စစ်ခေါင်းဆောင်များ ကို ဖယ်ရှားရန်ကု လ အထူး သံတမန် တောင်းဆို

အာဆီယံ မှ မင်းအောင်လှိုင် အား အစည်းအဝေး သို့ မဖိတ်ခေါ်ဘဲ ထားခဲ့မှုသည် နိုင်ငံတကာ ၏ အသိအမှတ်ပြု ခံရရန် အာသာငမ်းငမ်း ကြိုးပမ်းနေသော အာဏာသိမ်း အဖွဲ့ အတွက် အကြီးအကျယ် အထိနာသွားခဲ့ရသော် လည်း နောက်ဆုတ်မည့် ဟန် မရှိသည့်အပြင် တိုး၍ တိုး၍သာ မိုက်တွင်းနက်လာနေသည့် လက္ခဏာများ ပြသလာခဲ့သည်။

ထန်တလန် တွင် သောကြာနေ့ နံနက် ဆယ်နာရီခန့်က လူသူ မရှိသော အိမ်များထဲသို့ မင်းအောင်လှိုင်၏ စစ်သားများက ဆန် နှင့် စားစရာ များ ဝင်ရောက် လုယက်ယူငင်‌နေသည်ကို ချင်း ပြည်သူ့ ကာကွယ်ရေး တပ်ဖွဲ့များက ပစ်ခတ်သဖြင့် တဦးသေဆုံး သွားပြီးနောက် လူနေရပ်ကွက်များကို ချိန်ရွယ်ကာ အဝေး မှ သူရဲဘော ကြောင်စွာဖြင့် လက်နက်ကြီးများ နှင့် ပစ်ခတ်ရာမှ မီးလောင်ခံခဲ့ရခြင်း ဖြစ်သည်။

ချင်းပြည်နယ် ထန်တလန် မြို့လေးတွင် ဘုရားကျောင်း နှစ်ကျောင်း၊ CB ဘဏ် နှင့်  အိမ်ခြေ ၁၆၄ လုံးမှာ ၎င်းတို့ လက်ချက်ဖြင့် မီးဟုန်းဟုန်း တောက်လောင်နေကာ ပြည်သူများ အသက်ဘေး အတွက် ပြေးလွှားနေရ ချိန်တွင် မင်းအောင်လှိုင်သည် အပြုံးမပျက်၊ အလည်အပတ် ရောက်ရှိနေသော ရုရှားရေတပ်မှ အကြီးအကဲများ ဖြင့် အရက်ခွက်ခြင်း တေ့ကာ ပြုံးပျော်နေသည့် သတင်းဓါတ်ပုံများက ပလူပျံအောင် ထွက်လာခဲ့ပေတော့သည်။

ရုရှားတို့သည်  သူ့ကို ယခုအထိ အစိုးရ အကြီးအကဲ တဦး အဖြစ် အသိအမှတ် ပြု ဆက်ဆံခြင်း မရှိဘဲ ၎င်းတို့ ထံမှ လက်နက်များ ဝယ်ယူမည့် စစ်ခေါင်းဆောင် တဦး အဖြစ်သာ သဘောထား နေဆဲ ဖြစ်သည်ကို သိသိကြီး နှင့် ကျေနပ်နေရသည့် အဖြစ်ပင်။ ဆီးရီးယားရှိ အာဆတ်လို မိမိအား လာကူညီမည့်သူများဟု လည်း တိတ်တခိုး စိတ်ကူးယဉ်နေဦးမည် ထင်သည်။

သို့သော် တနိုင်ငံလုံး ကတော့ ၎င်းတို့ ကျဥ်းထဲကျပ်ထဲ ရောက်သည်ထက် ရောက်လာနေပြီ ဆိုသည်ကို  ရိပ်စားမိနေကြလေသည်။

 

မြန်မာပြည်သူပြည်သားများ အနေနှင့် မင်းအောင်လှိုင် တပ်များ၏ လူမဆန်စွာ ရက်စက်ယုတ်မာခဲ့မှုများ အတွက် ကြိမ်မီးအုန်းသလို ပူဆွေးသောက ရောက်နေကြရပြီး ၎င်းအား အမြန်ဆုံး ဖယ်ရှား နိုင်မှ ဖြစ်တော့မည် ဆိုသည့် သံဓိဠာန် များ ခိုင်မာသည်ထက် ခိုင်မာလာရခြင်းကပင် အဆိုးထဲက အမြတ်ထွက်လာခဲ့ရသည်။

ထိုဖြစ်အင်ကို ကြည့်၍ မြန်မာနိုင်ငံ တွင်း အခြေအနေများသည် လက်နက်အားကိုး ဖြင့် အနိုင်ကျင့်ခံနေရသည် မှာ ကမ္ဘာအလယ်တွင် ထင်ရှားသည်ထက် ထင်ရှား၍ လာနေပြီ ဖြစ်သည်။

သက်တမ်းကုန်၍ ရာထူးမှ ဆင်းပေးရတော့မည့် ကုလ အတွင်းရေးမှူးချုပ်၏ အထူး သံတမန် ခရစ်စတင်း ဘာဂင်ဂါ မှ ပြည်တွင်း စစ်ကြီးသည် တနိုင်ငံလုံးသို့ ပျံ့နှံ့လာနေပြီ ဖြစ်သောကြောင့် နိုင်ငံတကာ မိသားစုများ အနေဖြင့် စစ်ခေါင်းဆောင်များ အား ဖယ်ရှားပြီး ငြိမ်းချမ်းရေးဆီ ဦးတည် နိုင်မည့် လူများ နှင့် အစားထိုး နိုင်ရေး ကို စဉ်းစားသင့်ပြီဟု ပွင့်လင်းစွာ ပြောဆိုလာသည်။ သူမ၏ တောင်းဆိုမှုသည် မင်းအောင်လှိုင် အတွက် သေမင်း ခေါ်သံကြီးပင် ဖြစ်ပေသည်။

ချင်းပြည်နယ်သည် လွန်စွာ တောတောင်ထူထပ်ပြီး ဒေသခံ တိုင်းရင်းသားများက ကျားကုတ်ကျားခဲ ခုခံ တွန်းလှန်ရန် သံဓိဠာန် ချပြီး ဖြစ်၍ နှစ်ဖက် ထိခိုက်ကျဆုံးမှု များပြားလာတော့မည်ဟုလည်း ခန့်မှန်း ပြောဆိုလိုက်သည်။ ထိုအနေအထား အားလုံးကို ပြောင်းလဲနိုင်စွမ်း ရှိသည့် တခုတည်းသော နိုင်ငံသည် တရုတ်ပင် ဖြစ်၍ မှန်ကန်သည့် ဆုံးဖြတ်ချက် ချနိုင်လိမ့်မည်ဖြစ်ကြောင်း မျှော်လင့်ရသည်ဟု ဆိုသည်။

သူမ ကဲ့သို့ စစ်ခေါင်းဆောင်များ အာဏာတည်မြဲရေး အတွက် တိုင်းပြည်အား ပြည်တွင်းစစ်ကြီး အဖြစ် ပြောင်း လဲနိုင်ရန် ကြိုးပမ်းအားထုတ်နေမှုများကို ကုလသမဂ္ဂအနေဖြင့် အမြန်ဆုံး ရပ်တန့်ပြစ်ရန် တောင်း ဆိုမှုများ လည်း ကျယ်လောင်စွာ ထွက်ပေါ်လာနေပြီ ဖြစ်သည်။

ကုလသည် ၎င်းတို့ ကို ပေးအပ်ထားသော အခွင့် အာဏာတခုတည်း ဖြင့် ဆုံးဖြတ်လုပ်ဆောင်ခွင့်ရမည် ဆိုလျှင် မြန်မာအရေးသည် ကာလကြာမြင့်စွာကပင် ဖြေရှင်းပြီး ဖြစ်နေလောက်ပြီ။ သို့သော် အခွင့်အာဏာသည် စာရွက်ပေါ်တွင်သာ ရှိနေပြီး တကယ်တမ်း ကြိုးကိုင် ချယ်လှယ်နေကြသည်က ဗီတို အာဏာ စွဲကိုင်ထားသော နိုင်ငံကြီး ငါးနိုင်ငံသာ ဖြစ်သည်။ လုံခြုံရေး ကောင်စီသည် မြန်မာ အရေး အပေါ် ဥပ‌ဒေကဲ့သို့ အာဏာ တည်စေမည့် ဆုံးဖြတ်ချက်မျိုး တခုတလေမျှ မချမှတ်နိုင်သေးသော်လည်း ယခုအတိုင်း ဆိုလျှင် မကြာမီ အချိန်တွင် ဖြစ်ပေါ်လာဖွယ် ရှိသည်ဟု မျှော်လင့်ရပေသည်။

ဆက်ဒမ် ဟူစိန် အား ကြိုးပေး ကွပ်မျက်ခဲ့မှုသည် ၎င်းကျူးလွန်ခဲ့သော ဖြစ်စဉ်များ အားလုံးကို ရုံးတင် စစ်ဆေး ခဲ့ခြင်း မဟုတ်ဘဲ ၁၉၈၂ ခုနှစ် အတွင်း ဆက်ဒမ်ကို လုပ်ကြံသတ်ဖြတ်ရန် ကြိုးစားမှု ဖြစ်ပွားခဲ့သည့် နေရာ အနီး အနားရှိ ဒူဂျေး ရွာ တရွာလုံး နီးပါးကို လက်တုန့်ပြန် သတ်ဖြတ်ခဲ့သည့် အမှု တမှုတည်း ဖြင့် သေဒဏ် စီရင်ပြီး ရက်ပေါင်း ၃၀ အတွင်း ကြိုးပေး ကွပ်မျက်ခဲ့ခြင်း ဖြစ်သည်။ 

အစိုးရ တရပ်လို တိုင်းပြည်ကို အုပ်ချုပ်သွားတော့မည်ဟု ထင်တလုံး ဖြင့် ပူးပေါင်းလာခဲ့ကြသူ များ၊ သစ္စာခံ ခဲ့ကြသည့် ဝန်ထမ်းများသည် လည်း သူခိုးဓါးပြ သာသာ အဖွဲ့ လက်အောက်တွင် အမှုထမ်းရမည့် အဖြစ်မျိုး နှင့် ကြုံနေကြရလေသည်။

တော်လှန်ရေးကြီး မုချအောင်ရမည်!!!

ဆရာလှစိုးဝေရေးသားသည်၊