လက်ဖက်ရည်ဆိုင်တွင် စစ်တုရင်ကစားနေသည့် ယာတော်အုပ်ချုပ်ရေးမှူး ပစ်သတ်ခံရ
ဧရာ၀တီတိုင်းမ်
ဖေဖော်ဝါရီလ ၁၃ ရက်
မန္တလေးတိုင်း၊ ပြည်ကြီးတံခွန်မြို့နယ်၊ ယာတော်ရပ်ကွက်ရှိ လက်ဖက်ရည်ဆိုင် တစ်ဆိုင်တွင် ယမန်နေ့ ဖေဖော်ဝါရီ ၁၂ ရက်နေ့ မွန်းလွဲပိုင်းအချိန်က ပစ်ခတ်မှုတစ်ခု ဖြစ်ပွားခဲ့ကြောင်း ဒေသခံများထံက သိရသည်။
ယမန်နေ့ မွန်းလွဲ ၂ နာရီခန့်က ယာတော်ရပ်ကွက်အုပ်ချုပ်ရေးမှူးသည် ရွာမလမ်းအတွင်းရှိ လက်ဖက်ရည်ဆိုင်၌ စစ်တုရင်ကစားနေစဉ် သေနတ်ဖြင့်လာရောက်ပစ်ခတ် သွားခြင်းဖြစ်ကြောင်း သိရသည်။
"သူက လက်ဖက်ရည်ဆိုင်မှာ စစ်တုရင်ထိုင်ကစားနေတာ။ ကစားနေတုန်း သေနတ်နဲ့ လာပစ်သွားတာ"ဟု အဆိုပါ ရပ်ကွက်တွင်နေထိုင်သူ အမျိုးသားတစ်ဦးက ဧရာ၀တီတိုင်းမ် ကိုပြောသည်။
ပစ်ခတ်ခံရသည့် ယာတော်အုပ်ချုပ်ရေးမှူးမှာ အသက် (၅၅) နှစ်အရွယ် ဦးရဲမြင့်ဖြစ်ပြီး ၎င်း၏ ယောက်ဖနှင့် စစ်တုရင်ကစားနေစဉ် အမည်မသိအမျိုးသား ၂ ဦးမှ လာရောက်ပစ်ခတ်ခဲ့ခြင်းဖြစ်သည်။
ပစ်ခတ်ခံရမှူကြောင့် အုပ်ချုပ်ရေးမှူး ဦးရဲမြင့်တွင် ယာနားထင်ဖောက်၀င်ပြီး ဝဲပါးမေးရိုး အပေါ်သို့ ဖောက်ထွက်ဒဏ်ရာရရှိခဲ့ကြောင်း ရဲတပ်ဖွဲ့နှင့် နီးစပ်သူတစ်ဦးက အတည်ပြုပြောဲကားသည်။
ယင်းပစ်ခတ်မှုနှင့် ပတ်သက်၍ မည်သည့်အဖွဲ့မှ ပြုလုပ်ခဲ့ခြင်းဖြစ်သည်ကို တစ်စုံတရာ ထုတ်ပြန်ထားခြင်းမရှိပေ။
မန္တလေးတိုင်းအတွင်းရှိ စစ်တပ်ဒေါက်တိုင်များဖြစ်သည့် ရပ်ကွက်အုပ်ချုပ်ရေးမှူးများနှင့် အုပ်ချုပ်ရေး အဖွဲ့၀င်များကို နုတ်ထွက်ရန် အကြိမ်ကြိမ်သတိပေးစာများ ထုတ်ပြန် ထားသော်လည်း နုတ်ထွက်ခြင်းမရှိ၍ ရှင်းလင်းခဲ့ခြင်းဖြစ်ကြောင်း သိရသည်။
#မန္တလေးတိုင်း #ယာတော်ရပ်ကွက် #အုပ်ချုပ်ရေးမှူး #ပစ်သတ်ခံရ #Ayeyarwaddy_Times
Comments