​ပူတင်က သူ့မိသားစုကို လျို့ဝှက် "မြေအောက်ဘန်ကာ" ထဲ ပုန်းခိုင်းထား

news.com.au

ဗလာဒီမာပူတင်က သူ့မိသားစုကို မကြာသေးခင်က ဆိုက်ဘေးရီးယားရှိ မြေအောက်မြိုတစ်ခုသို့ပြောင်းရွှေ့ဝှက်ထားကြောင်း ရုရှားပရော်ဖက်ဆာတစ်ဦးအပြောအရသိရသည်။

 

ဇိမ်ခံအဆင်မြင့်နည်းပညာများဖြင့်ဖွဲ့စည်းတည်ဆောက်ထားသော ဘန်ကာသည် အယ်လ်တိုင်တောင်တန်းများတွင်တည်ရှိပြီး နူကလီးယားဒဏ်ကိုပင်ခံနိုင်အောင် ဒီဇိုင်းဆွဲထားခဲ့သည်ဟု အသက် ၆၁ နှစ်အရွယ် နိုင်ငံရေးဆိုင်ရာသိပ္ပံပညာရှင် ဗလာရီ ဆိုလိုဗီး ပြောသည်။ 

 

ရုရှားက ယူကရိန်းမြို့တော် ကီယက်ဗ်နှင့် ဒုတိယအကြီးဆုံးမြို့ ခါကိဗ်ကို အမြောက်ကျည်ဆံမိုးရွာနေချိန် ပူတင်သည် "Vaccum ဗုံး" များအသုံးပြုကာ အပြစ်မဲ့အရပ်သားများအပေါ် စစ်ရာဇဝတ်မှုများကျူးလွန်နေကြာင်း စွပ်စွဲချိန်များထွက်ပေါ်လာချိန်တွင် သူ့မိသားစုပုန်းရှောင်နေသည်ဆိုသောပြောကြားချက်ထွက်ပေါ်လာခြင်းဖြစ်သည်။ 

အဆိုပါပညာရှင်သည် အစောပိုင်းက ပူတင်သည် ကျန်းမာရေးပြဿနာရှိနေပြီး ရုရှားလူထုမသိအောင်ဖုံးအုပ်ထားကြောင်းနှင့် သူနှင့် သူ၏ ကာကွယ်ရေးဝန်ကြီး ဆာဂျေရွိုင်ဂုတို့ လျို့ဝှက်ကာ တိုင်းရင်းရိုးရာတစ်မျိုးဖြစ်သော ရှာမန်တို့၏ ယတြာချေဆုတောင်းခြင်းများပြုလုပ်ကြောင်း စွပ်စွဲထားဖူးသည်။ 

" သမ္မတပူတင်ရဲ့ မိသားစုဟာ နူကလီယားစစ်ပွဲဖြစ်လာခဲ့သည်ရှိသော ပြင်ဆင်တဲ့အနေနဲ့ အထူးဘန်ကာကိုပြောင်းရွှေ့ခဲ့တယ်" ဟု ပရော်ဖက်ဆာကြီးက ဗီဒီယိုတစ်ခုတွင်ပြောသည်။

"ဘန်ကာက (တောင်တန်း) အယ်လ်တီ ရီပတ်ဘလစ်မှာ တည်ရှိပါတယ်"

" တကယ်တော့ အဲဒါဟာ ဘန်ကာမဟုတ်ပါဘူး၊ နောက်ဆုံးပေါ်သိပ္ပံနဲ့ နည်းပညာတွေနဲ့ဆင်ထားတဲ့ မြေအောက်မြို့တစ်ခုပါ"

သူက သတိပေးရာတွင် " ဒါဟာ ခင်ဗျားတို့အတွက် တစ်ခုခုအဓိပ္ပါယ်ဖြစ်လိမ့်မယ်လို့ ကျနော်မျှော်လင့်ပါတယ်" ဟု ပါရှိသည်။

" ဒီသမ္မတက သူ့မိသားစုကိုတော့ ဘန်ကာထဲပို့ထားတယ်"

ပူတင်၏မိသားစုများနှင့်ပတ်သက်၍ သူကပြောဆိုထားခြင်းမရှိသော်လည်း အသက် ၃၈ နှစ်အရွယ် အိုလံပစ်ရွှေတံဆိပ်ဆုရှင် ကျွမ်းဘားမယ် အလီနာ ကာဗေးဘာမှာ ပူတင်၏ လျို့ဝှက်အိမ်ထောင်ဘက်ဖြစ်သည်ဟု စွပ်စွဲဖူးသည်။

" အဲဒါက သူရဲ့ မိသားစုအစစ်အမှန်ပဲ၊ အလီနာက သူ့ရဲဆုံးဖြတ်ချက်တွေကို လွှမ်းမိုးတာပါ" ဟု ယမန်နှစ်က သူ ပြောဖူးသည်။

ယူကရိန်းကိုသိမ်းပိုက်ခြင်း မဟာဗျူဟာမြောက်အစီအစဉ် " ပျက်ပြားသွား" ပြီးနောက် မိသားစုကို ဘန်ကာထဲပြောင်းရွှေ့ခြင်းဖြစ်ပေါ်လာခဲ့သည်ဟု ပရော်ဖက်ဆာက ပြောသည်။

ပူတင်သည် အလွန်အမင်းအားကောင်း၊ ညီညွတ်ကာ ရုရှား၏အစီအစဉ်ကို အနှုတ်လက္ခဏာဖြစ်စေသော အနောက်အုပ်စု၏တစ်ပေါင်းတစ်စည်းတည်းတန်ပြန်မှုကြောင့် အထိနာနေရသည်။

" ဖေဖော်ဝါရီ ၂၇ ရက်နေ့မှာ  "အထူးစစ်ဆင်ရေး" ဆိုတာကြီး အဆုံးသတ်ကြောင်း ဒါမှမဟုတ် အဆုံးသတ်ခါနီးပြီလို့ ကြေညာပြီး ရုရှားတပ်တွေအငြင်းပွားစရာမရှိ အောင်ပွဲခံဖို့ ပူတင်က စီစဉ်ထားခဲ့တာ" ဟု သူက ပြောသည်။

" ခင်ဗျားတို့ သိတဲ့အတိုင်းပဲ ရုရှားရဲ့ ယူကရိန်းကျူးကျော်မှုမှာ ရည်မှန်းထားတဲ့နေရာတစ်ခုတောင်မှ မပေါက်ရောက်နိုင်ခဲ့ဘူးလေ"

ကရင်မလင်တွင် အတွင်းလူများနှင့်အချိတ်အဆက်ရှိသည်ဟုဆိုသော ဆိုလိုဗီးပြောသောနေရာသည် Gazprom က အယ်လ်တိုင်ရီပတ်ဘလစ်၏ အွန်ဂူဒေးစကိုင်းခရိုင်တွင် ဆယ်စုနှစ်တစ်ခုခန့်က တည်ဆောက်ထားခဲ့သောအဆောက်အဦများကိုညွှန်းဆိုထားသည်ဟု ယုံကြည်ရသည်။ 

တောင်ပတ်လည်ဝိုင်းရံထားသော မြေအောက်ပုန်းခိုရာနေရာများတွင် လေပေါက်များတပ်ဆင်ထားသည်ကို လေ့လာသူများသတိထားမိကြပြီး ဗို့အားမြင့်မီးလိုင်းများက ခေတ်လွန် ၁၁၀ ကီလိုဝပ်ဓာတ်အားရုံခွဲကိုဆက်သွယ်ထားရာ မြို့လေးတစ်ခုကိုလျှပ်စစ်ဖြန့်ဖြူးရန်လုံလောက်သည်။

တည်ဆောက်စဉ်ကာလက ဂျာမန်လှိုဏ်ခေါင်းတူးသူများကို ဆောက်လုပ်ရေးလုပ်ငန်းခွင်တွင်တွေ့ရသည်ဆိုသော သတင်းများထွက်ပေါ်ခဲ့သည်။ 

မော်စကိုရှိအချို့သူများကတော့ ဆိုလိုဗီးက ကောလာဟလဖြန့်သူ သို့မဟုတ် လုပ်ဇာတ်တွေပြောတတ်သူအဖြစ်ပယ်ချတတ်ကြသော်လည်း ပူတင်၏ဆေးဘက်ဆိုင်ရာနှင့် စိတ်ကျန်းမာရေးတို့နှင့်ပတ်သက်ပြီး စွပ်စွဲပြောဆိုကာ တယ်လီဂရမ်မှဖြန့်ဝေမှုနှင့်ပတ်သက်၍ ပြီးခဲ့သည့်အပတ်တွင်းက သူ့ကို ခုနှစ်နာရီကြာအောင် စစ်ကြောရေးလုပ်ခံခဲ့ရဖူးသည်။ 

သံတမန်များနှင့် စပိုင်များမွေးထုတ်ပေးလေ့ရှိသည့် မော်စကိုနိုင်ငံတကာဆက်ဆံရေး အင်စတီကျူတွင် ပရော်ဖက်ဆာလုပ်ခဲ့သူကို လွှတ်ပေးခဲ့သော်လည်း သူ၏အမှုနှင့်ပတ်သက်၍ ထုတ်ဖော်ပြောခြင်းမရှိပါ။

သူ့အိမ်ကို ရှာဖွေခံရကာ အီလက်ထရောနစ်ပစ္စည်းများစွာ အသိမ်းခံခဲ့ရသည်။

သူပြောသည့်အထဲ ထူးထူးကဲကဲလူစိတ်ဝင်စားခံရသည်က ကာကွယ်ရေးဝန်ကြီး ဆာဂျေရွိုင်ဂုက ပူတင်အတွက် ဆိုင်ဘေးရီးယားတွင် ရှာမန်းတို့ရိုးရာဖြင့် မြေခွေးနက်ကို ယစ်ဇ်ပူဇော်မှု သမ္မတ၏ကျန်းမာရေးကောင်းလာစေရန် လုပ်ဆောင်ခဲ့သည်ဆိုသော ပြောစကားဖြစ်သည်။

ဆာဂျေသည် လောလောဆယ်တွင် ယူကရိန်းရှိ ရုရှားစစ်တပ်စစ်ဆင်ရေးကို ထိန်းချုပ်နေသည်။ 

" မြေခွေးသွေးစိမ်ထားတဲ့အဝတ်ဖြူစကို မီးရှိုခဲ့တာ" ဟု ဆိုလိုဗီးနှင့်ဆက်နွယ်သော   တယ်လီဂရမ်ချန်နယ် General SVR တွင်ပြောသည်။ 

ပုံ (၁) ရုရှားသမ္မတ ဗလာဒီမာပူတင်နှင့် သူ၏ဇနီး လုမီလာ (ညာ) နှင့် သူ၏သမီး မယ်ရီယာ ပူတီနာ (ဘယ်)

ပုံ (၂) ပရော်ဖက်ဆာ ဗယ်လာရီ ဆိုလိုဗီးက ပူတင်၏ မိသားစု အယ်တိုင်းရှိ လျို့ဝှက်ဘန်ကာများထဲတွင် ပုန်းအောင်နေကြောင်းပြောသည်။

Mizzima