ဒေါ်အောင်ဆန်းစုကြည်နဲ့ NLD ပါတီကို ပစ်ပယ်လို့မရဘူးဆိုတာ တရုတ်က ရှင်းရှင်းလင်းလင်း နားလည်

အာဆီယံအစည်းထိပ်သီးအစည်းအဝေးမှာ စစ်တပ်ရဲ့ အမြင့်ဆုံးခေါင်းဆောင်ကို ဖယ်ကျဉ်ခံလိုက်ရတဲ့ ဒီကာလမှာ ရုရှားရဲ့ ရေတပ် ဒုတိယအကြီးအကဲက မြန်မာနိုင်ငံရောက်လာတယ်။ တကယ်တော့ ဒါဟာ စစ်လက်နက်ရောင်းဖို့ ရည်ရွယ်တာထက် အခြားဘယ်ကိစ္စမှ ဦးစားပေးမဖြစ်နိုင်ဘူး။ 

စစ်တပ်ဟာ ရုရှားကို သိသိသာသာ ပူးကပ်ပေမယ့် ရုရှားကတော့ မြန်မာစစ်တပ်ကို လက်နက်ဖောက်သည် အဆင့်ထက်ပိုမြင်ထားပုံလည်းရဘူး။ ဘာကြောင့်လဲဆိုရင် 

အာဆီယံ က ဖယ်ကျဉ်တာပဲဖြစ်ဖြစ်၊ကုလသမဂ္ဂမှာ သံအမတ်ကြီးဦးကျော်မိုးထွန်းဆက်ရှိနေတာပဲဖြစ်ဖြစ် ရုရှားဟာ မြန်မာစစ်တပ်ဘက်က ခုခံကာကွယ်တာမျိုးမလုပ်ဘဲ နှုတ်ဆိတ်နေတာတွေဟာ မြင်သာတဲ့အချက်လို့ဆိုရမယ်။

တရုတ်အနေနဲ့ကျတော့ မြန်မာနိုင်ငံမှာ ဘယ်နိုင်ငံရေးစနစ်ပဲရှိနေပါစေသူစိတ်မဝင်စားဘူး။ သူစိတ်ဝင်စားတာ မြန်မာနိုင်ငံတည်ငြိမ်ရေးပဲ( ဒါဟာ ထာဝရငြိမ်းချမ်းရေးလို့ ဆိုလိုတာမဟုတ်ဘူး)။ တည်ငြိမ်မှု ရှိမှလည်း သူ့ရဲ့ ပိုးလမ်းမစီမံကိန်းအတွက် အဆင်ချောမှာ။ တည်ငြိမ်ဖို့ဆိုရင် မြန်မာလူထု ထောက်ခံမှုရှိတဲ့ ဒေါ်အောင်ဆန်းစုကြည်နဲ့ NLD ပါတီကို ပစ်ပယ်လို့မရဘူးဆိုတာ တရုတ်က ရှင်းရှင်းလင်းလင်း နားလည်တယ်။ လက်နက်ကိုင်တော်လှန်တာကို တရုတ်က အားမပေးပေမယ့် ဒီအကျပ်အတည်းတွေကို ဗိုလ်ချုပ်မှူးကြီးမင်းအောင်လှိုင်နဲ့ ဒေါ်အောင်ဆန်းစုကြည်တွေ့ဆုံဖြေရှင်းရေးဆိုတာကို တရုတ်က အားပေးတယ်။ ဒါဟာ ပကတိလိုအပ်ချက်လို့ တရုတ်က တွက်ဆထားပုံပေါ်တယ်။

ပြီးခဲ့တဲ့ လပိုင်းက တရုတ်အထူးကိုယ်စားလှယ်က မြန်မာပြည်ကို တစ်ပတ်ကြာလာတယ်။ စစ်တပ်ခေါင်းဆောင်နဲ့တွေ့တယ်။ တွေ့ဆုံဆွေးနွေးရေးနည်းလမ်းကို တိုက်တွန်းခဲ့ပေမယ့် ဗိုလ်ချုပ်မှူးကြီးမင်းအောင်လှိုင်ဟာ တရုတ်ရဲ့ တိုက်တွန်းမှုကို နှစ်လိုဟန်မပြခဲ့တာကြောင့် တရုတ်အထူးကိုယ်စားလှယ် စိတ်ပျက်လက်ပျက်နဲ့ ပြန်သွားရတယ်။

အဲ့ဒီခရီးစဉ်နောက်မှာတော့ ဦးကျော်မိုးထွန်းကို ကုလမှာဆက်ရှိဖို့ နဲ့ ကုလညီလာခံကို စစ်တပ်ကလွတ်တဲ့ကိုယ်စားလှယ်ကို ပေးမတက်ဖို့ ဆိုတဲ့ သဘောတူညီချက်မျိုး တရုတ်နဲ့ အမေရိကန်ပူးပေါင်းချမှတ်ခဲ့တယ်။ ဒါ့အပြင် အာဆီယံအထူးသံတမန်မြန်မာပြည်လာပြီး ဒေါ်အောင်ဆန်းစုကြည်နဲ့ တွေ့ခွင့်တောင်းတာကို စစ်တပ်ဘက်က ငြင်းပယ်တာကြောင့် ဗိုလ်ချုပ်မှူးကြီးမင်းအောင်လှိုင်ကို အာဆီယံထိပ်သီးခေါင်းဆောင်တွေနဲ့ တတန်းတည်း မထားနိုင်ဘူးလို့ သဘောဆောင်တဲ့ ဆုံးဖြတ်ချက်ကို ချမှတ်ခဲ့တယ်။ ဒီအပေါ်မှာ တရုတ်ဟာ သိသိသာသာနှုတ်ဆိပ်နေတာဟာ နောက်ကွယ်မှာ တရုတ်ရဲ့ သဘောထား ပါပုံရတယ်ဆိုတဲ့ အမြင်မျိုး အကဲခက်တွေက ရှုမြင်ကြတယ်။ အခု အာဆီယံ-တရုတ် အစည်းအဝေးမှာ တရုတ်ဝန်ကြီးချုပ် လီကာချန်းတက်ရောက်ပေမယ့် မြန်မာ့အကြောင်း လုံး၀ မပြောခဲ့ဘူးလို့ နိုင်ငံတကာ သတင်းတွေက ဖော်ပြနေကြတယ်။

စစ်တပ်က တရုတ်ကို ပစ်ခွာပြီး ရုရှားနဲ့ ပူးပေါင်းဖို့ကြံရွယ်ခဲ့ပေမယ့် ရုရှားက နိုင်ငံရေးအရှုပ်အထွေးတွေမှာ ဝင်ပါချင်ပုံမပေါ်ဘဲ လက်နက်ဖောက်သည်နဲ့ ဆက်ဆံရေးကောင်းထိန်းထားဖို့သာ ရည်ရွယ်ခဲ့တယ်။ ဒီအခြေအနေက စစ်တပ်အနေနဲ့ သံတမန်ရေးမှာ တွက်ကိန်းမှားခဲ့တယ်ပဲ ဆိုရမယ်။

(စိုင်းဝဏ္ဏ ရေးသားသည်)

----------------------

ရန်ကုန်၊ အောက်တိုဘာ ၂၅

(People Media)

ရုရှားနိုင်ငံမှ ဒု-ရေတပ်ဦးစီးချုပ်သည် မနေ့က နံနက်ပိုင်းက လေကြောင်းခရီးဖြင့် မြန်မာနိုင်ငံသို့ ရောက်ရှိ နေပါတယ်။

မြန်မာနိုင်ငံကို ရောက်ရှိလာသည့် ရုရှားနိုင်ငံ ဒု-ရေတပ်ဦးစီးချုပ်သည် မြန်မာ့တပ်မတော်မှ အဆင့်မြင့် အရာရှိများနှင့်လည်း တွေ့ဆုံရန်ရှိကြောင်း သိရပါတယ်။ 

အလားတူ တပ်မတော်ကာကွယ်ရေးဦးစီးချုပ်၊ ဒုတိယတပ်မတော်ကာကွယ်ရေးဦးစီးချုပ်အပါအဝင် တပ်မ တော်မှ အဆင့်မြင့်အရာရှိများ ရုရှားနိုင်ငံ သွားရောက်ခဲ့စဉ်က နှစ်နိုင်ငံ စစ်ဘက်ဆိုင်ရာနည်းပညာပူးပေါင်း ဆောင်ရွက်ရေးသဘောတူညီမှု ရရှိခဲ့တယ်လို့ ရုရှား-မြန်မာ စစ်ဘက်ဆိုင်ရာလေ့လာသူအချို့က ပြောပါတယ်။

ထိုကဲ့သို့ ရုရှား ဒု-ရေတပ်ဦးစီးချုပ် မြန်မာနိုင်ငံခရီးစဉ်နှင့် ပတ်သက်ပြီး တပ်မတော်ဘက်က တစ်စုံတစ်ရာ သတင်းထုတ်ပြန်မှုကို ပြုလုပ်ထားခြင်း မရှိသေးပါဘူး။