ရန်ကုန်မြို့ရှိ Barနှင့် Clubများတွင် "ငါတို့နိုင်ရင် ဒီ့ထက်ပိုပျော်ရမှာကွာ"စတစ်ကာများဖြင့်လှုပ်ရှားမှုပြုလုပ်

သုည/People's Spring

ရန်ကုန်မြို့ရှိ Bar နှင့် Club များတွင် "ငါတို့နိုင်ရင် ဒီ့ထက်ပိုပျော်ရမှာကွာ" ဟူသော စာတန်းပါ စတစ်ကာများ ကပ်၍ Yangon Revolution Force - YRF ( Soft Strike Community )မှ ရဲဘော်များက လူထုအား လှုံ့ဆော်သည့် လှုပ်ရှားမှုတစ်ခု ပြုလုပ်ခဲ့ကြသည်။ 

အာဏာရှင်တို့၏ အကြမ်းဖက်ဖိနှိပ် ချုပ်ချယ်မှုများကြောင့် ရန်ကုန်မြို့အပါအဝင် မြို့ပြဒေသများတွင် ပြည်သူလူထုအနေဖြင့် နွေဦးတော်လှန်ရေးအား သိသာထင်ရှားစွာ ပါဝင်ပံ့ပိုးနိုင်မှု အားနည်းလျက်ရှိကြောင်း YRF က ဖော်ပြခဲ့သည်။

သို့သော်တိတ်ဆိတ်စွာ ရရာနည်းလမ်းဖြင့် တော်လှန်အင်အားစုများအား ဆက်လက်ပံ့ပိုးနေသော မြို့ပြနေပြည်သူ အမြောက်အများရှိနေသေးကြောင်းနှင့် အပြင်ပုံပန်းသဏ္ဍာန်သာ ကြည့်မည်ဆိုပါက ရန်ကုန်မြို့သည် သွေးအေးနေပြီး ပုံမှန်အခြေနေအတိုင်း လည်ပတ်နေသလို ဖြစ်နေသော်လည်း ပြည်သူလူထုအနေဖြင့် အပန်းဖြေ၊ အနားယူခြင်းကို အပြစ်မမြင်ကြောင်း YRF က ဆိုသည်။

အပန်းဖြေ အနားယူသည့်အချိန်တွင် စစ်ကောင်စီနှင့် ဆက်စပ်နေသော Bar များ၊ Club များ၊ စားသောက်ဆိုင်၊ ခန်းမနှင့် တည်းခိုရာနေရာများအား ရှောင်ကျဉ်ကြရန်နှင့် ပွဲစီစဉ်သူများက စစ်တပ်နှင့်ဆက်နွယ်သူများဖြစ်ပါက မလွဲမသွေ Boycott ကြပါရန်နှင့် တော်လှန်ရေး အနိုင်ရပါက ယခုထက် အဆပေါင်းများစွာ ပိုပျော်ရမည်ဖြစ်ကြောင်းကိုလည်း သတိချပ်စေရန် အသိပေးသည့်အနေဖြင့် ယင်းလှုပ်ရှားမှုအား ပြုလုပ်ခဲ့ခြင်း ဖြစ်ကြောင်း YRF က အသိပေးခဲ့သည်။

ဓာတ်ပုံ - YRF