​ယူကရိန်းနဲ့ မြန်မာနိုင်ငံကို နှိုင်းယှဉ်ကြည့်ခြင်း။

ယူကရိန်းနိုင်ငံ

ယူကရိန်းအပါအဝင် အရှေ့ဥရောပသည် ရုရှားအုပ်ချုပ်မှုအောက်တွင် နှစ်ပေါင်းများစွာ နေခဲ့ရသည်။ ၁၉၂၂ ခုနှစ်မှ ၁၉၉၁ ခုနှစ်အထိ ယူကရိန်းသည် ရုရှားတို့ကြီးစိုးသည့် ဆိုဗီယက်ယူနီယံထဲတွင် အုပ်ချုပ်ခံအဖြစ် နှစ်ပေါင်း ၆၉ နှစ်ကြာ နေခဲ့ရသည်။ ဆိုဗီယက်ယူနီယံ ပြိုကွဲသွားပြီးနောက် ၁၉၉၁ ခုနှစ်တွင် အရှေ့ဥရောပနိုင်ငံများသည် ရုရှားတို့ သံကွန်ခြာအောက်မှ လွတ်မြောက်ခဲ့ကြပြီး လွတ်လပ်သောနိုင်ငံများ ဖြစ်လာကြသည်။ ရုရှားပြီးလျှင် ယူကရိန်းသည် ဥရောပတွင် အကြီးဆုံးနိုင်ငံဖြစ်ပြီး ရုရှားနှင့် အိမ်နီးချင်းနိုင်ငံအဖြစ် နယ်စပ်အရှည် ၁၄၂၆.၀၇ မိုင် ရှည်လျားပြီး ကုန်းတွင်းမိုင် ၁၂၂၆.၆၁ မိုင်နှင့် ပင်လယ်မိုင် ၁၉၉ မိုင် ထိစပ်လျက်ရှိသည်။ ယူကရိန်းသည် အိမ်နီးချင်းနိုင်ငံများဖြစ်သည့် Belarus, Moldova Poland, Slovakia, Hungary, Romania တို့နှင့် လည်း နယ်နမိတ်ချင်း ထိစပ်နေသည့်အတွက် ရုရှားအတွက် ပထဝီအနေအထားအရ အရေးကြီးသည့် နိုင်ငံဖြစ်နေပေသည်။ ရုရှားတို့က ဘယ်လာရုပ်စ်နှင့် ယူကရိန်းတို့သည် သီးခြားမဟုတ်ဘဲ သူတို့နိုင်ငံပိုင်အဖြစ် မှတ်ယူထားခဲ့ကြသည်။ 

စစ်အေးကာလ ဝါဆောစာချုပ်ဝင်နိုင်ငံများမှာ အယ်ဘေးနီးယား၊ ဘူလ်ဂေးရီးယား၊ ချက်ကိုစလိုဗက်ကီးယား၊ အရှေ့ဂျာမဏီ၊ ဟန်ဂေရီ၊ ပိုလန်၊ ရိုးမေးနီးယားနှင့် ဆိုဗီယက်ယူနီယံတို့ဖြစ်သည်။ ထိုအချိန်က ဆိုဗီယက်ယူနီယံထဲတွင် ယူကရိန်းနှင့် ဘယ်လာရုပ်စ်တို့ ပါဝင်သည်။ ထို့ကြောင့် ရုရှားသမတပူတင်က ယူကရိန်းကို ပြန်လိုချင်နေခဲ့ခြင်းဖြစ်သည်။ 

ရုရှား သမတပူတင်၏ အဓိက စိုးရိမ်ချက်မှာ ယူကရိန်းနိုင်ငံသည် နေတိုးအဖွဲ့ဝင်နိုင်ငံ ဖြစ်သွားမည့်အရေး ဖြစ်သည်။ နေတိုးအဖွဲ့ဝင် ဖြစ်သွားပါက ယူကရိန်းကို ပြန်လည်ရယူရေးမှာ နေတိုးနှင့် ထိပ်တိုက် ရင်ဆိုင်တိုးရမည့် အရေး ဖြစ်လာမည်ဖြစ်သည်။ ထို့ကြောင့် ယူကရိန်းကို သိမ်းပိုက်ရန်အတွက် အကြောင်းရှာသည်။ ယူကရိန်းသည် မိမိနိုင်ငံတွင်းရှိ ရုရှားလူမျိုးများကို လူမျိုးတုံး သတ်ဖြတ်နေသည်။ ထိုအကြောင်းပြချက်ဖြင့် ယူကရိန်းတွင်အခြေချနေထိုင်နေသည့် ရုရှားလူမျိုးများကို ထကြွစေရန် အားပေးပြီး လိုအပ်သည့် လက်နက်ခဲယမ်းများကို ထောက်ပံ့ပေးသည်။ ယူကရိန်း၏ ခရိုင်းမီးယားဒေသတွင် ရုရှားလူမျိုး အများအပြားနေထိုင်ပြီး ၎င်းတို့က ရုရှားနိုင်ငံနှင့် ပူးပေါင်းချင်ကြသည်ကို အကြောင်းပြုပြီး ရုရှားစစ်တပ်က ဝင်ရောက်သိမ်းပိုက်ခဲ့သည်။ ၂၀၁၄ ခုနှစ်၊ မတ်လ ၁၆ ရက်နေ့တွင် အငြင်းပွားဘွယ် လူထုဆန္ဒခံယူပွဲ ပြုလုပ်ပြီး ပြည်သူ ၉၇% က ရုရှားနှင့် ပေါင်းချင်ကြောင်း သဘောထားပေးသည်ဆိုပြီး ရုရှားနိုင်ငံအတွင်း သိမ်းသွင်းခဲ့သည်။ ကုလသမဂ္ဂလုံခြုံရေးကောင်စီတွင် ယင်းကိစ္စကို လက်မခံနိုင်ကြောင်း မဲခွဲရာတွင် ရုရှားတနိုင်ငံတည်းက ကန့်ကွက်မဲပေးပြီး ဗီတိုအာဏာသုံးပြီး ပယ်ချခဲ့သည်။ 

ယူကရိန်း၏ Donetsk (ဒိုနက်ခ်) နှင့်Luhansk (လိုဟန့်စ်) ဒေသတွင် ရုရှားလိုလားသည့် အုပ်စုများက အစိုးရ ဆောက်အအုံများ၊ ရဲစခန်းများကို သိမ်းပိုက်ခဲ့ကြသည်။ တရားမဝင်ဆန္ဒခံယူပွဲ ပြုလုပ်ပြီး ရုရှားနိုင်ငံနှင့် ပူးပေါင်းချင်ကြောင်း ဆန္ဒခံယူပွဲကို ပြုလုပ်ခဲ့ကြသည်။ ထိုအချက်ကို အကြောင်းပြုပြီး ပူတင်က ထိုနေရာတွင် ရုရှားလူမျိုးများ အစုလိုက် အပြုံလိုက် အသတ်ခံနေရသည်ဟု အကြောင်းပြပြီး ထိုဒေသနှစ်ခုကို လွတ်လပ်သော နိုင်ငံများအဖြစ် အသိအမှတ်ပြုသည်ဟု ကြေညာလိုက်ပြီး ထိုနိုင်ငံရှိ ရုရှားနိုင်ငံသားများကို ကာကွယ်ရန်နှင့် ငြိမ်းချမ်းရေး ထိန်းသိမ်းရန် ရုရှားစစ်တပ်ကို လွှတ်လိုက်ခြင်းသာဖြစ်သည်၊ ယူကရိန်းကို ကျူးကျော်ခြင်းမဟုတ်ဟု ဗြောင်လိမ်သည်။ တချိန်တည်း ယူကရိန်းမြို့တော်ကီယက်ဗ် အနားထိ လေထီးတပ်များကို ချပေးပြီး လေဆိပ်များကို သိမ်းပိုက်ခဲ့သည်။ ပူတင်၏ အဓိကရည်မှန်းချက်မှာ ယူကရိန်းကို သူ့အမိန့်နာခံသည့် ရုပ်သေးအစိုးရကို ဖွဲ့စည်းပြီး မိမိ လက်အောက်ခံနိုင်ငံ (ပြည်နယ်) တခုအဖြစ် ထားရှိရေးဖြစ်သည်။ 

မြန်မာနိုင်ငံ

မြန်မာနိုင်ငံတွင် စစ်တပ်မှ ၁၉၆၂ခုနှစ် စစ်အာဏာသိမ်းပြီးနောက် စစ်ခေါင်းဆောင်များသည် စစ်ဝတ်စုံချွတ်လိုက် ခေါင်းပေါင်းဝတ်လိုက်နှင့် တိုင်းပြည်ကို လက်နက်အားကိုး စိုးမိုးအုပ်ချုပ်လာခဲ့ကြသည်။ ၂၀၁၀ တွင် ရွေးကောက်ပွဲပြုလုပ်ပြီး စစ်ဝတ်ချွတ် ဦးသိန်းစိန် အစိုးရတက်လာခဲ့သည်။ သို့ရာတွင် ၂၀၁၅ ခုနှစ်တွင် NLD ပါတီ မှ အနိုင်ရရှိလာပြီးနောက် စစ်အုပ်စိုးမှုမှ အရပ်သားအုပ်စိုးမှုကို ၅၃ နှစ်အကြာတွင် ပြန်လည်ရယူခဲ့သည်။ ယူကရိန်းသည် ရုရှားလက်အောက်မှလွတ်ရန် ၆၉ နှစ်ကြာနေလာပြီးမှ လွတ်မြောက်သော နိုင်ငံဖြစ်လာသော်လည်း ယနေ့အချိန်တွင် ရုရှားလက်အောက်သို့ ပြန်ရောက် ရပေတော့မည်။ မြန်မာနိုင်ငံသည်လည်း စစ်အုပ်စိုးမှုမှ အရပ်သားအုပ်စိုးမှုအောက်တကြိမ်ရောက်ပြီး နောက်တကြိမ်လည်း NLD ပါတီမှအနိုင်ရလာသည့်အခါ မဲမသမာမှုအကြောင်းပြလျက် စစ်တပ်မှအာဏာ ပြန်သိမ်းခဲ့ပြန်သည်။ ပူတင်က ယူကရိန်းသည် ရုရှားပိုင်အဖြစ်သတ်မှတ်သကဲ့သို့ စစ်အုပ်စုသည်လည်း မြန်မာနိုင်ငံကို သူတို့သာ အုပ်ချုပ်ခွင့်ရှိသည်ဟု ထင်မှတ်ယုံကြည်လျက်ရှိသည်။ 

ပူတင်က ယူကရိန်းကိုသိမ်းပိုက်၍ ရုပ်သေးအစိုးရခန့်ထားရန်အတွက် သူတို့သည် ယူကရိန်းကို ဝင်ရောက် ကျူးကျော်ခြင်းမဟုတ်၊ ထိုနိုင်ငံအတွင်း နေထိုင်နေသော သူတို့၏ ရုရှားလူမျိုူးများ အစုလိုက် အသတ်ခံနေရမှုမှ ကယ်တင်ရန်ဖြစ်သည်။ စစ်ဖြစ်နေခြင်းမဟုတ် စစ်ဆင်ရေးသာ လုပ်ခြင်းဖြစ်သည်ဟု အကြောင်းပြသည်။ မင်းအောင်လှိုင်က မဲမသမာမှုကြောင့် အကြောင်းပြပြီး သူတို့အာဏာသိမ်းခြင်း မဟုတ်အာဏာထိန်းခြင်းသာဖြစ်သည် ၂၀၀၈ ခြေဥအရ လုပ်ဆောင်ပိုင်ခွင့်အရ ပြုလုပ်ခြင်းဖြစ်သည်ဟု လိမ်သည်။ ၂၀၀၈ ခြေဥတွင် သမတက အရေးပေါ်ခြေအနေဖြစ်လျှင် အာဏာလွှဲပိုင်ခွင့်ရှိသည်ဟု ဆိုထားသဖြင့် သမတဦးဝင်းမြင့်ကသာ လွှဲစရာအကြောင်း ပေါ်လာလျှင် လွှဲရမည်ဖြစ်သော်လည်း သမတဦးဝင်းမြင့် သဘောတူညီချက် မရဘဲ ဖမ်းဆီးပြီးစစ်တပ်မှ ရွေးပေးထားသည့် ဒုသမတဦးမြင့်ဆွေက အာဏာလွှဲသည့် လုပ်ဇာတ်နှင့်အာဏာကို လိမ်လည်သိမ်းယူရန် ကြိုးစားခဲ့ခြင်းဖြစ်သည်။ထို့နောက် အတုအယောင်ရွေးကောက်ပွဲကို ဖန်တီးပြီး သူတို့တည်ထောင်ထားသည့် ကြံခိုင်ရေးပါတီကို အာဏာရရှိရန် အလိမ်အညာများဖြင့် လုပ်ကြလိမ့်ဦးမည်။ သူတို့ပါတီအနိုင်မရနိုင်ပါက အကြောင်းအမျိုးမျိုးပြလျက် NLD ပါတီကို ဖျက်သိမ်းကောင်း ဖျက်သိမ်းနိုင်သည်။ 

ယူကရိန်းတပ်များသည် ရုရှားတပ်အင်အားကို မယှဉ်နိုင်သော်လည်း ၎င်းတို့ ခုခံတိုက်ခိုက်နေကြသည်။ အမေရိကန်၊ ဥရောပယူနီယံနှင့် ကုလသမဂ္ဂတို့သည် လွတ်လပ်သည့်နိုင်ငံတခုကို မခိုင်လုံသည့်အကြောင်းပြချက်ဖြင့် အင်အားကြီး ရုရှားနိုင်ငံက ဝင်ရောက်သိမ်းပိုက်မှုကို စီးပွားရေးပိတ်ဆို့မှု ပြစ်တင်မှုတို့ဖြင့်သာ လုပ်ဆောင်နိုင်ကြသည်။ ယူကရိန်းအရေးတွင် စစ်ရေးအရ မပါဝင်လိုကြပေ။ 

ထို့အတူ မြန်မာပြည်အရေးကိုလည်း စစ်အကြမ်းဖက်အုပ်စုကို စီးပွားရေးပိတ်ဆို့မှုမှလွဲ၍ ဒီမိုကရေစီအင်အားစုများကို စစ်ရေး အကူအညီပေးမည်မဟုတ်ပေ။ ယူကရိန်းပြည်သူများနှင့် မြန်မာပြည်သူများသည် မိမိပြည်တွင်းအားဖြင့်သာ ကျူးကျော်ရန်စမှုကို တွန်းလှန်ကြရပေမည်။ မိမိကိုယ်မှ တပါးအခြားမရှိချေ။

အချုပ်အားဖြင့် ပူတင်နှင့် မင်းအောင်လှိုင်တို့သည် လူလိမ်များ ဖြစ်ကြပြီး ကမ္ဘာ့အလယ်တွင် မရှက်မကြောက် သူတို့အာဏာရူးမှုအတွက် လူ့အသက်ပေါင်းများစွာကို စတေးရန် ဝန်မလေးသည့် လူယုတ်မာများပင် ဖြစ်ကြသည်။ 

ထွန်းအောင်ကျော် (၇၄မျိုးဆက်)