မင်းဘူးမြို့နယ် NLD လွှတ်တော်ကိုယ်စားလှယ်နဲ့ မိသားစုဝင် လေးဦးဖမ်းဆီးခံရ

မကွေးတိုင်း မင်းဘူးမြို့နယ် ပြည်သူ့လွှတ်တော် ကိုယ်စားလှယ် ဦးဝင်းဝင်း၊ ဇနီးဖြစ်သူနဲ့ သားသမီး သုံးဦးကို ဇန်နဝါရီလ ၈ ရက် ဒီမနက် ၄ နာရီဝင်းကျင်မှာ သူတို့ တိမ်းရှောင်နေတဲ့ နေအိမ်ထိ စစ်ကောင်စီတပ်သားတွေက လာရောက်ဖမ်းဆီးသွားတယ်လို့ မိသားစုနဲ့ နီးစပ်သူတစ်ဦးက RFA ကို ပြောပါတယ်။ စစ်အာဏာသိမ်းပြီးကတည်းက ဦးဝင်းဝင်းဟာ မိသားစုနဲ့အတူ မကွေးတိုင်း ပွင့်ဖြူမြို့နယ် ရှားတောကျေးရွာက ဆွေမျိုးတွေရဲ့နေအိမ်မှာ သွားရောက်တိမ်းရှောင်နေတာပါ။ ဒီကနေ့မနက်မှာတော့ ရှားတောကျေးရွာက နေအိမ်ကို စစ်ကောင်စီတပ်တွေ ရောက်လာပြီး ဖမ်းဆီးခဲ့တာလို့ မိသားစုနဲ့နီးစပ်သူ တစ်ဦးက ပြောပါတယ်။ “သူတို့ကို လင်းအားကြီးအချိန်မှာ ဝင်ရောက်ဖမ်းဆီးခဲ့တာ။ အဲဒီနောက် ဘယ်ကိုခေါ်သွားလဲ ဆိုတာတော့ ကျနော်တို့ မသိဘူး။ စစ်တပ်က ဦးဝင်းဝင်းကို ရာဇသတ်ကြီးဥပဒေပုဒ်မ ၅၀၅ (က) နဲ့ ဖမ်းဝရမ်းထုတ်ထားတယ်လို့တော့ သိရတယ်” စစ်ကောင်စီတပ်တွေက ဦးဝင်းဝင်းအပြင် ဇနီးဖြစ်သူ ဒေါ်တိုးတိုးဝေ၊ အသက် ၁၇ နှစ်အရွယ် မောင်သန့်ဇင်ဝင်းဝေဟိန်း၊ အသက် ၁၃ နှစ်အရွယ် မနှောင်းရတီဝင်းဝေထွေးနဲ့ အသက်သုံးနှစ်အရွယ် မောင်လပြည့်ဝင်းတို့ကိုပါ ဖမ်းဆီးခဲ့တာလို့ ဆိုပါတယ်။ ဒါနဲ့ ပတ်သက်လို့ စစ်ကောင်စီက သတင်းထုတ်ပြန်တာ မရှိသေးပါဘူး။ ဦးဝင်းဝင်းက ၂၀၁၅ ခုနှစ် အထွေထွေရွေးကောက်ပွဲမှာ မကွေးတိုင်း မင်းဘူးမြို့နယ် ပြည်သူ့လွှတ်တော် ကိုယ်စားလှယ်အဖြစ်ရွေး ကောက်တင်မြောက်ခံခဲ့ရသလို စစ်တပ်က ဖျက်သိမ်းလိုက်တဲ့ ၂၀၂၀ အထွေထွေရွေးကောက်ပွဲမှာလည်း အဲဒီမဲဆန္ဒနယ်မှာ ထပ်မံအနိုင်ရရှိခဲ့ပါတယ်။ စစ်အာဏာသိမ်းပြီးကတည်းက ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ်ပါတီ (NLD) ထိပ်ပိုင်းခေါင်းဆောင်တွေ အပါအဝင် လွှတ်တော်ကိုယ်စားလှယ်တွေကို ဖမ်းဆီးထောင်ချတာတွေ လုပ်နေတာပါ။ NLD ပါတီရဲ့ လူ့အခွင့်အရေးချိုးဖောက်မှု မှတ်တမ်းများ ကောက်ယူရေးအဖွဲ့ (NLD-HRD T) ရဲ့ ၂၀၂၂ ခုနှစ် အောက်တိုဘာလကုန်အထိ စာရင်းတွေအရ NLD က လွှတ်တော်ကိုယ်စားလှယ် ၉၀ ဦး အပါအဝင် ပါတီဝင်စုစုပေါင်း ၁,၁၆၉ ဦး ဖမ်းဆီးခံထားရပါတယ်။ ဖမ်းဆီးထားတဲ့ကာလအတွင်း လွှတ်တော်ကိုယ်စားလှယ် နှစ်ဦး အပါအဝင် ၆၇ ဦးသေဆုံးခဲ့ပါတယ်။ 

 မင်းဘူးမြို့နယ် NLD လွှတ်တော်ကိုယ်စားလှယ် ဦးဝင်းဝင်းအား တွေ့ရစဉ်။ (Photo: Citizen Journalist)