ရဲနဲ့စစ်သား တွေ အညံခံပြီး စခန်းမစွန့်ခွာဖို့ကို စစ်ကောင်စီ ညွှန်ကြား
ရဲနဲ့စစ်သား တွေ အညံခံပြီး စခန်းမစွန့်ခွာဖို့ကို စစ်ကောင်စီ ညွှန်ကြား၊ အညံ့မခံဘဲ အသေခံတိုက်ခိုင်းတဲ့သဘောလို့ ဆို
ရန်ကုန် | မတ် ၃၀
ခေတ်သစ်မီဒီယာ
အာဏာသိမ်းစစ်ကောင်စီလက်အောက် ရဲစခန်း၊ ရဲကင်းတွေက တပ်ဖွဲ့ဝင်တွေနဲ့ မိသားစုဝင်တွေအနေနဲ့ ပြည်သူ့ကာကွယ်ရေးတပ်ဖွဲ့ (PDF)တွေရဲ့ စခန်းသိမ်းတိုက်ခိုက်မှုတွေကြုံရပါက လက်နက်ချအညံခံတာတွေ၊ စခန်းကိုစွန့်ခွာထွက်ပြေးတာတွေ မလုပ်ကြဖို့ ညွှန်ကြားထားတဲ့ စစ်ကောင်စီကြေးနန်းစာတစ်စောင်ကို Myanmar Police CDM Channel က ထုတ်ပြန်ပါတယ်။
ရဲစခန်း၊ ရဲကင်းတွေမှာရှိတဲ့ စစ်ကောင်စီတပ်ဖွဲ့ဝင်တွေနဲ့ မိသားစုဝင်တွေကို ပြည်သူ့ကာကွယ်ရေးတပ်ဖွဲ့ (PDF)တွေက ကြိုတင်စည်းရုံးသိမ်းသွင်းတာတွေလုပ်ဆောင်နေတယ်လို့လည်း အဆိုပါ စစ်ကောင်စီကြေးနန်းညွှန်ကြားချက်မှာ ဖော်ပြထားပါတယ်။
ရဲတပ်ဖွဲ့ဝင်တွေ၊ မိသားစုဝင်တွေအနေနဲ့ ပြည်သူ့ကာကွယ်ရေးတပ်ဖွဲ့ PDFတွေနဲ့ပူးပေါင်းပြီး တပ်တွင်းသတင်းပေးတာတွေ၊ အလစ်အငိုက်တိုက်ခိုက်ခံရရင် လက်နက်ချအညံခံတာနဲ့ စခန်းစွန့်ခွာတာတွေလုပ်နေတယ်လို့လည်း အဆိုပါကြေးနန်းက ဆိုပါတယ်။
တပ်တွင်းစည်းလုံးမှုမပြိုကွဲဖို့နဲ့ တပ်ဖွဲ့ဝင်တွေ NUG၊ PDF အဖွဲ့အစည်းတွေနဲ့ ဆက်သွယ်တာတွေမလုပ်စေဖို့အတွက် ကြပ်မတ်ဆောင်ရွက်ဖို့လည်း ညွှန်ကြားထားတာတွေ့ရပါတယ်။
"စခန်းမစွန့်နဲ့ မင်းတို့ အသေခံတိုက်ဆိုတဲ့သဘောပဲ။ အသေခံတိုက်။ သေချင်လည်း သေပါစေ မင်းတို့ စခန်းကို ရအောင် ပြန်တိုက်လို့ ပြောတာပါပဲ။ မင်းတို့အသက်ထက် စခန်းမကျဖို့က အရေးကြီးတယ်ပေါ့။ ညွှန်ကြားချက်က အဲဒီအဓိပ္ပာယ်ပဲ" လို့ CDM စစ်သားတစ်ဦးက သုံးသပ်ပြောဆိုပါတယ်။
Comments