လော်ဘီကုမ္ဗဏီမှ (၂) ဦး မြန်မာနိုင်ငံသို့ မနက်ဖြန် လာရောက်မည်

မြန်မာစစ်ကောင်စီက နိုင်ငံတကာအသိုင်းအဝန်း၏ ထောက်ခံမှုရရန် ငှားရမ်းထားသည့် Dickens & Madson Canada လော်ဘီကုမ္ဗဏီမှ ပုဂ္ဂိုလ် (၂) ဦး မြန်မာနိုင်ငံသို့ မနက်ဖြန် လာရောက်မည် ကနေဒါ နိုင်ငံကူးလက်မှတ် ကိုင်ဆောင်ထားသည့် Dickens & Madson Canada လော်ဘီကုမ္ဗဏီမှ Dr. Ari Ben-Menashe နှင့် Ms. Dimitra Papageorkopoulos တို့နှစ်ဦးသည်၊ Myanmar Airways International - MAI (လေယာဉ်အမှတ် 8M-802) ဖြင့် မနက်ဖြန် မတ်လ ၁၆ ရက်နေ့ ည ၈ နာရီတွင်၊ ရန်ကုန်မြို့သို့ ဆိုက်ရောက်မည်ဟု သိရသည်။ ထိုလေယာဉ်သည်၊ ကိုးရီးယားနိုင်ငံ ဆိုးလ်မြို့ Incheon လေဆိပ်မှ ထွက်ခွာလာမည် ဖြစ်သည်။ မြန်မာပြည်တွင် ရှိစဉ်အတွင်း မည်သူတို့နှင့်တွေ့မည် ဆိုသည်ကို မသိရှိရသော်လည်း၊ ကနေဒါလော်ဘီ ၂ ဦးသည်၊ စစ်အာဏာသိမ်းအုပ်စုမှ ကာကွယ်ရေးဝန်ကြီး ဗိုလ်ချုပ်ကြီး မြထွန်းဦးနှင့် တွေ့ဆုံမည်ဟု ယုံကြည်ရသည်။ Dr. Ari Ben-Menashe ၏ Passport No. မှာ AK690403 ဖြစ်ပြီး၊ Ms. Dimitra Papageorkopoulos ၏ Passport No. မှာ AK680278 ဖြစ်သည်ဟု သိရသည်။ မြန်မာစစ်တပ်၏ အာဏာသိမ်းမှုနှင့် ပတ်သက်ပြီး အမေရိကန်နှင့် အခြားသော နိုင်ငံများကို အခြေအနေမှန်အား ရှင်းပြနိုင်ရန်အတွက် အစ္စရေး-ကနေဒါ လော်ဘီ အား မြန်မာအာဏာသိမ်းအုပ်စုက အမေရိကန်ဒေါ်လာ ၂ သန်းဖြင့် ငှားရမ်းခဲ့သည်ဟု အမေရိကန် တရားရေးဝန်ကြီးဌာနသို့ တင်သွင်းသည့် မှတ်တမ်းများက ဖော်ပြကြောင်း Reuters သတင်းဌာနအရ သိရသည်။ Dr. Ari Ben-Menashe နှင့် ၎င်း၏ Dickens & Madson Canada လော်ဘီကုမ္ပဏီက အမေရိကန်တွင် မြန်မာစစ်အာဏာသိမ်းအစိုးရအတွက် ကိုယ်စားပြုလိုက်လံ စည်းရုံးမည် ဖြစ်သကဲ့သို့ ဆော်ဒီအာရေဗျ၊ ယူအေအီး၊ အစ္စရေးနှင့် ရုရှအပြင် ကုလသမဂ္ဂကဲ့သို့သော နိုင်ငံတကာအဖွဲ့အစည်းများကိုလည်း မြန်မာစစ်တပ်အတွက် လော်ဘီအကျိုးဆောင်ပေးမည် ဖြစ်ကြောင်း အတိုင်ပင်လုပ်ငန်းသဘောတူညီချက်တစ်ရပ်အရ သိရသည်။ Mizzima - News in Burmese