ပေါင်မြို့နယ်ကို အနီရောင်အဆင့်သတ်မှတ်ထားပြီး မြို့နယ်တရားရုံးနှင့် ထွေအုပ်ရုံးများ ယာယီပိတ်

ဧရာဝတီတိုင်းမ်

(ပေါင်)၊ ဒီဇင်ဘာလ ၁၇ ရက်

မွန်ပြည်နယ်၊ ပေါင်မြို့နယ်တွင်  ဒီဇင်ဘာလ ၁၅ ရက်နေ့ နေလည်ပိုင်းမှ စတင်ပြီး အနီရောင်အဆင့်သတ်မှတ်ထားသည်ဟုဆိုကာ တရားရုံးနှင့် ထွေအုပ်ရုံးများအား မြို့နယ်အုပ်ချုပ်ရေးအရာရှိများမှ ပိတ်လိုက်ကြောင်း သတင်းရရှိသည်။

မြို့နယ်တရားရုံးနှင့် ထွေအုပ်ရုံးအား စစ်ကောင်စီလက်အောက်ခံ အစိုးရရုံးအရာရှိများမှ အစည်းအဝေးထိုင်ကာ ယာယီပိတ်ထားရန်ဆုံးဖြတ်ချက်ချခဲ့ပြီး မည်သည့်အကြောင်းကြောင့်ရုံးပိတ်ရသည်ကို မသိကြောင်း စစ်ကောင်စီနှင့် နီးစပ်သူတစ်ဦးက ပြောသည်။

"မြို့နယ်ကိုအနီရောင်အဆင့်ဆိုပြီး သတ်မှတ်ပြီးပိတ်လိုက်တယ်လို့ကြားတယ်။ လူကြီးတွေအစည်းဝေးထိုင်ပြီးဆုံးဖြတ်လိုက်တာ။ စစ်တပ်ကနေညွှန်ကြားတာမျိုးလဲမဟုတ်ဘူး။ လက်အောက်ခံဝန်ထမ်းတွေကလည်းပြန်မမေးရဲဘူးလေ သူတို့အထက်အရာရှိကို။ ရုံးပိတ်ပြီ မလာနဲ့ဆိုတာပဲသိတယ်" ဟု စစ်ကောင်စီနှင့် နီးစပ်သူတစ်ဦးက ဧရာဝတီတိုင်းမ်ကိုပြောသည်။

လက်ရှိတွင် မြို့နယ်ရဲစခန်းမှူးမှာလည်း စခန်းတွင် မနေရဲသဖြင့်  ရှောင်တိမ်းနေထိုင်လျှက်ရှိနေပြီး ပေါင်မြို့မရဲစခန်းတွင်လည်းအချုပ်ခန်းစောင့်ရဲတပ်သားအနည်းငယ်သာထားရှိကြောင်း သိရသည်။

"မြို့နယ်မှူးက ညဆိုမော်လမြိုင်မှာသွားအိပ်တာ။ ဒီမှာမနေရဲလို့။ စခန်းမှူးကလည်းပေါင်မြို့ထဲ ဟိုရှောင်အိပ်၊ ဒီရှောင်အိပ်နဲ့၊ ပြောရမယ်ဆို ပေါင်မြို့နယ်ရဲ့အုပ်ချုပ်ရေး ယန္တရားကပျက်နေပြီ" ဟု တော်လှန်ရေးတပ်ဖွဲ့ဝင်တစ်ဦးက ဧရာဝတီတိုင်းမ်ကို ပြောသည်။

မွန်ပြည်နယ်၊ ပေါင်မြို့နယ်တွင် ရဲစခန်းများ၊ ဌာနဆိုင်ရာရုံများ၊ အုပ်ချုပ်ရေးမှူးရုံးများ တိုက်ခိုက်ခံခြင်းများမကြာခဏ ဖြစ်ပွားနေပြီး ဒီဇင်ဘာလ ၁၀ ရက်နေ့ကလည်း ဇင်းကျိုက်နယ်မြေရဲစခန်းမှ နယ်ထိန်း နှင့်ရဲတပ်သားတစ်ဦး ပစ်ခတ်ရှင်းလင်းခြင်းခံခဲ့သေးကြောင်း သိရသည်။