ပုသိမ်ထောင် လှုပ်ရှားမှုနောက်ပိုင်း နိုင်ကျဉ်း ၆၀ အား ခြေချင်းခတ်ထား၊ ထောင်ပိုင်မှ အရက်မူးတိုင်း မကျေနပ်သူများကို ရိုက်နှက်နေ

Author လင်းခိုင် Published on Mar 01, 2023

 ပုသိမ်ထောင် တွင် နိုင်ငံရေးအကျဉ်းသားများ ဆန္ဒထုတ်ဖော်မှု ပြုလုပ်ပြီးနောက်ပိုင်းတွင် နိုင်ငံရေးအကျဉ်းသား ၆၀ ကို ခြေချင်းခတ်ထားပြီး၊ ထောင်ပိုင်မှ အရက်မူးတိုင်း ယင်းမကျေနပ်သည့် နိုင်ငံရေးအကျဉ်းသားများကို ရိုက်နှက်မှုများပြုလုပ်နေကြောင်း အကျဉ်းသားအသိုင်းအဝိုင်းထံမှ စုံစမ်းသိရှိရသည်။ “ညွှန်မှူးက ညဘက် အရက်မူးပြီး ပြန်လာတာနဲက သူမကျေနပ်တဲ့သူတွေကို ဆွဲထုတ်ပြီးပါးရိုက်တယ်။ မင်းလား ကဗျာဆရာ၊ မင်းလား တော်လှန်ရေးသမားဆိုပြီး အော်အော်ရိုက်တာ” ဟု ဆိုသည်။ ထိုကဲ့သို့ ထောင်ပိုင်မှ စိတ်မထင်သလို ရိုက်နှက်မှုကြောင့် နိုင်ငံရေးအကျဉ်းသား ကိုဝင်းထွန်းနိုင်သည် ရိုက်နှက်ခံထားရသည့် ဒဏ်ရာများကြောင့် အပြင်းအထန် နာကြင်ကာ ဖူးယောင်ဒဏ်ရာများ ရရှိထားကြောင်းလည်း သိရသည်။ ထို့ပြင် ရိုက်နှက် နှိပ်စက်ခံထားရသည့် ဒဏ်ရာများကြောင့် ခြေဆစ်၊ လက်ဆစ်လွဲသူများ၊ အသားကျေသူများ၊ ချိနဲ့နေသူများ၊ ကျန်းမာရေး ဆိုးရွားစွာခံစားရသူများရှိနေပြီး၊ အနည်းဆုံး ၅ ယောက်မှ ၁၀ ယောက်ခန့်ရှိနေကြောင်း CJ Platform ၏ သတင်းရင်းမြစ်က ဆိုသည်။ ယင်းအပြင် ပုသိမ်ထောင်၏ ထောင်ဝင်စာကိုလည်း ဇန်နဝါရီ ၅ ရက်မှ စတင်ပိတ်ထားပြီး ဈေးဘားမှသာ ပိုက်ဆံပို့ခွင့်ရကြောင်း၊ ဈေးဘားသည်လည်း ၂ ပတ် တစ်ကြိမ်သာ ဝယ်စားခွင့်ရှိကြောင်းလည်း သိရသည်။ ယခုနှစ် ဇန်နဝါရီ ၅ ရက် နှင့် ၆ ရက်တွင် ပုသိမ်ထောင်အတွင်းရှိ ထောင်ဝန်ထမ်းများသည် ပြည်သူ တစ်ဦးကို အသက်ဆုံးရှုံးစေသည်အထိ ရိုက်နှက်ခဲ့ပြီး၊ ကိုးဦးသည် အသက်အန္တရာယ် စိုးရိမ်ရသည်အထိ နှိပ်စက်ခံခဲ့ရသည်။ ပုသိမ်ထောင် ဆူပူမှုဖြစ်စဉ်သည် မတရားဖမ်းဆီးအကျဉ်းကျခံနေရသည့် ကိုဝင်းမင်းထက် အပါအဝင် ရှစ်ဦးကို သေဒဏ်ချမှတ်ခြင်းနှင့် ပတ်သက်ပြီး နိုင်ငံရေးအကျဉ်းသားများမှ ဆန္ဒထုတ်ဖော်ခဲ့ခြင်းကို စစ်ကောင်စီလက်အောက်ခံ ထောင်ဝန်ထမ်းများက အကြမ်းဖက် နှိပ်စက်၊ ရိုက်နှက်မှုများပြုလုပ်ခဲ့ခြင်း ဖြစ်သည်။ 

ဓာတ်ပုံ- Google #CjPlatform #ပုသိမ်ထောင် #နိုင်ငံရေးအကျဉ်းသား #ထောင်တွင်းအကြမ်းဖက်မှု