လှိုင်သာယာတွင် နေအိမ်ချိတ်ပိတ်ခံရသည့်အိမ်များ ပြန်ဖွင့်ပေးဖို့ စာတင်ပေးမည်ဟုဆိုကာ စရဖများက ငွေသိန်းဆယ်နှင့်ချီ၍ လိမ်လည်တောင်းယူနေ

ဧရာ၀တီတိုင်းမ်

ဇန်နဝါရီလ ၈ ရက်

ရန်ကုန်တိုင်း၊ လှိုင်သာယာမြို့နယ်တွင် စစ်ကောင်စီလက်အောက်ရှိ စစ်ဖက်ရေးရာထောက်လှမ်းရေးအဖွဲ့  (စရဖ)များက စစ်ကောင်စီ ချိတ်ပိတ်ခဲ့သောနေအိမ်များကို ပြန်ဖွင့်ပေးရန်အတွက် အထက်ကို အသနားခံစာ စာတင်ပေးမည်ဟုဆိုကာ အိမ်ရှင်များထံမှ ငွေကျပ်သိန်းဆယ်နှင့်ချီ၍ လိမ်လည်တောင်းခံမှုများ ပြုလုပ်နေကြောင်း သတင်းရရှိသည်။

“စရဖတွေက ချိတ်ပိတ်ခံရတဲ့အိမ်ရှင်တွေကို ချဉ်းကပ်ပြီးတော့ ခင်ဗျားတို့အိမ် ချိတ်ပိတ်ထားတာကို ပြန်ဖွင့်ပေးဖို့ အထက်ကိုအသနားခံစာတင်ပေးမယ်၊ အဲ့အတွက် ပိုက်ဆံပေးဆိုပြီး လိမ်တောင်းနေတာ။ တချို့အိမ်ရှင်တွေဆို သိန်းဆယ်နဲ့ချီ ပေးလိုက်မိပြီး အလိမ်ခံရတာတွေ ဖြစ်နေတယ်။ ချိတ်ပိတ်ခံရတဲ့ အိမ်ရှင်တွေကျတော့လည်း သူတို့အိမ်က သိန်းရာဂဏန်း၊ ထောင်ဂဏန်းတန်တဲ့အိမ်တွေဆိုတော့ စာတင်ရင် ပွင့်လိုပွင့်ငြား အကုန်ခံကြတာ။ စရဖတွေကလည်း အဲ့အကွက်ကိုနင်းပြီး အိမ်ရှင်တွေဆီက လိမ်စားနေတာ။ ကျနော့်မိတ်ဆွေတယောက်ဆို သိန်း ၅၀ ကျော်ပါသွားတာ”ဟု လှိုင်သာယာမြို့ခံ အမျိုးသားတစ်ဦးက ဧရာ၀တီတိုင်းမ်ကို ပြောသည်။

စစ်ကောင်စီက အာဏာသိမ်းပြီးနောက် ဆန္ဒပြပွဲ ဦးဆောင်သူများ၊ နိုင်ငံရေးတက်ကြွလှုပ်ရှားသူများ၊ လွှတ်တော်ကိုယ်စားလှယ်များ၊ PDF တပ်ဖွဲ့ဝင်တို့၏နေအိမ်များ၊ တော်လှန်ရေးအတွက် ရန်ပုံငွေရှာဖွေပေးသူ (ထောက်ပို့) တို့၏နေအိမ်များကို ပစ်မှတ်ထား၍ ချိတ်ပိတ်သိမ်းဆည်းခြင်းများ ပြုလုပ်ခဲ့သည်။ 

၂၀၂၁ ခုနှစ် ဖေဖော်ဝါရီလ ၁ ရက်နေ့မှ ၂၀၂၂ ခုနှစ် မေလအထိ မြန်မာတနိုင်ငံလုံးအတိုင်းအတာဖြင့် အာဏာသိမ်းစစ်ကောင်စီ၏ ချိတ်ပိတ်သိမ်းဆည်းခြင်းခံရသည့် နေအိမ် ၅၈၆ လုံးထက်မနည်းရှိကြောင်း ISP Myanmar ၏ စာရင်းများအရ သိရသည်။

#Ayeyarwaddy_Times