သြစတြီးယားနိုင်ငံလုပ် ဒရုန်းယာဉ်တွေကို ထောက်လှမ်းရေးအတွက် စစ်ကောင်စီသုံးနေ

​

Camcopter S-100 ဟာ ၆ နာရီကြာ ပျံသန်းနိုင်ပြီး ရေတပ်နဲ့လေတပ်အတွက် ထောက်လှမ်းပေးပါတယ်။

• စမ်းစမ်းတင် (ဝါရှင်တန်ဒီစီ)
  2022-03-16

Schiebel ရှီဘဲယ် အမှတ်တံဆိပ်ပါ ကင်းထောက် ဒရုန်းလေယာဉ်Photo:Schiebel

စစ်အာဏာသိမ်းမှုကြိုးပမ်းချိန်ကစလို့ မောင်းသူမဲ့ Camcopter S-100 ဒရုန်းထောက်လှမ်းရေး လေယာဉ် အစိတ်အပိုင်းတွေကို ရုရှားကတဆင့် Miya Win International Limited ကုမ္ပဏီက ဝယ်ယူတင်သွင်းတယ်လို့ မြန်မာစစ်တပ်နဲ့ စီးပွားရေးလုပ်သူတွေကို ဆက်စပ်ဖော်ထုတ်သုတေသနလုပ်နေတဲ့ Justice for Myanmar က မတ်လ ၁၄ ရက်က ပြောကြားလိုက်ပါတယ်။

Camcopter S-100 ဟာ သြစတြီးယားနိုင်ငံ Schiebel ရှီဘဲယ်ကုမ္ပဏီ မူပိုင်ဖြစ်ပြီး သူနဲ့အကျိုးတူ ရုရှား OAO Gorizont က ထုတ်လုပ်ခွင့်လိုင်စင်ရထားပါတယ်။ Camcopter ကို ကင်မရာနဲ့ ရဟတ်ယာဉ်ကိုတွဲလို့ cam- ကင်မရာနဲ့ copter ချော့ပါကို ပေါင်းနာမည်ပေးထားတယ်လို့ ပြောနိုင်ပါတယ်။

Miya Win International ကုမ္ပဏီကပဲ မြန်မာစစ်တပ်အတွက် Camcopter S-100 ဝယ်ယူပေးထားပါတယ်။

Camcopter S-100 ဟာ ၆ နာရီကြာ ပျံသန်းနိုင်ပြီး ရေတပ်နဲ့လေတပ်အတွက် ထောက်လှမ်းပေးပါတယ်။

တစ်နာရီ မိုင် ၁၄၀ နှုန်းနဲ့ အမြင့်ပေ ၁၈၀၀၀ ကနေ ထောက်လှမ်းနိုင်ပါတယ်။ နိုင်ငံမြောက်ဖျား မြစ်ကြီးနားကစ အလယ်ပိုင်း၊ မိထ္ထီလာ၊ တောင်ပိုင်း မြိတ်အထိ လေတပ်စခန်းတွေ ရှိနေတဲ့ အတွက်လည်း နိုင်ငံအနှံ့ ဒီထောက်လှမ်းရေးမောင်းသူမဲ့ ရဟတ်ယာဉ်ကို စေလိုရာစေပြီး ထောက်လှမ်းနိုင်ပြန်ပါတယ်။

စစ်အာဏာမသိမ်းခင်ကပဲ မြန်မာလေတပ်ကိုလည်း တိုးချဲ့ဖွဲ့စည်းထားပါတယ်။ ဒါကလည်း လေကြောင်းက အသာစီးယူပြီး ထိန်းချုပ်နိုင်အောင် လေတပ်ကို တိုးချဲ့ဖွဲ့စည်းတာလို့ ဂျာမဏီ နိုင်ငံရောက်နေတဲ့ လူ့အခွင့်အရေးလေ့လာသူ ကိုနစ်ကီဒိုင်းမွန်းက ပြောပါတယ်။ နောက်လေ့လာသိရှိချက်တွေအရ တကယ်လို့ တပ်ကနေစွန့်ခွာသူတွေရှိရင် လိုက်လံတိုက်ခိုက်လို့ ရအောင် တိုးချဲ့ဖွဲ့စည်းတာလို့ ပြောပါတယ်။

Aljazeera သတင်းမှာတော့ စစ်အာဏာသိမ်းပြီး တစ်နှစ်အတွင်း စစ်သည် ၂၅၀၀ ထက် မနည်း တော်လှန်ရေး အင်အားစုတွေနဲ့ ပူးပေါင်းလာတယ်လို့ ဒီလ ၈ ရက်နေ့က ဖော်ပြပါတယ်။

PDF ပြည်သူ့ကာကွယ်ရေးတပ်တွေရှိလို့ ဒါမှမဟုတ် လက်ခံထားလို့ဆိုတဲ့ စွပ်စွဲချက်နဲ့ ရုရုားလုပ် ရဟတ်ယာဉ်နဲ့ စစ်ကောင်စီတပ်ဖွဲ့ဝင်တွေကို စစ်ဆင်ရေးလုပ်မယ့်နေရာချထားပြီး လေကြောင်းက တိုက်ခိုက်နိုင်တဲ့အတွက် လေတပ်ဟာ စစ်ကောင်စီအတွက် အားထားစရာ ဖြစ်နေပါတယ်။

ဒီလို ကိုယ့်ပြည်သူကိုယ်တိုက်ခိုက်နေတဲ့အတွက် လေတပ်ကနေ ပြည်သူ့ဘက် နောက်ထပ် ပြောင်းလာမယ့်သူတွေရှိပြီး လုံခြုံရေးအခြေအနေကို စောင့်ကြည့်နေတဲ့အကြောင်းနဲ့ တချို့လည်း မိသားစုကို စွန့်ခွာရမယ့်ကိစ္စအတွက် အခက်အခဲတွေရှိတဲ့အကြောင်း ပြည်သူနဲ့ ပူးပေါင်းလာတဲ့ လေတပ်က ဗိုလ်လေး မိုးညိုက ပြောပါတယ်။

ဒီလိုပုံစံနဲ့ စစ်နွံက ရုန်းမထွက်နိုင်သူတွေရှိသလို စစ်တပ်အင်အားကြီးဖို့ အားကန်အထောက်အကူပေးတဲ့ လက်နက်ပွဲစားတွေရှိနေတာမို့ ကယ်ဆယ်ရေးလုပ်ငန်းတွေမှာပါ သုံးနိုင်တဲ့ ထောက်လှမ်းရေး ယာဉ်တွေကို စစ်ဆင်ရေးအတွက် သုံးနေပါတယ်။

Miya Win International ကို ၁၉၉၆ ကတည်းက ထူထောင်ထားပြီး Camcopter S-100 ပျံသန်း နိုင်ဖို့ သင်တန်းပါပို့ချပေးတယ်လို့ Justice for Myanmar က ပြောပါတယ်။

ရုရှား Gorizont ကနေ Miya Win International ကို Camcopter S-100 ဆိုင်ရာပစ္စည်းတွေကို ၂၀၂၁ ဖေဖော်ဝါရီ ၁၉ ရက်နဲ့ ၂၀ ရက်နေ့က တင်ပို့တယ်လို့ အမေရိကန်ပြည်ထောင်စုအခြေစိုက် သွင်းကုန်-ထုတ်ကုန် အချက်အလက်ပြုစုတဲ့ ImportGenius က ဖော်ပြပါတယ်။ ပစ္စည်းအများစုမှာ Schiebel ရှီဘဲယ် အမှတ်တံဆိပ်ပါတယ်လို့ ပြောပါတယ်။

အီးယူ-ဥရောပသမဂ္ဂက အရေးယူပိတ်ဆို့ထားတာကို ရှောင်ကွင်းတဲ့အနေနဲ့ တချို့ပစ္စည်း အစိတ်အပိုင်းတွေကို Schiebel ဟာ သြစတြီးယားကနေ ရုရှားကို ၂၀၂၁ ဖေဖော်ဝါရီ ၈ ရက်က တင်ပို့ တယ်လို့ဆိုပါတယ်။

အမေရိကန်ဒေါ်လာ ၁၇ ဒသမ ၈ သန်း အကုန်အကျခံ ဝယ်ယူထားတဲ့ ထောက်လှမ်းရေး Camcopter S-100 တွေက ရေတပ်မှာရော လေတပ်မှာပါရှိပြီး သတ္တုတွင်းလုပ်ငန်းနဲ့ ယာဉ်အသွားအလာ စောင့်ကြည့်ဖို့ မြန်မာနိုင်ငံကို ရောင်းချတာလို့ Schiebel က ၂၀၁၉ မှာ ပြောထားပါတယ်။

ဒီမောင်းသူမဲ့ ဒရုန်းလေယာဉ်တွေ မြန်မာနိုင်ငံကို မလွှဲပြောင်းခင် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ သြစတြီးယားနိုင်ငံကို ၂၀၁၇ ဧပြီက သွားရောက်တဲ့အခါ Schiebel စက်ရုံတည်ရှိတဲ့ မြို့ကိုလည်းသွားခဲ့ပါတယ်။

စင်ကာပူမှာ ၂၀၁၈ က ကျင်းပတဲ့ လက်နက်ပြပွဲမှာလည်း Schiebel ပြခန်းကိုသွားရောက်ခဲ့တယ်လို့ Justice for Myanmar ကပြောပါတယ်။

ဒီမောင်းသူမဲ့ ထောက်လှမ်းရေးလေယာဉ်တွေ မြန်မာစစ်တပ်လက်ဝယ်ရောက်ဖို့ ကြားပွဲစားလုပ်တဲ့ Miya Win International မှာ ညွှန်ကြားရေးမှူး ဦးနေထွတ်ဝင်းက အစုရှယ်ယာ ၅၀ ပါဝင်တယ်လို့ ကမ္ဘာတစ်ဝန်းက ကုမ္ပဏီတွေကို သုတေသနလုပ်တဲ့ open corporates က ဖော်ပြထားပြီး ခုတော့ ညွှန်ကြားရေးမှူး တာဝန်မယူဘူးလို့ ဖော်ပြထားပါတယ်။

Miya Win International ဟာ ၂၀၁၇ခုနှစ်မှာ ရိုဟင်ဂျာတွေကို စစ်ဆင်ချိန် မြန်မာစစ်တပ်ကို အမေရိကန် ဒေါ်လာ ၇၀၀၀၀ ကျော်လှူတယ်လို့ ကုလသမဂ္ဂအချက်အလက်ရှာဖွေရေးအဖွဲ့က တွေ့ရှိထားပြီး ၂၀၁၈ နဲ့ ၂၀၁၉ခုနှစ် မတ် ၂၇ ရက်နေ့၊ တပ်မတော်နေ့တွေမှာလည်း စစ်တပ်ကို အလှူငွေတွေ ပေးအပ်ခဲ့ပါတယ်။ ဦးနေထွတ်ဝင်းဟာ ဗိုလ်ချုပ်မှူးကြီး မင်းအောင်လှိုင်ရဲ့သမီး မခင်သီရိသက်မွန်နဲ့ ရင်းနှီးသူလို့ Justice for Myanmar က ဖော်ထုတ်ထားပါတယ်။

RFA