ပုသိမ်အကျဉ်းထောင်တွင် ပစ်သတ်ခံရသည့် ကိုဝေယံဖြိုးရဲ့ အလောင်းကို စစ်ကောင်စီက မိသားစုဝင်တွေကို မပေးပဲ မီးသဂြိုလ်
ဧရာဝတီတိုင်းမ်
ဇန်နဝါရီလ ၈ ရက်
ဧရာဝတီတိုင်း၊ ပုသိမ်မြို့မှာ ဇန်နဝါရီလ ၆ ရက်နေ့က ပုသိမ်အကျဉ်းထောင်မှာ စစ်ကောင်စီလက်အောက်ခံ ရဲတွေ အကြမ်းဖက်ပစ်ခတ်မှုတွေကြောင့် အကျဉ်းကျခံနေရတဲ့ ကိုဝေယံဖြိုး ဦးခေါင်း သေနတ်ကျည် ၃ ချက် မှန်ပြီသေဆုံးခဲ့တယ်လို့ အကျဉ်းထောင်နဲ့နီးစပ်သူတွေဆီက သိရပါတယ်။
ကိုဝေယံဖြိုးသေဆုံးတဲ့နေမှာ ချောင်းသာမှာနေထိုင်တဲ့ မိသားစုဝင်တွေကို ဆက်သွယ်ခေါ်ယူခဲ့ပေမယ့် မိသားစု ဝင်တွေနဲ့ တွေ့ခွင့်ပေးတာမျိုးမရှိဘဲ စစ်ကောင်စီတပ်ဖွဲ့ဝင်တွေက မီးသဂြိုလ်ခဲ့တာလို့ မိသားစုဝင်တွေနဲ့ နီးစပ်သူတွေက ပြောပါတယ်။
“ မိသားစုဝင်တွေက ၆ ရက်နေ့ ညထဲကရောက်တာ လပြည့်ဝန်းဟိုတယ်ရှေ့မှာ ထိုင်စောင့်နေတာ၊ အဲ့တာကို စစ်ကောင်စီက လုံးဝကို တွေ့ခွင့်မပေးတာ၊ တစ်ယောက်မေးရင် တစ်မျိုးပြောတာ အလောင်းကဆေးရုံကြီး ပို့လိုက်ပြီပြောလိုက် ရင်ခွဲရုံမှာပြောလိုက် ထောင်မှာပြောလိုက်ပေါ့ဗျာ အဲ့လိုမျိုးလုပ်တာ”လို့ မိသားစုဝင်တွေနဲ့ နီးစပ်တဲ့ ဒေသခံတစ်ဦးက ဧရာဝတီတိုင်းမ်ကို ပြောပါတယ်။
ကိုဝေယံဖြိုးရဲ့ အလောင်းကို စစ်ကောင်စီက ဇန်နဝါရီလ ၇ ရက်နေ့က သရောင်းချောင်းသုသာန်မှာ မီးသဂြိုလ် ခဲ့တာဖြစ်ပြီး မိသားစုဝင်တွေကို အဝေးကပဲ ကြည့်ခွင့်ပေးခဲ့တယ်လို့ နီးစပ်သူတွေက ဆိုပါတယ်။
အကျဉ်းထောင် အကြမ်းဖက်ခံရမှုဖြစ်စဉ်မတိုင်ခင် ညပိုင်းမှာ ပျောက်ဆုံးနေတဲ့ ကိုမဲကြီးကိုတော့ ဒီနေ့အထိ ဘယ်နေရာရောက်တယ်ဆိုတာ အတည်မပြုနိုင်သေးဘူးလို့ အကျဉ်းထောင်နဲ့ နီးစပ်သူတွေက ပြောပါတယ်။
ဒါ့ပြင် ဇန်နဝါရီလ ၅ ရက်နေ့ ညပိုင်းမှာ ရိုက်နှက်နှိပ်စက်ခံခဲ့ရတဲ့ ကိုမဲကြီးအပါဝင် အကျဉ်းသား ၈ ဦးရဲ့ မိသားစု ဝင်တွေကို စစ်ကောင်စီတပ်သားတွေက လိုက်လံဖမ်းဆီးနေတယ်လို့ ဆိုပါတယ်။
#ပုသိမ် #အကျဥ်းထောင် #ကိုဝေယံဖြိုး #ရုပ်အလောင်း #မီးသဂြိုလ်
#Ayeyarwaddy_Times
Comments