မန္တလေးမှ LGBT အရေးလှုပ်ရှားသူ နှစ်ရှည်ထောင်ဒဏ်ချခံရ

အာဏာသိမ်းစစ်တပ်သည် ရဟန်းသံဃာများ၊ ဘာသာရေးခေါင်းဆောင်များနှင့် လူ့အခွင့်အရေး တက်ကြွလှုပ်ရှားသူများပါမကျန် ဆန့်ကျင်သူမှန်သမျှကို နည်းမျိုးစုံဖြင့် ဖမ်းဆီးနှိပ်စက်ကာ နှစ်ရှည်ထောင်ဒဏ်များ ချမှတ်နေသည်။ 

မြတ်သွယ်

Published on Dec 13, 202

စစ်ကောင်စီ၏ အငြိုးဖြင့် ထောင်ဒဏ် နှစ်ရှည်ချခံရသည့် စူးရှရှင်းသန့်

မန္တလေးမြို့တွင် LGBT (လိင်စိတ်ခံယူမှုကွဲပြားသူ) အရေး လှုပ်ရှားသူများအနက် ထင်ရှားသည့် စူးရှရှင်းသန့်ကို စစ်ကောင်စီက မန္တလေးအိုးဘိုထောင်တွင်း အထူးတရားရုံးက ယမန်နေ့ (ဒီဇင်ဘာ ၁၂) တွင် ပုဒ်မနှစ်ခုဖြင့် ထောင်ဒဏ် ၂၂ နှစ် ထပ်မံချမှတ်လိုက်သည်။

အကြမ်းဖက်မှုတိုက်ဖျက်ရေး ဥပဒေပုဒ်မ ၅၂(က) နှင့် အကြမ်းဖက်အဖွဲ့အစည်းတစ်ခုခုကို ငွေကြေးထောက်ပံ့မှုဆိုင်ရာ ပုဒ်မ ၅၀ (ည) တို့ဖြင့် နှစ်ရှည်ထောင်ဒဏ် ထပ်ချခံရသူ စူးရှရှင်းသန့်မှာ ပုဒ်မ ၅၀၅ (ခ) ဖြင့်လည်း ထောင်သုံးနှစ် ချခံထားရပြီးဖြစ်သည်။ 

“ပေါင်းပြီးချလိုက်တာလို့ပဲ သိရတယ်။ အမှုအကြောင်းအသေးစိတ်တော့ မသိရသေးဘူး။ ၅၀၅(ခ) နဲ့က ဒီနှစ်အစောပိုင်းကတည်းက ၃ နှစ်ချထားတာပါ။ အခုအားလုံးပေါင်း ၂၅ နှစ်ပေါ့” ဟု မိသားစုနှင့် နီးစပ်သူတစ်ဦးက Myanmar Now ကို ပြောသည်။

အသက် ၂၇ နှစ်အရွယ် စူးရှရှင်းသန့်ကို စစ်ကောင်စီက ပြီးခဲ့သည့်နှစ် အောက်တိုဘာလအတွင်း ကျောက်ဆည်မြို့မှအပြန် မန္တလေးမြို့အဝင် မြစ်ငယ်တိုးဂိတ်အနီးတွင် ကားဖြင့်တိုက်ကာ ဖမ်းဆီးခဲ့ခြင်းဖြစ်သည်။ 

ထိုစဉ်က စူးရှရှင်းသန့်နှင့် ဖမ်းဆီးခံရသည့် ကိုသန်းတိုးအောင်သည်လည်း ယမန်နေ့၌ပင် ပုဒ်မနှစ်ခုဖြင့် ထောင်ဒဏ် ၁၅ နှစ် အချခံရသည်ဟု သိရသည်။ 

“ကိုသန်းတိုးအောင်ကို ၂ မှုပေါင်း ၁၅ နှစ်၊ ဒီပုဒ်မတွေအတွက် သူကျူးလွန်ခြင်းလည်း မရှိပါဘူး။ သူက NGO မှာ လုပ်တာဆိုတော့ ပရဟိတတွေ၊ ငွေကြေးပိုင်ဆိုင်ရာ ငွေအလွှဲအထုတ် ကူညီရတာတွေရှိတယ်။ ဒါတွေအတွက်ပဲ စွပ်စွဲပြီး ချခံရတယ်လို့ ထင်ပါတယ်” ဟု အထက်ပါ နီးစပ်သူက ပြောသည်။

စစ်ကောင်စီက ကားဖြင့်တိုက်ဖမ်းဆီးစဉ် ကိုသန်းတိုးအောင်မှာ ခန္ဓာကိုယ်အောက်ပိုင်း ဒဏ်ရာရရှိခဲ့ပြီး စူးရှရှင်းသန့်မှာ အသက်အန္တရာယ်စိုးရိမ်ရသည်အထိ ဒဏ်ရာမရသော်လည်း အညိုအမည်းစွဲသည့် ဒဏ်ရာများ ရရှိခဲ့သည်။ 

ထို့ပြင် စစ်ကြောင်းရေးတွင် စူးရှရှင်းသန့်မှာ လိင်ပိုင်းဆိုင်ရာ ထိပါးပြောဆိုမှုများ၊ ထိတွေ့နှောက်ယှက်မှုများ၊ နှိပ်စက်ခံရမှုများ ရင်ဆိုင်ကြုံတွေ့ခဲ့ရသည်ဟု ၎င်းနှင့်ရင်းနှီးသူ နောက်တစ်ဦးက ဆိုသည်။

“သူ့ကို စစ်ကြောရေးမှာ ရင်သားတွေကို ကိုင်တွယ်တာ၊ ဆေးလိပ်မီးနဲ့ တို့တာတွေ ခံရတယ် နောက်ပြီး ထောင်ရောက်တဲ့အခါမှာလည်း သူက လိင်စိတ်ပြောင်း အမျိုးသမီးလည်းဖြစ်တယ်။ ထွားတဲ့အခါကျတော့ အတွင်းခံအင်္ကျီတွေဘာတွေ တောင်းခံတဲ့အခါ သွင်းလို့မရဘူးလို့ ကြားရတယ်”

လက်ရှိတွင် စူးရှရှင်းသန့်မှာ မန္တလေးအိုးဘိုအကျဉ်းထောင်အတွင်း သီးသန့်အဆောင်တွင် ထိန်းသိမ်းခံထားရသည်ဟု သိရသည်။

စူးရှရှင်းသန့် ဖမ်းဆီးထောင်ချခံရမှုအတွက် အမျိုးသားညီညွတ်ရေးအစိုးရ NUG ၏ လူ့အခွင့်အရေးဆိုင်ရာ ဝန်ကြီး ဦးအောင်မျိုးမင်းက ဆုံးရှုံးနစ်နာမှုတစ်ရပ်ဖြစ်ပြီး တရားမျှတမှု ဖော်ဆောင်သွားမည်ဟု ဆိုသည်။

“LGBTတို့ရဲ့ အရိပ်သင်္ကေတကို ဖော်ဆောင်ပြီး တက်ကြွစွာ ကြိုးပမ်းခဲ့သူတစ်ဦးဖြစ်တယ်။ စူးရှရှင်းသန့် အပါအဝင် အခုလိုမျိုး မတရား ဖမ်းဆီးနှိပ်စက်ခံရပြီး ထောင်ချခံရသူတို့အတွက် တရားမျှတမှုကို ဖော်ဆောင်သွားမှာပါ” ဟု ဦးအောင်မျိုးမင်းက ယနေ့ (ဒီဇင်ဘာ၁၃) တွင် ပြောဆိုသည်။

လိင်ပြောင်းအမျိုးသမီးတစ်ဦးဖြစ်သူ စူးရှရှင်းသန့်သည် မန္တလေးမြို့တွင် ပရဟိတအလုပ်ဖြင့် လူသိများလာခဲ့ပြီး မြို့နေလူထုအကြား ထင်ရှားသူဖြစ်သည်ဟု သိရသည်။ လူ့အခွင့်အရေး၊ LGBT အရေး၊ ကလေးသူငယ်အခွင့်အရေးတို့ကို အစဉ်တစိုက် ဆောင်ရွက်နေသူဖြစ်ပြီး အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက်တွင် မန္တလေးတိုင်း လူငယ်ရေးရာကော်မတီဥက္ကဋ္ဌအဖြစ် လုပ်ကိုင်ခဲ့သူဖြစ်သည်။

“နောင်တချိန်မှာ ပြန်တွေ့ခွင့်ရမယ်ဆိုတဲ့စိတ်နဲ့ ဖြေနေရတယ်. မတရားတာတော့ မတရားဘူးပေါ့နော်။ ဒါပေမဲ့ မတရားမှုတွေကြားမှာ အသက်မသေသေးဘူးဆိုပြီးတော့ နေရတယ်။ ဖြစ်နိုင်မယ်ဆိုရင် အမြန်ဆုံးပဲ လွတ်မြောက်စေချင်ပါတယ်” ဟု စူးရှရှင်းသန့်နှင့် ရင်းနှီးသူ LGBT တစ်ဦးက ပြောသည်။