မအူပင်မြို့တွင် ဒုဗိုလ်မှူးကြီးနိုင်လွင်က စပါးပွဲစားတစ်ဦးထံမှ ကျပ်သိန်း ၁၀၀ နီးပါး လာဘ်စားကာ ရွှေတောင်ပေါ်ကျေးရွာအုပ်ချုပ်ရေးမှူး အသစ်အဖြစ်ခန့်အပ်
နွေဦးမောင် /ဧရာဝတီတိုင်းမ်
(မအူပင်)၊ ဖေဖော်ဝါရီလ ၇ ရက်
ဧရာဝတီတိုင်း၊ မအူပင်မြို့နယ် ရွှေတောင်ပေါ်ကျေးရွာတွင် အုပ်ချုပ်ရေးမှူး အသစ်က အုပ်ချုပ်ရေးမှူး ရာထူးရရေးအတွက် G1 ဒုတိယဗိုလ်မှူးကြီး နိုင်လွင်အား ကျပ်သိန်း ၁၀၀ နီးပါး ပေးခဲ့ရကြောင်း သိရသည်။
ရွှေတောင်ပေါ် ကျေးရွာတွင် တာဝန်ထမ်းဆောင်နေဆဲဖြစ်သည့် ကျေးရွာအုပ်ချုပ်ရေးမှုး အောင်မင်းနိုင်ကို ရာထူးမှဖြုတ်ချပြီနောက် စပါးပွဲစားတစ်ဦးမှာ ၎င်းအုပ်ချုပ်ရေးမှူး ရာထူးရရေးအတွက် စစ်ကောင်စီတပ်မှ ဒုတိယဗိုလ်မှူးကြီးနိုင်လွင်ထံ ငွေကျပ် ၉၅ သိန်းပေးခဲ့ရကြောင်း စစ်ကောင်စီနှင့် နီးစပ်သူများက ပြောသည်။
"ထောင်က ထွက်လာတဲ့ စပါးပွဲစားတစ်ယောက်ကို အသစ်ခန့်မှာ။ သူ့ကို မြို့နယ်စီမံအုပ်ချုပ်ရေးကောင်စီက ဒုတိယ မြို့နယ်အုပ်ချုပ်ရေးမှုး ဇင်ဝိုင်းသက်ဦးဆိုသူက ခလရ (၂၇)တပ်ရင်းထဲ ခေါ်သွားပြီး G1 နိုင်လွင်ဆိုသူနှင့်တွေ့ပေးပြီး ပိုက်ဆံပေးခဲ့တာ" ဟု စစ်ကောင်စီနှင့် နီးစပ်သူတစ်ဦးက ဧရာဝတီတိုင်းမ်ကို ပြောသည်။
ဒုတိယဗိုလ်မှူးကြီး နိုင်လွင်အား လာဘ်ထိုး၍ အုပ်ချုပ်ရေးမှူးရာထူးရယူခဲ့သူမှာ ရွှေတောင်မှော်ကျေးရွာမှာ စပါးပွဲတစ်ဦးဖြစ်ပြီး ၎င်းမှာ အာဏာသိမ်းပြီး ၃ လအကြာတွင် နိုင်ငံရေးပုဒ်မဖြင့် ဖမ်းဆီးထိန်းသိမ်းခံထားရပြီးနောက် ပြန်လည်လွတ်မြောက်လာသူဖြစ်ကြောင်း ဒေသခံများက ပြောသည်။
ဧရာဝတီတိုင်း စစ်ကောင်စီနှင့် နီးစပ်သူများ၏ ပြောဆိုချက်များအရ တိုင်းအတွင်း ရပ်ကွက်နှင့် ကျေးရွာအုပ်ချုပ်ရေးမှူးများကို စစ်မှုထမ်းဟောင်းများ၊ ကြံခိုင်ရေးပါတီဝင်များကိုသာ ခန့်အပ်သွားရန်စီစဥ်နေကြောင်း သိရသည်။
#မအူပင် #ဒုဗိုလ်မှူးကြီး #နိုင်လွင် #စပါးပွဲစား #ကျပ်သိန်း၁၀၀ #လာဘ်စား #ရွှေတောင်ပေါ် #အသစ်အဖြစ်ခန့်အပ်
#Ayeyarwaddy_Times
Comments