ဖေဖေါ်ဝါရီ ၁ ရက် - အသံတိတ် သပိတ် တိုက်ပွဲကြီး

 နိုင်ငံတကာ သတင်းစာမျက်နှာ များ တွင် မြန်မာပြည်တွင် ပေါ်ထွန်းစ ဒီမိုကရေစီ စနစ်အား ရိုက်ချိုး ဖျက်ဆီးခံလိုက်ရပြီး တနိုင်ငံလုံး ကြိမ်မီးအုန်း သလို ဒုက္ခပင်လယ်ဝေခဲ့ရသည့် နှစ် နှစ်မြောက် အထိမ်း အမှတ် အဖြစ် ပါရှိလာနေချိန် တွင် ဒီမိုကရေစီ တိုက်ပွဲဝင် နေကြသော အင်အားစုများက လည်း အသံတိတ် သပိတ် ဆင်နွှဲရန် နံနက် ၁၀ နာရီ မှ ညနေ ၃ နာရီ အထိ အိမ်ပြင် မထွက်ကြရန် အထွေထွေ သပိတ် ညှိနှိုင်းရေး ကော်မတီ မှ လှုံ့ဆော်လိုက်ပြီ ဖြစ်သည်။

၂၀၂၃ ခုနှစ်တွင် တော်လှန်ရေးကြီး အပြီးသတ် ဆင်နွှဲရန် စိုင်းပြင်းနေကြပြီ ဖြစ်၍ ယခုလို အသံတိတ် သပိတ်ကြီး ဆင်နွှဲခြင်း သည် လွန်စွာ အရေးပါသော နောက်ထပ် ခြေလှမ်းကြီး ဖြစ်သည်။ မြန်မာ အရေး အပေါ် စိတ်ဝင်စားမှု လျော့နည်းလာနေပြီ ဖြစ်သော နိုင်ငံတကာကလည်း မိမိတို့ မြန်မာ ပြည်သူများ သည် စစ်အာဏာရှင် စနစ် ကို မဆုပ်မနစ် ဆက်လက် တိုက်ပွဲဝင်သွားမည်သာ ဖြစ်သည်ဟု ထုတ်ဖေါ်ပြသရာလည်း ရောက်ပေသည်။

၎င်းတို့ လုပ်မည်ဟု ရည်ရွယ်ထားသော ရွေးကောက်ပွဲ ဆိုသည်ကိုလည်း ပြည်သူများက လက်မခံကြောင်း ထုံးတွေ အဖွေးသား ကြားမှထပ်မံ ပြသလိုက်ခြင်းလည်း ဖြစ်သည်။

နိုင်ငံတကာ သည်လည်း စစ်အာဏာရှင်များသည် လက်နက်အားကိုးဖြင့်သာ သက်ဆိုးရှည်နေသူများ ဖြစ်ပြီး ယခုထိ တိုင်းပြည်ကို မည်သို့မျှ အုပ်ချုပ်နိုင်စွမ်း ရှိသူများ မဟုတ်ဟု ထပ်၍ အတည်ပြုနိုင်ပြန်သဖြင့် အရှက်တကွဲ အကျိုးနည်း သွားစေမည့် ထိုးနှက်ချက် ကြီးလည်း ဖြစ်၍ ယခင် အသံတိတ် သပိတ်များထက် ပို၍ လေးနက်ပြီး အနှစ်သာရ ရှိနေသည်။ အထူးသဖြင့် တရုတ် သည် လက်ရှိ အနေအထားတွင် စစ်အာဏာရှင်များ ဖက်မှ လိုလိုလားလား ထောက်ခံပြောဆိုမှု မရှိတော့၍ ထို အနေအထားကို ပို၍ ခိုင်မာအောင် အင်္ဂတေ လောင်းပေးမည့် ပွဲလည်း ဖြစ်သည်။ အာဆီယံ ၏ ဥက္ကဌ အသစ် ဖြစ်လာမည့် အင်ဒိုနီရှား အားလည်း ပြတ်ပြတ်သားသား ဆန့်ကျင်သွားရန် မြန်မာပြည်သူများက mandate အခွင့်အာဏာ ပေးအပ်လိုက်သည့် ပွဲလည်း ဖြစ်သွားပေလိမ့်မည်။

စစ်အာဏာသိမ်း အဖွဲ့သည် ဇန်နဝါရီ ၃၁ ရက်နေ့တွင် ကာလုံ ဆိုသည်ကို တရားမဝင် ခေါ်ယူ ဆွေးနွေးကြမည်ဟု ဆုံးဖြတ်ထားသည်ဟု သတင်းများ ထွက်ပေါ်နေသည်။ မည်သို့ပင် ဆုံးဖြတ်ကြစေကာမူ ထွက်ပေါ်လာမည့် ရလဒ်သည် နိုင်ငံတကာ နှင့် လူထုကို လှည့်ဖျားရန်သာ ဖြစ်၍ မည်သို့မျှ ထူးခြားမည် မဟုတ်သည့် အပြင် အခြေအနေများက အချိန်မရွေး ရုတ်ခြည်း ဆိုသလို ပြောင်းလဲသွား နိုင်ပြန်၍ မိမိတို့ အိမ်တွင်း နေ ကြသည်သာ အကောင်းဆုံး ဟု ယူဆ၍ လည်း ရနေသည်။ ၎င်းတို့အား ထောက်ခံပါသည် ဆိုသော စီတန်း လှည့်လည် ပွဲ များ လည်း ရှိနေပြန်၍ ပြည်သူများကလည်း မိမိတို့ လုပ်နိုင်သည့် ဘောင်အတွင်း မှ တန်ပြန် ဆန္ဒပြကြဖို့သာ ရှိပေတော့သည်။

ဒေါက်တာ တေဇာဆန်း မှ လည်း အကြမ်းဖက် စစ်အုပ်စု မှ အာဏာသိမ်းကာ အရေးပေါ် အခြေအနေ ကျေညာထား ခြင်းသည် ထို့နေ့တွင် ပင် မည်သို့မျှ ရှေ့ဆက်၍ မရတော့ပဲ ကုန်ဆုံး တော့မည် ဖြစ်၍ မည်သို့ပင် ထပ်မံ လှည့်စားစေကာမူ ပြည်သူများက ဆက်လက်ဆန့်ကျင်သွားမည် သာ ဖြစ်သည်ဟု ထုတ်ဖေါ်ပြသရာ ရောက်သဖြင့် တနိုင်ငံလုံး တစိတ်တဝမ်းတည်း စည်းလုံးညီညွတ်စွာ ပါဝင်သွားကြဖို့ တိုက်တွန်း နှိုးဆော် ထားခဲ့သည်။

လက်ရှိ အချိန်အထိ စစ်အာဏာရှင် စနစ် ကို ရိုက်ချိုးရန် တွန်းလှန်ရင်း ကျဆုံးသွားခဲ့သည့် ပြည်သူ ၂,၈၉၀ နှင့် ဖမ်းဆီးခံထားရသူ ၁၇,၄၀၀ ဦး ရှိနေပြီ ဖြစ်၍ ၎င်းတို့ ၏ သွေးများ မြေခခဲ့ရသည်မှာ အလဟသ မဟုတ်၊ မိမိတို့ အမြဲတစေ အောင်မေ့ အမှတ်တရ ရှိနေကြောင်း ငါးနာရီ ခန့် အိမ်ထဲက အိမ်ပြင် မထွက်ကြပဲ ပြသနိုင်ခွင့် ရရှိကြဦးမည် ဖြစ်သည် မဟုတ်ပါလား။

ပြည်သူတို့၏ ခုခံ တွန်းလှန်စစ် မုချအောင်ရမည်!!!