တနင်္သာရီမြို့နယ်တွင် တိုက်ပွဲမရှိဘဲ စစ်ကောင်စီက ကျေးရွာနှစ်ရွာကို လေကြောင်းတိုက်ခိုက်

ကျော်ဇော/People's Spring

တနင်္သာရီမြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က ကျေးရွာနှစ်ရွာကို လေကြောင်းမှ ပစ်ခတ်ခဲ့ကြောင်း မြိတ်ခရိုင် ပြည်သူ့ကာကွယ်ရေးပူးပေါင်းစစ်ကြောင်း (၂)မှ တာဝန်ရှိသူတစ်ဦးက လူထုနွေဦးသို့ ပြောသည်။

ယနေ့(ဇွန်လ ၁၃)မွန်းလွဲ ၃နာရီခန့်က တနင်္သာရီမြို့နယ်၊ တကူတိုက်နယ်ရှိ ခြောက်အိမ်စုရွာ၊နှင့် ပြည်အေးရွာတို့မှ စာသင်ကျောင်းအနီးနှင့် မီးသတ်ရုံးနေရာအပါအဝင် သုံးနေရာကို ဗုံးသီး ၁၈ လုံးကြဲချ ပစ်ခတ်ခဲ့ခြင်း ဖြစ်သည်။

"ဘာတိုက်ပွဲမှ မရှိပါဘူး။ အကြောင်းမဲ့ လာရောက်ပစ်ခတ်သွားတာပါ"ဟု မြိတ်ခရိုင်ပြည်သူ့ကာကွယ်ရေးပူးပေါင်းစစ်ကြောင်း (၂)မှတာဝန်ရှိသူက ပြောသည်။

စစ်ကောင်စီက စာသင်ကျောင်းအနီးနှင့် စစ်ရေးပစ်မှတ်မဟုတ်သော ပြည်သူများနေထိုင်ရာ နေအိမ်များကို ပစ်မှတ်ထား၍ Mi-2 ရဟတ်ယာဉ်ဖြင့် လာရောက်ပစ်ခတ်ခြင်းဖြစ်ပြီး ပစ်ခတ်မှုကြောင့် အဆောက်အအုံအချို့ထိခိုက်ပျက်စီးကာ အမျိုးသားတစ်ဦး ထိခိုက်ဒဏ်ရာရခဲ့ကြောင်း ၎င်းက ဆက်ပြောသည်။

လေကြောင်းမှ ပစ်ခတ်ခံရသော ကျေးရွာများသည် ပြည်သူ့ကာကွယ်ရေးတပ်မတော်(PDF) ထိန်းချုပ်နယ်မြေအတွင်းပါဝင်ပြီး အမျိုးသားညီညွတ်ရေးအစိုးရ(NUG)မှ ဖွင့်လှစ်ထားသော စာသင်ကျောင်းများနှင့် ဆေးခန်းများရှိကြောင်း ပူးပေါင်းစစ်ကြောင်း(၂)ထံမှ သိရသည်။

"PDF ထိန်းချုပ်နယ်မြေပါ။ အပြည့်အဝတော့မဟုတ်သေးဘူးပေါ့။ NUG အစိုးရရဲ့ ကျောင်းတွေ၊ ဆေးခန်းတွေ ဖွင့်ထားတယ်။ ပြည်သူ့အုပ်ချုပ်ရေးနဲ့ လုုခြုံရေးအဖွဲ့တွေလည်း ဖွဲ့ထားပြီဖြစ်ပါတယ်"ဟု တကူတိုက်နယ်အတွင်း နယ်မြေစိုးမိုးမှုအခြေအနေကို စစ်ကြောင်း(၂)မှ တာဝန်ရှိသူက ရှင်းပြသည်။

လက်ရှိအခြေအနေတွင် စစ်ကောင်စီနှင့် ၎င်း၏လက်အောက်ခံ လက်နက်ကိုင်အဖွဲ့များက ပြည်သူများအား ပစ်မှတ်ထားတိုက်ခိုက်လျှက်ရှိရာ မိဘပြည်သူများအနေဖြင့် သတိထားသွားလာနေထိုင်ကြရန် တော်လှန်ရေးတပ်ဖွဲ့များက အသိပေးထားသည်။

(လေကြောင်းမှပစ်ခတ်ရာတွင် စစ်ကောင်စီတပ်အသုံးပြုသော ဗုံးသီးနှင့် ထိခိုက်ပျက်စီးသွားသော အဆောင်အအုံအချို့ကို တွေ့ရစဥ်။ 

ဓာတ်ပုံ - ပေးပို့)