မန္တလေးဓူဝံဆေးရုံပိုင်ရှင်ကိုစစ်တပ်ဖမ်းဆီး

10 Jan 2023 by MPA

မန္တလေးမြို့၊ ၇၃လမ်း ၇၄လမ်းကြား၂၈လမ်းပေါ်က ဓူဝံဆေးရုံပိုင်ရှင်ကို စစ်ကောင်စီတပ်က ယနေ့ညနေပိုင်းတွင် ဖမ်းဆီးသွားကြောင်းကျန်းမာရေးအသိုင်းအဝိုင်းထံက သိရသည်။

 ဇန်နဝါရီ ၁၀ရက်နေ့ညနေ ၅နာရီဝန်းကျင်က ဖမ်းဆီးသွားခြင်းဖြစ်ပြီးဘာကြောင့်ဖမ်းဆီးသွားသလဲဆိုသည်ကိုမူမသိရသေးပေ။ 

မန္တလေးမြို့ပေါ်က ဆေးရုံများမှာ CDM ကျန်းမာရေးဝန်ထမ်းတွေခန့်ထားမှုရှိ၊မရှိ စစ်ကောင်စီတပ်က ပြီးခဲ့တဲ့ရက်ပိုင်းအတွင်း လိုက်လံစစ်ဆေးခဲ့ကြောင်း မန္တလေးကျန်းမာရေးအသိုင်းအဝိုင်းကသိရသည်။ 

"တစ်ရုံပြီးတရုံလိုက်စစ်နေတာ၊အလုပ်လည်းကောင်းကောင်းမလုပ်ရဘူး"ဟု ပုဂ္ဂလိကဆေးရုံတစ်ရုံက ကျန်းမာရေးဝန်ထမ်းတစ်ဦးကဆိုသည်။ 

မန္တလေးမြို့မဟာအောင်မြေမြို့နယ် လမ်း ၆၀၊ ၃၅လမ်းနဲ့ ၃၆လမ်းကြားကကြယ်စင်လင်းဆေးရုံကိုလည်း စစ်ကောင်စီတပ်က ယနေ့ နေ့ခင်းပိုင်းတွင် CDMကျန်းမာရေး ဝန်ထမ်းရှိမရှိဝင်ရောက်စစ်ဆေးခဲ့ကြောင်း သိရသည်။ 

ဓူဝံဆေးရုံသည်  အထူးကုဆေးခန်းနှင့်ကျန်းမာရေးစောင့်ရှောက်မှုစင်တာဖြစ်ပြီး စင်တာခွဲ သုံးခုရှိကာ ဝန်ထမ်း ငါးဆယ်နှင့် အထက်ရှိသည့်ဆေးရုံဖြစ်သည်။

မန္တလေးမြို့က ပုဂ္ဂလိကဆေးရုံငါးရုံဖြစ်သည့်  စိန်ပန်းဆေးရုံ၊ နန်းတော်ဆေးရုံ၊မြို့တော်ဆေးရုံ၊ကံကော်ဆေးရုံနှင့် ထက်နေလင်းဆေးရုံတို့ကို CDM ကျန်းမာရေးဝန်ထမ်းခန့်ထးသည်ဟုဆိုကာ စစ်ကောင်စီတပ်က ဒီဇင်ဘာ၃၁ရက်နေ့မှစတင်ကာ  ပိတ်သိမ်းခဲ့သည်။