ဦးမင်းအောင်လှိုင်ကြီးများ ပါနေမလားလို့ ပုံကို ဖြဲကြည့်ရသေး

အာဆီယံ နိုင်ငံများ မှ သမ္မတများ၊ ဝန်ကြီးချုပ်များသည် ဘဲလ်ဂျီယံ နိုင်ငံ၏ မြို့တော် ဘရပ်ဆဲလ်သို့ အသီးသီး ရောက်ရှိလာကြပြီး မိမိတို့ နိုင်ငံသားများ အတွက် စီးပွားရေး၊ လူမှုရေး အဆင့်အတန်းများ တိုးတက်သည်ထက် တိုးတက်အောင် မြှင့်တင် ပေးနိုင်ရန် အီးယူ နှင့် လွတ်လပ်စွာ ကုန်သွယ်ခွင့် ရရေး အကြိတ်အနယ် ဆွေးနွေးနေ ကြချိန်တွင် မြန်မာပြည်မှ အာဏာသိမ်း ခေါင်းဆောင်သည် မြစ်ကြီးနားတွင် ပြည်သူများ အနေဖြင့် နိုင်ငံ ချစ်စိတ် ဖြင့် စက်ဘီးသာ စီးနင်းကြဖို့ တိုက်တွန်းနေချိန် နှင့် တိုက်ဆိုင်လျှက် ရှိနေသည်။

၎င်းအဖို့က ဥရောပကုန်းမြေကြီးပေါ်သို ခြေချပိုင်ခွင့်ကို မျှော်မှန်း၍ မရသည့်အတူတူ ငါလည်း ငါဖာသာ နေနိုင် သည့် ပုံစံမျိုး ဖြင့် ဝါးလုံးခေါင်းထဲ လသာ ပြရန် ခရီးထွက်နေခြင်း ဖြစ်သည်။

ယခုလို အနေအထားတွင် မည်သည့် နိုင်ငံကမျှ ကျူးကျော်ဖို့ နေနေသာသာ ၎င်းတို့ အပေါ် ဖုတ် လေသည့် ငပိ ရှိလေသည်ဟု မထင်သည်ကို မြေပြင်၊ ဝေဟင်၊ ရေပြင် ရေအောက် စစ်ဆင်နိုင်ရန် အဆင်သင့် ဖြစ်နေပြီဟု အရူးချီးပန်းစကားများကို သူရူးပမာ တောင်စဉ်ရေမရ ပြောဆိုသွားပြန်သည်။

အဆိုပါ စကားများကို စစ်ကောင်စီ လေတပ်၏ ၇၅ နှစ်မြောက် စိန်ရတု နှစ်ပတ်လည် နေ့တွင် မိတ္ထီလာ လေတပ် ဌာနချုပ်၌ ပြောဆိုသွားခြင်း ဖြစ်သည်။ တိုင်းပြည်တွင် လူဦးရေ လေးပုံတပုံ နီးပါးသည် စားရမဲ့ သောက်ရမဲ့ ဖြစ်နေချိန်တွင် ၎င်းဝယ်ယူထားသော တိုက်လေယာဉ် များအား အရှက်ကင်းမဲ့စွာ တပ်တော်ဝင်သည် ဆိုပြီး ပြုလုပ်သွားခဲ့ပြန်သည်။ ၎င်း၏ စကားပင် မဆုံးသေး မင်္ဂလာဒုံ ရှိ အထင်ကရ လေတပ်စခန်းကြီးအား တော်လှန်ရေး တပ်ဖွဲ့များက ရှော့တိုက် ဒုံးဖြင့် ပစ်ခတ်တိုက်ခိုက်ခဲ့ကြ၍ အကျအဆုံး များပြားဖွယ် ရှိသည် ဟူသော သတင်းများ ထွက်ပေါ်လာခဲ့ပြီ ဖြစ်သည်။

ထိုလေယာဉ်များသည် တိုင်းရင်းသား ပြည်သူများအား ဗုံးကြဲသတ်ဖြတ်ရာတွင် အသုံးပြုဖို့ ဖြစ်သည်ကို ထမင်းစား ကြီးသူတိုင်း သိရှိထားပြီးလည်း ဖြစ်သည်။

လူတဦးတယောက်၏ တောင်စဉ်ရေမရ ပါးစပ်ထဲ ရှိရာ ပြောဆိုနေမှုများက ရှိတတ်သည့် သဘာဝ ရှိသော် ငြားလည်း နောက်မှ ခေါင်းတငြိမ့်ငြိမ့်ဖြင့် ထောက်ခံနေသူ တပုံတပင်ကြီး ရှိနေသည့်အဖြစ်သည် လွန်စွာမှ ထူးဆန်း အံ့ဩဖို့ ကောင်းနေရပေသည်။

ထိုသို့သော အတွေးအခေါ်များ ရှိသည့် စစ်တပ် ကြောင့်သာ မက ထိုကဲ့သို့သော ဖေါ်လံဖား များကြောင့် လည်း နိုင်ငံ ကို နာလံမထူအောင် နှစ်ပေါင်းများစွာ ဆွဲချခဲ့ကြပြီး ဖြစ်သည်။

လက်နက်အားကိုး ဖြင့် မတရား အနိုင်ကျင့် နေမှုများကို မည်သူက ကြာရှည် လက်ပိုက်ကြည့် နေနိုင်အံ့ပေ မည် နည်း၊ မတတ်သာ၍ ကြည့်နေရသည် ဆိုစေဦး၊ ၎င်းတို့၏ ကိုယ်ကျင့်တရား အသိဉာဏ် နှင့် ခံယူချက်ကို တကျီကျီ ထိုးနှက်နေသလို သာ ရှိနေပေလိမ့်မည်။ ထို့အတွက် အနှေး နှင့် အမြန် ဆိုသလို နိုင်ငံတကာ က ဝင်ရောက်ပတ်သက်လာကြမည် ဖြစ်သည်။

မင်းအောင်လှိုင်သည် သူ့အတွက် လုပ်နိုင်ခွင့် အချိန်များများစားစား မရတော့မှန်း သိထားသည်။ အချိန်တို အတွင်း နိုင်ငံတည်ငြိမ်မှု ရရန် ကြိုးပမ်းခဲ့သော်လည်း ထင်တိုင်း မပေါက် ဖြစ်လာနေသည်။

၎င်း၏ ကိုးကွယ် ဆည်းကပ်ရာ ရုရှားသည် ယူကရိန်းအား ရက်သတ္တပတ် အနည်းငယ်အတွင်း လွယ်လင့်တကူ သိမ်းယူ နိုင်လိမ့်မည်ဟူသော ထင်တလုံးဖြင့် ဝင်ရောက် ကျူးကျော်ခဲ့ရာ ယခုတော့ ရေရှည် စစ်ပွဲကြီး ဆင်နွှဲ ရတော့မည့် အရေးကြောင့် အခက်ကြုံနေရပြီ ဖြစ်သည်။

ရေနံ နှင့် လက်နက် ရောင်းရငွေများ မှ စစ်စရိတ်များ ကျခံရတော့မည် ဖြစ်သည်။ ယူကရိန်း ၏ စစ်သုံးစရိတ် ကို ချမ်းသာ ကြွယ်ဝသော အမေရိကန် နှင့် ဥရောပ မဟာမိတ်နိုင်ငံများက ဝိုင်းဝန်းထည့်ဝင်ပေးလျှက် ရှိသည်။ ရုရှား အဖို့က တဦးတည်း ဒိုင်ခံ ထုတ်သုံးနေရလေသည်။ ပူတင် တကျပ်သုံးတိုင်း အမေရိကန်က ပြားသုံးဆယ်၊ ပြင်သစ်၊ ဂျာမဏီ၊ အင်္ဂလန်တို့ က ပြား နှစ်ဆယ်စီ ဝိုင်းဝန်းကျခံပေးနေခြင်းလည်း ဖြစ်သည်။

ယခင်က ရုရှားပြည်သူများသည် စစ်သတင်းများကို တီဗီ ထိုင် ကြည့်ပြီး ၎င်းတို့နှင့် မပတ်သက်သရွေ့ ထောက်ခံ ခဲ့ကြသော်လည်း ယခုအခါ ၎င်းတို့ ရင်သွေးများကိုပါ စစ်မြေပြင်သို့ ဆွဲခေါ်ခံနေရသည့် အဖြစ်နှင့် ကြုံလာခဲ့ရပြီ ဖြစ်သည်။ 

ဤအနေအထား များ ကြောင့် ရုရှား ခေါင်းဆောင် ပူတင်သည် မရှုမလှ ဇာတ်သိမ်းဖို့သာ ရှိနေသည်။ ထိုအခါတွင် မြန်မာ စစ်ခေါင်းဆောင်များ၏ အနာဂတ်သည်လည်း ပျောက်ဆုံးသွားပေတော့မည်။

ယခုအခါ BURMA ACT ပါဝင်သည့် ၂၀၂၃ အတွက် ဒေါ်လာ ၈၅၈ ဘီလီယံ သုံးစွဲမည့် အမေရိကန် ကာကွယ်ရေး အသုံးစရိတ် ဥပဒေကို အထက်လွှတ်တော်မှ ထောက်ခံမဲ ၈၃ မဲ၊ ကန့်ကွက်မဲ ၁၁ မဲ ဖြင့် ထပ်မံ အတည်ပြု ပေး လိုက်ပြီ ဖြစ်သည်။ သမ္မတ ဂျိုးဘိုင်ဒင်မှ ခရစ်စမတ် မတိုင်မီ လက်မှတ်ရေးထိုး အတည် ပြုပေးဖွယ် ရှိကြောင်း ခန့်မှန်းထားကြသည်။

ထိုဥပဒေ  တွင် PDF နှင့် CRPH တို့အား နည်းပညာ၊ လက်နက်နှင့် မသက်ဆိုင်သော အကူအညီများ ပေးရန်ဟု အထင်အရှားပင် ပါရှိလာခဲ့သည်။ သို့သော်လည်း အကြမ်းဖက် စစ်တပ်၏ ရက်စက်ကြမ်းကြုပ်မှု များ ကို တန်ပြန် ကူညီပေးနိုင်ရန် အမေရိကန် အတွက် ဥပဒေကြောင်းအရ အကျုံးဝင်သွားခဲ့ပြီ ဖြစ်သည်။

ထိုဥပဒေ ၏ အဓိက လက်သည်ကြီး ဖြစ်သော အောက်လွှတ်တော် နိုင်ငံခြားရေးရာ ကော်မတီ ဥက္ကဌ ဂရီဂိုရီ မိခ် မှ ကျေညာချက် ထုတ်ပြန်ရာတွင် “မြန်မာပြည်ရှိ လူသတ်စစ်တပ်အား တာဝန်ခံမှု ရှိလာစေရန် လွန်စွာ အရေးပါလှသော ခြေလှမ်းကြီး လည်း ဖြစ်ပြီး ဒီမိုကရေစီ အရေး အတွက် တိုက်ပွဲဝင်နေသော မြန်မာ ပြည်သူများ အတွက် အောင်ပွဲကြီး တရပ် ဖြစ်သည် ဟု ပါရှိခဲ့သည်။

အမေရိကန်မှ ပေးရင် ငါတို့ကိုလည်း ရုရှားက ပေးမှာပါ ဟု မျှော်လင့် နေကြဦးမည်လား။

ပြည်သူတို့၏ ခုခံ တွန်းလှန်စစ် မုချအောင်ရမည်!!!

လှစိုးဝေ