BeeXprss, ကြံ့ခိုင်ရေးပါတီနဲ့ UMG, Openmind တို့ရဲ့ ဆက်နွယ်မှု

By YeYint Nge March 28, 2022

28 MAR, 2022

UMG ရဲ့ နာမည်ကြီး လုပ်ငန်းအများစုတွေထဲမှာ ရန်ကုန် ရှုခင်းသာမှာရှိတဲ့ Yangon Waterboom, နောက် ‘တောင်သူရွှေခတ်’ မြေသြဇာထုတ်လုပ်တာ၊ myDoctor လို နည်းပညာနဲ့ပတ်သက်တဲ့ ဝန်ဆောင်မှုတွေ အပြင် Volvo, Hitachi, SDLG နဲ့ Sunward တို့လို စက်ကြီးတွေ တင်သွင်းဖြန့်ချိတာလည်း ရှိပါသေးတယ်။

‘၇၇ နှစ်မြောက် တပ်မတော်နေ့’ လို့ စာရေးပြီး မြန်မာနိုင်ငံအလံ နောက်ခံနဲ့ စစ်သားတချို့ အလေးပြုနေပုံ၊ သေနတ်ကိုင်ထားပုံတွေပါတဲ့ ဓာတ်ပုံတစ်ပုံကို ရန်ကုန်အခြေစိုက် ပါဆယ်ဝန်ဆောင် ကုမ္ပဏီတစ်ခုက Facebook ပေါ် တင်ခဲ့လို့ အင်တာနက် အသုံးပြုသူများ အကြား ဂယက် ထ သွားခဲ့ပါတယ်။

အဲ့ဒီနောက် ဝေဖန်မှုတွေ မြင့်တက်ခဲ့ရာကနေ “မည်သည့် ပုဂ္ဂိုလ် အဖွဲ့အစည်းနဲ့မျှ ပတ်သတ်ဆက်နွယ်ခြင်း မရှိကြောင်းနှင့် မြန်မာနိုင်ငံ၏ ပိတ်ရက်များအား ပုံမှန်တင်နေကျဖြစ်ပါသဖြင့် ချစ်လှစွာသော Customer များအား အထင်လွှဲမှားစေသည့် post အား မှားယွင်းပေါ့ဆစွာ တင်ခဲ့မှုကြောင့် BeeXprss မှအနူးအညွှတ် တောင်းပန်အပ်ပါကြောင်း” ဆိုပြီး နာရီပိုင်းအကြာမှာ ပြန်လည် ဖြေရှင်းခဲ့ပါတယ်။

ဒါပေမယ့် စစ်တပ်က အာဏာသိမ်းထားချိန်၊ ပြည်သူအများစုက စစ်ကောင်စီကို ရွံမုန်းနေချိန်မှာ တပ်မတော်နေ့ဆိုပြီး စာတင်ခဲ့ခြင်းက BeeXprss အတွက် စွန့်စားလွန်းရာ ကျပါတယ်။ သူတို့ Facebook စာမျက်နှာမှာ အင်တာနက် အသုံးပြုသူတွေက အုံနဲ့ကျင်းနဲ့ ဝေဖန်ပြောဆိုကြပြီးတဲ့နောက် BeeXprss ဟာ နဂိုပို့စ်ကို ဖြုတ်ပစ်လိုက်သလို ပေးလာတဲ့ Comment တွေကို ဖျက်ပစ်တာတွေထိ လုပ်ခဲ့ပါတယ်။

တကယ်တော့ BeeXprss ဟာ အာဏာသိမ်းစစ်တပ်နဲ့ ‘တိုက်ရိုက်’ ပတ်သက်နေသလား ဆိုတာကိုတော့ တိကျရေရာတဲ့ သက်သေမတွေ့ရပါဘူး။ Beexprss ရဲ့ တကယ့် မိခင်ကုမ္ပဏီကတော့ စီးပွားရေး လုပ်ငန်းစုကြီး ဖြစ်ပြီး ရန်ကုန်က လူသိများတဲ့ လုပ်ငန်းတော်တော်များများကို ပိုင်ဆိုင်ပါတယ်။

သူကတော့ UMG ပဲဖြစ်ပါတယ်။ UMG ဟာ မြေသြဇာထုတ်လုပ်တာ၊ စားသောက်ကုန်ထုတ်လိုက်တာ၊ ပညာရေးဝန်ဆောင်မှု၊ ကျန်းမာရေးဝန်ဆောင်မှုပေးတာ၊ စက်ကြီးတွေ ငှားရမ်းတာ၊ ကစားကွင်း စီးပွားရေးကနေ နောက်ဆုံး ကြော်ငြာ မားကက်တင်း အေဂျင်စီအထိ လုပ်ငန်းပေါင်းစုံ လုပ်ကိုင်တဲ့ ကုမ္ပဏီကြီး တစ်ခု ဖြစ်ပါတယ်။

အာဏာသိမ်းပြီး တစ်လအကြာ မတ်လ ပထမပတ်က စမ်းချောင်းမှာ ဆန္ဒထုတ်ဖော်တဲ့ လူငယ်တွေကို စစ်ကောင်စီရဲတပ်ဖွဲ့က ဖြိုခွင်းရာမှာ မြေကော်စက်၊ မြေတူးစက် စတဲ့ စက်ကြီးတွေအသုံးပြုတာတွေ ရှိခဲ့ပြီး ဒီစက်တွေဟာ UMG က စက်တွေလို့ နာမည်ထွက်ခဲ့ပါသေးတယ်။

ဒါပေမယ့် “UMG Group of Companies မှ တင်သွင်းဖြန့်ချိလျှက်ရှိသော စက်ယန္တရားဆိုင်ရာ Brand အမှတ်တံဆိပ်များသည် ယခု ငြိမ်းချမ်းစွာ ဆန္ဒထုတ်ဖော်နေသည့် ပြည်သူလူထုအား အကြမ်းဖက် နှိမ်နင်းသည့် နေရာများတွင် အသုံးပြုသည့် စက်ယန္တရားများ၌ တွေ့ရှိရသော Brand အမှတ်တံဆိပ်များ မပါဝင်ကြောင်း” ဆိုပြီး ပြီးခဲ့တဲ့နှစ် မတ် ၂ က ထုတ်ပြန်ခဲ့ပါတယ်။

UMG ကို အာဏာသိမ်း စစ်တပ်နဲ့ တွဲစပ်ပြီး ဝေဖန်ကြပေမယ့် တိုက်ရိုက် ပတ်သက်ဆက်နွယ်နေမှုမျိုးကို လတ်တလော မတွေ့ရှိရပါ။ ဒါပေမယ့် UMG ရဲ့ မားကက်တင်းနဲ့ ကြော်ငြာအေဂျင်စီဖြစ်တဲ့ Openmind ကုမ္ပဏီလီမိတက်ကတော့ ဟိုးအရင် ၂၀၂၀ နိုဝင်ဘာ ရွေးကောက်ပွဲ မဲဆွယ်စည်းရုံးရေးကာလက ကြံ့ခိုင်ရေးပါတီ ရွေးကောက်ပွဲ အောင်နိုင်ရေးအတွက် အလုပ်လုပ်ပေးခဲ့ဖူးကြောင်း တွေ့ရှိရပါတယ်။

● UMG ရဲ့ Openmind Co., Ltd

Openmind ကို ၂၀၁၅ ခုနှစ်ကတည်းက စတင်တည်ထောင်ခဲ့ပြီးတော့ UMG ရဲ့ အဓိက လုပ်ငန်းတွေထဲက လုပ်ငန်းကြီးတစ်ခု ဖြစ်ပါတယ်။ ကြော်ငြာ၊ မားကက်တင်း၊ ဒီဂျစ်တယ်မားကက်တင်း၊ မားကက်တင်းသုတေသန စတဲ့ ဝန်ဆောင်မှုတွေ လုပ်ပါတယ်။

Facebook ရဲ့ ၂၀၂၀ ပြည့်နှစ် အောက်တိုဘာက ထုတ်ပြန်ချက်အရ Openmind နဲ့ဆက်စပ်နေတဲ့ Facebook Page ၆ ခု၊ အကောင့်ပေါင်း ၃၆ ခု၊ Facebook Group ၂ ခုနဲ့ Instagram အကောင့် ၁ ခုတို့ကို တွေ့ရှိခဲ့တယ်လို့ ဆိုပါတယ်။

အဲ့ဒီ အကောင့်များဟာ “မြန်မာနိုင်ငံရှိ PR အေဂျင်စီဖြစ်သည့် Openmind နှင့် ချိတ်ဆက်နေ” တယ်လို့ Facebook က ဆိုပါတယ်။ ဒါ့အပြင် “ဤလှုပ်ရှားမှုသည် မြန်မာနိုင်ငံရှိ ပြည်တွင်းပရိသတ်များကို ပစ်မှတ်ထားခြင်းဖြစ်သည်။ နိုဝင်ဘာလ ရွေးကောက်ပွဲ မတိုင်မီ အစစ်အမှန် မဟုတ်တဲ့ သံသယရှိဖွယ် အပြုအမူတွေကို စုံစမ်းစစ်ဆေးရာမှာ ဒီကွန်ရက်ကို တွေ့ရှိခဲ့သည်” လို့ Facebook က ထုတ်ပြန်ခဲ့ဖူးပါတယ်။

Openmind နဲ့ ချိတ်ဆက်နေတယ်လို့ Facebook က ပြောတဲ့ အကောင့်တွေဟာ အနီရောင် - အမျိုးသားဒီမိုကရေစီအဖွဲ့ချုပ် (NLD) ကို ဦးတည်တိုက်ခိုက်ပြီး အစိမ်းရောင် - ကြံ့ခိုင်ရေးနှင့်ဖွံ့ဖြိုးရေးပါတီ (USDP) ကို ဦးစားပေးရွေးချယ်ဖို့ ဝါဒဖြန့်လှုံ့ဆော်တဲ့ စာတွေ၊ ဓာတ်ပုံတွေနဲ့ ဗွီဒီယိုတွေ တောက်လျှောက်တင်ခဲ့တာ ဖြစ်ပါတယ်။

စာဖတ်သူများ သိကြတဲ့အတိုင်း အနီရောင်ဟာ အမျိုးသားဒီမိုကရေစီအဖွဲ့ချုပ် (NLD) ကို ဆိုလိုတာ ဖြစ်ပြီး အစိမ်းရောင်ကတော့ ကြံ့ခိုင်ရေးနှင့်ဖွံ့ဖြိုးတိုးတက်ရေးပါတီ (USDP) ကို ရည်ညွှန်းတာ ဖြစ်ပါတယ်။

မှတ်တမ်းများအရ အနီရောင်ကို ဦးတည်တိုက်ခိုက်တဲ့ Facebook စာမျက်နှာတွေထဲမှာ ‘စေ့စပ်သေချာ မဲပေးပါ’၊ ‘Free To Talk’၊ ‘USDP Women Committee’ နဲ့ Brighter Future စာမျက်နှာတို့ဖြစ်တာကို တွေ့ရပါတယ်။ ဒီထဲမှာ USDP Women Committee သာ ကျန်နေသေးပြီး အခြား စာမျက်နှာတွေကတော့ လက်ရှိအချိန်မှာ မရှိတော့ပါဘူး။

ရွေးကောက်ပွဲမှာ USDP အောင်နိုင်ရေးအတွက် ဝါဒဖြန့်နေတဲ့ ဒီ အကောင့်တုတွေဟာ Openmind နဲ့ဆက်စပ်နေတယ်လို့ Facebook က ထုတ်ပြန်ပြီးတဲ့နောက်ပိုင်း ကြံ့ခိုင်ရေးပါတီ ပြောရေးဆိုခွင့်ရှိသူ မယမင်းမြင့်ဆွေက ဒီလိုကိစ္စတွေကို သူ မသိတဲ့အကြောင်း ငြင်းဆိုခဲ့ဖူးပါတယ်။

ဒါ့အပြင် Openmind ကလည်း သူတို့အနေနဲ့ ဒီလိုမျိုး နိုင်ငံရေးကိစ္စတွေမှာ မပါဝင်သလို USDP အတွက် အကောင့်တွေကလည်း သူတို့လုပ်တာ မဟုတ်ကြောင်း သူတို့ Facebook ကနေ ကြေညာခဲ့တယ်လို့ Reuters သတင်းဌာနက ၂၀၂၀ နိုဝင်ဘာ ၆ က ရေးသားခဲ့ဖူး ပါတယ်။

ဒါပေမယ့် Openmind ရဲ့ အဲ့ဒီ ထုတ်ပြန်ချက်ကိုတော့ ခုချိန်မှာ သူတို့ Facebook ပေါ်မှာ ရှာမတွေ့တော့ပါဘူး။

● Openmind ကို ဘယ်သူတွေ ဦးဆောင်သလဲ

ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန (DICA) ရဲ့ ဖော်ပြချက်အရ Openmind ကို ဦးဆောင်သူ ဒါရိုက်တာတွေထဲ အင်ကြင်းဆွေ၊ မာလာဝင်း၊ သက်ထားရွှေစင် နဲ့ သင်းရတီရွှေစင်တို့ကို တွေ့ရပါတယ်။ ဒီထဲက ဒေါ်မာလာဝင်း၊ သက်ထားရွှေစင်နဲ့ သင်းရတီရွှေစင်တို့ဟာ UMG ရဲ့ ဒါရိုက်တာတွေလည်း ဖြစ်ပြန်ပါတယ်။

ဒေါ်မာလာဝင်းရဲ့ အမျိုးသားဖြစ်သူ အင်ဒိုနီးရှားနိုင်ငံသား Kiwis Aliwarga ကိုတော့ DICA ရဲ့ မှတ်ပုံတင်စာရင်းထဲ တရားဝင်ဖော်ပြထားတာ မတွေ့ရပေမယ့် UMG ရဲ့ Facebook ပို့စ် တစ်ခုမှာတော့ ဦးကီဝီ (CEO) + ဒေါ်မာလာဝင်း (Chairwoman) (UMG Group of Companies) လို့ ရေးသားထားတာ တွေ့ရပါတယ်။

● UMG ၏ Win Food ကုမ္ပဏီပြဿနာ

အာဏာသိမ်းကာလအတွင်း စက်ရုံကို ယာယီပိတ်သိမ်းမယ်လို့ ကြေညာလိုက်ပြီးတဲ့နောက် UMG ကုမ္ပဏီလုပ်ငန်းစုရဲ့ လက်ခွဲတစ်ခုဖြစ်တဲ့ Win Food စားသောက်ကုန်ထုတ်စက်ရုံကနေ အလုပ်သမား ၇ ဦး အလုပ်ထုတ်ခံခဲ့ရဖူးပါတယ်။

ဘာကြောင့်လဲဆိုရင် စက်ရုံပိတ်ထားတဲ့ကာလမှာ အလုပ်သမားအခွင့်အရေး ရဖို့ တိုင်စာပို့ တောင်းဆိုတဲ့အတွက်ပါ။ စက်ရုံပိတ်ထားတဲ့ကာလမှာ အနည်းဆုံး အခကြေးငွေ ခံစားလိုတာကို အလုပ်သမား ၇ ဦးက ကုမ္ပဏီနဲ့ သက်ဆိုင်ရာ မြို့နယ် အလုပ်သမား ညွှန်ကြားမှု ဦးစီးဌာန၊ ထွေအုပ်၊ လူဝင်မှု ကြီးကြပ်ရေးတို့ကို ပြီးခဲ့တဲ့နှစ် သြဂုတ်က တိုင်ခဲ့ဖူးပါတယ်။

အဲ့ဒီလို အလုပ်သမားအခွင့်အရေး လိုချင်လို့ တိုင်ကြားခဲ့တဲ့ အလုပ်သမားတွေကို UMG ရဲ့ လက်အောက်ခံ ကုမ္ပဏီခွဲ Win Food က အလုပ်ထုတ်ပစ်ခဲ့တာ ဖြစ်ပါတယ်။

https://mmsentiment.com