တော်လှန်ရေး အင်အားစုများ နောက်ကွယ်မှ ရံပုံငွေ

ဘရပ်ဆဲလ် အခြေစိုက် နိုင်ငံတကာ အကျပ်အတည်းများ လေ့လာရေး အဖွဲ့ ကြီးမှ “Crowdfunding a war: The Money Behind the Myanmar Resistance” ခေါင်းစဉ် ဖြင့် အစီရင်ခံစာ ထုတ်ပြန်ချက်အား ပြန်လည် ကောက် နှုတ် တင်ပြသွားပါမည်။

Crowdfunding ဆိုသည်မှာ လုပ်ငန်းတရပ်ရပ် အပေါ် စိတ်ဝင်စားသူများ ထံမှ အွန်လိုင်းမှတဆင့် ရံပုံငွေ ကောက် ခံခြင်းကို ဆိုလိုသည်။

မြန်မာနိုင်ငံအတွင်းရှိ တော်လှန်ရေး အဖွဲ့များသည် စစ်အာဏာသိမ်း အဖွဲ့၏ နည်းလမ်းမျိုးစုံဖြင့် ဟန့်တားနေ သည့်ကြားမှ ပြီးခဲ့သည့် ဆယ့်ရှစ်လ အတွင်း ထိုနည်းလမ်းဖြင့် ရံပုံငွေများကို အောင်မြင်စွာ ရှာဖွေနိုင်ခဲ့ကြသည်။

တော်လှန်ရေး အဖွဲ့များသာမက စစ်အာဏာသိမ်း အဖွဲ့သည်လည်း သူ့နည်းသူ့ဟန်ဖြင့် ရံပုံငွေများ ရှာဖွေနေရဆဲ ဖြစ်ပြီး တဖက်တွင်လည်း ပြည်သူ့ ကာကွယ်ရေး တပ်ဖွဲ့များ အား ငွေကြေး စီးမျောခြင်း မရှိအောင် ပိတ်ဆို့ ဟန့်တားနိုင်ရန် လုံးပမ်းနေကြရသည်။ သို့သော် တော်လှန်ရေး အင်အားစုများသည် သမားရိုးကျ ယန္တရားများ အတွင်းကသာ မက နည်းပညာ အသစ်များ သုံး၍လည်း စုဆောင်း နိုင်ခဲ့ကြသည်။

စစ်အာဏာသိမ်း အဖွဲ့ ၏ လက်ဝယ်ရှိ ရံပုံငွေသည် လက်ရှိ ပဋိပက္ခကြီး ဆက်လက် ဖြစ်ပွားနေခြင်း၏ ကြီးမား သော အကြောင်းရင်း တရပ် ဖြစ်နေသည်။ ထို့အတူ တော်လှန်ရေး အင်အားစုများ၏ ရံပုံငွေများ ဆက်လက် ရှာဖွေနိုင်စွမ်း ရှိမှုသည်လည်း အရေးပါနေသည်။

စစ်တပ်သည် နိုင်ငံ ရှိ အုပ်ချုပ်ရေး ယန္တရားများကို ထိန်းချုပ်ထားနိုင်သဖြင့် အရေးသာလျှက် ရှိနေသည်။ တော်လှန်ရေး အင်အားစုများသည်လည်း Crowdfunding နည်းလမ်းပေါင်းစုံဖြင့် စစ်မျက်နှာပေါင်းစုံအတွက် ထောက်ပံ့ ပေးနိုင်ရန် ရံပုံငွေများ ရရှိနေကြသည်။ မထင်မှတ်ဘဲ ဒေါ်လာသန်း ရာပေါင်း များစွာ စုဆောင်းနိုင်ခဲ့ကြသည်။ သို့သော်လည်း စစ်တပ်ကို ခြိမ်းခြောက်နိုင်လောက်သော ပမာဏ အထိတော့ မရရှိနိုင်သေးပေ။ ထိုအတွက် ပဋိပက္ခ၏ အဆုံးသတ်ရေးဆီ သွားနိုင်မည့် လားရာသည် တော်လှန်ရေး အင်အားစုများ ရံပုံငွေ ယခုထက် ပို၍ ရရှိနိုင်မည်လား ဆိုသည်က အဆုံးအဖြတ် ပေးလာတော့မည် ဖြစ်သည်။

တော်လှန်ရေး အင်အားစုများ အနေဖြင့် ထိုအရေး အတွက် ကျွမ်းကျင်သူများ၏ အကြံဉာဏ်များ ရယူနိုင်ဖို့ လို အပ်နေသည်။ အထူးသဖြင့် လှူဒါန်းနေသူများ၏ ကိုယ်ရေး အချက်အလက်များကို အကာအကွယ် ပေးနိုင်‌ရေး တွင် ဖြစ်သည်။ လူသားချင်း စာနာထောက်ထားမှု အကူအညီများ ပေးနေသည့် အဖွဲ့အစည်းများ အနေဖြင့်လည်း ပြည်တွင်း ရှိ အဖွဲ့များ နှင့် တိုက်ရိုက် ထိတွေ့ဆက်ဆံသွားဖို့ လိုအပ်နေသည့်အပြင် မိမိတို့၏ စည်းမျဉ်းများ လိုက် နာခိုင်းခြင်းဖြင့် ထိုအဖွဲ့များကို ဝန်ထုပ်ဝန်ပိုး မဖြစ်စေသင့်ဟုလည်း အစီရင်ခံစာ နိဒါန်းတွင် ဖေါ်ပြထားသည်။

တော်လှန်ရေး အင်အားစုများသည် အင်တာနက်ကို လက်နက်အဖြစ် အသုံးချ၍ ဒီဂျစ်တယ် တော်လှန်ရေးကြီး ဆင်နွှဲ နိုင်ခဲ့သည့်အပြင် ဒီမိုကရေစီ ကာလ အတွင်း လွတ်လပ်ပွင့်လင်းစွာ ဆောင်ရွက်နိုင်ခဲ့သည့် ဘဏ်လုပ်ထုံး လုပ်နည်းများကို အသုံးချနိုင်ခဲ့ကြသည်။ မြန်မာပြည်သူများ အနေဖြင့် အဆိုပါ အင်တာနက်ကို အသုံးချပြီး အကျိုးရှိရာ ရှိကြောင်း အသုံးချခြင်းဖြင့် စစ်အာဏာသိမ်း အဖွဲ့ကို ဘဏ္ဍာရေးအရ အင်အားချည့်နဲ့သွားအောင် ကြံဆောင် သင့်သည်။ အချို့ လုပ်ခဲ့သည်များက အောင်မြင်မှုများ ရရှိခဲ့ကြသည်။ မီတာခများ မပေးဆောင်ခြင်း၊ စစ်တပ်ပိုင် လုပ်ငန်းများမှ ထုတ်လုပ်သော ကုန်ပစ္စည်းများကို သပိတ်မှောက်ခြင်း အစရှိသည့် နည်းလမ်းများ နှင့် ဖြစ်သည်။

အချို့လုပ်ရပ်များသည် မှန်းချက် နှင့် နှမ်းထွက် မကိုက် ဖြစ်နေသည်။ ဥပမာ အရပ်ဖက် အဖွဲ့အစည်းများက ပြင်သစ် ရေနံကုမ္ပဏီကြီး ဖြစ်သော တိုတယ် အား နိုင်ငံတွင်း မှ ထွက်ခွာရန် ဖိအားပေးခဲ့၍ ထွက်သွားသည့်အခါ စစ်တပ်သည် တိုတယ် အတွက် ပေးရမည့် ငွေများ ပေးစရာ မလိုသဖြင့် ယခင်ကထက်ပင် ဝင်ငွေများ ပိုရသွား ခဲ့သည်။

ပြည်တွင်းရှိ တော်လှန်ရေး အင်အားစုများထံ လိုအပ်သည့် ငွေများ ပို့ဆောင်ပေးဖို့လည်း အခက်အခဲများ ရှိလာ နေသည်။ စစ်တပ်သည် လမ်းဟောင်းကြီး နှင့်ပင် ပြည်တွင်း ရှိ အလှူရှင်များ အကြားတွင် အကြောက်တရားများ ဖန်တီးလာနိုင်ပြီး ပြည်တွင်း ဘဏ်လုပ်ငန်း နယ်ပယ်ထဲမှ မောင်းထုတ် ကာကွယ် နိုင်ခဲ့၍ ဖြစ်သည်။ 

အမျိုးသား ညီညွတ်ရေး အစိုးရ အဖို့လည်း နိုင်ငံတကာ ဘဏ်လုပ်ငန်း အဖွဲ့အစည်းများ၏ ငွေကြေး ခဝါချမှု၊ အကြမ်းဖက်ဝါဒ တိုက်ဖျက်မှု ပေါ်လစီ များကြောင့် တခါတရံတွင် အခက်အခဲများ ရင်ဆိုင်လာခဲ့ရသည်။ NUG သည် ဒီဂျစ်တယ် ငွေကြေး၊ ဘလော့ခ်ချိန်း နည်းလမ်းများ သုံးခဲ့သော်လည်း သန္ဓေသား အဆင့်ထက် တက်မလာ နိုင်ဘဲ ရှိနေဆဲ ဖြစ်သည်။ ထို့အတွက် ပြည်သူ့တော်လှန်ရေး အဖွဲ့များသည် စစ်တပ် လက်ဝေခံ ဘဏ်လုပ်ငန်း အဖွဲ့အစည်းများ ကို ရှောင်ရှားပြီး တရားမဝင် ငွေလွှဲ နည်းလမ်း ဖြစ်သည့် ဟွန်ဒီ ကိုသာ အဓိက အားပြုနေရသည်။

စစ်တပ်အဖို့မှာ အခွင့်အလမ်းများစွာ ရှိနေသည်။ ဗဟိုဘဏ်ကို သိမ်းပိုက်ထားနိုင်သည့်အပြင် နိုင်ငံတော်ပိုင် ပစ္စည်း ဥစ္စာများကို ထင်သလို အသုံးချခွင့် ရှိနေသည်။ ပုဂ္ဂလိက ကဏ္ဍများ ကိုလည်း အကြောက်တရားဖြင့် စေလိုရာ စေနိုင်ခဲ့သည်။

စီးပွားရေး ကဏ္ဍတွင် တည်ငြိမ်မှု ရှိအောင် စွမ်းဆောင်နိုင်စွမ်း မရှိခဲ့ကြပေ။ ထိုသို့ ဖြစ်ခဲ့ရသည်မှာလည်း ပြည် တွင်းတွင် ၎င်းတို့၏ အုပ်ချုပ်ရေးအား နေရာအနှံ့တွင် ဆန့်ကျင်နေကြခြင်း၊ နိုင်ငံတကာမှ ပိတ်ဆို့ ဒဏ်ခတ်ခြင်း များ နှင့် ၎င်းတို့၏ အလွဲလွဲ အချော်ချော် စီမံခန့်ခွဲမှု အမှားများကြောင့် ဖြစ်သည်။ မြန်မာ ပြည်သူ အများစုမှ တရားမဝင် အစိုးရ အဖြစ် သတ်မှတ်ခံထားရသော အဖွဲ့ အုပ်ချုပ်နေသမျှ အခြေအနေများ တည်ငြိမ်လာမှု ရှိမည်မဟုတ်ဟု နိုင်ငံတကာ ရှိ ရင်းနှီးမြှုပ်နှံသူများကိုလည်း သတိပေးထားပြန်သည်။

စစ်အာဏာသိမ်း အဖွဲ့သည် ထိုသို့သော အနေအထားကို ပို၍ ဆိုးဝါးလာအောင် နိုင်ငံခြားငွေများ တင်းကျပ်စွာ ထိန်းချုပ်လာခြင်း၊ သွင်းကုန် ပါမစ်များ အား ခွဲတမ်းဖြင့် ချပေးခြင်း၊ နိုင်ငံခြားငွေ လဲလှယ်မှု နှုန်းထားကို မြှင့်တင်လာခြင်းကြောင့် ၎င်းတို့ ၏ စီးပွားရေး စွမ်းဆောင်နိုင်မှု အပေါ် ယုံကြည်မှု ပို၍ပင် လျော့နည်းသွား စေခဲ့သည်။ ဤသို့ဖြင့် တော်လှန်ရေး တပ်ဖွဲ့ ဝင်များထံ ဟွန်ဒီ ဖြင့် ငွေလွှဲသည့် နည်းလမ်းများ ပြန်လည် အသုံးပြုလာခဲ့ကြသည်။

ထိုသို့ တရားမဝင် နည်းလမ်း များ အသုံးပြုလာခြင်းကို မူ စစ်ကောင်စီမှ မည်သို့မျှ ဟန့်တား နိုင်စွမ်း မရှိ ဖြစ်နေသည်။ တဖက်တွင် ပြည်ပရှိ မြန်မာနိုင်ငံသားများ ဖက်၌ ငွေကြေး ထောက်ပံ့နေရမှုများ အပေါ် စိတ်ပျက်စ ပြုလာနေပြီး အချို့အမြင် တွင် အောင်မြင်နိုင်ဖွယ်မရှိတော့ဟု ယူဆလာမှုများလည်း ရှိနေသည်။

သို့သော်လည်း NUG သည် နည်းလမ်းမျိုးစုံ သုံး၍ ရံပုံငွေများ ရရှိရန် တမီလ် ကျားများ၊ အိုင်အာအေ အဖွဲ့များ ကဲ့သို့ ဖန်တီးနိုင်ခဲ့ကြ၍ ဆက်လက် ရပ်တည်နေနိုင်ဆဲပင် ဖြစ်သည်။ Click2Donate ကဲ့သို့ App မှ ဒေါ်လာ တသန်းကျော်အထိ ရရှိခဲ့သလို “War of Heroes” မိုဘိုင်း ဂိမ်း သည်လည်း ယခုထိ ဒေါ်လာ နှစ်သိန်းခန့် ရရှိနေပြီ ဖြစ်သည်။

ထိုနေရာတွင် ICG အဖွဲ့ကြီး မှ နိုင်ငံတကာ အစိုးရများ အနေဖြင့် တော်လှန်ရေး အဖွဲ့များအား လက်နက်များ၊ ငွေများ ထောက်ပံ့ရန် လိုလိုလားလား မရှိသေးသည်ကို နားလည်မှု ပေးနိုင်သော်လည်း ပြည်ပရှိ မြန်မာနိုင်ငံ သားများ ထံမှ လှူဒါန်းနေမှုများ အား လိုက်လံပိတ်ပင်ရန် ကြိုးပမ်းလာမှုသည်က အတော် လွန် လွန်း သွားပြီ ဖြစ်သည်ဟု ဆိုသည်။ ထိုသို့ လုပ်ခြင်းအားဖြင့် တိုက်ပွဲများကို ရပ်တန့်သွားအောင် လုပ်နိုင်မည်တော့ မဟုတ်ပေ။ အချို့ဒေသများတွင် တိုက်ပွဲ အရှိန် လျော့ကျသွားကောင်း သွားနိုင်သော်လည်း ထိုသို့ ကျဆင်းသွားသည် နှင့် အမျှ စစ်တပ်သည် ထိုဒေသများတွင် အပြစ်မဲ့ အရပ်သားများ အပေါ် လက်စားချေ တုန့်ပြန်မှုများ ပြုလုပ်လာနိုင် ပေသည်။ ထိုသို့ လှူဒါန်းပေးပို့နေသည်များကို စိုးရိမ်ကြောင့်ကြမှု ကင်းစွာ ဖြင့် ဆောင်ရွက်နိုင်အောင် ဖန်တီး ပေးသင့်သည်။

ရံပုံငွေများ ဖြတ်တောက်ခံရပါက မြန်မာ ပြည်သူများ အတွက် ပို၍ ထိခိုက် နစ်နာစရာများ ဖြစ်ပေါ်လာနိုင်ပြီး ရပ်တန့်အောင် လုပ်နေသည့် နိုင်ငံတကာ ၏ လုပ်ရပ်များ အပေါ်လည်း ဒေါသများ ထွက်လာနိုင်သည်။  ထိုလုပ် ရပ်များသည် မြန်မာပြည်သူများ အပေါ် နေ့တဒူဝ နှိပ်စက်ညှင်းပန်းနေသည့် တရားမဝင် စစ်အာဏာသိမ်း အဖွဲ့ကို သွယ်ဝိုက် အားပေးရာ ကျနေပေသည်။ စစ်အာဏာသိမ်း အဖွဲ့သည် လူမျိုးစု တိုင်းရင်းသား လက်နက်ကိုင်များ အား နှိမ်နှင်းနိုင်ရေး အပေါ် ပို၍ အာရုံစိုက်လာကြမည်။ နိုင်ငံတွင်းရှိ တော်လှန်ရေး အဖွဲ့များနှင့် လက်နက် မထောက်ပံ့သည်ကလွဲ၍ သွေးစည်း ညီညွတ်စွာ ရပ်တည်သွားမည် ဆိုသည့် နိုင်ငံတကာ ၏ ရပ်တည်ချက်အား ထိခိုက်စေမည့် လုပ်ရပ်များကို ရှောင်ရှားသင့်လှပေသည်။

လူသားချင်း စာနာထောက်ထားရေး အကူအညီများ အတွက် ဘဏ်လုပ်ငန်း စည်းမျဉ်းစည်းကမ်းများကို ဖြေ လျော့ပေးနိုင်မှလည်း ဖြစ်မည်။ သို့မဟုတ်က ကူညီဆောင်ရွက်ပေးနေကြသည့် အင်ဂျီအို အဖွဲ့အစည်းများ အဖို့ ရံပုံငွေ ပြတ်လတ်မှုများ နှင့် ရင်ဆိုင်လာရဖွယ် ရှိနေသည်။ နိုင်ငံတကာ အလှူရှင်များ အနေဖြင့် ကုန်ပစ္စည်းများ၊ သို့မဟုတ် ငွေများကို နယ်စပ် ဖြတ်ကျော်ပို့ဆောင်ပေးခြင်း အပြင် နည်းလမ်းပေါင်းစုံဖြင့် ရောက်ရှိအောင် ဆောင်ရွက်ပေးသင့်သည်ဟု ဒီဇင်ဘာ ၂၀ ရက်နေ့စွဲ ဖြင့် ထုတ်ပြန်လာသော အစီရင်ခံစာကို ကောက်နှုတ် တင်ပြ လိုက်ရပါသည်။

အကြံပေးချက်များလည်း ပါဝင်နေ၍ အသေးစိတ် အစအဆုံး ဖတ်ရှုလိုသူများ အောက်ပါ လင့်ခ်မှ တဆင့် ဝင်ရောက်နိုင်ပါသည်။ 

https://www.crisisgroup.org/asia/south-east-asia/myanmar/328-crowdfunding-war-money-behind-myanmars-resistance

ပြည်သူတို့၏ ခုခံတွန်းလှန်စစ် မုချအောင်ရမည်!!!

လှစိုးဝေ