မြန်မာစစ်ကောင်စီအပေါ် ပိတ်ဆို့အရေးယူမှုကို ဂျပန်က ထောက်ခံဖို့ အချိန်တန်ပြီ

By Japan Forward (Editorial) By Japan Forward (Editorial)

ခေတ်သစ်မီဒီယာ
မြန်မာအကြမ်းဖက် စစ်ကောင်စီသည် တွေ့ဆုံဆွေးနွေးရေး တောင်းဆိုမှုများကို လိုက်လျောနားထောင်ခြင်း မရှိပေ။ ယခုအချိန်အထိ သေဆုံးသူ သို့မဟုတ် ဖမ်းဆီးထိန်းသိမ်းခံရသူ အရေအတွက် ထောင်နှင့်ချီ ရှိလာခဲ့ပြီးလူဦးရေ ၁ သန်းမှာလည်း နေရပ်စွန့်ခွာထွက်ပြေးနေကြရသည်။
-------------------
မြန်မာနိုင်ငံတွင် စစ်တပ်ကအာဏာသိမ်းယူပြီး နိုင်ငံကိုထိန်းချုပ်ခဲ့သည်မှာ ယခုအခါ နှစ်နှစ်တင်းတင်း ပြည့်မြောက်ခဲ့ပေပြီ။ မြန်မာနိုင်ငံသား အများအပြား သေကြေပျက်စီးခဲ့ရသလို လွတ်လပ်မှုများ ဆုံးရှုံးခဲ့ကြရသည်။အချို့မှာမူ အတင်းအကြပ် ဖိအားပေးမှုကြောင့် နိုင်ငံကို စွန့်ခွာထွက်ပြေးခဲ့ကြရသည်။ “အာရှတိုက်၏ နောက်ဆုံးတိုးတက်မှုအလားအ

လာ"ဟု အမျှော်လင့်ကြီး မျှော်လင့်ထားခဲ့သော မြန်မာ့ဈေးကွက်စီးပွားရေးမှာလည်း ရှေ့မတိုးသာဘဲ နောက်ပြန်ဆုတ်လာခဲ့သည်။
သို့တိုင်အောင်လည်း စစ်ကောင်စီ၏ ဖိနှိပ်မှုများကြားမှ ပြည်သူတို့က ဆက်လက်တော်လှန် အံတုနေကြဆဲပင်။အချို့သော ဒီမိုကရေစီရေး တက်ကြွလှုပ်ရှားသူများသည် တိုင်းရင်းသားလူနည်းစုတို့၏ လက်နက်ကိုင်တော်လှန်ရေးတွင် ပူးပေါင်းပါဝင်လာကြသည်။ စစ်ကောင်စီ၌ တရားဝင်မှုမရှိသလို လူထုထောက်ခံမှုလည်း ကင်းမဲ့နေကြောင်း လွန်ခဲ့သော နှစ်နှစ်တာကာလက ထပ်လောင်းသက်သေထူလျက် ရှိသည်။ 
တွေ့ဆုံဆွေးနွေးရေးကို ဂျပန်အစိုးရကတောက်လျှောက်အလေးထား ပြောဆိုနေခဲ့သည်။ ထို့သို့ပြောဆိုနေမည့်အစား ၎င်းတို့သည် အမေရိကန်ပြည်ထောင်စုနှင့် ဥရောပနိုင်ငံများနှင့် ပူးပေါင်း၍ မြန်မာစစ်ကောင်စီအားအထီးကျန်ဖြစ်စေရေး လမ်းကြောင်းကို လျှောက်လှမ်းသင့်သည်။
ယခုဖေဖော်ဝါရီလသည် မြန်မာနိုင်ငံအတွက် သမိုင်းမှတ်တိုင်တစ်ခု ဖြစ်လာမည့် လတစ်လဖြစ်သည်။အကြောင်းရင်းမှာ တိုင်းပြည်ကို အလုံးစုံထိန်းချုပ်ရန်အတွက် စစ်တပ်က တရားမဝင် ယူငင်သုံးစွဲခဲ့သော  နိုင်ငံ့ဖွဲ့စည်းပုံအခြေခံဥပဒေပါ အရေးပေါ်အခြေအနေ ပြဋ္ဌာန်းခွင့်သည် ၂ နှစ်အထိ သက်တမ်းရှိနေပြီး အဆိုပါကာလသည် ယခုဖေဖော်ဝါရီလ၌ ကုန်ဆုံးခဲ့ပြီ ဖြစ်သောကြောင့် ဖြစ်သည်။ 
သို့ရာတွင် ဖေဖော်ဝါရီ ၁ ရက်နေ့ အရောက်တွင် လက်ရှိလုံခြုံရေး အခြေအနေများကို အကြောင်း

ပြ၍ အရေးပေါ်ကာလကို နောက်ထပ် ၆ လ သက်တမ်းတိုးလိုက်ကြောင်း စစ်တပ်က ကြေညာခဲ့သည်။အကျိုးဆက်အနေဖြင့်စစ်တပ်က ဩဂုတ်လတွင် ကျင်းပရန် စီစဥ်နေသော အထွေထွေရွေးကောက်ပွဲများကို အမှန်တကယ် ကျင်းပဖြစ်ရန်မှာလည်း အလှမ်းကွာဝေးသွားခဲ့ရပြီ ဖြစ်သည်။ 
မည်သို့ပင်ဆိုစေ ဒီမိုကရေစီခေါင်းဆောင် ဒေါ်အောင်ဆန်းစုကြည်အား စုစုပေါင်း ထောင်ဒဏ် ၃၃နှစ် ပြစ်ဒဏ်ချမှတ်ကာ ဘေးဖယ်ထုတ်ပြီးမှ ကျင်းပမည့် အဆိုပါရွေးကောက်ပွဲတွင် တရားမျှတမှုရှိမည်ကိုမျှော်လင့်၍ မရနိုင်သည်မှာ ပြောစရာမလိုအောင် ထင်ရှားနေသည့်အချက်ဖြစ်သည်။

လူ့အသက်ဆုံးရှုံးမှုနှင့် ထိခိုက်ဒဏ်ရာရမှု
===============
စစ်ကောင်စီ၏ ဖြိုခွဲနှိမ်နှင်းမှုကြောင့် ဇန်နဝါရီလ ၃၁ ရက်အထိ လူ ၂,၉၄၀ ဦးသေဆုံးခဲ့ပြီး ၁၃,၇၆၃ ဦး ဖမ်းဆီးထိန်းသိမ်းခံထားရပြီး ဖြစ်ကြောင်း မြန်မာလူ့အခွင့်အရေး အဖွဲ့များက ဆိုသည်။ ထို့အပြင် လူဦးရေ ၁ သန်းကျော်မှာ ယခုအခါ ဒုက္ခသည်ဘဝသို့ ရောက်ရှိသွားကြပြီဖြစ်သည်။
ထိုသို့သော အခြေအနေတွင် ဂျပန်နိုင်ငံ၏ တုံ့ပြန်ဆောင်ရွက်မှုမှာ စိတ်ပျက်စရာကောင်းလှသည်။ အကြမ်းဖက်မှုများကို ချက်ချင်းရပ်ဆိုင်းရန် ဂျပန်က တောင်းဆိုခဲ့သည်။ သို့သော် အနောက်နိုင်ငံများတွင် မရှိသည့် စစ်တပ်နှင့်ဆွေးနွေးရေးလမ်းကြောင်း တစ်ခုကို မိမိတို့ဖွင့်လှစ်ထားသည်ဟု အကြောင်းပြလျက် ဂျပန်နိုင်ငံသည် မြန်မာနိုင်ငံအပေါ် ပိတ်ဆို့အရေးယူမှု များနှင့် ခပ်ခွာခွာနေခဲ့သည်။ သို့တိုင်အောင်လည်း မြန်မာစစ်အုပ်စုသည် ဂျပန်နိုင်ငံ၏သဘောထားအသံကို အလေးထား နားထောင်သည့် အခြေအနေမျိုးကား မတွေ့ရှိရပေ။
"ကုလသမဂ္ဂအဖွဲ့ဝင် နိုင်ငံများအကြား မဟာမိတ်ဖွဲ့ပြီး မြန်မာနိုင်ငံအပေါ် မဟာဗျူဟာကျကျ ပူးပေါင်း၍ ပိတ်ဆို့အရေးယူမှုများချမှတ်ရန်" မြန်မာ့လူ့အခွင့်အရေးဆိုင်ရာ ကုလသမဂ္ဂ၏ အထူးအစီရင်ခံစာ တင်သွင်းသူ Thomas Andrews က ၎င်း၏အစီအရင်ခံစာထဲတွင် တင်ပြတောင်းဆို ထားသည်။ 
မြန်မာနိုင်ငံအပေါ် လက်ရှိပိတ်ဆို့အရေးယူမှုများသည် ရုရှားအပေါ် ချမှတ်သည့် အရေးယူမှုများလောက် ထိရောက်မှုမရှိကြောင်း ၎င်းကထောက်ပြသည်။ မြန်မာစစ်ကောင်စီအပေါ် ပိတ်ဆို့မှုများ ချမှတ်ပြဋ္ဌာန်းရေး ဂျပန်နိုင်ငံအနေဖြင့် "ချက်ချင်းအရေးယူဆောင်ရွက်ရန်" ကိုလည်း ၎င်း၏အစီရင်ခံစာထဲတွင် ထည့်သွင်းတောင်းဆိုခဲ့သည်။
ဂျပန်နိုင်ငံအနေနှင့် အထူးစိုးရိမ်မကင်းဖြစ်မိကြောင်း ကက်ဘိနက် အတွင်းဝန်ချုပ် Hirokazu Matsuno က ပြောကြားသည်။ "မြန်မာစစ်တပ်ဟာ နိုင်ငံတကာ 
အသိုင်းအဝိုင်းရဲ့ အသံတွေကို နားမထောင်ဘဲ အကြမ်းဖက်မှုများကိုအဆုံးသတ်မယ့် လက္ခဏာလည်း မတွေ့ရပါဘူး" ဟု ဖေဖော်ဝါရီလ ၁ရက် သတင်းစာရှင်းလင်းပွဲတွင် ၎င်းကမှတ်ချက်ပြု ပြောဆိုသည်။
သို့ရာတွင် လက်ရှိအခြေအနေကို စိုးရိမ်မကင်းဖြစ်သည် ဆိုရုံမျှဖြင့် ပြဿနာကိုဖြေရှင်းနိုင်မည် မဟုတ်ပေ။နိုင်ငံတကာ အသိုင်းအဝိုင်း အများစုသည် ယူကရိန်းနိုင်ငံအား ရုရှား၏ကျူးကျော်တိုက်ခိုက်မှု အပေါ်တွင်သာအာရုံစိုက်နေကြသည်။ သို့သော် မြန်မာ့အရေးကို လျစ်လျူရှုထားမည်ဆိုပါက တရုတ်နှင့်ရုရှားကဲ့သို့ အာဏာရှင်နိုင်ငံများကို အားပေးအားမြှောက်ပြုရာ ရောက်ပေလိမ့်မည်။ တရုတ်နှင့် ရုရှား နှစ်နိုင်ငံစလုံးမှာလည်း မြန်မာစစ်ကောင်စီကို ထောက်ခံသည့် နိုင်ငံများအဖြစ် ထင်ရှားသည်။ 
G 7 အုပ်စု၏ လက်ရှိဥက္ကဋ္ဌ တာဝန်ကို ရယူထားသော ဂျပန်နိုင်ငံအနေဖြင့် အမေရိကန်ပြည်ထောင်စုနှင့် ဥရောပနိုင်ငံများနည်းတူ မြန်မာနိုင်ငံအပေါ် ပိတ်ဆို့အရေးယူမှုများ အလားတူ ချမှတ်ဆောင်ရွက်ရန် အလေးထား စဉ်းစားသင့်နေပြီ ဖြစ်သည်။
Japan Forward တွင် အယ်ဒီတာအာဘော်အဖြစ် ဖော်ပြထားသော “Time for Japan to Support Sanctions on the Junta” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်သည်။