လက်ရှိစစ်ရေးအခြေအနေ သုံးသပ်ချက် (မတ်လ ၆ ရက် ၂၀၂၂)

​Credit to Myat Tun Oo

အများစုက စစ်ရေးအခြေအနေ ဘယ်ကိုရောက်ပြီလဲ သိလိုကြပါတယ်။ NUG က နိုင်နေလား မအလက နိုင်နေလားပေါ့။ ဒီနေရာမှာ စာရေးသူအနေနဲ့ အတွင်းသတင်းအပါအဝင် မြေပြင်သတင်းအပေါ်မူတည်ပြီး အမှန်အတိုင်း သုံးသပ်ပေးပါ့မယ်။ အထောက်အထားနဲ့ ပညာရှင်သဘော ခံစားချက်မပါ ရေးပြပါ့မယ်။ မဆဲပါနဲ့။

ဒီမိုတွေစိုးရိမ်တာက ရွာတွေမီးရှို့ခံရ၊ ပြည်သူတွေထွက်ပြေးနေရ၊ မအလက လေပေါ်ကနေ အသာစီးရလို့ PDF တွေ ရှုံးနေလားလို့ စိုးရိမ်ကြတာရှိပါတယ်။ ယခင်က ခဏခဏ ပြောခဲ့သလို မအလတပ်က လေကြောင်းကနေ ရဟတ်ယာဉ်နဲ့ လာတိုက်ရတာက ဘာကိုပြသလဲဆိုတော့ ကုန်းလမ်းမှာ သူ့တပ်က လှုပ်ရှားလို့မရတာ နယ်မြေစိုးမိုးမှုမရှိတာကို ပြနေပါတယ်။ အမေရိကန်လဲ အာဖဂန်မြို့တွေကို စိုးမိုးခဲ့ပေမယ့် နယ်ထဲကို မသွားရဲခဲ့ပါ။ သူက ကျူးကျော်သူဖြစ်ပြီး မအလက မိမိနယ်မြေထဲမှာ မိမိမသွားရဲတာပါ။ သူသာ နယ်မြေစိုးမိုးရင် ရန်ကုန်မှာလို စစ်ကားတွေနဲ့ သွားလာပြရမှာပါ။ စစ်ကိုင်းမှာ လုံးဝမသွားရဲအောင်ကြောက်နေပါတယ်။ သူတို့က အရပ်သားကား ဘုန်းကြီးကားတွေကို စီးပြီး သွားပါတယ်။ ဘုန်းကြီးကတော့ မဘသပေါ့။ နမခထဲမှာ ခေတ်သစ်က သေနှုန်းမြင့်လာရင် ဒီနေ့လှည့်ကင်းနားဆိုပြီးတောင် ပြောယူရတဲ့အထိပါ။

နောက်ရဟတ်ယာဉ်ပေါ်က ဆင်းတိုက်တာပါ။ ဒါကသတင်းအတိအကျရရင် သူတိုက်လို့ရနိုင်ပါတယ်။ ယခင်က အင်တာဗျူးတွေပေးတာရဲ့ အကျိုးကျေးဇူးတွေပါ။ ဒလန်လဲပါပါတယ်။ ဒါပေမယ့် သူတိုက်တိုင်း PDF အများကြီး မထိခဲ့ပါ။ ရှိတဲ့ PDF ထက် သူ့ကြောင့်ထိခိုက်တာက အနည်းစုပါ။ ခံရတာက အပြစ်မဲ့ ရွာသားတွေအများစုပါ။ PDF ကို မတိုက်နိုင် မမိနိုင် မဖမ်းနိုင်လို့ ကြွက်မနိုင် ကျီမီးနဲ့ရှို့တဲ့ပုံစံနဲ့ ရွာတွေကို မီးရှို့နေတာပါ။ စာဖတ်သူများ စဉ်းစားပါ။ ပုံမှန်မှာ မိမိကနိုင်နေတဲ့ရွာကို ဘာမှမီးရှို့စရာမရှိပါ။ သူလုပ်တာက အဆိုပါရွာတွေက သူတို့မီးရှို့ခံရရင် PDF ကို မုန်းပြီး မထောက်ပံ့အောင်ပါ။ မြေပြင်မှာ ဖြစ်နေတာက မီးရှို့ခံရအပြီးမှာ ရွာလုံးကျွတ် PDF ဖြစ်သွားတာပါ။ ဒီနေရာမှာ အရေးကြီးတာက ယခင်ကဆန္ဒပြတာဟာ သူတို့ဒီမိုကရေစီရဖို့နဲ့ ဗမာရွာအများစုဟာ ၉၉% အမေစုကိုချစ်လို့ပါ။ သူတို့မီးရှို့လူသတ်အပြီးမှာ အဆိုပါရွာတွေက ဒီမိုကရေစီနဲ့ အမေစုအတွက်တင်မဟုတ်တော့ဘဲ ငါတို့အဖေ၊ ငါတို့အမေ၊ ငါတို့ကလေး၊ ငါတို့ရွာ၊ ငါတို့သူငယ်ချင်းအတွက် လက်စားချေဖို့ မအလတပ်ကို သတ်မယ်ဆိုတာမျိုး ဖြစ်သွားခဲ့ပါပြီ။ သူတို့စိတ်က ပိုမာသွားကြပါပြီ။ ဒီနေရာမှာ တိုက်ပွဲအတွက် စိတ်ဓာတ်ပေါ့။ ဒီစိတ်ဓာတ်ဟာ မီးရှို့လို့ မကြောက်ဘဲ ပြန်ချမယ်ဆိုတာ ဖြစ်သွားခဲ့ပါပြီ။ ထိုဒေသတွေက အလောင်းဘုရား၊ ဗန္ဓုလနယ်မိုလို့ အမျိုးသားရေးစိတ်ပြင်းပါတယ်။

ဒါဆိုမအလတပ်က အသေများလား PDF က အကျများနေလား? 

အစပိုင်းက မအလတပ်က အသေများတယ်လို့ပြောခဲ့ရင် ဘောမများက ဘာညာဆိုပြီး ဝေဝါးအောင်လုပ်လေ့ရှိပါတယ်။ ဆေးရုံတွေမှာ ခြေပြတ်လက်ပြတ်တွေများနေတာကို အရိုးအထူးကု စစ်ဆေးအရာရှိများစွာက အတည်ပြုထားပါတယ်။ ခြေပြတ် လက်ပြတ်နဲ့ ထွက်ဖို့တင်ထားတဲ့ စာရင်းက ၂၀၂၁ အာဏာသိမ်းနောက်ပိုင်း ရှစ်ထောင်ကျော်ပါတယ်။ မုံရွာနဲ့ မန္တလေးမှာ မိုင်းဆွဲခံရရင် တစ်ချိန်ထဲအများကြီး ဆေးရုံရောက်လေ့ရှိပါတယ်။ ဘာလို့လဲဆိုတော့ သူကကားနဲ့သွားရင် မိုင်းဆွဲခံရလို့ပါ။ အပြင်မထွက်တဲ့နေ့ မိုင်းဆွဲမခံရလို့ အသေအပျောက်နည်းပါတယ်။ တစ်ခါတလေမှာ တောင်ငူလို နေပြည်တော်လို ရန်ကုန်လိုမျိုး သူကလုံခြုံတယ်လို့ ထင်ရတဲ့နေရာမှာ အလစ်အငိုက်မိုင်းဆွဲခံရရင် အသေများပါတယ်။ စစ်သဘောအရ အပြင်မထွက်တိုက်ရင် နယ်မြေစိုးမိုးလို့မရပါ။ မအလတပ်မှာ မိုင်းခံကား မရှိပါ။ ဒါကြောင့် မအလတပ်က အသေများနေပါတယ်။ အသေများပြီး တပ်အင်အားနည်းလာလို့ မအလက စစ်ခွေးသင်္ဃန်းဝတ်ဂတုံးတွေတောင် လက်နက်ကိုင်ခိုင်းနေရပါပြီ။ မအလသာသူ့စစ်သားမသေရင် ဒီလိုမျက်နှာပျက်ခံပြီး သင်္ဃန်းဝတ်ဂတုံးတွေကို စစ်သင်တန်းပေး လက်နက်ကိုင်ခိုင်းစရာမရှိပါ။ ဒါက ထင်ရှားတဲ့အထောက်အထားပါ။

ဒီနေရာမှာ မေးစရာရှိတာက မအလတပ်က ကရင်နီနယ်တွေ လေးကေ့ကော်တွေမှာ ပြန်တိုက်သိမ်းနိုင်တာ မင်းမတွေ့ဖူးလားလို့ မေးနိုင်ပါတယ်။ ပြောလိုတာက စစ်ဆင်ရာမှာ တင့်ကားတွေ၊ လေယာဉ်တွေနဲ့ သာလွန်အင်အားသုံးပြီးသိမ်းရင် နယ်မြေသိမ်းလို့ ရနိုင်ပါတယ်။ သိမ်းပြီးရင် ထိန်းရမှာပါ။ ဥပမာ အမေရိကန်က အီရတ်ကို သိမ်းတာက ဒုံးပျံတွေ၊ လေယာဉ်တွေနဲ့ ပစ်သိမ်းနိုင်ပေမယ့် ထိန်းရာမှာ အသေများခဲ့ပါတယ်။ အဆိုပါဥပမာကို ယခု ယူကရိန်းမှာစစ်မှာ တွေ့ရမှာပါ။ ဒါတွေက ပြည်သူမပါလို့ပါ။ ထို့အတူ မအလတပ်က အဆိုပါနယ်မြေတွေကို သိမ်းနိုင်ပေမယ့် ထိန်းဖို့က မအလတပ်အသေများမှာပါ။ နယ်မြေကိုထိန်းရာမှာ တပ်တွေက ရွာတွေထဲဝင်စစ်တာ အုပ်ချုပ်ရေးစနစ် ထူထောင်တာတွေလုပ်ရမှာပါ။ သူတို့ဟာ စစ်ကိုင်းမှာလို မြို့ပြင်ထွက်တာနဲ့ မိုင်းဆွဲခံရပြီး သေမှာပါ။

ဟာဒါဆိုရင် PDF က မြို့တွေသိမ်းနိုင်တော့မှာလား? PDF ပေါ်လာတာ တစ်နှစ်တောင်မပြည့်သေးပါ။ PDF အရင်ပေါ်ခဲ့တဲ့ AA၊ KIAတို့တောင် မြို့တွေ မသိမ်းနိုင်သေးပါ။ မြို့တွေသိမ်းနိုင်ဖို့က လက်နက်ကြီးကြီးတွေလိုပါတယ်။ ဒီလက်နက်တွေက ပိုက်ဆံရှိရင်တောင် နိုင်ငံကြီးတွေက မရောင်းရင် ဝယ်မရပါ။ ဒါပေမယ့် ရုရှားက ယူကရိန်းကို ဝင်သိမ်းချိန် မအလက ရုရှားကိုထောက်ခံချိန်မှာ အနောက်အုပ်စုဟာ NUG ကို လက်နက်ထောက်ပံ့ဖို့ စဉ်းစားလာနေကြပါပြီ။ တချိန်ထဲမှာဘဲ NUG ဟာ တော်လှန်ရေးမိသားစု PRF အစီအစဉ်နဲ့ စနစ်တကျ ပိုက်ဆံကောက်လာနိုင်တာ တွေ့နေရပါပြီ။ 

နောက်ပိုင်း လစဉ်ဒေါ်လာသန်းဂဏန်းလောက်ရလာရင် PDF ဟာ လက်နက်တွေ ယခုထက်ပိုကောင်းလာမှာပါ။ ယခု NUG လက်အောက်ခံ တရားဝင် PDF ယာယီတပ်ရင်းမှူးတွေက သူတို့ NUG ထံက ထောက်ပံ့မှုနဲ့ ဘယ်လိုတိုးတက်လာနေကြောင်း ဗီဒီယိုဖိုင်နဲ့ ပြောတင်လာတာဟာ NUG အတွက် ပုံရိပ်ကောင်းစေခဲ့ပါတယ်။ မဟုတ်ရင် မရတဲ့ NUG နဲ့ မဆက်သွယ်တဲ့ PDF ကသာ မရဘူးတင်နေလို့ ဇဝေဇဝါဖြစ်စေခဲ့ပါတယ်။ PRF ပိုက်ဆံဟာ လစဉ်ရနေလို့ ကြာလာလေ ဝင်ငွေပိုကောင်းလာလေ ဖြစ်လာမှာပါ။ clicktodonate ကလဲ ဝင်ငွေကောင်းနေပြီး ဒါက GenZ လေးတွေရဲ့ အတွေးအခေါ်အသစ်ကနေလာတာပါ။ ဒါက နည်းဗျူဟာ အသေးစိတ်ပါ။

မဟာဗျူဟာအဆင့်မှာ မအလဟာ ဘယ်တိုင်းရင်းသားလက်နက်ကိုင်ကိုမှ အကြီးအကျယ်မတိုက်ရဲဘဲ ကြောက်လို့ အပြစ်ရပ်ထားရပါတယ်။ AA ဆိုရင် တရားစီရင်နေတာ အုပ်ချုပ်နေတာသိပေမယ့် ချင်းကိုဖိနေရလို့ ရခိုင်က AA ကို သွားမတိုက်ရဲပါ။ ဝ တပ်ဆိုရင် RCSS ရွက်ဆစ်ကို ရှမ်းတောင်အထိ လိုက်တိုက်ပေမယ့် မအလဘာမှမလုပ်ရဲပါ။ ဒါက မအလက PDF ကိုတိုက်ဖို့ ယခင်က ဓားကျိန်းကျိန်းခဲ့တဲ့ လက်နက်ကိုင်တွေကို ဖင်ပေးပေါင်းနေရတာကို ပြတာပါ။

မအလတပ်ကယုံကြည်တာက ဗကပနဲ့ ဦးနု ပုန်ကန်တာကိုနိုင်ခဲ့လို့ ဒီအခေါက်လဲ ဗကပကိုတိုက်သလိုတိုက်ရင် သူတို့နိုင်မယ်လို့ ထင်ထားခဲ့တာပါ။ သူမသိတာက ယခုသူဖြစ်နေတာက ပြည်သူနဲ့ဆိုတာပါ။ ဒီအကြောင်းနောက်မှရေးပါ့မယ်။

အကျဉ်းချုပ်ရရင် စစ်ဖြစ်တာမှာ အနိုင်အရှုံးကို ရွာတွေဘယ်လောက်မီးရှို့နိုင်လဲ အပြစ်မဲ့ပြည်သူ ဘယ်လောက်ကိုသတ်နိုင်သလဲဆိုတာနဲ့ တိုင်းတာရင်တော့ မအလတပ်က မီးရှို့၊ မုဒိမ်းကျင့်၊ အပြစ်မဲ့ပြည်သူကို သတ်တဲ့နေရာမှာ ပထမမိုလို့ နိုင်တယ်လို့ပြောနိုင်ပါတယ်။ ဒါပေမယ့် တကယ်စစ်မြေပြင်မှာ ဘယ်သူကနိုင်သလဲဆိုရင်တော့ PDF ကသာ နိုင်နေတယ်ဆိုတာ မငြင်းနိုင်တဲ့ အထောက်အထားများက ပြနေပါတယ်။ ပြည်သူသာ အဓိကပါ။

https://www.myattunoo.com/