ချက် မိတ်

ခေတ်သစ် သတင်း အဆိုအရ စစ်အာဏာသိမ်း အဖွဲ့၏ ပြည်ထဲရေး တာဝန်ခံ စိုးထွဋ် မှ အမျိုးသား ညီညွတ်ရေး အစိုးရ တပ်မတော် PDF အား ချေမှုန်းရန် ထိတ်တန်းလျို့ဝှက် အစည်း‌အဝေးကို ဒီဇင်ဘာ ၂၃ ရက်နေ့က ခေါ်ယူပြီး brainstorming လုပ်ကြသော်လည်း လူတဦးချင်းစီထံ SMS မက်ဆေ့ခ်ျ ပို့ရန် မှ စ၍ တ‌ယောက် တပေါက် နှင့် လက်တွေ့ အကောင်အထည် ဖေါ်နိုင်စွမ်း မရှိသည့် ပေါက်ပန်းဈေး အကြံညဏ်များ ပြောဆိုရင်းဖြင့်သာ အဆုံးသတ်သွားခဲ့ရသည် ဟု သိရသည်။

၎င်းတို့ ထိုသို့ တိုင်ပတ်နေချိန်တွင် အမျိုးသား ညီညွတ်ရေး အစိုးရ၏ ဘဏ္ဍာရေး ဝန်ကြီး ဦးတင်ထွန်းနိုင်မှ မိမိတို့ အစိုးရမှ စစ်အာဏာရှင်များ အား ဖြုတ်ချရန် လုံးပမ်းနေသည့် တော်လှန်ရေးကြီး အတွက် ရံပုံငွေ ဒေါ်လာ သန်း ၁၀၀ ကျော် စုဆောင်းနိုင်ခဲ့ပြီဟု ဂုဏ်ယူ ဝင့်ကြွားစွာ ထုတ်ဖေါ်ပြောဆိုလိုက်သည့် သတင်းကို ကမ္ဘာ ဘဏ္ဍာရေး သတင်းဌာန ဖြစ်သည့် Bloomberg တွင် ဖေါ်ပြလာခဲ့သည်။

ထိုအထဲမှ ၄၅% သည် အထူး ငွေတိုက် စာချုပ်များ ရောင်းရငွေများ ဖြစ်ပြီး၊ စစ် အာဏာရှင်များ ပိုင်ဆိုင်ထားသည့် အဖိုးတန် အိမ်ခြံမြေများကို လေလံတင် ရောင်းချရငွေများလည်း ပါဝင်သည်။

ရရှိသည့် ငွေများကို ကဏ္ဍပေါင်းစုံတွင် အသုံးပြုမည်ဟု လည်း ဆိုသည်။ နောက်ပိုင်းတွင် NUG မှ crypto currency အဖြစ် Initial Coin Offering ကို တရားဝင် လက်ခံခြင်း၊ စာရင်းသေ အပ်နှံ‌‌ ငွေများ လက်ခံနိုင်မည့် Spring Development Bank ကိုလည်း တည်ထောင်သွားမည်ဟုလည်း သိရသည်။

နိုင်ငံ အတွင်းရှိ မြို့နယ်ပေါင်း ၃၃၀ အနက် ၃၈ မြို့တွင် ဝင်ငွေခွန် ကောက်ယူမှု များ ပြုလုပ်ခဲ့ရာ ကျပ်ငွေ သန်း ၃,၀၀၀ အထိ ရရှိခဲ့သည်ဟု သိရသည်။ ထိုသတင်းကပင် မြိုနယ် ၃၈ မြို့တွင် အဖြူရောင် နယ်‌ မြေ အဖြစ် NUG မှ အုပ်ချုပ်နိုင်နေပြီ ဆိုသည်ကို နိုင်ငံတကာ သို့ အလုပ်နှင့် သက်သေပြ အတည်ပြု ပေးနိုင်ခဲ့ပြီ ဖြစ်သည်။

ဦးတင်ထွန်းနိုင်မှပင် အမည်မဖေါ်လိုသူ တဦးမှ ဒေါ်လာ ၆ သန်း အထိ ထည့်ဝင်လှူဒန်းသွားသည်ကိုလည်း အတည်ပြု ခဲ့သည်။

စစ်အာဏာသိမ်း အဖွဲ့သည် တိုင်းပြည် အာဏာကို သိမ်းယူပြီး အုပ်ချုပ်လာသည်မှာ ၂ နှစ် နီးပါး ရှိလာပြီ ဖြစ်သည်၊ ထို့အတွက် တိုင်းပြည်၏ အုပ်ချုပ်ရေး ယန္တရား မှန်သမျှ ကို စိတ်ကြိုက် အသုံးချခွင့် ရှိနေသည်။ ငွေကြေးကလည်း ကြောင့်ကြနေစရာ မလို၊ သို့သော် ယခု အချိန်အထိ နိုင်ငံတကာ ၏ အသိအမှတ်ပြုခြင်းလည်း မခံရသည့် အပြင် ဗုံးမကြဲနိုင်သည့် စစ်မျက်နှာ မှန်သမျှ တွင် အရှုံး နှင့် ရင်ဆိုင်နေကြရသည်၊ ထိုသို့ အချိန်ကြာလာလေ ၎င်းတို့အဖို့ အထင်သေး ခံရလေ ဖြစ်လာနေသည်။

ကုလသမဂ္ဂ တွင် အမျိုးသား ညီညွတ်ရေး အစိုးရ၏ သံအမတ်ကြီး ဖြစ်သူ ဦးကျော်မိုးထွန်းသည် အထွေထွေ ညီလာခံ ဆုံးဖြတ်ချက် မှန်သမျှ ကို တရားဝင် မဲထည့် နိုင်နေသော်လည်း ၎င်းတို့ နှင့် ပတ်သက်သူ များ အဖို့ ကုလ အဆောက်အအုံအတွင်းရှိ စင်္ကြန်လမ်းတွင်ပင်‌ လျှောက်ခွင့်မရ ကြသည့် အခြေ ဆိုက်နေသည်။

လူထု ကလည်း အသိအမှတ် ပြုဖို့ ဝေးစွ၊ ဖြစ်နိုင်လျင် ၎င်းတို့ မျက်နှာ များကိုပင် မမြင်ချင်သည့် အထိ ဖြစ်လာနေသည်။ ထိုလူများက ရွေးကောက်ပွဲ လုပ်ကြဦးမည် ဆိုသည့်စကား က ရီစရာ ဟာသ တခုလို ဖြစ်နေသည်။ 

မင်းအောင်လှိုင်သည် သူတို့ဖက်ကတော့ ဒီလိုပဲ ပြောကြမှာပေါ့ ဟု ကိုယ့်စိတ်ကို လှည့်စားနေသော်လည်း

သူ့အဖို့ စစ်ရေးတွင် အသာစီးရဖို့ လေကြောင်းတခုတည်းသာ အားကိုးရတော့မည်ကို ကောင်းစွာ သိနားလည် ထားပြီးဖြစ်သည်။

နေပြည်တော်ရှိ စစ်ဗိုလ်ချုပ်များကလည်း ထိုသဘော အတိုင်းပင် ရှိ၍ တိုင်းပြည်ဖွံ့ဖြိုးရေး၊ အုပ်ချုပ်ရေး တို့ကို လက်ရှိအနေအထား မပျက်အောင်သာ ထိန်းထားပြီး စစ်လက်နက် ပစ္စည်းများ ဝယ်ယူရေး အတွက် သာ တိုင်းပြည် ဘဏ္ဍာကို ပုံအော် သုံးကြတော့မည် ဖြစ်သည်။

အောက်ခြေ စစ်သည်များသည်လည်း တိုက်ပွဲတိုင်း ထင်တိုင်း မပေါက် အခြေမလှ ဖြစ်နေသည့် သတင်းများ နေ့စဉ်နှင့် အမျှ ကြားနေရပြီး အင်အား ဖြည့်တင်းနိုင်ကြခြင်းလည်း မရှိပြန်၍ ၎င်းတို့ အသက် ခန္ဓာ တည်မြဲဖို့သည် နေ့လား ညလား ဖြစ်လာနေပြီဆိုကာ စိတ်ဓါတ်များ ကျဆင်းလာနေကြပြီ ဖြစ်သည်။ ဤသည်ကလည်း သူသူ ကိုယ်ကိုယ် ဖြစ်ကြမည်သာပင်။ အားလုံးအဖို့ ဇနီးသားသမီးများ လောက အလယ် ထားခဲ့ရမည့် အရေးကို တွက်ဆလာကြပေလိမ့်မည်။

မင်းအောင်လှိုင်သည် ၎င်းတို့အား ထိန်းထားနိုင်ရေး အတွက် ရွာများကို မီးရှို့လုယက်ခွင့် ပေးထားသော်လည်း နောက်ဆုံးတွင် ရှို့စရာ ရွာပင် မကျန်တော့သည့် အဖြစ်မျိုး ရောက်လာပေဦးမည်။

အထက်တွင် ဆိုခဲ့သည့် အတိုင်း အချိန်ကြာလာလေ ပြည်သူ့ကာကွယ်ရေး တပ်ဖွဲ့များသည် အင်အားကြီးထွားလာနေပြီး တိုက်ရည်ခိုက်ရည် စစ်စွမ်းရည်များ ပြည့်ဝလာကြပြီ ဖြစ်သည်၊ ၎င်းတို့အား ပြည်သူများ၊ကုလ အပါအဝင် နိုင်ငံတကာကလည်း ဝိုင်းဝန်းထောက်ခံလာနေကြ၍ မင်းအောင်လှိုင် သစ္စာခံ တပ်များ နှင့် ယှဉ်လျှင် စိတ်ဓါတ် အင်အားချင်းလည်း မိုး နှင့် မြေလို ကွာခြားလာနေသည်။ 

အထူးသဖြင့် အာဆီယံ အဖွဲ့ကြီးမှ အင်ဒိုနီရှား၏ ဦးဆောင်မှု အောက်တွင် စစ်အာဏာသိမ်း အဖွဲ့အား အပြင်းအထန် ဆန့်ကျင်လာနေ၍ ရုရှား နှင့် တရုတ်တို့မှ အာဆီယံ နှင့် ဆန့်ကျင်ဖက် ရပ်တည်၍ မရ၊ အနောက်အုပ်စု နှင့် အင်အားချိန်ခွင်လျှာ ထိန်းညှိထားဖို့ လိုအပ်လာနေသည်။ အဆိုပါ သဘောထားကို မကြာခင်က အထင်အရှား မြင်တွေ့လာနေရသည်။

စစ်ကောင်စီသည် ထိုသဘောကို ကောင်းစွာ နားလည်ထားပြီး အာဆီယံအား ဆန့်ကျင်လေလေ ရုရှား နှင့် တရုတ်တို့၏ နိုင်ငံရေး အရ ထောက်ခံမှု ကျဆင်းလေလေ ဖြစ်လာမည် ကို သိထားပြီး ဖြစ်သည်။ သို့သော် လောလောဆယ်တွင် ဆက်လက် ရှင်သန်နိုင်ရေး ကို ဦးစားပေးနေရ၍ ထိုအရေး ကို မျက်စိမှိတ် ထားရသည့် အဖြစ် ရောက်နေသည်။

ထို့အတွက် ကုလ နှင့် အနောက်အုပ်စုမှ အာဆီယံ အား ၎င်းတို့၏ အချက် ငါးချက် နှင့် အပိုင်ချည်ကာ စစ်အာဏာသိမ်း အဖွဲ့ကို လုံးဝ အသိအမှတ် မပြုပဲ ဆန့်ကျင်နေရန် ဖိအားပေးနေခြင်း ဖြစ်သည်။

မိမိတို့ အနေဖြင့် အာဆီယံ ၏ အခန်းကဏ္ဍကို လျော့မတွက်မိဖို့ လိုသည်။ အာဆီယံသည် နိုင်ငံတကာ အလယ် စစ်တုရင် စကား နှင့် ဆိုလျှင်  စစ်အာဏာသိမ်း အဖွဲ့နှင့် တရုတ်၊ ရုရှားတို့အား ခွ ချက် ချက် ထားသည်ဟု ဆိုရမည် ဖြစ်သည်။

ပြည်သူတို့၏ ခုခံတွန်းလှန်စစ် မုချ အောင်ရမည်!!!

လှစိုးဝေ