စစ်ကောင်စီ၏ ဘီလူးစစ်ကြောင်း အသက်ရှင်ကျန်ရစ်သူ ၆၀ကျော်ဖြင့် ပြန်လည်ထွက်ပြေး

အင်အား ၁၅၀နှင့် မြောင်နယ်သို့ စစ်ကြောင်းထိုးလာသည့် စစ်ကောင်စီ၏ ဘီလူးစစ်ကြောင်း အသက်ရှင်ကျန်ရစ်သူ ၆၀ကျော်ဖြင့် ပြန်လည်ထွက်ပြေးရ 

 CJ Platform 

 စစ်ကိုင်းတိုင်း၊ မြောင်မြို့နယ်သို့ စစ်ကြောင်းထိုးလာသည့် အင်အား ၁၅၀ ပါ စစ်ကောင်စီ၏ ဘီလူးစစ်ကြောင်းသည် ပြန်လည်ဆုတ်ခွာရာတွင် ၆၀ ကျော်သာကျန်ရှိတော့သည်ကို ဒရုန်းများဖြင့် ထောက်လှမ်းတွေ့ရှိခဲ့သည်ဟု Myaung PDF CDSOM မှ တာဝန်ရှိသူ ကိုနွေဦးက CJ Platform သို့ပြောကြားသည်။ စစ်ကောင်စီ၏ ဘီလူးစစ်ကြောင်းသည် စစ်ကိုင်း တိုင်းအတွင်း ပြည်သူများကို ဓားစာခံအဖြစ်ဖမ်း ဆီးခြင်း၊ သတ်ဖြတ်ခြင်း၊ နေအိမ်များကို မီးရှို့ဖျက်ဆီးခြင်းများကို ပြုလုပ်နေသည့် အကြမ်းဖက် စစ်ကြောင်းတစ်ခု ဖြစ်ကြောင်းကိုလည်း ဒေသခံများက ပြောကြားထားသည်။ “၁၅ ရက်နေ့ကစပြီးစစ်ကြောင်းထိုးနေတာ၊ အဲ့ဒီရက်မှာပဲ ခွေး ၈ ကောင်သေတယ်။ ၁၆ ရက်နေ့မှာ ၉ ကောင်သေတယ်။ ၂၁ ရက်ညမှာ ၁၉ ကောင်သေတယ်။ အလာတုန်းက ၁၅၀ ကျော်၊ ဒီနေ့ဒီကောင်တွေ စစ်ကြောင်းပြန်ဆုတ်တော့ ၆၀ကျော်ပဲတွေ့ရတော့တယ်” ဟု ကိုနွေဦးက ပြောကြားသည်။ ဒေသခံ PDF ပူးပေါင်းတပ်ဖွဲ့များ တိုက်ခိုက်မှုကြောင့် ဘီလူးစစ်ကြောင်းမှ စစ်ကြောင်းမှူး သေ ဆုံးခဲ့ပြီး၊ အခြားအဆင့် စစ်သားများလည်းသေဆုံးခဲ့ကြောင်း ၊ သေဆုံးစစ်သားအလောင်းများကို မီးရှို့ခြင်း၊ မြင်းခြံဘက်သို့ ပို့ဆောင်ခြင်းများပြုလုပ်ခဲ့သည်ဟုလည်း ကိုနွေဦးက ရှင်းပြသည်။ “ဒီနေ့ သူတို့စစ်ကြောင်းမှူးအလောင်းကို ထမ်းပြီးပြန်နေကြတာ၊ တပ်ကြပ်ကြီးမြင့်ကျော် အလောင်းတော့ ဒီနေ့သူတို့ပြန်ရတယ်။ အခြားအလောင်းတွေတော့ မီးရှို့သွားတာရော၊ မြင်းခြံဘက် ပို့လိုက်တောတွေရော ရှိပါတယ်” ဟု ကိုနွေဦးကဆိုသည်။ ဘီလူးစစ်ကြောင်းကို PDF ပူးပေါင်းတပ်ဖွဲ့များမှ တိုက်ခိုက်ရာတွင် မတ် ၁၅ ရက်တွင် တော်လှန်ရေးရဲဘော် ၂ ဦးထိခိုက်ဒဏ်ရာရရှိခဲ့ပြီး၊ မတ် ၂၁ ရက်တွင် ဒရုန်းတစ်စီးအား စစ်ကောင်စီတပ်မှ ပစ်ခတ်မှုကြောင့် ပျက်စီးခဲ့ကြောင်းလည်း သိရသည်။ အထိနာခဲ့သည့် ဘီလူးစစ်ကြောင်းသည် မြောင်မြို့နယ်မှ ဆုတ်ခွာပြီးနောက် မုံရွာမြို့နယ်အခြေ စိုက် နမခ တပ်ရင်းသို့ ပြန်လည် ဆုတ်ခွာနေကြောင်းလည်း သိရသည်။ မြောင်မြို့နယ်သို့ စစ်ကြောင်းထိုးလာသည့် စစ်ကောင်စီတပ်ကို Myaung PDF CDSOM အပြင်ဒေသခံ PDF အဖွဲ့အစည်းပေါင်း ၂၀ နီးပါးမှ ပူးပေါင်း တိုက်ခိုက်ခဲ့ခြင်းလည်း ဖြစ်သည်။ 

 🖋️လင်းခိုင် ဓာတ်ပုံ-Ko Nway Oo-Myaung #CjPlatform #ဘီလူးစစ်ကြောင်း #မြောင်