ပါကစ္စတန်သို့ အကြမ်းဖက်စစ်တပ်အရာရှိအချို့ သွားရောက်မည်

​ဝယ်ယူထားသော စစ်လက်နက်များစစ်ဆေးရန် 

—People's Spring

အကြမ်းဖက်စစ်တပ်အရာရှိအချို့သည် ဝယ်ယူထားသောလက်နက်များမတင်ပို့မီစစ်ဆေးရန် ပါကစ္စတန်သို့သွားရောက်ရန် စီစဉ်ထားကြောင်း The Defense Post က ဖေဖော်ဝါရီ ၂၄ ရက်တွင်ဖော်ပြသည်။

အကြမ်းဖက်မြန်မာစစ်တပ်သည် ပါကစ္စတန်မြို့တော် အစ္စလမ်ဘတ်မှ ၆၀ မမ၊ ၈၁ မမ မော်တာများ၊ M-79 လောင်ချာများနှင့် လက်နက်ကြီးများကို ဝယ်ယူရန် စီစဉ်ထားကြောင်း Economic Times သတင်းဖော်ပြချက်အရ သိရသည်။

ထို့အပြင် အကြမ်းဖက်စစ်တပ်သည် JF-17 တိုက်လေ ယာဉ်များအတွက် ဝေဟင်မှ မြေပြင်ပစ်ဒုံး ကျည်များကို ပါကစ္စတန်မှ ဝယ်ယူရန်ရှိနေကြောင်း Economic Times က ဆိုသည်။

ပြီးခဲ့သည့် ၂၀၁၅ တွင် အကြမ်းဖက်စစ်တပ်သည် တရုတ်နှင့် ပါကစ္စတန်တို့ ပူးပေါင်းထုတ်လုပ် ထားသော ဘက်စုံသုံးတိုက်လေယာဉ် JF-17 အတွက် အရောင်း အဝယ်စာချုပ် ပထမဆုံးချုပ် ဆိုခဲ့သည်။

ထို့အပြင် တရားမဝင်အာဏာသိမ်းပြီးနောက်ပိုင်း ၂၀၂၁ စက်တင်ဘာတွင် ပါကစ္စတန်စစ်ဘက်ရေးရာကိုယ်စားလှယ်အဖွဲ့သည် မြန်မာနိုင်ငံသို့ လျှို့ဝှက်စွာလာရောက်ခဲ့ပြီး တိုက်လေယာဉ်များပြုပြင်ရေး၊ ထိန်းသိမ်းရေးနှင့် ရေတပ်ခဲယမ်းလက်နက်များတွင် စစ်ရေးပူးပေါင်းဆောင်ရွက်ရန် ကမ်းလှမ်းခဲ့သည်။

ယင်းပါကစ္စတန်စစ်ဘက်ဆိုင်ရာကိုယ်စားလှယ်အဖွဲ့ကို အကြမ်းဖက်စစ်ကောင်စီ ကာကွယ်ရေးဝန်ကြီးက လက်ခံတွေ့ဆုံခဲ့ပြီး နေပြည်တော်သို့ အဆင့်မြှင့်တင်ထားသော JF-17 တိုက်လေယာဉ်များနှင့် ဝေဟင်မှ မြေပြင်ပစ်ဒုံးကျည်များရောင်းချရေး ဆွေးနွေးခဲ့သည်။

၂၀၂၁ ဖေဖော်ဝါရီတွင် ဒီမိုကရေစီနည်းကျရွေးကောက်ခံအစိုးရကို ဖယ်ရှားကာ စစ်တပ်က အာဏာသိမ်းပြီးနောက်ပိုင်း အမေရိကန်၊ ဗြိတိန်၊ ကနေဒါ၊ နယူးဇီးလန်အပါအဝင် အနောက်နိုင်ငံများက မြန်မာနိုင်ငံကို စစ်လက်နက်ပစ္စည်းများ တင်ပို့ရောင်းချမည်မဟုတ်ကြောင်း ကြေညာခဲ့သည်။

သို့သော် တရုတ်၏ တွန်းအားပေးမှုဖြင့် ပါကစ္စတန်သည် အကြမ်းဖက်မြန်မာစစ်တပ်နှင့် စစ်ရေးဆိုင်ရာ ပူးပေါင်းဆောင်ရွက်မှု တိုးချဲ့လာခဲ့သည်။

မကြာသေးမီက ကုလသမဂ္ဂကျွမ်းကျင်သူများ၏ အစီရင်ခံစာအရ တရုတ်သည် အကြမ်းဖက် မြန်မာစစ်တပ်ကို စစ်လက်နက်ပံ့ပိုးနေသော ၃နိုင်ငံတွင် ပါဝင်နေကြောင်း ဖော်ပြသည်။ ကုလသမဂ္ဂလူ့အခွင့်အရေးဆိုင်ရာ အထူးအစီရင်ခံစာတင်သွင်းသူကလည်း တရုတ်သည် အကြမ်းဖက်စစ်တပ်ကို တိုက်လေယာဉ်များနှင့် သံချပ်ကာယာဉ်များကို ပံ့ပိုးပေးသည်ဟု ပြောသည်။

ယင်းသို့ ပံ့ပိုးသောလက်နက်များဖြင့် မြန်မာစစ်တပ်သည် နိုင်ငံတကာဥပဒေများကိုချိုးဖောက်ကာ အရပ်သားများကိုတိုက်ခိုက်မည်ကို တရုတ်အနေဖြင့် သတိပြုရမည်ဖြစ်ကြောင်း ကုလသမဂ္ဂကျွမ်းကျင်သူများ၏ အစီရင်ခံ စာတွင် ဖော်ပြသည်။

အကြမ်းဖက်စစ်တပ်သည် အတိုက်အခံများကို တိုက်ခိုက်ခြင်း၊ အရပ်သားများကို နေရပ်စွန့်ခွာ စေပြီး တိုက်ခိုက်ခြင်းများကို ကျူးလွန်နေကြောင်း စွပ်စွဲခံထားရသည်။

(ရုရှားနိုင်ငံပိုင် Rosoboronexport ကုမ္ပဏီက ရောင်းချသည့် လက်နက်များကို မင်းအောင်လှိုင်ကြည့်ရှု့ခဲ့စဉ်။)

#လူထုနွေဦး

#LuduNwayOo

#People'sSpring

#PS

https://www.ludunwayoo.com

https://www.facebook.com/LuduNwayOo

https://www.instagram.com/ludunwayoo/