ပြင်သစ်နိုင်ငံသည် စစ်ကောင်စီကိုအသိအမှတ်မပြု

ပြင်သစ်နိုင်ငံသည် အာဏာသိမ်းစစ်ကောင်စီကို အသိအမှတ် မပြုကြောင်းနှင့် စီးပွားရေးပိတ်ဆို့မှုကို တိုးချဲ့ရန် စဥ်းစားနေကြောင်း မြန်မာနိုင်ငံဆိုင်ရာ ပြင်သစ်သံရုံးက ယနေ့ (မတ် ၂၂ ရက်) တွင် ထုတ်ပြန် လိုက်သည်။ 

ပြင်သစ်အထက်လွှတ်တော်၌ မြန်မာ့အရေးနှင့်ပတ်သက်သည့် မေးခွန်းတစ်ခုအပေါ် ပြင်သစ် နိုင်ငံရပ်ခြားကုန်သွယ်ရေးနှင့် စီးပွားရေး၀န်ကြီး Franck Riester က မတ် ၁၇ ရက်တွင် ဖြေကြားခဲ့ခြင်း ဖြစ်သည်။

ဥရောပသမဂ္ဂအဖွဲ့ဝင်နိုင်ငံ ပြင်သစ်အနေဖြင့် စစ်ကောင်စီ၏ လက်နက်ကိုင်တပ်ဖွဲ့ဝင် အရာရှိ ၁၁ ဦးကို အရေးယူမှုတွင် ပါဝင်မည်ဖြစ်ပြီး ယင်းအရေးယူမှုကို ယနေ့ ချမှတ်မည်ဖြစ်သည်။

ထို့အပြင် ပြင်သစ်သည် စီးပွားရေးပိတ်ဆို့အရေးယူမှုများကို တိုးချဲ့ရန်လည်း စဥ်းစားနေပြီး ယခုကဲ့သို့ အလွန်အန္တရာယ်များသော ကာလတွင် မြန်မာစစ်တပ်သို့ ငွေကြေး စီးဆင်းမှုဖြစ်စေသော လုပ်ရပ်များ အားလုံး ရပ်တန့်ရမည်ဖြစ်ကြောင်း Franck Riester က ပြောသည်။

အာဏာသိမ်းစစ်ကောင်စီအပေါ် ကမ္ဘာက တုံ့ပြန်မှုအဖြစ် စစ်တပ်ထံစီးဝင်နေသည့် ငွေနှင့် လက်နက် များကို ဖြတ်တောက်ပစ်ရမည်ဟု ကုလသမဂ္ဂ၏ မြန်မာလူ့အခွင့်အရေးအထူးအစီရင်ခံစာတင်သွင်းသူ Tom Andrews က တိုက်တွန်းထားသည်။

https://www.myanmar-now.org/en