နိုင်ငံတော် အရန်စက်သုံးဆီ ဂါလံ ၁၈ သန်းကို အာဏာသိမ်း စစ်တပ်အသုံးပြုရန်

​

နိုင်ငံတော် အရန်စက်သုံးဆီ ဂါလံ ၁၈ သန်းကို အာဏာသိမ်း စစ်တပ်အသုံးပြုရန်အတွက် ပေးအပ်ထားသော ကုမ္ပဏီများထံမှ ပြန်တောင်းခံကြောင်း သိရ

~~~~~~~~~~~

ထက်ခေါင်လင်း/ဧရာဝတီတိုင်းမ်

ရန်ကုန် ၊ မတ်လ ၆ ရက်

အာဏာသိမ်း စစ်ကောင်စီသည် လွန်ခဲ့သည့် ၇ နှစ်ကျော်က နိုင်ငံတော်ပိုင် အရန်စက်သုံးဆီ ဂါလံ သန်းနှင့်ချီသည့် ပမာဏကို စစ်တပ်နှင့် နီးစပ်သည့် ကုမ္ပဏီ ၅ ခုကို အခွန်မဲ့စနစ်ဖြင့် ပေးအပ်ထားခဲ့ရာမှ ပြီးခဲ့သည့်လကမှစပြီး လျှပ်စစ်ကဏ္ဍထုတ်လုပ်ရေးအတွက်ဟုဆိုပြီး အရန်ဆီ ဂါလံ ၁၈ သန်းကို အဆိုပါကုမ္ပဏီများထံမှ အချိုးကျနှုန်းဖြင့် ပြန်လည်တောင်းခံခဲ့ကြောင်း မြန်မာ့ရေနံလုပ်ငန်းဌာန၏ လျှို့ဝှက်ရုံးတွင်းစာအရ သိရသည်။

အဆိုပါ စက်သုံးဆီများသည် သန်လျင်ရေနံချက်စက်ရုံ ပိတ်သိမ်းစဉ်က စက်ရုံအတွင်း ရှိနေခဲ့သည့် စက်သုံးဆီများဖြစ်ပြီး ဂါလံ သန်းရာနှင့်ချီကို မြတ်မေတ္တာမွန်၊ Apex၊ Puma Energy Asia Sun၊ Max၊ Greenluck၊ Denko ကုမ္ပဏီများထံသို့ သိမ်းထားရန်ဆိုပြီး အချိုးကျ ပေးအပ်ခဲ့ကြောင်း သိရသည်။

" အရန်ဆီကို ပြန်တောင်းတဲ့ ခေါင်းစဉ်ကတော့ လျှပ်စစ်လိုအပ်ချက်အတွက် ပြန်ထုတ်ပေးဖို့ပဲလို့ ဆိုတယ်။ ဒါပေမယ့် ထုတ်ယူလိုက်တဲ့ အများစုကတော့ စစ်တပ်အသုံးပြုဖို့ချည်းပဲ။ လျှပ်စစ်ဌာနကို ဘယ်လောက်ရောက်လဲတော့ ကျနော်တို့မသိဘူး။ ကျနော်တို့ဌာနကလူတွေလည်း သယ်ယူပို့ဆောင်ရေး မလုပ်ရဘူး။ Denko က လူတွေချည်း သယ်ကြတာ’ ဟု သီလဝါရှိ မြန်မာ့ရေနံလုပ်ငန်းဝန်ထမ်းတဦးက ပြောသည်။

အဆိုပါညွှန်ကြားစာတွင် ချေးငှားသုံးစွဲလိုသည့်ကိစ္စနှင့်ပက်သက်ပြီး လျှပ်စစ်ဝန်ကြီးဌာန၏ ခွင့်ပြုချက်ဖြင့် စတင်ချေးငှားပေးထားသော နိုင်ငံတော်၏ အရန်ဆီများထဲမှ သုံးစွဲရန်အလို့ငှာ ထုတ်ပေးရမည်ဖြစ်ပြီး ကုမ္ပဏီများမှ စက်သုံးဆီ ဂါလံ ၁၈ သန်းကို ထုတ်ပေးရန် စက်သုံးဆီလုပ်ငန်းရှင်များအသင်းမှ မချိန်မှီ ထုတ်ပေးနိုင်စေရန် အကြောင်းကြားသည်ဟု ပါရှိသည်။

သို့သော်လည်း အမှန်တကယ်အားဖြင့် ယခင် ၇ နှစ်ခန့်က နိုင်ငံတော်အရန်ဆီအဖြစ် ထားရှိရေး ကုမ္ပဏီများကို ပေးအပ်ခဲ့သော်လည်း ယခုထုတ်ယူသည့် ဂါလံ ၁၈ သန်းကို နိုင်ငံတော်အနေဖြင့်ပင် ပြန်လည်ဖြည့်တင်းပေးရမည်ဖြစ်ကြောင်း ဌာနတွင်းသတင်းများအရ သိရသည်။

" သူတို့အခုထုတ်တယ်ဆိုတာ ကုမ္ပဏီတွေကို ပြန်ဖြည့်ပေးရမယ်။ ကုမ္ပဏီတွေက ဟိုးအရင်ထဲက အလကား ရထားတဲ့ ဆီတွေလိုဖြစ်နေတယ်။ အဲ့ဆီတွေနဲ့ ဈေးကွက်ထဲ လှည့်ရောင်းနေကြတာ။ အဲ့ဒီအတွက် နိုင်ငံတော်လည်း ဘာမှအကျိုးအမြတ်မရဘူး။ အခွန်မရဘူး။ ဒါက နိုင်ငံတော်အရန်ဆီ၊ အခုထုတ်သုံးဖို့ပေးလို့ ဆိုပေမယ့် ပြန်ဖြည့်ပေးရမယ်" ဟု သီလဝါရှိ စက်သုံးဆီကုမ္ပဏီတခုမှ ဝန်ထမ်းတဦးက ပြောသည်။

သီလဝါဆိပ်ကမ်းတွင် မြတ်မေတ္တာမွန်၊ Apex၊ Puma Energy Asia Sun၊ Max၊ Greenluck၊ Denko စသော ကုမ္ပဏီများ၏ ဆီသိုလှောင်ကန်များ တည်ရှိနေပြီး မြန်မာနိုင်ငံအနှံ့ စက်သုံးဆီများကို ဖြန့်ဖြူးပေးနေပြီး သီလဝါဆိပ်ကမ်းကို အာဏာသိမ်းစစ်တပ်မှ ရေတပ်သားများက လုံခြုံရေး တင်းကျပ်စွာ ကိုင်တွယ်နေလျှက်ရှိသည်။

ထို့အပြင် ယခုနောက်ပိုင်းတွင် သီလဝါဆိပ်ကမ်း၊ လေယာဉ်ဆီတင်ပို့မှု၊ ရေတပ်လှုပ်ရှားမှုများနှင့် ပက်သက်ပြီး သတင်းမီဒီယာများကို ပေါက်ကြားခြင်းမရှိစေရန်အတွက် စစ်ကောင်စီဝန်ထမ်းများအပြင် ကုမ္ပဏီဝန်ထမ်းများကိုပါ ထပ်မံညွှန်ကြားထားပြီး ပေါက်ကြားမှု ပေါက်ပေါက်ခဲ့ပါက နိုင်ငံတော်လျှို့ဝှက်ချက်ဥပဒေဖြင့်ပင် အရေးယူမည်ဟု ထုတ်ပြန်ထားသည်။ 

ထို စစ်တပ်အတွက် အထောက်အပံ့ပေးနေသည့် ကုမ္ပဏီများအဖြစ် မြတ်မေတ္တာမွန်၊ Apex၊ Puma Energy Asia Sun၊ Denko နှင့် ရွှေဗျိုင်းဖြူ ကုမ္ပဏီများအဖြစ် သတင်းများ ထွက်ပေါ်နေသော်ပြီး အမျိုးသားညီညွတ်ရေး အစိုး ရ NUG က စစ်ကောင်စီကို လေယာဥ်ဆီထောက်ပံ့မှုနှင့်ပတ်သက်၍ ပုဂ္ဂလိက စက်သုံးကုမ္ပဏီ ၆ခုကို အမည်ပျက်စာရင်းသွင်းထားပြီး ထပ်မံစိစစ်ကာ ထုတ်ပြန်မည်ဖြစ်ကြောင်း သိရသည်။

ဓာတ်ပုံ - လူမှုကွန်ရက်

#Ayeyarwaddy_Times