လူစိတ်မရှိတဲ့ ကြံဖွတ်နှင့်စစ်ခွေးလော်ဘီများ
ထန်တလန်မြို့ကို စစ်ကောင်စီက မီးရှို့ဖျက်ဆီး
ပြီးနောက် ကြံ့ခိုင်ရေးပါတီပြောရေး ဆိုခွင့်ရှိသူ
နှင့် စစ်တပ်လော်ဘီများက လူမှုကွန်ရက်တွင်
အောင်ပွဲခံ၊ စစ်ကောင်စီအနေဖြင့် မြို့ရွာများ
ထပ်မံဖျက်ဆီးရမည်ဟု ခြိမ်းခြောက်
ရန်ကုန်၊ အောက်တိုဘာ ၃၀
ချင်းပြည်နယ်၊ ထန်တလန်မြို့ကို စစ်ကောင်စီတပ်ဖွဲ့က မီးရှို့ဖျက်ဆီးပြီးနောက် ကြံ့ခိုင်ရေးပါတီပြောရေးဆိုခွင့်ရှိသူ နန်းမြမြမီမီဇော်၊ စစ်တပ်ထောက်ခံသူ လော်ဘီ တပ်ကြပ်ကြီး ဖိုးစီ၊ စစ်တပ်ထောက်ခံသူ ဟန်ငြိမ်းဦးတို့က လူမှုကွန်ရက်များမှတစ်ဆင့် အောင်ပွဲခံခဲ့ပြီး စစ်ကောင်စီအနေဖြင့် မြို့ရွာများကို ထပ်မံ ဖျက်ဆီးရမည်ဖြစ်ကြောင်း ခြိမ်းခြောက်ရေးသားမှုများ လုပ်ဆောင်လျက်ရှိကြောင်း သိရှိရသည်။
ထန်တလန်မြို့လုံးကျွတ်နီးပါး မီးရှို့ဖျက်ဆီးခံနေရသည့် ထန်တလန်မြို့နယ်ကဲ့သို့ ထပ်မံ ဖျက်ဆီးခံရမည့် မြို့နယ်များ ပေါ်ပေါက်လာမည်ဖြစ်ကြောင်း USDP ပါတီ၏ ပြောရေးဆိုခွင့်ရှိသူ ဒေါ်နန်းမြမြမီမီဇော်က လူမှုကွန်ရက်မှတဆင့် ခြိမ်းခြောက်ရေးသားသည်။
"ဖြစ်မှ မျက်ရည်မခြူနှင့် အာဘန်ဝေါ မြို့ပြစစ် ပျောက်ကြားစစ်ဆိုပြီး ဂြိုလ်ဆက်ကြွရင် ထန်တလန်ကို ကြည့်ထားကြ၊ နောက်ထပ် ထန်တလန်တွေ ထပ် ထပ်ပြီးပေါ်လာမယ်" ဟု ကြံ့ခိုင်ရေးပါတီမှ နန်းမြမြမီမီဇော်က ဖေ့ဘုတ်စ်လူမှုကွန်ရက်တွင် ရေးသားထားသည်။
အလားတူ စစ်တပ် ထောက်ခံ လော်ဘီ တပ်ကြပ်ကြီး ဖိုးစည်က စစ်ကောင်စီ ၏ထန်တလန်မြို့ မီးရှို့မှုကို ထောက်ခံလိုက်ပြီး ရွာများကိုပါ အမြစ်လှန်ရန် တယ်လီဂရမ်တွင် ခြိမ်းခြောက်ရေးသားထားသည်။
"တယောက်ကျရင် ၁၀ ဆပြန်ယူ၊ ဒီရွာ အဝင်လမ်းဆွဲမိုင်းမိရင် အဲဒီရွာကို အမြစ်ပါလှန်။ အဲလိုသာ ကျင့်သုံးပေး။ အကျိုးစီးပွားထိခိုက်တဲ့ အရာမှန်သမျှ နောက်ဆုတ်သွားလိမ့်မယ်" ဟု ရေးသားထားသည်။
ဆက်လက်၍ "စခန်းတွေ ဝင်စီးပြီး ဒိုဇာနဲ့ ဖျက်ဆီးခဲ့တုန်းက ဒီလိုအသံမထွက်ခဲ့ကြပါဘူး။ အိမ်လေး ၃ လုံးလောက် မီးလောင်တာနဲ့ ပထွေးသိအောင် ငယ်သံပါပါနဲ့ အော်တော့တာပဲ" ဟု စစ်လော်ဘီ တပ်ကြပ်ကြီးဖိုးစီက ဆက်လက် ရေးသားသည်။
အလားတူ စစ်လော်ဘီ ဟန်ငြိမ်းဦးက ထန်တလန်မြို့ကို စစ်တပ်က မီးလောင်တိုက်သွင်းခဲ့မှုအပေါ် ပျော်ရွှင်ရမည်ဖြစ်သည်ဟု ရေးသားထားသည်။
"စစ်ကိုဖိတ်ခေါ်ခြင်း အကျိုး မိန်းမလို မိန်းမရ နဲ့ အိမ်တွေ အကာအကွယ်ယူပြီး တိုက်ကွက်ဖော် PDF စောက်ရူးတွေရဲ့ အကျိုးခံစားစမ်း၊ အားမနာနဲ့ ပျော်ချပစ်" ဟု တယ်လီဂရမ် လူမှုကွန်ရက်တွင် ရေးသားဖြန့်ဝေထားသည်။
ထန်တလန်မြို့တွင် အိမ်ခြေ ၁၆၃ လုံးနှင့် ခရစ်ယာန် ဘုရားရှိခိုးကျောင်း ၂ ခုကို စစ်ကောင်စီတပ်များက လက်နက်ကြီးများဖြင့် ပစ်ခတ် မီးရှို့၍ မီးလောင်ပြာကျသွားပြီး လက်ရှိအချိန်တွင်လည်း မီးဆက်လက် လောင်ကျွမ်းနေဆဲဖြစ်သည်။
ko htut
Comments