မန္တလေး စျေးချိုအနီး စစ်အုပ်စု အရာရှိရဲ့ တူမ ကားတိုက်သေပြီးနောက် စျေးသည်တွေ ရိုက်နှက်ခံရ၊

စစ်အုပ်စုက မနက်မိုးမလင်းခင် ​စျေးချိုအနီးက စျေးသည်တွေကို လာရောက်ရိုက်နှက်လို့ ဝရုန်းသုန်းကား ထွက်ပြေးရ၊

AN/MFP ၊ ဇွန်-၁၃

မန္တလေးမြို့၊ ချမ်းအေးသာစံမြို့နယ်၊ စျေးချိုတော် အနီး (၈၄)လမ်း၊ (၂၆)လမ်းနဲ့ (၂၈)လမ်းကြားမှာ ယမန်နေ့က စစ်အုပ်စု အရာရှိ တစ်ဦးရဲ့ တူမဆိုသူ ကားတိုက် သေပြီးနောက် ဒီမနက်ပိုင်း စစ်အုပ်စုက အဲ့ဒီ ယာဉ်တိုက်မှု ဖြစ်ပွားရာ အနီးက စျေးသည်တွေကို လာရောက် ရန်ပြု ရိုက်နှက်တယ်လို့ မြို့ခံတွေက MFP ကို ပြောပါတယ်။

အာဏာသိမ်း စစ်အုပ်စု သစ္စာခံ အရာရှိရဲ့ တူမဟာ ဇွန်(၁၂)ရက် မနေ့ကက စျေးချိုတော် အနောက်ဘက်က စျေးမှာ ကားတိုက်ခံရကာ သေဆုံးခဲ့ပြီး တိုက်တဲ့ကားဟာ ပန်းတွေ တင်ဆောင်လာတဲ့ ကားဖြစ်တယ်လို့ အရပ်စကား ပြန့်နှံ့ ခဲ့ပြီးနောက် စစ်အုပ်စုက ပန်းသည်တွေကို အငြိုးထားကာ အထက်ပါအတိုင်း စျေးသည်တွေကို လာရောက် ရိုက်နှက်တာလို့ ဆိုပါတယ်။

ဇွန်(၁၃)ရက် ဒီမနက်(၃)နာရီကျော်အချိန် စျေးချိုတော်အနီးက ပန်းသည်တွေ စျေးရောင်းရာ နေရာကို စစ်အုပ်စု ရောက်လာပြီး စျေးသည်တွေကို အော်ဟစ်ဆဲဆို ရန်ပြု ရိုက်နှက်တာ၊ စျေးပစ္စည်းတွေကို ရိုက်ခွဲဖျက်ဆီးတာ၊ ဆွဲရမ်း လွင့်ပစ်ပြီး ထင်တိုင်းကျဲ သောင်းကျန်း ဖျက်ဆီးတယ်လို့ ဆိုပါတယ်။

"ရိုက်တာရိုက်တာ။ ပန်းသည်တွေချည်းကို ရွေးရိုက်တာ။ ပစ္စည်းတွေလည်း ဆွဲလွင့်ပစ်တယ်။ ပန်းသည်အကုန်လုံး အရိုက်ခံရတယ်။ တခြားစျေးသည်တွေလည်း အကုန်ထွက်ပြေးကြတာ။ ထွက်ပြေးတဲ့သူတွေကို ကားတွေနဲ့ ပိတ်ပြီးကို လိုက်ရိုက်ကြတာ" လို့ မြင်တွေ့သူတစ်ဦးက ပြောပါတယ်။

နံပတ်တုတ်တွေနဲ့ ရောက်လာတဲ့ ရဲတွေက စျေးသည်တွေကို ရုတ်တရက် ဝင်ရောက် ရိုက်နှက်လို့ ဝရုန်းသုန်းကား ထွက်ပြေး ခဲ့ရတယ်လို့ ကိုယ်တိုင်ကြုံရသူက ပြောပါတယ်။

"ဘာဖြစ်လို့ လိုက်ရိုက်လဲ ဆိုတာ ဘယ်သူမှ မသိဘူး။ အကုန် ကြောက်လန့်တကြား ထွက်ပြေးရတာ" 

ဒီယာဥ်တိုက်မှု ဖြစ်ထားမှန်းကိုပင် မသိတဲ့ စျေးသည်တွေပါ အားလုံး အရိုက်ခံရတာ ဖြစ်ပြီး လာရောက် ရိုက်နှက် သူတွေဟာလည်း ဘာကြောင့် ရိုက်တယ်ဆိုတာကို မပြောဘဲ မြင်သမျှကို ရိုက်နှက်ခဲ့တာလို့ ဆိုပါတယ်။

ယာဥ်တိုက်မှုကြောင့် သေဆုံးသူဟာ အရာရှိတစ်ဦးရဲ့ တူမလို့သာ သိရပြီး ဘယ်ဌာနကလဲ ဆိုတာတော့ MFP အနေနဲ့ အတိအကျ မသိရပါဘူး။

ဒီမနက် စျေးသည်တွေကို အကြောင်းမဲ့ ရန်ပြု ရိုက်နှက်ပြီး သောင်းကျန်းသူတွေဟာ ရဲနဲ့ ပြည်သူ့စစ် ယူနီဖောင်းဝတ် ပျူတွေ ဖြစ်တယ်လို့ ဆိုပါတယ်။

အာဏာသိမ်း စစ်အုပ်စုဟာ မန္တလေးမြို့အနှံ့ လမ်းတွေ၊ ရပ်ကွက်တွေကို ပိတ်ဆို့ပြီး လက်နက်ပြ မိုက်ကြေးခွဲ ဖမ်းဆီး ငွေညှစ်တာ၊ ပစ်ခတ်သတ်ဖြတ်တာတွေလည်း မကြာခဏ ကျူးလွန်နေတာ ဖြစ်ပါတယ်။

#Mandalay_Free_Press_MFP