အွန်လိုင်းဘွတ်ကင် စနစ်အသစ်ဖြင့် ပြုလုပ်ရမည့် ပတ်စ်ပို့ ငွေကုန်ကြေးကျများနိုင်

Published By DVB | 23 February, 2023
နိုင်ငံကူးလက်မှတ် ပတ်စ်ပို့ လျှောက်ထားရာမှာ အွန်လိုင်းဘွတ်ကင် စနစ်အသစ်နဲ့ ပြုလုပ်ဖို့ စစ်ကောင်စီက စီစဉ်နေပေမဲ့ အခက်အခဲတွေရှိနိုင်ပြီး ငွေကုန်ကြေးကျလည်းပိုများနိုင်တယ်လို့ ပတ်စ်ပို့အကျိုးဆောင်တွေနဲ့ ပတ်စ်ပို့လျှောက်ထားသူတွေက ပြောပါတယ်။

ဖေဖော်ဝါရီ ၂၄ ရက်က စတင်ပြီး နိုင်ငံကူးလက်မှတ်တွေကို အွန်လိုင်းဘွတ်ကင် စနစ်သစ်နဲ့ လျှောက်ထားနိုင်မယ်လို့ စစ်ကောင်စီက ဖေဖော်ဝါရီ ၂၂ ရက်မှာ ကြေညာထားတာဖြစ်ပါတယ်။

အွန်လိုင်းဘွတ်ကင် စနစ်အသစ်ကို ရန်ကုန် ပတ်စ်ပို့ရုံးမှာပဲ လျှောက်ထားနိုင်မှာဖြစ်ပြီး ကျန်တဲ့ ပြည်နယ်နဲ့ တိုင်းဒေသကြီး ရုံးခွဲတွေမှာတော့ အရင်လျှောက်နေကျ ပုံစံအတိုင်း တိုကင်ယူ၊ ရက်ချိန်းအတိုင်း လာရောက်လုပ်တဲ့ပုံစံနဲ့ ပြုလုပ်ရမှာပါ။

လျှောက်ထားရာမှာ ဘယ်သူမဆို လွယ်လွယ်ကူကူ လျှောက်ထားနိုင်ဖို့ စီစဉ်ထားတာဖြစ်လို့ ကြားခံပွဲစားတွေနဲ့ အခကြေးငွေပေးဆောင် မလျှောက်ကြဖို့လည်း အသိပေးထားပါတယ်။

အွန်လိုင်းစနစ်သစ်နဲ့ လုပ်ခွင့်ပေးလိုက်ပေမဲ့ ပတ်စ်ပို့ပြုလုပ်ခ စျေးနှုန်းတွေဟာ သိန်းဂဏန်း ပေါက်စျေးရှိနေပြီး ပွဲစားကတဆင့် ပြုလုပ်ရတဲ့ အခြေအနေတွေ ရှိနေပါတယ်။ ပတ်စ်ပို့ပြုလုပ်သူ တဦးကတော့ ကိုယ်တိုင် အွန်လိုင်းဘွတ်ကင် လျှောက်ဖူးပေမဲ့ အဆင်မပြေတာကြောင့် အေးဂျင့်ကတဆင့် လျှောက်တဲ့အခါ QR code တခုကို သိန်းချီ ပေးရတယ်လို့ ပြောပါတယ်။

“ရန်ကုန်မှာက QR ကိုယ့်ဘာကိုယ်ယူရင် မလွယ်ဘူး။ ကုမ္ပဏီဆိုတဲ့ နာမည်အောက်ကနေ လုပ်ပေးတာ။ ပြောမယ်ဆို QR code ရောင်းတာပေါ့။ အခုက ၄၊ ၅၊ ၈ သိန်းလောက် ကျမယ် ပြောတယ်။ စာရင်းသွင်းထားရတယ်။ ကိုယ့်လိုပဲ စောင့်နေသူတွေရှိတယ်။ QR code ရမှ ပိုက်ဆံပေးရတာပေါ့။ QR code ဝယ်နေရတာပေါ့။ ကိုယ်တိုင်လုပ်ဖို့မလွယ်ဘူး။ အဆင်မပြေဘူး။ ဘာလုပ်လုပ် ပိုက်ဆံကုန်နေတာပေါ့။ ကုမ္ပဏီတွေကို ချပေးတာက သပ်သပ်၊ ရိုးရိုးလူတွေကို ချပေးတာ သပ်သပ်ပေါ့” လို့ ပတ်စ်ပို့ပြုလုပ်သူတဦးက ဒီဗွီဘီကို ပြောပါတယ်။

စစ်ကောင်စီဘက်ကတော့ ပတ်စ်ပို့ အွန်လိုင်းဘွတ်ကင် စနစ်အသစ်ကို အချိန်အကန့်အသတ်မရှိ အလွယ်တကူ လျှောက်ထားနိုင်ပြီး ကုန်ကျစရိတ်ကိုလည်း သတ်မှတ်နှုန်းထားအတိုင်း တပါတည်း ပေးချေရမယ်လို့ ထုတ်ပြန်ထားပါတယ်။

ဒါ့အပြင် အွန်လိုင်းဘွတ်ကင်လျှောက်ဖို့ အခက်အခဲရှိသူတွေ သက်ဆိုင်ရာ မြို့မရဲစခန်းတွေမှာ အကူအညီတောင်း လျှောက်ထားနိုင်သလို အပြင်ကပွဲစားတွေနဲ့ အခကြေးငွေပေးပြီး မလျှောက်ကြဖို့ အသိပေးထားပါတယ်။

လက်တွေ့မှာတော့ ပတ်စ်ပို့ပြုလုပ်ခ စျေးနှုန်းတွေဟာ အနိမ့်ဆုံး ငွေကျပ် ၇၀,၀၀၀ ကနေ ၃ သိန်း၊ ၄ သိန်း၊ ၆ သိန်းအထိ အစားစား ရှိနေပါတယ်။ ရန်ကုန်မြို့မှာ ပတ်စ်ပို့ပြုလုပ်ပေးတဲ့ ပွဲစားတဦးကတော့ ပုံမှန်အတိုင်း ၁၅ ရက်ကြာ အပြီးအစီး ငွေကျပ် ၂ သိန်း၊ ၇ ရက်အမြန် ပတ်စ်ပို့ဆိုရင် ငွေကျပ် ၃ သိန်းနဲ့ ဝန်ဆောင်မှုပေးတယ်လို့ ပြောပါတယ်။

ပတ်စ်ပို့ပွဲစားတဦးက “QR က အသစ်ဆိုရင် ပြန်တင်ရမယ်။ ရန်ကုန်ကတော့ အွန်လိုင်းဘွတ်ကင်နဲ့ပဲ။ ကျန်တဲ့နယ်ရုံးတွေက ပုံမှန်အတိုင်းပဲ။ တိုကင်သွားယူရမယ်။ တိုကင်ရမယ့်ရက်ကို လာလုပ်။ အဲ့လိုပုံစံနဲ့သွားမှာ။ အွန်လိုင်းဘွတ်ကင်က ပုံမှန်တိုင်းပဲ။ တလကြိုယူတယ်။ စျေးနှုန်းက MOU ထွက်လာရင် ၆ သိန်းလောက်ရှိမယ်။ ပုံမှန်တိုင်း မဟုတ်ဘဲ မှတ်ပုံတင်၊ သန်ခေါင်းစာရင်း ဘာညာ သွေးနှောတို့ ဘာတို့ဆို စျေးများသွားမှာပေါ့” လို့ ပြောပါတယ်။

စစ်ကောင်စီက တနိုင်ငံလုံးက နိုင်ငံကူးလက်မှတ် (ပတ်စ်ပို့) ရုံးတွေကို ဇန်နဝါရီ ၂ ရက်ကစပြီး အကန့်အသတ်မရှိ ပိတ်ခဲ့တဲ့အတွက် ပြည်ပထွက် အလုပ်လုပ်မယ့်သူတွေ၊ ကျန်းမာရေးနဲ့ ပညာရေးကိစ္စကြောင့် ပြည်ပထွက်မယ့်သူတွေ အခက်အခဲ ကြုံတွေ့ခဲ့ရပါတယ်။

ပြည်တွင်းမှာ ပတ်စ်ပို့ရုံးတွေ ရက်အကန့်အသတ်မရှိ ပိတ်ခဲ့သလို ထိုင်းနိုင်ငံ၊ ဘန်ကောက် မြန်မာသံရုံးမှာလည်း ပတ်စ်ပို့သက်တမ်းတိုးကိစ္စတွေကို ဇန်နဝါရီလအတွင်းက အကန့်အသတ်နဲ့သာ ပြုလုပ်ပေးခဲ့တာကြောင့် ထိုင်းရောက် မြန်မာတွေ အခက်အခဲတွေ ကြုံတွေ့ခဲ့ရပါတယ်။