မန္တလေးတွင် အဖမ်းခံရသည့် ခေါက်ဆွဲဆိုင်ပိုင်ရှင်မှာ ၃ နာရီအတွင်း သေဆုံး

 မန္တလေးမှ ရာအိမ်မှူးကို ပစ်ခတ်မှု၊ အရပ်သားကို ဖမ်းဆီးမှုများတွင် ၂ ဦး သေဆုံး  

လက်နက်ကိုင် ရာအိမ်မှူး ပစ်သတ်ခံရပြီးနောက် အရပ်သားတချို့ ဖမ်းဆီးခံရသည့် မန္တလေးတွင် အဖမ်းခံရသည့် ခေါက်ဆွဲဆိုင်ပိုင်ရှင်မှာ ၃ နာရီအတွင်း သေဆုံးသွားသည်။

မြတ်သွယ်
Published on Feb 20, 2023 Myanmar Now

မန္တလေးမြို့တွင် ရာအိမ်မှူးတစ်ဦး ပစ်သတ်ခံရပြီးနောက် အဖမ်းခံရသည့် အရပ်သား ၄ ဦးထဲမှ အသက် ၄၀ ဝန်းကျင် အမျိုးသားမှာ စစ်ကြောရေးတွင် သေဆုံးခဲ့သည်ဟု မန္တလေးဒေသခံများထံမှ သိရသည်။

ပစ်ခတ်မှုနှင့် ထိုအဖမ်းအဆီးများ ဆက်စပ်မှု ရှိမရှိ မသိရသေးပေ။

ဖေဖော်ဝါရီ ၁၇ ညနေ ၅ နာရီခန့်က ၇၉ လမ်းနှင့် ၄၆ လမ်းထောင့်၊ ဘုရားကြီးအရှေ့ဘက်မုခ်အနီး စစ်ကောင်စီက သေနတ်ထုတ်ပေးထားသော မဟာအောင်မြေမြို့နယ် ရွှေဘုန်းရှိန်ရပ်ကွက်၏ ရာအိမ်မှူး အသက် ၄၀ ဝန်းကျင်အရွယ် ဦးဇော်ဝင်းထွန်း ပစ်သတ်ခံရသည်။ 

“ကြားရတာတော့ သူက ဆိုင်ကယ်စီးလာတာ။ လမ်းပေါ်မှာပဲ ဆိုင်ကယ်နဲ့ပဲ လူတစ်စုက လိုက်ပစ်သွားတယ် ပြောတယ်။ ပွဲချင်းပြီး ဆုံးတယ်။ ပြီးတော့ မကြာခင် လူနာတင်ယာဉ်နဲ့ ရဲတွေ ရောက်လာပြီး အလောင်းကို တင်သွားတယ်” ဟု ‌၄၂ လမ်းအနီး နေထိုင်သူ အမျိုးသားတစ်ဦးက ဆိုသည်။

ပစ်သတ်ခံရသူသည် ယခင်က ဆယ်အိမ်မှူးဖြစ်ပြီး မကြာသေးမီက ရာအိမ်မှူးအဖြစ် ရာထူးတိုးသွားကာ ၎င်းကို သေနတ်ထုတ်ပေးထားကြောင်း ယင်းအမျိုးသားက ဆက်ပြောသည်။

ဦးဇော်ဝင်းထွန်းကို အောင်စည်တော်ဟု အမည်ပေးထားသည့် စစ်ဆင်ရေးအဖြစ် ပစ်ခတ်ရှင်းလင်းခဲ့ခြင်း ဖြစ်သည်ဟု မန္တလေးမြို့ပြပြောက်ကျားအဖွဲ့များ စုပေါင်းဖွဲ့စည်းထားသည့် AST-MDY က ယင်းညမှာပင် ကြေညာသည်။

ရာအိမ်မှူး ဦးဇော်ဝင်းထွန်းကို သေနတ်ဖြင့် နှစ်ချက်ပစ်ခတ်ခဲ့ပြီး ၎င်းထံမှ လက်လုပ် (ပွိုင့်၂၂) သေနတ်၊ ကျည် ၁၅ တောင့်၊ ဖုန်းတစ်လုံး၊ ကျပ် ၃၂၈၀၀၀ တို့ကို သိမ်းဆည်းခဲ့ကြောင်း ထိုအဖွဲ့က ဆိုသည်။

အဆိုပါအဖွဲ့သည် ဇန်နဝါရီ ၂၇ တွင် လှုပ်ရှားမှုသတင်းများ တင်ရန် တယ်လီဂရမ်စာမျက်နှာဖွင့်ပြီး တစ်လမပြည့်မီ အုပ်ချုပ်ရေးမှူး၂ ဦး၊ ရာအိမ်မှူး ၁ ဦး၊ စစ်ကောင်စီသတင်းပေးဟု ယူဆရသူ ၁ ဦးတို့ကို သတ်ဖြတ်ခဲ့သည်။

ထို့ပြင် ရပ်ကွက်အုပ်ချုပ်ရေးရုံးတစ်ရုံး၊ မီတာရုံးတစ်ရုံး၊ စစ်ကောင်စီကင်းတဲတစ်ခု၊ ရဲစခန်းတစ်ခုတို့ကိုလည်း ဗုံးပစ်တိုက်ခိုက်ခဲ့ပြီး အဆိုပါအဖြစ်အပျက်များကို ရုပ်သံမှတ်တမ်းများဖြင့် ၎င်းတို့၏ တယ်လီဂရမ်ချန်နယ်တွင် ဖော်ပြထားသည်ကို တွေ့ရသည်။

၄ ဦး ဖမ်းဆီးခံရ

ရာအိမ်မှူး ပစ်သတ်ခံရပြီး နောက်တစ်နေ့ (ဖေဖော်ဝါရီ ၁၈) နံနက်တွင် ၇၈ လမ်း၊ ၄၆ လမ်းအနီး နေအိမ်တစ်ခုသို့ စစ်ကောင်စီလက်နက်ကိုင်တချို့ အရပ်ဘက်သုံးမော်တော်ယာဉ်ဖြင့် ရောက်လာပြီး သက်လတ်ပိုင်းအရွယ် အမျိုးသမီးနှစ်ဦးကို ဖမ်းဆီးကာ ပစ္စည်းတချို့ကို သိမ်းယူသွားကြောင်း၊ အဆိုပါအမျိုးသမီးနှစ်ဦးကို လူမြင်ကွင်းတွင် ပါးရိုက်ကြသလို မျက်နှာကိုလည်း လက်သီးဖြင့် ထိုးကြကြောင်း ထိုရပ်ကွက်တွင် နေထိုင်သူများက ဆိုသည်။

ဖေဖော်ဝါရီ ၁၉ ညနေ ၆ နာရီခန့်တွင် ၄၄ လမ်း (၈၁ လမ်းနှင့် ၈၂လမ်းကြား) ရှိ ရှမ်းခေါက်ဆွဲဆိုင်တစ်ဆိုင်သို့ စစ်ကောင်စီလက်နက်ကိုင်တို့က အရပ်ဘက်သုံးကားများဖြင့် ရောက်သွားပြီး ဆိုင်ပိုင်ရှင် အသက် ၄၀ အရွယ် ဦးအောင်ဆိုသူကို ဖမ်းသွားသည်၊ ယင်းည ၉ နာရီတွင် အလောင်း လာရောက်ထုတ်ယူရန် မိသားစုထံ အကြောင်းကြားခဲ့သည်ဟု ထိုရပ်ကွက်တွင် နေထိုင်သူ အမျိုးသမီးတစ်ဦးက ပြောသည်။

ဦးအောင်သည် အမျိုးသားဒီမိုကရေစီအဖွဲ့ချုပ် (NLD) ပါတီကို အမာခံ ထောက်ခံအားပေးသူဖြစ်ပြီး လတ်တလော လက်နက်ကိုင်တော်လှန်ရေးအတွက် ထောက်ပံ့သူဟု စွပ်စွဲကာ ဖမ်းဆီးခဲ့ခြင်း ဖြစ်ကြောင်း အထက်ပါအမျိုးသမီးက ဆိုသည်။

“အလောင်းက မိသားစုကို လာထုတ်ခိုင်းတာ။ ဘာဒဏ်ရာတွေနဲ့ သေဆုံးသလဲတော့ အသေးစိတ် သွားမမေးရဲဘူး။ သင်္ဂြိုဟ်ပြီးပြီလို့ ကြားတယ်” ဟု သူက ဆိုသည်။

“သူ့ကို အရင်ကလည်း သတင်းထွက်တော့ လိုက်ဖမ်းဖူးတယ် ကြားတယ်။ အဲဒီတုန်းကတော့ ရှောင်ပြေးနိုင်ခဲ့တယ်”

ယနေ့ (ဖေဖော်ဝါရီ ၂၀) နံနက်တွင် မန္တလေး၊ ပြည်ကြီးတံခွန်မြို့နယ် စက်မှု (၁) ရပ်ကွက်ရှိ ဘီယာဆိုင်တစ်ဆိုင်မှ အသက် ၁၈ နှစ်အရွယ် မစိုးမြတ်နွယ် (ခေါ်) ထွေးထွေးဆိုသူ အမျိုးသမီးတစ်ဦး ဖမ်းဆီးခံရသည်။

TikTok တွင် သူ၏ ဝေဖန်ပြောဆိုထားမှုများနှင့် ပတ်သက်ပြီး ဖမ်းဆီးခံရခြင်းဖြစ်နိုင်သည်ဟု ယူဆနေသည်။

စစ်တပ်ကောင်းကြောင်း ရေးသားလေ့ရှိသည့် တယ်လီဂရမ်ချန်နယ်များက ထိုမိန်းကလေး၏ TikTok ဗီဒီယိုများကို ဖော်ပြကာ ဖမ်းဆီးရန် လှုံ့ဆော်ထားသည်ကို တွေ့ရသည်။

စစ်ကောင်စီသည် နိုင်ငံအနှံ့တွင် ၎င်းတို့ကို ဆန့်ကျင်သူ မည်သူ့ကိုမဆို ဖမ်းဆီး၍ ပုဒ်မများတပ်ကာ အကျဉ်းချထားသည်။

မန္တလေးမြို့၌ ပြီးခဲ့သည့်လများအတွင်း မြို့ပြပြောက်ကျားတပ်ဖွဲ့ဝင်များ၊ ဆန္ဒပြသူများ၊ ဆရာဝန်များ၊ ရှေ့နေများအပါအဝင် ဒေသခံ ၁၀၀ ကျော် ဖမ်းဆီးခံထားရသည်။

စစ်ကောင်စီတပ်ဖွဲ့ဝင်များကို မန္တလေးမြို့ပေါ်တွင် ၂၀၂၁ ဖေဖော်ဝါရီအတွင်းက တွေ့ရစဉ်။ (ဓာတ်ပုံ -မိုးဦး/Myanmar Now)