လားရှိုးဝန်းကျင် မြို့အဝင်လမ်းတွေ ဖြတ်တောက်ထားလို့ ခရီးသွား ကား၊ ပြည်သူတွေ အခက်ကြုံ

ဇွန် ၁၄-၆ ၂၀၂၄

Shy V (VOM)

ရှမ်းပြည်နယ်မြောက်ပိုင်း၊ လားရှိုးမြို့ ပတ်ပတ်လည် မြို့ အဝင်လမ်းတွေ  ဇွန်လ ၁၂ ရက်နေ့ ညနေ ၄ နာရီခန့်ကစ ဖြတ်တောက်ထားလို့ လားရှိုးကိုလာတဲ့ ခရီးသွား ကား၊ ပြည်သူတွေ ခက်ခဲ ဒုက္ခရောက်ကြောင်း ခရီးသွားတွေဆီက သိရပါတယ်။ 

"တနေကုန် လမ်းလိုက်ရှာတာ မိုင်းယော်ကနေ ဆင်းလာတဲ့ လမ်းလည်း မြေကော် စက်နဲ့ တူးပြီး လမ်းဖြတ်လိုက်ပြီ။ နမ္မတူ လမ်းဘက်လည်း ဖြတ်လိုက်ပြီလို့ ပြောတယ်။ အီနိုင်းလမ်းလည်း သွားလို့ မရဘူး။ ဟိုပိတ် ဘက်လည်း လမ်းပိတ်လိုက်ပြီ။ နမ့်ပေါင်လမ်းလည်း ပိတ်လိုက်ပြီ" လို့ ယာဉ်မောင်း တယောက်က ပြောပါတယ်။ 

တောင်ပေါ်လမ်း၊ ရွာလမ်းတွေကနေ လမ်းတွေမှာ ပိတ်မိနေတာကြောင့် ခရီးသွား ပြည်သူတွေနဲ့ ကားသမားတွေ နောက်ကြောင်း ပြန်လှည့်ဖို့လည်း ကား ဆီကုန်တဲ့ သူကုန် ဖြစ်နေကြတယ်လို့ သူက ပြောပါတယ်။ 

ပိတ်မိသောင်တင်နေတဲ့ သူတွေကလည်း ယမန်နေ့ ဇွန်လ ၁၂ ရက်နေ့က မိုးကြီး ရေလျှံလို့ မိုင်းလီလမ်းမှာ ပိတ်မိသောင်တင်နေတဲ့ ကားတွေနဲ့ ခရီးသွားတွေ ဖြစ်တယ်လို့ ခရီးသွားပြည်သူ တယောက်က ပြောပါတယ်။ 

"မူဆယ်ဘက်နေ အဆင်းကျရင် လားရှိုး မြို့ အဝင် ၆၈ ဂိတ်ကို မနေ့ညနေ ၄ နာရီလောက် က ပိတ်လိုက်ပါတယ်။ ဈေးသည်တွေကိုတော့ ပစ်ခတ်သံကြားရင် ဈေးရောင်း မသွားကြဖို့ မှာလိုက်တယ်ပြောတယ်။ မနေ့ နေ့လယ်က သိန္နီ - မိုင်းလီ - လားရှိုးလမ်းက မိုးသည်းရေကြီး လို့ လမ်းရေကျော်ပြီး အတက်အဆင်း ကားတွေ ပိတ်မိနေတာ။" လို့ သူက ပြောပါတယ်။ 

ဒါအပြင် နမ္မတူနဲ့ သီပေါလမ်းမကြီးပေါ်  သီပေါကြားမှာလည်း စစ်တပ်ဘက်က မြေကော် စက်နဲ့ လမ်းဖျက်လိုက်တယ်လို့ သီပေါ ဒေသခံ တယောက်က ပြောပြပါတယ်။ 

လားရှိုးမြို့ပြင်ဝန်းကျင်ဘက်မှာလည်း စစ်တပ်က လုံခြုံရေးတွေ တင်းကြပ်ထားတယ်လို့ ယာဉ်မောင်း တယောက်က ပြောပါတယ်။ 

"အရမ်းရှုပ်နေတယ်။ ဆီဆိုင်တောင် ခုညနေ ၅ ခွဲပိတ်ခိုင်းနေတာ။ တလမ်းလုံး စစ်သားတွေချည်းပဲ။" လို့ သူက ပြောပါတယ်။

လားရှိုးမြို့ဘက် ပြီးခဲ့တဲ့ ရက်ပိုင်းတွေက စစ်တပ်ဘက် UWSA, MNDAA တွေ စစ်ကြောင်းထိုး အင်အားဖြည့်လာသလို သီပေါဘက်မှာလည်း MNDAA နဲ့ TNLA တွေ အင်အားဖြည့် စစ်ကြောင်းထိုးလာတယ်လို့ ကြားရတဲ့နောက် လားရှိုးမြို့ ပတ်ပတ်လည် လမ်းတွေ ဖြတ်တောက်လိုက်ကြောင်း ဒေသခံတွေဆီက သိရပါတယ်။ 

Photo Crd# ခရီးသွားပြည်သူများ