အကြမ်းဖက် မြန်မာစစ်ကောင်စီကို ကုလသမဂ္ဂလုံခြုံရေးကောင်စီကချက်ချင်းအရေးယူရေးအရပ်ဘက်အဖွဲ့ ၅၂၁ ခု တောင်းဆို

ရန်ကုန်၊ နိုဝင်ဘာ ၅ 

မြန်မာနိုင်ငံတွင် ပြည်သူများအပေါ် ရက်စက်ကြမ်းကြုတ်သည့် အကြမ်းဖက်စစ်ကောင်စီကို ကုလသမဂ္ဂလုံခြုံရေးကောင်စီက အရေးယူရန် အရပ်ဘက်အဖွဲ့ ၅၂၁ ခုက တောင်းဆိုလိုက်သည်။ 

ချင်းပြည်နယ်တွင် ထန်တလန်မြို့ အပါအဝင် နိုင်ငံတစ်ဝန်း ဖိနှိပ် သတ်ဖြတ် ဖျက်ဆီးမှုများ လုပ်ဆောင်နေသော မြန်မာစစ်ကောင်စီ အကြမ်းဖက်မှု ကို အဆုံး သတ်ရန် ကုလသမဂ္ဂ လုံခြုံရေးကောင်စီက ချက်ချင်း အရေးယူရန် တောင်းဆိုလိုက်ကြခြင်းဖြစ်သည်။ 

ချင်းပြည်နယ်တွင် ဖြစ်ပွားနေသော စစ်ကောင်စီ၏ အကြမ်းဖက် တိုက်ခိုက်မှုများ ပြင်းထန်လာခြင်းနှင့် ပတ်သက်၍ အရှိန်အဟုန်ဖြင့် အစည်းအဝေးတစ်ရပ်ကို ခေါ်ယူကျင်းပရန်နှင့် မြန်မာနိုင်ငံတွင် လျင်မြန်စွာ ဆိုးရွားလာနေသော လူ သားချင်းစာနာထောက်ထားမှု၊ လူ့အခွင့်အရေးနှင့် နိုင်ငံရေး အကျပ်အတည်းများကို ကိုင်တွယ်ဖြေရှင်းရန် အရပ်ဘက်အဖွဲ့အစည်းများက ကုလသမဂ္ဂကို တောင်းဆိုကြသည်။ 

ကုလသမဂ္ဂ လုံခြုံရေးကောင်စီအနေဖြင့်  မြန်မာစစ်တပ်ကို လက်နက်ရောင်းချပိတ်ပင်ရေး ချမှတ်ရန် တောင်းဆိုလိုက်ပြီး စစ်တပ်သည် နိုဝင်ဘာလ ၃ ရက်နေ့အထိ လူပေါင်း ၁၂၃၆ ဦးကို သတ်ဖြတ်ခဲ့ကာ ပြည်သူ ၉၆၆၇  ဦး မတရား ဖမ်းဆီးထိန်းသိမ်းထားသည်ဟု အရပ်ဘက်အဖွဲ့များက ပြောသည်။ 

အကြမ်းဖက်စစ်ကောင်စီသည် ချင်းပြည်နယ်၊ စစ်ကိုင်းတိုင်းနှင့် မကွေးတိုင်း ဒေသကြီးများတွင် အကြမ်းဖက် တိုက်ခိုက်မှုများကို ဆက်လက်လုပ်ဆောင်နေပြီး၊ ကရင်နီ၊ ကရင်နှင့် ရှမ်း ပြည်နယ်တွင်လည်း ဒေသခံ တိုင်းရင်းသားများကို တိုက်ခိုက်မှုများ လုပ်ဆောင်လျက်ရှိသည်။ 

မြန်မာစစ်တပ်သည် ချင်းပြည်နယ် အနောက်ပိုင်း ထန်တလန်မြို့တွင် အောက် တိုဘာ ၂၉ ရက်နေ့တွင်  နေအိမ် ၂၀၀ ကျော်နှင့် ဘုရားကျောင်း ၂ ခု ရည်ရွယ် ချက်ရှိရှိ မီးရှို့ဖျက်ဆီးခဲ့သည်။ 

ချင်းပြည်နယ်ရှိ ရုံးခွဲ မီးရှို့ဖျက်ဆီးခံခဲ့ရသော Save the Children က မကြာသေးမီက ဖြစ်ပွားခဲ့သော တိုက်ခိုက်မှုများကို ပြင်းထန်စွာ ရှုတ်ချခဲ့ပြီး အကြမ်း ဖက်မှု အများအပြား ဆက်လက်ဖြစ်ပွားနေကြောင်း သတိပေးပြောဆိုသည်။ 

နိုင်ငံတစ်ဝှမ်းရှိ ကလေးများ အပါအဝင် အရပ်သားများနှင့် လူသားချင်းစာနာထောက်ထားမှုဆိုင်ရာ အဖွဲ့အစည်းများအပေါ် တိုက်ခိုက်မှုများသည် နိုင်ငံ တကာဥပဒေကို ချိုးဖောက်ပြီး စစ်ရာဇဝတ်မှုများဖြစ်ကြောင်း၊ တိုက်ခိုက်ရေး ဂျက်လေယာဉ်များနှင့် လက်နက်ကြီးများ အသုံးပြုခြင်း အပါအဝင် စစ်တပ်၏ ပြင်းထန်သော တိုက်ခိုက်မှုများနှင့် ရင်ဆိုင်ခဲ့ရပြီး ပြည်သူများ ဒါဇင်နှင့်ချီ၍ သေဆုံးခဲ့ရသည်ဟု အရပ်ဘက်အဖွဲ့များကဆိုကြသည်။ 

မြန်မာစစ်တပ်သည် ယခုနောက်ဆုံး ထန်တလန် တိုက်ခိုက်မှု မတိုင်မီ စက် တင်ဘာလအတွင်းက လက်နက်ကြီးများဖြင့် ပစ်ခတ်မှုများကြောင့် ထန်တလန်မြို့မှ ဒေသခံ ၁၀,၀၀၀ ခန့် ထွက်ပြေး တိမ်းရှောင်ခဲ့ရကြောင်း၊ ထိုအချိန်တွင် မီးငြှိမ်း သတ်ရန် ကြိုးပမ်းနေသော ခရစ်ယာန်သင်းအုပ်ဆရာတစ်ဦးသည် စစ် တပ်၏ သေနတ်ဖြင့် ပစ်သတ်မှုခံခဲ့ရပြီး ၎င်း၏လက်သူကြွယ်အား ရက်စက်စွာဖြတ်တောက်ကာ မင်္ဂလာလက်စွပ်နှင့်အတူ ဖယ်ရှားခဲ့ကြောင်းကိုလည်း ထောက်ပြထားသည်။ 

 မြန်မာနှင့် နိုင်ငံတကာ အဖွဲ့အစည်းများက ကုလသမဂ္ဂ လုံခြုံရေးကောင်စီအနေ ဖြင့် မြန်မာစစ်တပ်ကို အရေးယူဆောင်ရွက်ရန် အကြိမ်ကြိမ် တောင်းဆိုခဲ့ကြသော်လည်း လုံခြုံရေးကောင်စီသည် ထုတ်ပြန်ချက်ထက် ကျော်လွန်၍ ထိရောက်သော အရေးယူဆောင်ရွက်မှု တစ်စုံတစ်ရာ ပြုလုပ်ရန် ပျက်ကွက်နေကြောင်း ထောက်ပြထားသည်။ 

Credit...

ဓာတ်ပုံ- ကုလသမဂ္ဂလုံခြုံရေးကောင်စီ အစည်းအဝေးတစ်ခုကျင်းပနေသည့်မြင်ကွင်း။