း။
ဒေါ်စန္ဒာမင်း ကိုယ်တိုင်ပဲ ခြိမ်းချောက်ခံနေရ၍ လော ဟု သူမ၏ ဖြတ်သန်းလာခဲ့ရသည့် နိုင်ငံရေး ဘဝ ကို ထည့်တွက်ကာ လျော့လျော့ပေါ့ပေါ့ စဉ်းစားချင်မိသော်လည်း သူမသည် စစ်ကောင်စီ ပြောခွင့်ရ ဇော်မင်းထွန်း အပါအဝင် ဗိုလ်ချုပ် အတော်များများ နှင့် နီးစပ်သူ ဖြစ်နေပြန်သည်ဟု သိရသည်။
သူမ တယောက်တည်းသာ မဟုတ်၊ ရွေးကောက်ပွဲကို  ယခင်ကလို NLD  အမည်တပ်ပြီး အရွေးခံလိုသူ များ ရှိနေသည်။ ထိုလူများ အတွက် judgement call ရောက်လာပြီ ဖြစ်သည်။
အကောင်းဆုံး အကြံပေးလိုသည်က ထိုမျှလောက် ငမ်းငမ်းတက် ဖြစ်နေက  ခွဲထွက် NLD Breakaway NLD ဆိုပြီး သီးခြား ပါတီ ထောင်ပြီး ဝင်ရောက်ယှဉ်ပြိုင်ကြပါ၊ ပြည်သူတို့၏ တော်လှန်ရေး အား ဖျက်လို ဖျက်ဆီး မလုပ်မိကြပါစေနဲ့၊ ထိုအရေးကို ပြည်သူများက ခွင့်လွှတ်သည် ဆိုစေဦး၊ သမိုင်းကတော့ မည်သို့မျှ ခွင့်လွှတ်မည် မဟုတ်ပေ။
လက်ရှိ တွင် ပြည်သူ များ ရှေ့မှောက်တွင် မင်းအောင်လှိုင် မည်သည့် အဖြစ်ရောက်နေသည်ကို ကြည့်ပြီး သင်ခန်းစာ ယူနိုင်ကြပါစေ ဟုသာ ပြောလိုပေသည်။
ပြည်သူများ၏ ခုခံတွန်းလှန်စစ် မုချ အောင်ရမည်!!!