EXXON FILM Investment ငွေထုတ်မှု ယာယီရပ်ဆိုင်း

စစ်ကောင်စီကိုအကြောင်းပြကာ  EXXON FILM Investment အက်ပလီကေးရှင်း ငွေထုတ်မှု ယာယီရပ်ဆိုင်း၊ ရင်းနှီးမြုပ်နှံမှုကိုတော့ ဆက်လက်ခွင့်ပြုဟုဆို

ဖေဖော်ဝါရီလ ၂၃ ရက်

အဖွဲ့ဝင် သောင်းဂဏန်းကျော်ရှိနေသည့် အွန်လိုင်းမှတဆင့်ရင်းနှီးမြုပ်နှံမှုလုပ်စေသည်ဆိုသော  EXXON FILM Investment အက်ပလီကေးရှင်းသည် ငွေထုတ်ဝန်ဆောင်မှုကို ယာယီရပ်ဆိုင်းမည်ဖြစ်ကြောင်း ဖေဖော်ဝါရီ ၂၀ ရက်နေ့က ကြေညာလိုက်ပြီး စစ်ကောင်စီက လုံခြုံရေးဆိုင်ရာ သံသယကြောင့်ဖြစ်သည်ဟု အကြောင်းပြသည်။

ပြည်သူ့ကာကွယ်ရေးတပ် (PDF) များကို ထောက်ပံ့နေသည်ဟူသော သံသယဖြင့် စစ်ကောင်စီက  EXXON FILM အား စုံစမ်းစစ်ဆေးမည့်အကြောင်းသာ ထုတ်ပြန်ချက်တွင်ရေးသားထားသော်လည်း မည်သို့စစ်ဆေးမည်ဆိုသည့်အချက်ကိုမူ ဖော်ပြထားခြင်းမရှိပါ။

ကသာမြို့နယ်ရှိ စစ်ပွဲကြောင့် ပျက်စီးဆုံးရှုံးခဲ့ရသော ဒုက္ခသည်များကို ကူညီဆောင်ရွက်ပေးရာတွင် ပါဝင်ရာက ယခုလိုသံသယအဝင်ခံနေရခြင်းဖြစ်သည်ဟုပါရှိသည်။ 

ထို့အပြင်စုံစမ်းစစ်ဆေးမှု ပြီးစီးမှသာ အဖွဲ့ဝင်များ၏ ငွေထုတ်ဝန်ဆောင်မှုကိုလည်း ပြန်လည် လုပ်ဆောင်ပေးနိုင်မည်ဟုပါရှိသည်။  

သို့သော် ငွေထုတ်ယူခွင့်ပိတ်ထားသော်လည်း အဖွဲ့ဝင်ဟောင်းများအနေဖြင့် ရင်းနှီးမြုပ်နှံမှုကိုတော့ ပုံမှန်အတိုင်းဆက်လက်လုပ်ဆောင်နိုင်မည်ဟုဆိုသည့်အပြင် အဖွဲ့ဝင်အသစ်များကိုလည်း ဖိတ်ခေါ်နိုင်သည်ဟု ထုတ်ပြန်ချက်တွင်ပါရှိသည်။

"သူတို့ ဆော့ဝဲကတော့ အလုပ်လုပ်နေသေးတယ်ဗျ။ ဒါပေမယ့် အဖွဲ့ခေါင်းဆောင်တွေကတော့ လူသေတွေလို ဖြစ်နေပြီ။ ဘာမှမေးမရ ပြုမရနဲ့။ ဆေ့ာဝဲ ဝန်ဆောင်မှုမှာမေးတာက တပတ်အတွင်းရအောင် ပြန်လုပ်ပေးမယ်လို့တော့ ပြောတာပါပဲ စစ်ကောင်စီက စစ်ဘေးရှောင်တွေလှူတာကို PDF တွေ လက်နက်တွေလှူတယ်ဆိုပြီး သံသယရှိလို့ စစ်နေတာတဲ့။ ကျွန်တော်တော့ သိပ်မမျှော်လင့်တော့ပါဘူး။ ဒီယုန်မြင်လို့ ဒီချုံထွင်တာနေမယ် အရှေ့မှာလဲ ဆယ်လီလုလင်ပျိုတို့ ဖူးပွင့်ခိုင်တို့နဲ့ အလှူတွေလုပ်ပြနေတာလေ"ဟု ငွေကျပ် ၅၀၀၀၀၀ (ငါးသိန်း) ရင်းနှီးမြှပ်နှံထားသည့် အဖွဲ့ဝင်တစ်ဦးက ပြောသည်။

ယခုကဲ့သို့ ယာယီပိတ်သိမ်းမှုသည် ဖေဖော်ဝါရီ ၂၈ရက်တွင် ပြန်လည်ပြေလည်သွားမည်ဟု  Exxon Film က တယ်လီဂရမ်သီးသန့်ဂရုတွင် အကြောင်းကြားစာ ထပ်မံထုတ်ထားပြီး ၎င်းတို့၏ ငွေထုတ်ဝန်ဆောင်မှုယာယီရပ်ဆိုင်းခြင်းကို မှတ်ချက်ပြုလုပ်ခြင်းမပြုရန်နှင့် ပြုလုပ်ပါက ချက်ချင်း ပြင်းထန်သော ပြစ်ဒဏ် ချမှတ်မည်ဖြစ်ပြီး အကောင့်ကို ပိတ်ကာ ဝဘ်ဆိုက်ရှိ ရန်ပုံငွေအားလုံးကိုလည်း သိမ်းယူမည်ဟုလည်း Exxon Film က အဖွဲ့ဝင်များထံသို့ သတိပေးစာပေးပို့ခဲ့သည်။

အထက်ပါ သတိပေးစာကြောင့် အဖွဲ့ဝင်များသည် ဖေဖော်ဝါရီ ၂၈ရက်အထိ ဆက်လက်စောင့်စားနေကြမည်‌ဖြစ်ပြီး ငွေများအသိမ်းခံရမည်ကိုစိုးရိမ်မှုကြောင့် မှတ်ချက်ပြုလုပ်မည့်သူမရှိနိုင်ကြောင်း  အဖွဲ့ဝင်တစ်ဦးက မဇ္ဈိမကိုပြောသည်။

 Exxon Film အွန်လိုင်းအက်ပလီကေးရှင်းကို ၂၀၂၀ အောက်တိုဘာလ ၃၁ရက်တွင် ဖေ့ဘွတ်စ်ပေစ့်စတင်လုပ်ဆောင်ခဲ့ပြီး   ၂၀၂၂ခုနှစ် နိုဝင်ဘာလ ၂ရက်တွင် ဖေ့ဘွတ်စ်ပေစ့်အသစ်တစ်ခု ထပ်မံ လုပ်ဆောင်ထားသည်ကိုလည်း  မဇ္ဈိမက စုံစမ်းတွေ့ရှိရသည်။ 

၎င်းတို့၏လုပ်ငန်းလိုင်စင်ကို ၂၀၂၂ခုနှစ် နိုဝင်ဘာလ ၃ရက်တွင် တရားဝင်မှတ်ပုံတင်ထားကြောင်းကိုလည်း  ဖေ့ဘွတ်စ်ပေစ့်နှစ်ခုလုံးမှတဆင့် ဖော်ပြထားသည်ကို တွေ့ရသည်။ ၎င်းတို့၏ ရုံးခန်းကိုလည်း KTA -6 FMI  လှိုင်သာယာမြို့နယ် ရန်ကုန်တွင် ဖွင့်လှစ်ထားသည်ဟု ဖော်ပြထားသည်။ 

ရင်းနှီးမြှပ်နှံမှုများလုပ်ဆောင်ရန် ရည်ရွယ်ဖွင့်လှစ်ထားသည့် ဖေ့ဘွတ်စ်ဂရု ငါးခု ရှိနေပြီး Exxon Film ရှယ်ယာရှင်များဂရု ၊ Exxon Film Investment မန်ဘာဂရု၊ Exxon Film Shan State ၊ Exxon ငွေရှာသူများစုံစည်းရာ နှင့် Exxon Film စသည့် အမည်များဖြင့် ဂရုများရှိနေသည်ကိုလည်း စုံစမ်းသိရှိရပြီး အဆိုပါဂရုများကို လူရှာရန် ရည်ရွယ်ဖွင့်လှစ်ထားသည်ဟုသိရသည်။

သို့သော် ၎င်းတို့၏ ရင်းနှီးမြှပ်နှံမှုနှင့် ဆိုင်သည့်အချက်အလက်များ အကြောင်းကြားစာများကိုမူ သီးသန့်တယ်လီဂရမ်ဂရုတွင်သာ ပေးပို့လေ့ရှိသည်ဟု သိရသည်။

ရုပ်ရှင်ရင်းနှီးမြှပ်နှံမှု EXXON FILM Investmentကို မြန်မာဆယ်လီ ဖူးပွင့်ခိုင် ၊ လမင်းကဗျာ နှင့် လုလင်ပျိုတို့မှ ကြော်ငြာပေးထားသည်များလည်း တွေရပြီး အဆိုပါကိစ္စရပ်ကို " မြန်မာနိုင်ငံက ဆယ်လီအချို့ စည်းကမ်းမဲ့လွန်းတာလား ၊ ဦးနှောက် တခန်းလွတ်နေကြတာလား ။ နိုင်ငံတကာရုပ်ရှင်တွေမှာ ရင်းနှီးမြှပ်နှံဖို့ မြန်မာနိုင်ငံမှာ ရုံးခန်းလာဖွင့် မြန်မာပြည်သူတွေဆီက အရင်းအနှီးလာရှာတယ်ဆိုတာ ဖြစ်နိုင်ပါ့မလား ။ မစဉ်းစားတတ်ကြတော့ဘူးလား " ဟု ဆင့်ပွားဈေးကွက်ဖြန့်ချီ‌ရေးလုပ်ငန်း MLM စနစ်ကို ဆန့်ကျင်တိုက်ဖြတ်သူတစ်ဦးဖြစ်သည့် ကိုဇင်ဇေလွင်က ၎င်း၏လူမှုကွန်ရက်တွင် မှတ်ချက်ပြုရေးသားထားသည်ကိုတွေ့ရသည်။

ထို့အပြင် "  Exxon Film Investment ဆိုတာ လိမ်မှာမဟုတ်ဘူး ။လိမ်ကို လိမ်နေတာငွေရနေသေးလို့ ၊ အရှိန်ယူနေတုန်း မပြေးသေးလို့ မလိမ်ဘူး ခံငြင်း မနေကြနဲ့။သူ့ App ထဲမှာ ထည့်ထားတဲ့ နာမည်ကြီး ရုပ်ရှင်တွေနဲ့ သူတို့နဲ့ တကယ် ပက်သက်ကြောင်း ၊ အပြန်အလှန် သဘောတူမှုတွေ ရှိကြောင်း နိုင်ငံတကာ သတင်းတွေမှာ ပါဖူးတဲ့ သက်သေတောင် ခင်ဗျားတို့ ပြနိုင်လို့လား "ဟု Exxon Film Investmentကို ထပ်မံ ဝေဖန်ထားသည်ကိုလည်း တွေ့ရသည်။

၂၀၂၂ ခုနှစ် ဇူလိုင်လတွင် စတင်ဖွင့်လှစ်ခဲ့‌သည့် ရင်းနှီးမြှပ်နှံမှုလုပ်ငန်းဟု ၎င်းတို့အမည်ပေးထားသော Joom အက်ပလီကေးရှင်းနှင့် Koala အက်ပလီကေးရှင်းသည် လည်း အောက်တိုဘာလတွင် ၎င်းတို့အက်ပလီကေးရှင်းကို ရပ်ဆိုင်းလိုက်ကြပြီး လူ ၂၀,၀၀၀ နီးပါး ငွေလိမ်လည်ခံရမှု ဖြစ်ပွားခဲ့ကြသည်။

©MIZ

Hlaing Info

ဖူးပွင့်ခိုင်ကြည့်ရန်